| Library / Tipiṭaka / තිපිටක • Tipiṭaka / සාරත්‌ථදීපනී-ටීකා • Sāratthadīpanī-ṭīkā |
පණාමනාඛමාපනාකථාවණ්‌ණනා
Paṇāmanākhamāpanākathāvaṇṇanā
80. යං පුබ්‌බෙ ලක්‌ඛණං වුත්‌තන්‌ති සම්‌බන්‌ධො, ‘‘තෙනෙව ලක්‌ඛණෙන නිස්‌සයන්‌තෙවාසිකස්‌ස ආපත්‌ති වෙදිතබ්‌බා’’ති පොත්‌ථකෙසු පාඨො දිස්‌සති, ‘‘න තෙනෙව ලක්‌ඛණෙන නිස්‌සයන්‌තෙවාසිකස්‌ස ආපත්‌ති වෙදිතබ්‌බා’’ති එවං පනෙත්‌ථ පාඨො වෙදිතබ්‌බො. සද්‌ධිවිහාරිකස්‌ස වුත්‌තලක්‌ඛණෙන නිස්‌සයන්‌තෙවාසිකස්‌ස ආපත්‌ති න වෙදිතබ්‌බාති එවං පනෙත්‌ථ අත්‌ථොපි වෙදිතබ්‌බො. අඤ්‌ඤථා ‘‘නිස්‌සයන්‌තෙවාසිකෙන හි යාව ආචරියං නිස්‌සාය වසති, තාව සබ්‌බං ආචරියවත්‌තං කාතබ්‌බ’’න්‌ති ඉදං විරුජ්‌ඣෙය්‍ය. ඉදඤ්‌හි වචනං නිස්‌සයන්‌තෙවාසිකස්‌ස අමුත්‌තනිස්‌සයස්‌සෙව වත්‌තං අකරොන්‌තස්‌ස ආපත්‌තීති දීපෙති. තස්‌මා සද්‌ධිවිහාරිකස්‌ස යථාවුත්‌තවත්‌තං අකරොන්‌තස්‌ස නිස්‌සයමුත්‌තකස්‌ස අමුත්‌තකස්‌සපි ආපත්‌ති, නිස්‌සයන්‌තෙවාසිකස්‌ස පන අමුත්‌තනිස්‌සයස්‌සෙව ආපත්‌තීති ගහෙතබ්‌බං. තෙනෙව විසුද්‌ධිමග්‌ගෙපි (විසුද්‌ධි. 1.41) ඤාතිපලිබොධකථායං –
80. Yaṃ pubbe lakkhaṇaṃ vuttanti sambandho, ‘‘teneva lakkhaṇena nissayantevāsikassa āpatti veditabbā’’ti potthakesu pāṭho dissati, ‘‘na teneva lakkhaṇena nissayantevāsikassa āpatti veditabbā’’ti evaṃ panettha pāṭho veditabbo. Saddhivihārikassa vuttalakkhaṇena nissayantevāsikassa āpatti na veditabbāti evaṃ panettha atthopi veditabbo. Aññathā ‘‘nissayantevāsikena hi yāva ācariyaṃ nissāya vasati, tāva sabbaṃ ācariyavattaṃ kātabba’’nti idaṃ virujjheyya. Idañhi vacanaṃ nissayantevāsikassa amuttanissayasseva vattaṃ akarontassa āpattīti dīpeti. Tasmā saddhivihārikassa yathāvuttavattaṃ akarontassa nissayamuttakassa amuttakassapi āpatti, nissayantevāsikassa pana amuttanissayasseva āpattīti gahetabbaṃ. Teneva visuddhimaggepi (visuddhi. 1.41) ñātipalibodhakathāyaṃ –
‘‘ඤාතීති විහාරෙ ආචරියුපජ්‌ඣායසද්‌ධිවිහාරිකඅන්‌තෙවාසිකසමානුපජ්‌ඣායකසමානාචරියකා, ඝරෙ මාතා පිතා භගිනී භාතාති එවමාදිකා. තෙ ගිලානා ඉමස්‌ස පලිබොධා හොන්‌ති, තස්‌මා සො පලිබොධො උපට්‌ඨහිත්‌වා තෙසං පාකතිකකරණෙන උපච්‌ඡින්‌දිතබ්‌බො. තත්‌ථ උපජ්‌ඣායො තාව ගිලානො සචෙ ලහුං න වුට්‌ඨාති, යාවජීවං පටිජග්‌ගිතබ්‌බො. තථා පබ්‌බජ්‌ජාචරියො උපසම්‌පදාචරියො සද්‌ධිවිහාරිකො උපසම්‌පාදිතපබ්‌බාජිතඅන්‌තෙවාසිකසමානුපජ්‌ඣායකා ච. නිස්‌සයාචරිය උද්‌දෙසාචරිය නිස්‌සයන්‌තෙවාසික උද්‌දෙසන්‌තෙවාසිකසමානාචරියකා පන යාව නිස්‌සයඋද්‌දෙසා අනුපච්‌ඡින්‌නා, තාව පටිජග්‌ගිතබ්‌බා’’ති –
‘‘Ñātīti vihāre ācariyupajjhāyasaddhivihārikaantevāsikasamānupajjhāyakasamānācariyakā, ghare mātā pitā bhaginī bhātāti evamādikā. Te gilānā imassa palibodhā honti, tasmā so palibodho upaṭṭhahitvā tesaṃ pākatikakaraṇena upacchinditabbo. Tattha upajjhāyo tāva gilāno sace lahuṃ na vuṭṭhāti, yāvajīvaṃ paṭijaggitabbo. Tathā pabbajjācariyo upasampadācariyo saddhivihāriko upasampāditapabbājitaantevāsikasamānupajjhāyakā ca. Nissayācariya uddesācariya nissayantevāsika uddesantevāsikasamānācariyakā pana yāva nissayauddesā anupacchinnā, tāva paṭijaggitabbā’’ti –
විභාගෙන වුත්‌තං. අයඤ්‌ච විභාගො ‘‘තෙනෙව ලක්‌ඛණෙන නිස්‌සයන්‌තෙවාසිකස්‌ස ආපත්‌ති වෙදිතබ්‌බා’’ති එවං පාඨෙ සති න යුජ්‌ජෙය්‍ය. අයඤ්‌හි පාඨො සද්‌ධිවිහාරිකස්‌ස විය නිස්‌සයන්‌තෙවාසිකස්‌සපි යථාවුත්‌තවත්‌තං අකරොන්‌තස්‌ස නිස්‌සයමුත්‌තකස්‌ස අමුත්‌තකස්‌සපි ආපත්‌තීති ඉමමත්‌ථං දීපෙති, තස්‌මා වුත්‌තනයෙනෙවෙත්‌ථ පාඨො ගහෙතබ්‌බො.
Vibhāgena vuttaṃ. Ayañca vibhāgo ‘‘teneva lakkhaṇena nissayantevāsikassa āpatti veditabbā’’ti evaṃ pāṭhe sati na yujjeyya. Ayañhi pāṭho saddhivihārikassa viya nissayantevāsikassapi yathāvuttavattaṃ akarontassa nissayamuttakassa amuttakassapi āpattīti imamatthaṃ dīpeti, tasmā vuttanayenevettha pāṭho gahetabbo.
පබ්‌බජ්‌ජඋපසම්‌පදධම්‌මන්‌තෙවාසිකෙහි පන…පෙ.… තාව වත්‌තං කාතබ්‌බන්‌ති පබ්‌බජ්‌ජාචරියඋපසම්‌පදාචරියධම්‌මාචරියානං
Pabbajjaupasampadadhammantevāsikehi pana…pe… tāva vattaṃ kātabbanti pabbajjācariyaupasampadācariyadhammācariyānaṃ
එතෙහි යථාවුත්‌තවත්‌තං කාතබ්‌බං. තත්‌ථ යෙන සික්‌ඛාපදානි දින්‌නානි, අයං පබ්‌බජ්‌ජාචරියො. යෙන උපසම්‌පදකම්‌මවාචා වුත්‌තා, අයං උපසම්‌පදාචරියො. යො උද්‌දෙසං පරිපුච්‌ඡං වා දෙති, අයං ධම්‌මාචරියොති වෙදිතබ්‌බං. සෙසමෙත්‌ථ උත්‌තානමෙව.
Etehi yathāvuttavattaṃ kātabbaṃ. Tattha yena sikkhāpadāni dinnāni, ayaṃ pabbajjācariyo. Yena upasampadakammavācā vuttā, ayaṃ upasampadācariyo. Yo uddesaṃ paripucchaṃ vā deti, ayaṃ dhammācariyoti veditabbaṃ. Sesamettha uttānameva.
පණාමනාඛමාපනාකථාවණ්‌ණනා නිට්‌ඨිතා.
Paṇāmanākhamāpanākathāvaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi / 20. පණාමනා ඛමාපනා • 20. Paṇāmanā khamāpanā
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / පණාමනාඛමනාකථා • Paṇāmanākhamanākathā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / පණාමනාඛමාපනාකථාවණ්‌ණනා • Paṇāmanākhamāpanākathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 20. පණාමනාඛමාපනාකථා • 20. Paṇāmanākhamāpanākathā
