| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
៦. បាណសុត្តំ
6. Pāṇasuttaṃ
១១០៦. ‘‘សេយ្យថាបិ, ភិក្ខវេ, បុរិសោ យំ ឥមស្មិំ ជម្ពុទីបេ តិណកដ្ឋសាខាបលាសំ តច្ឆេត្វា ឯកជ្ឈំ សំហរេយ្យ; ឯកជ្ឈំ សំហរិត្វា សូលំ ករេយ្យ។ សូលំ ករិត្វា យេ មហាសមុទ្ទេ មហន្តកា បាណា តេ មហន្តកេសុ សូលេសុ អាវុនេយ្យ, យេ មហាសមុទ្ទេ មជ្ឈិមកា បាណា តេ មជ្ឈិមកេសុ សូលេសុ អាវុនេយ្យ, យេ មហាសមុទ្ទេ សុខុមកា បាណា តេ សុខុមកេសុ សូលេសុ អាវុនេយ្យ។ អបរិយាទិន្នា ច, ភិក្ខវេ, មហាសមុទ្ទេ ឱឡារិកា បាណា អស្សុ។
1106. ‘‘Seyyathāpi, bhikkhave, puriso yaṃ imasmiṃ jambudīpe tiṇakaṭṭhasākhāpalāsaṃ tacchetvā ekajjhaṃ saṃhareyya; ekajjhaṃ saṃharitvā sūlaṃ kareyya. Sūlaṃ karitvā ye mahāsamudde mahantakā pāṇā te mahantakesu sūlesu āvuneyya, ye mahāsamudde majjhimakā pāṇā te majjhimakesu sūlesu āvuneyya, ye mahāsamudde sukhumakā pāṇā te sukhumakesu sūlesu āvuneyya. Apariyādinnā ca, bhikkhave, mahāsamudde oḷārikā pāṇā assu.
‘‘អថ ឥមស្មិំ ជម្ពុទីបេ តិណកដ្ឋសាខាបលាសំ បរិក្ខយំ បរិយាទានំ គច្ឆេយ្យ។ ឥតោ ពហុតរា ខោ, ភិក្ខវេ, មហាសមុទ្ទេ សុខុមកា បាណា, យេ ន សុករា សូលេសុ អាវុនិតុំ។ តំ កិស្ស ហេតុ? សុខុមត្តា , ភិក្ខវេ, អត្តភាវស្ស។ ឯវំ មហា ខោ, ភិក្ខវេ, អបាយោ។ ឯវំ មហន្តស្មា ខោ, ភិក្ខវេ, អបាយស្មា បរិមុត្តោ ទិដ្ឋិសម្បន្នោ បុគ្គលោ ‘ឥទំ ទុក្ខ’ន្តិ យថាភូតំ បជានាតិ…បេ.… ‘អយំ ទុក្ខនិរោធគាមិនី បដិបទា’តិ យថាភូតំ បជានាតិ។
‘‘Atha imasmiṃ jambudīpe tiṇakaṭṭhasākhāpalāsaṃ parikkhayaṃ pariyādānaṃ gaccheyya. Ito bahutarā kho, bhikkhave, mahāsamudde sukhumakā pāṇā, ye na sukarā sūlesu āvunituṃ. Taṃ kissa hetu? Sukhumattā , bhikkhave, attabhāvassa. Evaṃ mahā kho, bhikkhave, apāyo. Evaṃ mahantasmā kho, bhikkhave, apāyasmā parimutto diṭṭhisampanno puggalo ‘idaṃ dukkha’nti yathābhūtaṃ pajānāti…pe… ‘ayaṃ dukkhanirodhagāminī paṭipadā’ti yathābhūtaṃ pajānāti.
‘‘តស្មាតិហ, ភិក្ខវេ, ‘ឥទំ ទុក្ខ’ន្តិ យោគោ ករណីយោ…បេ.… ‘អយំ ទុក្ខនិរោធគាមិនី បដិបទា’តិ យោគោ ករណីយោ’’តិ។ ឆដ្ឋំ។
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Chaṭṭhaṃ.
