| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
பாணகதா²வண்ணனா
Pāṇakathāvaṇṇanā
114. பாணகதா²யங் ஆட²பிதோதி மாதாபிதூஹி இணங் க³ண்ஹந்தேஹி ‘‘யாவ இணதா³னா அயங் தும்ஹாகங் ஸந்திகே ஹோதூ’’தி இணதா³யகானங் நிய்யாதிதோ. அவஹாரோ நத்தீ²தி மாதாபிதூஹி புத்தஸ்ஸ அபரிச்சத்தத்தா மாதாபிதூனஞ்ச அஸந்தகத்தா அவஹாரோ நத்தி². த⁴னங் பன க³தட்டா²னே வட்³ட⁴தீதி இமினா ஆட²பெத்வா க³ஹிதத⁴னங் வட்³டி⁴யா ஸஹ ஆட²பிதபுத்தஹாரகஸ்ஸ கீ³வாதி த³ஸ்ஸிதந்தி வத³ந்தி. தா³ஸஸ்ஸ ஜாதோதி உக்கட்ட²லக்க²ணங் த³ஸ்ஸேதுங் வுத்தங். தா³ஸிகுச்சி²யங் பன அதா³ஸஸ்ஸ ஜாதோபி எத்தே²வ ஸங்க³ஹிதோ . பரதே³ஸதோ பஹரித்வாதி பரதே³ஸவிலும்பகேஹி ராஜசோராதீ³ஹி பஹரித்வா. ஸுக²ங் ஜீவாதி வத³தீதி தெ²ய்யசித்தேன ஸாமிகானங் ஸந்திகதோ பலாபேதுகாமதாய வத³தி, ததா² பன அசிந்தெத்வா காருஞ்ஞேன ‘‘ஸுக²ங் க³ந்த்வா ஜீவா’’தி வத³ந்தஸ்ஸ நத்தி² அவஹாரோ, கீ³வா பன ஹோதி. து³தியபத³வாரேதி யதி³ து³தியபத³ங் அவஸ்ஸங் உத்³த⁴ரிஸ்ஸதி, பி⁴க்கு²ஸ்ஸ ‘‘பலாயித்வா ஸுக²ங் ஜீவா’’தி வசனக்க²ணேயேவ பாராஜிகங். அனாபத்தி பாராஜிகஸ்ஸாதி தஸ்ஸ வசனேன வேக³வட்³ட⁴னே அகதேபி து³க்கடா ந முச்சதீதி த³ஸ்ஸேதி. ‘‘அதி³ன்னங் தெ²ய்யஸங்கா²தங் ஆதி³யெய்யா’’தி (பாரா॰ 89, 91) ஆதா³னஸ்ஸேவ வுத்தத்தா வுத்தபரியாயேன முச்சதீதி.
114. Pāṇakathāyaṃ āṭhapitoti mātāpitūhi iṇaṃ gaṇhantehi ‘‘yāva iṇadānā ayaṃ tumhākaṃ santike hotū’’ti iṇadāyakānaṃ niyyātito. Avahāro natthīti mātāpitūhi puttassa apariccattattā mātāpitūnañca asantakattā avahāro natthi. Dhanaṃ pana gataṭṭhāne vaḍḍhatīti iminā āṭhapetvā gahitadhanaṃ vaḍḍhiyā saha āṭhapitaputtahārakassa gīvāti dassitanti vadanti. Dāsassa jātoti ukkaṭṭhalakkhaṇaṃ dassetuṃ vuttaṃ. Dāsikucchiyaṃ pana adāsassa jātopi ettheva saṅgahito . Paradesato paharitvāti paradesavilumpakehi rājacorādīhi paharitvā. Sukhaṃ jīvāti vadatīti theyyacittena sāmikānaṃ santikato palāpetukāmatāya vadati, tathā pana acintetvā kāruññena ‘‘sukhaṃ gantvā jīvā’’ti vadantassa natthi avahāro, gīvā pana hoti. Dutiyapadavāreti yadi dutiyapadaṃ avassaṃ uddharissati, bhikkhussa ‘‘palāyitvā sukhaṃ jīvā’’ti vacanakkhaṇeyeva pārājikaṃ. Anāpatti pārājikassāti tassa vacanena vegavaḍḍhane akatepi dukkaṭā na muccatīti dasseti. ‘‘Adinnaṃ theyyasaṅkhātaṃ ādiyeyyā’’ti (pārā. 89, 91) ādānasseva vuttattā vuttapariyāyena muccatīti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பாணகதா²வண்ணனா • Pāṇakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பூ⁴மட்ட²கதா²தி³வண்ணனா • Bhūmaṭṭhakathādivaṇṇanā
