| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
6. பாணஸுத்தங்
6. Pāṇasuttaṃ
1106. ‘‘ஸெய்யதா²பி, பி⁴க்க²வே, புரிஸோ யங் இமஸ்மிங் ஜம்பு³தீ³பே திணகட்ட²ஸாகா²பலாஸங் தச்செ²த்வா ஏகஜ்ஜ²ங் ஸங்ஹரெய்ய; ஏகஜ்ஜ²ங் ஸங்ஹரித்வா ஸூலங் கரெய்ய. ஸூலங் கரித்வா யே மஹாஸமுத்³தே³ மஹந்தகா பாணா தே மஹந்தகேஸு ஸூலேஸு ஆவுனெய்ய, யே மஹாஸமுத்³தே³ மஜ்ஜி²மகா பாணா தே மஜ்ஜி²மகேஸு ஸூலேஸு ஆவுனெய்ய, யே மஹாஸமுத்³தே³ ஸுகு²மகா பாணா தே ஸுகு²மகேஸு ஸூலேஸு ஆவுனெய்ய. அபரியாதி³ன்னா ச, பி⁴க்க²வே, மஹாஸமுத்³தே³ ஓளாரிகா பாணா அஸ்ஸு.
1106. ‘‘Seyyathāpi, bhikkhave, puriso yaṃ imasmiṃ jambudīpe tiṇakaṭṭhasākhāpalāsaṃ tacchetvā ekajjhaṃ saṃhareyya; ekajjhaṃ saṃharitvā sūlaṃ kareyya. Sūlaṃ karitvā ye mahāsamudde mahantakā pāṇā te mahantakesu sūlesu āvuneyya, ye mahāsamudde majjhimakā pāṇā te majjhimakesu sūlesu āvuneyya, ye mahāsamudde sukhumakā pāṇā te sukhumakesu sūlesu āvuneyya. Apariyādinnā ca, bhikkhave, mahāsamudde oḷārikā pāṇā assu.
‘‘அத² இமஸ்மிங் ஜம்பு³தீ³பே திணகட்ட²ஸாகா²பலாஸங் பரிக்க²யங் பரியாதா³னங் க³ச்செ²ய்ய. இதோ ப³ஹுதரா கோ², பி⁴க்க²வே, மஹாஸமுத்³தே³ ஸுகு²மகா பாணா, யே ந ஸுகரா ஸூலேஸு ஆவுனிதுங். தங் கிஸ்ஸ ஹேது? ஸுகு²மத்தா , பி⁴க்க²வே, அத்தபா⁴வஸ்ஸ. ஏவங் மஹா கோ², பி⁴க்க²வே, அபாயோ. ஏவங் மஹந்தஸ்மா கோ², பி⁴க்க²வே, அபாயஸ்மா பரிமுத்தோ தி³ட்டி²ஸம்பன்னோ புக்³க³லோ ‘இத³ங் து³க்க²’ந்தி யதா²பூ⁴தங் பஜானாதி…பே॰… ‘அயங் து³க்க²னிரோத⁴கா³மினீ படிபதா³’தி யதா²பூ⁴தங் பஜானாதி.
‘‘Atha imasmiṃ jambudīpe tiṇakaṭṭhasākhāpalāsaṃ parikkhayaṃ pariyādānaṃ gaccheyya. Ito bahutarā kho, bhikkhave, mahāsamudde sukhumakā pāṇā, ye na sukarā sūlesu āvunituṃ. Taṃ kissa hetu? Sukhumattā , bhikkhave, attabhāvassa. Evaṃ mahā kho, bhikkhave, apāyo. Evaṃ mahantasmā kho, bhikkhave, apāyasmā parimutto diṭṭhisampanno puggalo ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti.
‘‘தஸ்மாதிஹ, பி⁴க்க²வே, ‘இத³ங் து³க்க²’ந்தி யோகோ³ கரணீயோ…பே॰… ‘அயங் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. ச²ட்ட²ங்.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Chaṭṭhaṃ.
