| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
பணாமனாக²மாபனாகதா²வண்ணனா
Paṇāmanākhamāpanākathāvaṇṇanā
80. யங் புப்³பே³ லக்க²ணங் வுத்தந்தி ஸம்ப³ந்தோ⁴, ‘‘தேனேவ லக்க²ணேன நிஸ்ஸயந்தேவாஸிகஸ்ஸ ஆபத்தி வேதி³தப்³பா³’’தி பொத்த²கேஸு பாடோ² தி³ஸ்ஸதி, ‘‘ந தேனேவ லக்க²ணேன நிஸ்ஸயந்தேவாஸிகஸ்ஸ ஆபத்தி வேதி³தப்³பா³’’தி ஏவங் பனெத்த² பாடோ² வேதி³தப்³போ³. ஸத்³தி⁴விஹாரிகஸ்ஸ வுத்தலக்க²ணேன நிஸ்ஸயந்தேவாஸிகஸ்ஸ ஆபத்தி ந வேதி³தப்³பா³தி ஏவங் பனெத்த² அத்தோ²பி வேதி³தப்³போ³. அஞ்ஞதா² ‘‘நிஸ்ஸயந்தேவாஸிகேன ஹி யாவ ஆசரியங் நிஸ்ஸாய வஸதி, தாவ ஸப்³ப³ங் ஆசரியவத்தங் காதப்³ப³’’ந்தி இத³ங் விருஜ்ஜெ²ய்ய. இத³ஞ்ஹி வசனங் நிஸ்ஸயந்தேவாஸிகஸ்ஸ அமுத்தனிஸ்ஸயஸ்ஸேவ வத்தங் அகரொந்தஸ்ஸ ஆபத்தீதி தீ³பேதி. தஸ்மா ஸத்³தி⁴விஹாரிகஸ்ஸ யதா²வுத்தவத்தங் அகரொந்தஸ்ஸ நிஸ்ஸயமுத்தகஸ்ஸ அமுத்தகஸ்ஸபி ஆபத்தி, நிஸ்ஸயந்தேவாஸிகஸ்ஸ பன அமுத்தனிஸ்ஸயஸ்ஸேவ ஆபத்தீதி க³ஹேதப்³ப³ங். தேனேவ விஸுத்³தி⁴மக்³கே³பி (விஸுத்³தி⁴॰ 1.41) ஞாதிபலிபோ³த⁴கதா²யங் –
80. Yaṃ pubbe lakkhaṇaṃ vuttanti sambandho, ‘‘teneva lakkhaṇena nissayantevāsikassa āpatti veditabbā’’ti potthakesu pāṭho dissati, ‘‘na teneva lakkhaṇena nissayantevāsikassa āpatti veditabbā’’ti evaṃ panettha pāṭho veditabbo. Saddhivihārikassa vuttalakkhaṇena nissayantevāsikassa āpatti na veditabbāti evaṃ panettha atthopi veditabbo. Aññathā ‘‘nissayantevāsikena hi yāva ācariyaṃ nissāya vasati, tāva sabbaṃ ācariyavattaṃ kātabba’’nti idaṃ virujjheyya. Idañhi vacanaṃ nissayantevāsikassa amuttanissayasseva vattaṃ akarontassa āpattīti dīpeti. Tasmā saddhivihārikassa yathāvuttavattaṃ akarontassa nissayamuttakassa amuttakassapi āpatti, nissayantevāsikassa pana amuttanissayasseva āpattīti gahetabbaṃ. Teneva visuddhimaggepi (visuddhi. 1.41) ñātipalibodhakathāyaṃ –
‘‘ஞாதீதி விஹாரே ஆசரியுபஜ்ஜா²யஸத்³தி⁴விஹாரிகஅந்தேவாஸிகஸமானுபஜ்ஜா²யகஸமானாசரியகா, க⁴ரே மாதா பிதா ப⁴கி³னீ பா⁴தாதி ஏவமாதி³கா. தே கி³லானா இமஸ்ஸ பலிபோ³தா⁴ ஹொந்தி, தஸ்மா ஸோ பலிபோ³தோ⁴ உபட்ட²ஹித்வா தேஸங் பாகதிககரணேன உபச்சி²ந்தி³தப்³போ³. தத்த² உபஜ்ஜா²யோ தாவ கி³லானோ ஸசே லஹுங் ந வுட்டா²தி, யாவஜீவங் படிஜக்³கி³தப்³போ³. ததா² பப்³ப³ஜ்ஜாசரியோ உபஸம்பதா³சரியோ ஸத்³தி⁴விஹாரிகோ உபஸம்பாதி³தபப்³பா³ஜிதஅந்தேவாஸிகஸமானுபஜ்ஜா²யகா ச. நிஸ்ஸயாசரிய உத்³தே³ஸாசரிய நிஸ்ஸயந்தேவாஸிக உத்³தே³ஸந்தேவாஸிகஸமானாசரியகா பன யாவ நிஸ்ஸயஉத்³தே³ஸா அனுபச்சி²ன்னா, தாவ படிஜக்³கி³தப்³பா³’’தி –
‘‘Ñātīti vihāre ācariyupajjhāyasaddhivihārikaantevāsikasamānupajjhāyakasamānācariyakā, ghare mātā pitā bhaginī bhātāti evamādikā. Te gilānā imassa palibodhā honti, tasmā so palibodho upaṭṭhahitvā tesaṃ pākatikakaraṇena upacchinditabbo. Tattha upajjhāyo tāva gilāno sace lahuṃ na vuṭṭhāti, yāvajīvaṃ paṭijaggitabbo. Tathā pabbajjācariyo upasampadācariyo saddhivihāriko upasampāditapabbājitaantevāsikasamānupajjhāyakā ca. Nissayācariya uddesācariya nissayantevāsika uddesantevāsikasamānācariyakā pana yāva nissayauddesā anupacchinnā, tāva paṭijaggitabbā’’ti –
விபா⁴கே³ன வுத்தங். அயஞ்ச விபா⁴கோ³ ‘‘தேனேவ லக்க²ணேன நிஸ்ஸயந்தேவாஸிகஸ்ஸ ஆபத்தி வேதி³தப்³பா³’’தி ஏவங் பாடே² ஸதி ந யுஜ்ஜெய்ய. அயஞ்ஹி பாடோ² ஸத்³தி⁴விஹாரிகஸ்ஸ விய நிஸ்ஸயந்தேவாஸிகஸ்ஸபி யதா²வுத்தவத்தங் அகரொந்தஸ்ஸ நிஸ்ஸயமுத்தகஸ்ஸ அமுத்தகஸ்ஸபி ஆபத்தீதி இமமத்த²ங் தீ³பேதி, தஸ்மா வுத்தனயேனேவெத்த² பாடோ² க³ஹேதப்³போ³.
Vibhāgena vuttaṃ. Ayañca vibhāgo ‘‘teneva lakkhaṇena nissayantevāsikassa āpatti veditabbā’’ti evaṃ pāṭhe sati na yujjeyya. Ayañhi pāṭho saddhivihārikassa viya nissayantevāsikassapi yathāvuttavattaṃ akarontassa nissayamuttakassa amuttakassapi āpattīti imamatthaṃ dīpeti, tasmā vuttanayenevettha pāṭho gahetabbo.
பப்³ப³ஜ்ஜஉபஸம்பத³த⁴ம்மந்தேவாஸிகேஹி பன…பே॰… தாவ வத்தங் காதப்³ப³ந்தி பப்³ப³ஜ்ஜாசரியஉபஸம்பதா³சரியத⁴ம்மாசரியானங்
Pabbajjaupasampadadhammantevāsikehi pana…pe… tāva vattaṃ kātabbanti pabbajjācariyaupasampadācariyadhammācariyānaṃ
ஏதேஹி யதா²வுத்தவத்தங் காதப்³ப³ங். தத்த² யேன ஸிக்கா²பதா³னி தி³ன்னானி, அயங் பப்³ப³ஜ்ஜாசரியோ. யேன உபஸம்பத³கம்மவாசா வுத்தா, அயங் உபஸம்பதா³சரியோ. யோ உத்³தே³ஸங் பரிபுச்ச²ங் வா தே³தி, அயங் த⁴ம்மாசரியோதி வேதி³தப்³ப³ங். ஸேஸமெத்த² உத்தானமேவ.
Etehi yathāvuttavattaṃ kātabbaṃ. Tattha yena sikkhāpadāni dinnāni, ayaṃ pabbajjācariyo. Yena upasampadakammavācā vuttā, ayaṃ upasampadācariyo. Yo uddesaṃ paripucchaṃ vā deti, ayaṃ dhammācariyoti veditabbaṃ. Sesamettha uttānameva.
பணாமனாக²மாபனாகதா²வண்ணனா நிட்டி²தா.
Paṇāmanākhamāpanākathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 20. பணாமனா க²மாபனா • 20. Paṇāmanā khamāpanā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / பணாமனாக²மனாகதா² • Paṇāmanākhamanākathā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பணாமனாக²மாபனாகதா²வண்ணனா • Paṇāmanākhamāpanākathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 20. பணாமனாக²மாபனாகதா² • 20. Paṇāmanākhamāpanākathā
