| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
পঞ্চাবাধৰত্থুকথা
Pañcābādhavatthukathā
৮৮. মগধেসু পঞ্চ আবাধা উস্সন্না হোন্তীতি মগধনামকে জনপদে মনুস্সানঞ্চ অমনুস্সানঞ্চ পঞ্চ রোগা উস্সন্না ৰুড্ঢিপ্পত্তা ফাতিপ্পত্তা হোন্তি। জীৰককোমারভচ্চকথা চীৰরক্খন্ধকে আৰিভৰিস্সতি। ন ভিক্খৰে পঞ্চহি আবাধেহি ফুট্ঠো পব্বাজেতব্বোতি যে তে কুট্ঠাদযো পঞ্চ আবাধা উস্সন্না, তেহি ফুট্ঠো অভিভূতো ন পব্বাজেতব্বো।
88.Magadhesupañca ābādhā ussannā hontīti magadhanāmake janapade manussānañca amanussānañca pañca rogā ussannā vuḍḍhippattā phātippattā honti. Jīvakakomārabhaccakathā cīvarakkhandhake āvibhavissati. Na bhikkhave pañcahi ābādhehi phuṭṭho pabbājetabboti ye te kuṭṭhādayo pañca ābādhā ussannā, tehi phuṭṭho abhibhūto na pabbājetabbo.
তত্থ কুট্ঠন্তি রত্তকুট্ঠং ৰা হোতু কাল়কুট্ঠং ৰা, যংকিঞ্চি কিটিভদদ্দুকচ্ছুআদিপ্পভেদম্পি সব্বং কুট্ঠমেৰাতি ৰুত্তং। তঞ্চে নখপিট্ঠিপ্পমাণম্পি ৰড্ঢনকপক্খে ঠিতং হোতি, ন পব্বাজেতব্বো। সচে পন নিৰাসনপারুপনেহি পকতিপটিচ্ছন্নে ঠানে নখপিট্ঠিপ্পমাণং অৰড্ঢনকপক্খে ঠিতং হোতি, ৰট্টতি। মুখে পন হত্থপাদপিট্ঠেসু ৰা সচেপি অৰড্ঢনকপক্খে ঠিতং নখপিট্ঠিতো চ খুদ্দকতরম্পি, ন ৰট্টতিযেৰাতি কুরুন্দিযং ৰুত্তং। তিকিচ্ছাপেত্ৰা পব্বাজেন্তেনাপি পকতিৰণ্ণে জাতেযেৰ পব্বাজেতব্বো। গোধাপিট্ঠিসদিসচুণ্ণওকিরণকসরীরম্পি পব্বাজেতুং ন ৰট্টতি।
Tattha kuṭṭhanti rattakuṭṭhaṃ vā hotu kāḷakuṭṭhaṃ vā, yaṃkiñci kiṭibhadaddukacchuādippabhedampi sabbaṃ kuṭṭhamevāti vuttaṃ. Tañce nakhapiṭṭhippamāṇampi vaḍḍhanakapakkhe ṭhitaṃ hoti, na pabbājetabbo. Sace pana nivāsanapārupanehi pakatipaṭicchanne ṭhāne nakhapiṭṭhippamāṇaṃ avaḍḍhanakapakkhe ṭhitaṃ hoti, vaṭṭati. Mukhe pana hatthapādapiṭṭhesu vā sacepi avaḍḍhanakapakkhe ṭhitaṃ nakhapiṭṭhito ca khuddakatarampi, na vaṭṭatiyevāti kurundiyaṃ vuttaṃ. Tikicchāpetvā pabbājentenāpi pakativaṇṇe jāteyeva pabbājetabbo. Godhāpiṭṭhisadisacuṇṇaokiraṇakasarīrampi pabbājetuṃ na vaṭṭati.
গণ্ডোতি মেদগণ্ডো ৰা হোতু অঞ্ঞো ৰা যো কোচি কোলট্ঠিমত্তকোপি চে ৰড্ঢনকপক্খে ঠিতো গণ্ডো হোতি, ন পব্বাজেতব্বো। পটিচ্ছন্নট্ঠানে পন কোলট্ঠিমত্তে অৰড্ঢনকপক্খে ঠিতো ৰট্টতি। মুখাদিকে অপ্পটিচ্ছন্নট্ঠানে অৰড্ঢনকপক্খে ঠিতোপি ন ৰট্টতি। তিকিচ্ছাপেত্ৰা পব্বাজেন্তেনাপি সরীরং সঞ্ছৰিং কারেত্ৰাৰ পব্বাজেতব্বো। উণ্ণিগণ্ডা নাম হোন্তি গোথনা ৰিয অঙ্গুলিকা ৰিয চ তত্থ তত্থ লম্বন্তি, এতেপি গণ্ডাযেৰ। তেসু সতি পব্বাজেতুং ন ৰট্টতি। দহরকালে খীরপিল়কা যোব্বন্নকালে চ মুখে খরপিল়কা নাম হোন্তি, মহল্লককালে নস্সন্তি, ন তা গণ্ডসঙ্খ্যং গচ্ছন্তি, তাসু সতি পব্বাজেতুং ৰট্টতি। অঞ্ঞে পন সরীরে খরপিল়কা নাম অপরা পদুমকণ্ণিকা নাম হোন্তি, অঞ্ঞা সাসপবীজকা নাম সাসপমত্তা এৰ সকলসরীরং ফরন্তি, তা সব্বা কুট্ঠজাতিকা এৰ। তাসু সতি ন পব্বাজেতব্বো।
Gaṇḍoti medagaṇḍo vā hotu añño vā yo koci kolaṭṭhimattakopi ce vaḍḍhanakapakkhe ṭhito gaṇḍo hoti, na pabbājetabbo. Paṭicchannaṭṭhāne pana kolaṭṭhimatte avaḍḍhanakapakkhe ṭhito vaṭṭati. Mukhādike appaṭicchannaṭṭhāne avaḍḍhanakapakkhe ṭhitopi na vaṭṭati. Tikicchāpetvā pabbājentenāpi sarīraṃ sañchaviṃ kāretvāva pabbājetabbo. Uṇṇigaṇḍā nāma honti gothanā viya aṅgulikā viya ca tattha tattha lambanti, etepi gaṇḍāyeva. Tesu sati pabbājetuṃ na vaṭṭati. Daharakāle khīrapiḷakā yobbannakāle ca mukhe kharapiḷakā nāma honti, mahallakakāle nassanti, na tā gaṇḍasaṅkhyaṃ gacchanti, tāsu sati pabbājetuṃ vaṭṭati. Aññe pana sarīre kharapiḷakā nāma aparā padumakaṇṇikā nāma honti, aññā sāsapabījakā nāma sāsapamattā eva sakalasarīraṃ pharanti, tā sabbā kuṭṭhajātikā eva. Tāsu sati na pabbājetabbo.
কিলাসোতি ন ভিজ্জনকং ন পগ্ঘরণকং পদুমপুণ্ডরীকপত্তৰণ্ণং কুট্ঠং, যেন গুন্নং ৰিয সবলং সরীরং হোতি, তস্মিং কুট্ঠে ৰুত্তনযেনেৰ ৰিনিচ্ছযো ৰেদিতব্বো। সোসোতি সোসব্যাধি; তস্মিং সতি ন পব্বাজেতব্বো। অপমারোতি পিত্তুম্মারো ৰা যক্খুম্মারো ৰা; তত্থ পুব্বৰেরিকেন অমনুস্সেন গহিতো দুত্তিকিচ্ছো হোতি। অপ্পমত্তকেপি পন অপমারে সতি ন পব্বাজেতব্বো।
Kilāsoti na bhijjanakaṃ na paggharaṇakaṃ padumapuṇḍarīkapattavaṇṇaṃ kuṭṭhaṃ, yena gunnaṃ viya sabalaṃ sarīraṃ hoti, tasmiṃ kuṭṭhe vuttanayeneva vinicchayo veditabbo. Sosoti sosabyādhi; tasmiṃ sati na pabbājetabbo. Apamāroti pittummāro vā yakkhummāro vā; tattha pubbaverikena amanussena gahito duttikiccho hoti. Appamattakepi pana apamāre sati na pabbājetabbo.
পঞ্চাবাধৰত্থুকথা নিট্ঠিতা।
Pañcābādhavatthukathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ২৬. পঞ্চাবাধৰত্থু • 26. Pañcābādhavatthu
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পঞ্চাবাধৰত্থুকথাৰণ্ণনা • Pañcābādhavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পঞ্চাবাধৰত্থুকথাৰণ্ণনা • Pañcābādhavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পঞ্চাবাধৰত্থুকথাৰণ্ণনা • Pañcābādhavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২৬. পঞ্চাবাধৰত্থুকথা • 26. Pañcābādhavatthukathā
