| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
பஞ்சாபா³த⁴வத்து²கதா²
Pañcābādhavatthukathā
88. மக³தே⁴ஸு பஞ்ச ஆபா³தா⁴ உஸ்ஸன்னா ஹொந்தீதி மக³த⁴னாமகே ஜனபதே³ மனுஸ்ஸானஞ்ச அமனுஸ்ஸானஞ்ச பஞ்ச ரோகா³ உஸ்ஸன்னா வுட்³டி⁴ப்பத்தா பா²திப்பத்தா ஹொந்தி. ஜீவககோமாரப⁴ச்சகதா² சீவரக்க²ந்த⁴கே ஆவிப⁴விஸ்ஸதி. ந பி⁴க்க²வே பஞ்சஹி ஆபா³தே⁴ஹி பு²ட்டோ² பப்³பா³ஜேதப்³போ³தி யே தே குட்டா²த³யோ பஞ்ச ஆபா³தா⁴ உஸ்ஸன்னா, தேஹி பு²ட்டோ² அபி⁴பூ⁴தோ ந பப்³பா³ஜேதப்³போ³.
88.Magadhesupañca ābādhā ussannā hontīti magadhanāmake janapade manussānañca amanussānañca pañca rogā ussannā vuḍḍhippattā phātippattā honti. Jīvakakomārabhaccakathā cīvarakkhandhake āvibhavissati. Na bhikkhave pañcahi ābādhehi phuṭṭho pabbājetabboti ye te kuṭṭhādayo pañca ābādhā ussannā, tehi phuṭṭho abhibhūto na pabbājetabbo.
தத்த² குட்ட²ந்தி ரத்தகுட்ட²ங் வா ஹோது காளகுட்ட²ங் வா, யங்கிஞ்சி கிடிப⁴த³த்³து³கச்சு²ஆதி³ப்பபே⁴த³ம்பி ஸப்³ப³ங் குட்ட²மேவாதி வுத்தங். தஞ்சே நக²பிட்டி²ப்பமாணம்பி வட்³ட⁴னகபக்கே² டி²தங் ஹோதி, ந பப்³பா³ஜேதப்³போ³. ஸசே பன நிவாஸனபாருபனேஹி பகதிபடிச்ச²ன்னே டா²னே நக²பிட்டி²ப்பமாணங் அவட்³ட⁴னகபக்கே² டி²தங் ஹோதி, வட்டதி. முகே² பன ஹத்த²பாத³பிட்டே²ஸு வா ஸசேபி அவட்³ட⁴னகபக்கே² டி²தங் நக²பிட்டி²தோ ச கு²த்³த³கதரம்பி, ந வட்டதியேவாதி குருந்தி³யங் வுத்தங். திகிச்சா²பெத்வா பப்³பா³ஜெந்தேனாபி பகதிவண்ணே ஜாதேயேவ பப்³பா³ஜேதப்³போ³. கோ³தா⁴பிட்டி²ஸதி³ஸசுண்ணஓகிரணகஸரீரம்பி பப்³பா³ஜேதுங் ந வட்டதி.
Tattha kuṭṭhanti rattakuṭṭhaṃ vā hotu kāḷakuṭṭhaṃ vā, yaṃkiñci kiṭibhadaddukacchuādippabhedampi sabbaṃ kuṭṭhamevāti vuttaṃ. Tañce nakhapiṭṭhippamāṇampi vaḍḍhanakapakkhe ṭhitaṃ hoti, na pabbājetabbo. Sace pana nivāsanapārupanehi pakatipaṭicchanne ṭhāne nakhapiṭṭhippamāṇaṃ avaḍḍhanakapakkhe ṭhitaṃ hoti, vaṭṭati. Mukhe pana hatthapādapiṭṭhesu vā sacepi avaḍḍhanakapakkhe ṭhitaṃ nakhapiṭṭhito ca khuddakatarampi, na vaṭṭatiyevāti kurundiyaṃ vuttaṃ. Tikicchāpetvā pabbājentenāpi pakativaṇṇe jāteyeva pabbājetabbo. Godhāpiṭṭhisadisacuṇṇaokiraṇakasarīrampi pabbājetuṃ na vaṭṭati.
க³ண்டோ³தி மேத³க³ண்டோ³ வா ஹோது அஞ்ஞோ வா யோ கோசி கோலட்டி²மத்தகோபி சே வட்³ட⁴னகபக்கே² டி²தோ க³ண்டோ³ ஹோதி, ந பப்³பா³ஜேதப்³போ³. படிச்ச²ன்னட்டா²னே பன கோலட்டி²மத்தே அவட்³ட⁴னகபக்கே² டி²தோ வட்டதி. முகா²தி³கே அப்படிச்ச²ன்னட்டா²னே அவட்³ட⁴னகபக்கே² டி²தோபி ந வட்டதி. திகிச்சா²பெத்வா பப்³பா³ஜெந்தேனாபி ஸரீரங் ஸஞ்ச²விங் காரெத்வாவ பப்³பா³ஜேதப்³போ³. உண்ணிக³ண்டா³ நாம ஹொந்தி கோ³த²னா விய அங்கு³லிகா விய ச தத்த² தத்த² லம்ப³ந்தி, ஏதேபி க³ண்டா³யேவ. தேஸு ஸதி பப்³பா³ஜேதுங் ந வட்டதி. த³ஹரகாலே கீ²ரபிளகா யொப்³ப³ன்னகாலே ச முகே² க²ரபிளகா நாம ஹொந்தி, மஹல்லககாலே நஸ்ஸந்தி, ந தா க³ண்ட³ஸங்க்²யங் க³ச்ச²ந்தி, தாஸு ஸதி பப்³பா³ஜேதுங் வட்டதி. அஞ்ஞே பன ஸரீரே க²ரபிளகா நாம அபரா பது³மகண்ணிகா நாம ஹொந்தி, அஞ்ஞா ஸாஸபபீ³ஜகா நாம ஸாஸபமத்தா ஏவ ஸகலஸரீரங் ப²ரந்தி, தா ஸப்³பா³ குட்ட²ஜாதிகா ஏவ. தாஸு ஸதி ந பப்³பா³ஜேதப்³போ³.
Gaṇḍoti medagaṇḍo vā hotu añño vā yo koci kolaṭṭhimattakopi ce vaḍḍhanakapakkhe ṭhito gaṇḍo hoti, na pabbājetabbo. Paṭicchannaṭṭhāne pana kolaṭṭhimatte avaḍḍhanakapakkhe ṭhito vaṭṭati. Mukhādike appaṭicchannaṭṭhāne avaḍḍhanakapakkhe ṭhitopi na vaṭṭati. Tikicchāpetvā pabbājentenāpi sarīraṃ sañchaviṃ kāretvāva pabbājetabbo. Uṇṇigaṇḍā nāma honti gothanā viya aṅgulikā viya ca tattha tattha lambanti, etepi gaṇḍāyeva. Tesu sati pabbājetuṃ na vaṭṭati. Daharakāle khīrapiḷakā yobbannakāle ca mukhe kharapiḷakā nāma honti, mahallakakāle nassanti, na tā gaṇḍasaṅkhyaṃ gacchanti, tāsu sati pabbājetuṃ vaṭṭati. Aññe pana sarīre kharapiḷakā nāma aparā padumakaṇṇikā nāma honti, aññā sāsapabījakā nāma sāsapamattā eva sakalasarīraṃ pharanti, tā sabbā kuṭṭhajātikā eva. Tāsu sati na pabbājetabbo.
கிலாஸோதி ந பி⁴ஜ்ஜனகங் ந பக்³க⁴ரணகங் பது³மபுண்ட³ரீகபத்தவண்ணங் குட்ட²ங், யேன கு³ன்னங் விய ஸப³லங் ஸரீரங் ஹோதி, தஸ்மிங் குட்டே² வுத்தனயேனேவ வினிச்ச²யோ வேதி³தப்³போ³. ஸோஸோதி ஸோஸப்³யாதி⁴; தஸ்மிங் ஸதி ந பப்³பா³ஜேதப்³போ³. அபமாரோதி பித்தும்மாரோ வா யக்கு²ம்மாரோ வா; தத்த² புப்³ப³வேரிகேன அமனுஸ்ஸேன க³ஹிதோ து³த்திகிச்சோ² ஹோதி. அப்பமத்தகேபி பன அபமாரே ஸதி ந பப்³பா³ஜேதப்³போ³.
Kilāsoti na bhijjanakaṃ na paggharaṇakaṃ padumapuṇḍarīkapattavaṇṇaṃ kuṭṭhaṃ, yena gunnaṃ viya sabalaṃ sarīraṃ hoti, tasmiṃ kuṭṭhe vuttanayeneva vinicchayo veditabbo. Sosoti sosabyādhi; tasmiṃ sati na pabbājetabbo. Apamāroti pittummāro vā yakkhummāro vā; tattha pubbaverikena amanussena gahito duttikiccho hoti. Appamattakepi pana apamāre sati na pabbājetabbo.
பஞ்சாபா³த⁴வத்து²கதா² நிட்டி²தா.
Pañcābādhavatthukathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 26. பஞ்சாபா³த⁴வத்து² • 26. Pañcābādhavatthu
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பஞ்சாபா³த⁴வத்து²கதா²வண்ணனா • Pañcābādhavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பஞ்சாபா³த⁴வத்து²கதா²வண்ணனா • Pañcābādhavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பஞ்சாபா³த⁴வத்து²கதா²வண்ணனா • Pañcābādhavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 26. பஞ்சாபா³த⁴வத்து²கதா² • 26. Pañcābādhavatthukathā
