| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
(9) 4. மசலவக்³கோ³
(9) 4. Macalavaggo
1-6. பாணாதிபாதஸுத்தாதி³வண்ணனா
1-6. Pāṇātipātasuttādivaṇṇanā
81-86. சதுத்த²ஸ்ஸ பட²மாதீ³னி உத்தானத்தா²னேவ. பஞ்சமே (ஸங்॰ நி॰ டீ॰ 1.1.132) ‘‘நீசே குலே பச்சாஜாதோ’’திஆதி³கேன அப்பகாஸபா⁴வேன தமதீதி தமோ, தேன தமேன யுத்தோதி தமோ புக்³க³லோ வுச்சதி. ததா² ஹி தங்யோக³தோ புக்³க³லஸ்ஸ தப்³போ³ஹாரோ யதா² ‘‘மச்சே²ரயோக³தோ மச்ச²ரோ’’தி, தஸ்மா தமோதி அப்பகாஸபா⁴வேன தமோ தமபூ⁴தோ அந்த⁴காரங் விய ஜாதோ, அந்த⁴காரத்தங் வா பத்தோதி அத்தோ². வுத்தலக்க²ணங் தமமேவ பரம்பரதோ அயனங் க³தி நிட்டா² ஏதஸ்ஸாதி தமபராயணோ. உப⁴யேனபி தமக்³க³ஹணேன க²ந்த⁴தமோ கதி²தோ, ந அந்த⁴காரதமோ. க²ந்த⁴தமோதி ச ஸம்பத்திரஹிதா க²ந்த⁴பவத்தியேவ த³ட்ட²ப்³பா³. ‘‘உச்சே குலே பச்சாஜாதோ’’திஆதி³கேன பகாஸபா⁴வேன ஜோதேதீதி ஜோதி, தேன ஜோதினாயுத்தோதிஆதி³ ஸப்³ப³ங் வுத்தனயேன வேதி³தப்³ப³ங். இதரே த்³வேதி ஜோதிதமபராயணோ, ஜோதிஜோதிபராயணோதி இதரே த்³வே புக்³க³லே.
81-86. Catutthassa paṭhamādīni uttānatthāneva. Pañcame (saṃ. ni. ṭī. 1.1.132) ‘‘nīce kule paccājāto’’tiādikena appakāsabhāvena tamatīti tamo, tena tamena yuttoti tamo puggalo vuccati. Tathā hi taṃyogato puggalassa tabbohāro yathā ‘‘maccherayogato maccharo’’ti, tasmā tamoti appakāsabhāvena tamo tamabhūto andhakāraṃ viya jāto, andhakārattaṃ vā pattoti attho. Vuttalakkhaṇaṃ tamameva paramparato ayanaṃ gati niṭṭhā etassāti tamaparāyaṇo. Ubhayenapi tamaggahaṇena khandhatamo kathito, na andhakāratamo. Khandhatamoti ca sampattirahitā khandhapavattiyeva daṭṭhabbā. ‘‘Ucce kule paccājāto’’tiādikena pakāsabhāvena jotetīti joti, tena jotināyuttotiādi sabbaṃ vuttanayena veditabbaṃ. Itare dveti jotitamaparāyaṇo, jotijotiparāyaṇoti itare dve puggale.
வேணுவெத்தாதி³விலீவேஹி பேளபா⁴ஜனாதி³காரகா விலீவகாரகா. மிக³மச்சா²தீ³னங் நிஸாத³னதோ நேஸாதா³, மாக³விகமச்ச²ப³ந்தா⁴த³யோ. ரதே²ஸு சம்மேன நஹணகரணதோ ரத²காரா, சம்மகாரா. புஇதி கரீஸஸ்ஸ நாமங், தங் குஸெந்தி அபனெந்தீதி புக்குஸா, புப்ப²ச²ட்³ட³கா. து³ப்³ப³ண்ணோதி விரூபோ. ஓகோடிமகோதி ஆரோஹாபா⁴வேன ஹெட்டி²மகோ, ரஸ்ஸகாயோதி அத்தோ². தேனாஹ ‘‘லகுண்ட³கோ’’தி. லகு விய க⁴டிகா விய டே³தி பவத்ததீதி லகுண்ட³கோ, ரஸ்ஸோ. கணதி நிமீலதீதி காணோ. தங் பனஸ்ஸ நிமீலனங் ஏகேன அக்கி²னா த்³வீஹிபி வாதி ஆஹ ‘‘ஏகச்சி²காணோ வா உப⁴யச்சி²காணோ வா’’தி. குணனங் குணோ, ஹத்த²வேகல்லங், ஸோ ஏதஸ்ஸ அத்தீ²தி குணீ. க²ஞ்ஜோ வுச்சதி பாத³விகலோ. ஹெட்டி²மகாயஸங்கா²தோ ஸரீரஸ்ஸ பக்கோ² பதே³ஸோ ஹதோ அஸ்ஸாதி பக்க²ஹதோ. தேனாஹ ‘‘பீட²ஸப்பீ’’தி. பதீ³பே பதீ³பனே ஏதப்³ப³ங் நேதப்³ப³ந்தி பதீ³பெய்யங், தேலகபாலாதி³உபகரணங். வுத்தந்தி அட்ட²கதா²யங் வுத்தங்.
Veṇuvettādivilīvehi peḷabhājanādikārakā vilīvakārakā. Migamacchādīnaṃ nisādanato nesādā, māgavikamacchabandhādayo. Rathesu cammena nahaṇakaraṇato rathakārā, cammakārā. Puiti karīsassa nāmaṃ, taṃ kusenti apanentīti pukkusā, pupphachaḍḍakā. Dubbaṇṇoti virūpo. Okoṭimakoti ārohābhāvena heṭṭhimako, rassakāyoti attho. Tenāha ‘‘lakuṇḍako’’ti. Laku viya ghaṭikā viya ḍeti pavattatīti lakuṇḍako, rasso. Kaṇati nimīlatīti kāṇo. Taṃ panassa nimīlanaṃ ekena akkhinā dvīhipi vāti āha ‘‘ekacchikāṇo vā ubhayacchikāṇo vā’’ti. Kuṇanaṃ kuṇo, hatthavekallaṃ, so etassa atthīti kuṇī. Khañjo vuccati pādavikalo. Heṭṭhimakāyasaṅkhāto sarīrassa pakkho padeso hato assāti pakkhahato. Tenāha ‘‘pīṭhasappī’’ti. Padīpe padīpane etabbaṃ netabbanti padīpeyyaṃ, telakapālādiupakaraṇaṃ. Vuttanti aṭṭhakathāyaṃ vuttaṃ.
ஆக³மனவிபத்தீதி ஆக³மனட்டா²னவஸேன விபத்தி ‘‘ஆக³மோ எத்தா²’’தி கத்வா. புப்³பு³ப்பன்னபச்சயவிபத்தீதி பட²முப்பன்னபச்சயவஸேன விபராவத்தி. சண்டா³லாதி³ஸபா⁴வா ஹிஸ்ஸ மாதாபிதரோ பட²முப்பன்னபச்சயோ. பவத்தபச்சயவிபத்தீதி பவத்தே ஸுக²பச்சயவிபத்தி. தாதி³ஸே நிஹீனகுலே உப்பன்னோபி கோசி விப⁴வஸம்பன்னோ ஸியா, அயங் பன து³க்³க³தோ து³ரூபோ. ஆஜீவுபாயவிபத்தீதி ஆஜீவனுபாயவஸேன விபத்தி. ஸுகே²ன ஹி ஜீவிகங் பவத்தேதுங் உபாயபூ⁴தா ஹத்தி²ஸிப்பாத³யோ இமஸ்ஸ நத்தி², புப்ப²ச²ட்³ட³னஸிலாகொட்டனாதி³கம்மங் பன கத்வா ஜீவிகங் பவத்தேதி. தேனாஹ ‘‘கஸிரவுத்திகே’’தி. அத்தபா⁴வவிபத்தீதி உபதி⁴விபத்தி. து³க்க²காரணஸமாயோகோ³தி காயிகசேதஸிகது³க்கு²ப்பத்தியா பச்சயஸமோதா⁴னங். ஸுக²காரணவிபத்தீதி ஸுக²பச்சயபரிஹானி. உபபோ⁴க³விபத்தீதி உபபோ⁴க³ஸுக²ஸ்ஸ வினாஸோ அனுபலத்³தி⁴. ஜோதி சேவ ஜோதிபராயணபா⁴வோ ச ஸுக்கபக்கோ². ச²ட்ட²ங் உத்தானமேவ.
Āgamanavipattīti āgamanaṭṭhānavasena vipatti ‘‘āgamo etthā’’ti katvā. Pubbuppannapaccayavipattīti paṭhamuppannapaccayavasena viparāvatti. Caṇḍālādisabhāvā hissa mātāpitaro paṭhamuppannapaccayo. Pavattapaccayavipattīti pavatte sukhapaccayavipatti. Tādise nihīnakule uppannopi koci vibhavasampanno siyā, ayaṃ pana duggato durūpo. Ājīvupāyavipattīti ājīvanupāyavasena vipatti. Sukhena hi jīvikaṃ pavattetuṃ upāyabhūtā hatthisippādayo imassa natthi, pupphachaḍḍanasilākoṭṭanādikammaṃ pana katvā jīvikaṃ pavatteti. Tenāha ‘‘kasiravuttike’’ti. Attabhāvavipattīti upadhivipatti. Dukkhakāraṇasamāyogoti kāyikacetasikadukkhuppattiyā paccayasamodhānaṃ. Sukhakāraṇavipattīti sukhapaccayaparihāni. Upabhogavipattīti upabhogasukhassa vināso anupaladdhi. Joti ceva jotiparāyaṇabhāvo ca sukkapakkho. Chaṭṭhaṃ uttānameva.
பாணாதிபாதஸுத்தாதி³வண்ணனா நிட்டி²தா.
Pāṇātipātasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
1. பாணாதிபாதஸுத்தங் • 1. Pāṇātipātasuttaṃ
2. முஸாவாத³ஸுத்தங் • 2. Musāvādasuttaṃ
3. அவண்ணாரஹஸுத்தங் • 3. Avaṇṇārahasuttaṃ
4. கோத⁴க³ருஸுத்தங் • 4. Kodhagarusuttaṃ
5. தமோதமஸுத்தங் • 5. Tamotamasuttaṃ
6. ஓணதோணதஸுத்தங் • 6. Oṇatoṇatasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
1-5. பாணாதிபாதாதி³ஸுத்தபஞ்சகவண்ணனா • 1-5. Pāṇātipātādisuttapañcakavaṇṇanā
6. ஓணதோணதஸுத்தவண்ணனா • 6. Oṇatoṇatasuttavaṇṇanā
