| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৬. পাণসুত্তং
6. Pāṇasuttaṃ
১১০৬. ‘‘সেয্যথাপি, ভিক্খৰে, পুরিসো যং ইমস্মিং জম্বুদীপে তিণকট্ঠসাখাপলাসং তচ্ছেত্ৰা একজ্ঝং সংহরেয্য; একজ্ঝং সংহরিত্ৰা সূলং করেয্য। সূলং করিত্ৰা যে মহাসমুদ্দে মহন্তকা পাণা তে মহন্তকেসু সূলেসু আৰুনেয্য, যে মহাসমুদ্দে মজ্ঝিমকা পাণা তে মজ্ঝিমকেসু সূলেসু আৰুনেয্য, যে মহাসমুদ্দে সুখুমকা পাণা তে সুখুমকেসু সূলেসু আৰুনেয্য। অপরিযাদিন্না চ, ভিক্খৰে, মহাসমুদ্দে ওল়ারিকা পাণা অস্সু।
1106. ‘‘Seyyathāpi, bhikkhave, puriso yaṃ imasmiṃ jambudīpe tiṇakaṭṭhasākhāpalāsaṃ tacchetvā ekajjhaṃ saṃhareyya; ekajjhaṃ saṃharitvā sūlaṃ kareyya. Sūlaṃ karitvā ye mahāsamudde mahantakā pāṇā te mahantakesu sūlesu āvuneyya, ye mahāsamudde majjhimakā pāṇā te majjhimakesu sūlesu āvuneyya, ye mahāsamudde sukhumakā pāṇā te sukhumakesu sūlesu āvuneyya. Apariyādinnā ca, bhikkhave, mahāsamudde oḷārikā pāṇā assu.
‘‘অথ ইমস্মিং জম্বুদীপে তিণকট্ঠসাখাপলাসং পরিক্খযং পরিযাদানং গচ্ছেয্য। ইতো বহুতরা খো, ভিক্খৰে, মহাসমুদ্দে সুখুমকা পাণা, যে ন সুকরা সূলেসু আৰুনিতুং। তং কিস্স হেতু? সুখুমত্তা , ভিক্খৰে, অত্তভাৰস্স। এৰং মহা খো, ভিক্খৰে, অপাযো। এৰং মহন্তস্মা খো, ভিক্খৰে, অপাযস্মা পরিমুত্তো দিট্ঠিসম্পন্নো পুগ্গলো ‘ইদং দুক্খ’ন্তি যথাভূতং পজানাতি…পে॰… ‘অযং দুক্খনিরোধগামিনী পটিপদা’তি যথাভূতং পজানাতি।
‘‘Atha imasmiṃ jambudīpe tiṇakaṭṭhasākhāpalāsaṃ parikkhayaṃ pariyādānaṃ gaccheyya. Ito bahutarā kho, bhikkhave, mahāsamudde sukhumakā pāṇā, ye na sukarā sūlesu āvunituṃ. Taṃ kissa hetu? Sukhumattā , bhikkhave, attabhāvassa. Evaṃ mahā kho, bhikkhave, apāyo. Evaṃ mahantasmā kho, bhikkhave, apāyasmā parimutto diṭṭhisampanno puggalo ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti.
‘‘তস্মাতিহ, ভিক্খৰে, ‘ইদং দুক্খ’ন্তি যোগো করণীযো…পে॰… ‘অযং দুক্খনিরোধগামিনী পটিপদা’তি যোগো করণীযো’’তি। ছট্ঠং।
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Chaṭṭhaṃ.
