| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
পণামনাখমাপনাকথাৰণ্ণনা
Paṇāmanākhamāpanākathāvaṇṇanā
৮০. যং পুব্বে লক্খণং ৰুত্তন্তি সম্বন্ধো, ‘‘তেনেৰ লক্খণেন নিস্সযন্তেৰাসিকস্স আপত্তি ৰেদিতব্বা’’তি পোত্থকেসু পাঠো দিস্সতি, ‘‘ন তেনেৰ লক্খণেন নিস্সযন্তেৰাসিকস্স আপত্তি ৰেদিতব্বা’’তি এৰং পনেত্থ পাঠো ৰেদিতব্বো। সদ্ধিৰিহারিকস্স ৰুত্তলক্খণেন নিস্সযন্তেৰাসিকস্স আপত্তি ন ৰেদিতব্বাতি এৰং পনেত্থ অত্থোপি ৰেদিতব্বো। অঞ্ঞথা ‘‘নিস্সযন্তেৰাসিকেন হি যাৰ আচরিযং নিস্সায ৰসতি, তাৰ সব্বং আচরিযৰত্তং কাতব্ব’’ন্তি ইদং ৰিরুজ্ঝেয্য। ইদঞ্হি ৰচনং নিস্সযন্তেৰাসিকস্স অমুত্তনিস্সযস্সেৰ ৰত্তং অকরোন্তস্স আপত্তীতি দীপেতি। তস্মা সদ্ধিৰিহারিকস্স যথাৰুত্তৰত্তং অকরোন্তস্স নিস্সযমুত্তকস্স অমুত্তকস্সপি আপত্তি, নিস্সযন্তেৰাসিকস্স পন অমুত্তনিস্সযস্সেৰ আপত্তীতি গহেতব্বং। তেনেৰ ৰিসুদ্ধিমগ্গেপি (ৰিসুদ্ধি॰ ১.৪১) ঞাতিপলিবোধকথাযং –
80. Yaṃ pubbe lakkhaṇaṃ vuttanti sambandho, ‘‘teneva lakkhaṇena nissayantevāsikassa āpatti veditabbā’’ti potthakesu pāṭho dissati, ‘‘na teneva lakkhaṇena nissayantevāsikassa āpatti veditabbā’’ti evaṃ panettha pāṭho veditabbo. Saddhivihārikassa vuttalakkhaṇena nissayantevāsikassa āpatti na veditabbāti evaṃ panettha atthopi veditabbo. Aññathā ‘‘nissayantevāsikena hi yāva ācariyaṃ nissāya vasati, tāva sabbaṃ ācariyavattaṃ kātabba’’nti idaṃ virujjheyya. Idañhi vacanaṃ nissayantevāsikassa amuttanissayasseva vattaṃ akarontassa āpattīti dīpeti. Tasmā saddhivihārikassa yathāvuttavattaṃ akarontassa nissayamuttakassa amuttakassapi āpatti, nissayantevāsikassa pana amuttanissayasseva āpattīti gahetabbaṃ. Teneva visuddhimaggepi (visuddhi. 1.41) ñātipalibodhakathāyaṃ –
‘‘ঞাতীতি ৰিহারে আচরিযুপজ্ঝাযসদ্ধিৰিহারিকঅন্তেৰাসিকসমানুপজ্ঝাযকসমানাচরিযকা, ঘরে মাতা পিতা ভগিনী ভাতাতি এৰমাদিকা। তে গিলানা ইমস্স পলিবোধা হোন্তি, তস্মা সো পলিবোধো উপট্ঠহিত্ৰা তেসং পাকতিককরণেন উপচ্ছিন্দিতব্বো। তত্থ উপজ্ঝাযো তাৰ গিলানো সচে লহুং ন ৰুট্ঠাতি, যাৰজীৰং পটিজগ্গিতব্বো। তথা পব্বজ্জাচরিযো উপসম্পদাচরিযো সদ্ধিৰিহারিকো উপসম্পাদিতপব্বাজিতঅন্তেৰাসিকসমানুপজ্ঝাযকা চ। নিস্সযাচরিয উদ্দেসাচরিয নিস্সযন্তেৰাসিক উদ্দেসন্তেৰাসিকসমানাচরিযকা পন যাৰ নিস্সযউদ্দেসা অনুপচ্ছিন্না, তাৰ পটিজগ্গিতব্বা’’তি –
‘‘Ñātīti vihāre ācariyupajjhāyasaddhivihārikaantevāsikasamānupajjhāyakasamānācariyakā, ghare mātā pitā bhaginī bhātāti evamādikā. Te gilānā imassa palibodhā honti, tasmā so palibodho upaṭṭhahitvā tesaṃ pākatikakaraṇena upacchinditabbo. Tattha upajjhāyo tāva gilāno sace lahuṃ na vuṭṭhāti, yāvajīvaṃ paṭijaggitabbo. Tathā pabbajjācariyo upasampadācariyo saddhivihāriko upasampāditapabbājitaantevāsikasamānupajjhāyakā ca. Nissayācariya uddesācariya nissayantevāsika uddesantevāsikasamānācariyakā pana yāva nissayauddesā anupacchinnā, tāva paṭijaggitabbā’’ti –
ৰিভাগেন ৰুত্তং। অযঞ্চ ৰিভাগো ‘‘তেনেৰ লক্খণেন নিস্সযন্তেৰাসিকস্স আপত্তি ৰেদিতব্বা’’তি এৰং পাঠে সতি ন যুজ্জেয্য। অযঞ্হি পাঠো সদ্ধিৰিহারিকস্স ৰিয নিস্সযন্তেৰাসিকস্সপি যথাৰুত্তৰত্তং অকরোন্তস্স নিস্সযমুত্তকস্স অমুত্তকস্সপি আপত্তীতি ইমমত্থং দীপেতি, তস্মা ৰুত্তনযেনেৰেত্থ পাঠো গহেতব্বো।
Vibhāgena vuttaṃ. Ayañca vibhāgo ‘‘teneva lakkhaṇena nissayantevāsikassa āpatti veditabbā’’ti evaṃ pāṭhe sati na yujjeyya. Ayañhi pāṭho saddhivihārikassa viya nissayantevāsikassapi yathāvuttavattaṃ akarontassa nissayamuttakassa amuttakassapi āpattīti imamatthaṃ dīpeti, tasmā vuttanayenevettha pāṭho gahetabbo.
পব্বজ্জউপসম্পদধম্মন্তেৰাসিকেহি পন…পে॰… তাৰ ৰত্তং কাতব্বন্তি পব্বজ্জাচরিযউপসম্পদাচরিযধম্মাচরিযানং
Pabbajjaupasampadadhammantevāsikehi pana…pe… tāva vattaṃ kātabbanti pabbajjācariyaupasampadācariyadhammācariyānaṃ
এতেহি যথাৰুত্তৰত্তং কাতব্বং। তত্থ যেন সিক্খাপদানি দিন্নানি, অযং পব্বজ্জাচরিযো। যেন উপসম্পদকম্মৰাচা ৰুত্তা, অযং উপসম্পদাচরিযো। যো উদ্দেসং পরিপুচ্ছং ৰা দেতি, অযং ধম্মাচরিযোতি ৰেদিতব্বং। সেসমেত্থ উত্তানমেৰ।
Etehi yathāvuttavattaṃ kātabbaṃ. Tattha yena sikkhāpadāni dinnāni, ayaṃ pabbajjācariyo. Yena upasampadakammavācā vuttā, ayaṃ upasampadācariyo. Yo uddesaṃ paripucchaṃ vā deti, ayaṃ dhammācariyoti veditabbaṃ. Sesamettha uttānameva.
পণামনাখমাপনাকথাৰণ্ণনা নিট্ঠিতা।
Paṇāmanākhamāpanākathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ২০. পণামনা খমাপনা • 20. Paṇāmanā khamāpanā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / পণামনাখমনাকথা • Paṇāmanākhamanākathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পণামনাখমাপনাকথাৰণ্ণনা • Paṇāmanākhamāpanākathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২০. পণামনাখমাপনাকথা • 20. Paṇāmanākhamāpanākathā
