| Library / Tipiṭaka / තිපිටක • Tipiṭaka / අපදානපාළි • Apadānapāḷi |
49. පංසුකූලවග්‌ගො
49. Paṃsukūlavaggo
1. පංසුකූලසඤ්‌ඤකත්‌ථෙරඅපදානං
1. Paṃsukūlasaññakattheraapadānaṃ
1.
1.
‘‘තිස්‌සො නාමාසි භගවා, සයම්‌භූ අග්‌ගපුග්‌ගලො;
‘‘Tisso nāmāsi bhagavā, sayambhū aggapuggalo;
පංසුකූලං ඨපෙත්‌වාන, විහාරං පාවිසී ජිනො.
Paṃsukūlaṃ ṭhapetvāna, vihāraṃ pāvisī jino.
2.
2.
මණ්‌ඩලග්‌ගං ගහෙත්‌වාන, කානනං පාවිසිං අහං.
Maṇḍalaggaṃ gahetvāna, kānanaṃ pāvisiṃ ahaṃ.
3.
3.
‘‘තත්‌ථද්‌දසං පංසුකූලං, දුමග්‌ගෙ ලග්‌ගිතං තදා;
‘‘Tatthaddasaṃ paṃsukūlaṃ, dumagge laggitaṃ tadā;
චාපං තත්‌ථෙව නික්‌ඛිප්‌ප, සිරෙ කත්‌වාන අඤ්‌ජලිං.
Cāpaṃ tattheva nikkhippa, sire katvāna añjaliṃ.
4.
4.
‘‘පසන්‌නචිත්‌තො සුමනො, විපුලාය ච පීතියා;
‘‘Pasannacitto sumano, vipulāya ca pītiyā;
බුද්‌ධසෙට්‌ඨං සරිත්‌වාන, පංසුකූලං අවන්‌දහං.
Buddhaseṭṭhaṃ saritvāna, paṃsukūlaṃ avandahaṃ.
5.
5.
‘‘ද්‌වෙනවුතෙ ඉතො කප්‌පෙ, පංසුකූලමවන්‌දහං;
‘‘Dvenavute ito kappe, paṃsukūlamavandahaṃ;
දුග්‌ගතිං නාභිජානාමි, වන්‌දනාය ඉදං ඵලං.
Duggatiṃ nābhijānāmi, vandanāya idaṃ phalaṃ.
6.
6.
‘‘කිලෙසා ඣාපිතා මය්‌හං, භවා සබ්‌බෙ සමූහතා;
‘‘Kilesā jhāpitā mayhaṃ, bhavā sabbe samūhatā;
නාගොව බන්‌ධනං ඡෙත්‌වා, විහරාමි අනාසවො.
Nāgova bandhanaṃ chetvā, viharāmi anāsavo.
7.
7.
‘‘ස්‌වාගතං වත මෙ ආසි, මම බුද්‌ධස්‌ස සන්‌තිකෙ;
‘‘Svāgataṃ vata me āsi, mama buddhassa santike;
තිස්‌සො විජ්‌ජා අනුප්‌පත්‌තා, කතං බුද්‌ධස්‌ස සාසනං.
Tisso vijjā anuppattā, kataṃ buddhassa sāsanaṃ.
8.
8.
‘‘පටිසම්‌භිදා චතස්‌සො, විමොක්‌ඛාපි ච අට්‌ඨිමෙ;
‘‘Paṭisambhidā catasso, vimokkhāpi ca aṭṭhime;
ඡළභිඤ්‌ඤා සච්‌ඡිකතා, කතං බුද්‌ධස්‌ස සාසනං’’.
Chaḷabhiññā sacchikatā, kataṃ buddhassa sāsanaṃ’’.
ඉත්‌ථං සුදං ආයස්‌මා පංසුකූලසඤ්‌ඤකො ථෙරො ඉමා ගාථායො
Itthaṃ sudaṃ āyasmā paṃsukūlasaññako thero imā gāthāyo
අභාසිත්‌ථාති.
Abhāsitthāti.
පංසුකූලසඤ්‌ඤකත්‌ථෙරස්‌සාපදානං පඨමං.
Paṃsukūlasaññakattherassāpadānaṃ paṭhamaṃ.
Footnotes:
