| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
২৬. পঞ্চাবাধৰত্থুকথা
26. Pañcābādhavatthukathā
৮৮. মগধেসূতি এত্থ বহুৰচনপদেন ৰুত্তত্তা জনপদস্স নামন্তি আহ ‘‘মগধনামকে জনপদে’’তি। অমনুস্সানঞ্চাতি মনুস্সেহি অঞ্ঞসত্তানঞ্চ। উস্সন্নসদ্দো চ উস্সদসদ্দো চ ৰুড্ঢিপ্পত্তপরিযাযোতি আহ ‘‘উস্সন্না ৰুড্ঢিপ্পত্তা’’তি। ‘‘ফাতিপ্পত্তা’’তি ইমিনা তমেৰত্থং দস্সেতি। তেহীতি কুট্ঠাদীহি পঞ্চহি আবাধেহি।
88.Magadhesūti ettha bahuvacanapadena vuttattā janapadassa nāmanti āha ‘‘magadhanāmake janapade’’ti. Amanussānañcāti manussehi aññasattānañca. Ussannasaddo ca ussadasaddo ca vuḍḍhippattapariyāyoti āha ‘‘ussannā vuḍḍhippattā’’ti. ‘‘Phātippattā’’ti iminā tamevatthaṃ dasseti. Tehīti kuṭṭhādīhi pañcahi ābādhehi.
তত্থাতি কুট্ঠাদীসু পঞ্চসু আবাধেসু। আবাধিকং আভুসো বাধতি পীল়েতীতি আবাধো, অঙ্গপচ্চঙ্গং কুটতি ছিন্দতীতি কুট্ঠং। ‘‘রত্তকুট্ঠং ৰা’’তিআদীসু ৰাসদ্দেন সেতকুট্ঠাদীনিপি সঙ্গণ্হাতি। কীটিভ দদ্দু খজ্জু আদিপ্পভেদম্পীতি কীটিভো চ দদ্দু চ খজ্জু চ কীটিভদদ্দুখজ্জুযো , তা আদযো যেসং কুট্ঠানন্তি কীটিভদদ্দুখজ্জুআদযো, তেসং পভেদো কীটিভদদ্দু খজ্জুআদিপ্পভেদো, তম্পি। তত্থ কীটিভোতি কীট ইভোতি পদৰিভাগো কাতব্বো। তত্থ কীটোতি কিমি। ইমিনা কীটকুলাৰকং ‘‘কীটো’’তি গহেতব্বং, কীটো ৰিযাতি কীটো, কুট্ঠৰিসেসো। ইভোতি গজো। ইমিনা গজস্স সবলং ‘‘ইভো’’তি গহেতব্বং। ইভো ৰিযাতি ইভো, কুট্ঠৰিসেসো। কীটোযেৰ ইভো কীটিভো, কুট্ঠাবাধৰিসেসো, যং লোকে ‘‘কুট্টাবাধ ৰিসেসো’’ইতি ৰোহরন্তি। দদ্দূতি কচ্ছু। সা হি সরীরং দংসতি ৰিদংসতি, হিংসতীতি ৰা দদ্দুতি ৰুচ্চতি। একস্স দকারস্স রকারং কত্ৰা ‘‘দদ্দু’’তিপি পাঠো। যং লোকে ‘‘প্ৰে?’’ইতি ৰোহরন্তি। খজ্জূতি কণ্ডুৰনং। তঞ্হি সরীরং খজ্জতি ব্যথতি খদতি, হিংসতীতি ৰা খজ্জূতি ৰুচ্চতি। যং লোকে ‘‘খজ্জ’’ইতি ৰোহরন্তি। ‘‘কচ্ছূ’’তিপি পাঠো, সো অপাঠো দদ্দুসদ্দেন তস্স গহিতত্তা। তন্তি কুট্ঠং। পকতিপটিচ্ছন্নট্ঠানেতি পকতিযা পটিচ্ছন্নট্ঠানে, যথানিৰত্থপারুতট্ঠানেতি অত্থো। ইমিনা ৰিসেসতো পটিচ্ছন্নং নিৰত্তেতি। অৰড্ঢনকপক্খে ঠিতং সচে হোতীতি যোজনা। পকতিৰণ্ণেতি =০৭ পকতিছৰিযং। যথা অৰণা ছৰি হোতি, তথাতি অত্থো। ইদং ৰণৰত্থুং সন্ধায ন ৰুত্তং।
Tatthāti kuṭṭhādīsu pañcasu ābādhesu. Ābādhikaṃ ābhuso bādhati pīḷetīti ābādho, aṅgapaccaṅgaṃ kuṭati chindatīti kuṭṭhaṃ. ‘‘Rattakuṭṭhaṃ vā’’tiādīsu vāsaddena setakuṭṭhādīnipi saṅgaṇhāti. Kīṭibha daddu khajju ādippabhedampīti kīṭibho ca daddu ca khajju ca kīṭibhadaddukhajjuyo , tā ādayo yesaṃ kuṭṭhānanti kīṭibhadaddukhajjuādayo, tesaṃ pabhedo kīṭibhadaddu khajjuādippabhedo, tampi. Tattha kīṭibhoti kīṭa ibhoti padavibhāgo kātabbo. Tattha kīṭoti kimi. Iminā kīṭakulāvakaṃ ‘‘kīṭo’’ti gahetabbaṃ, kīṭo viyāti kīṭo, kuṭṭhaviseso. Ibhoti gajo. Iminā gajassa sabalaṃ ‘‘ibho’’ti gahetabbaṃ. Ibho viyāti ibho, kuṭṭhaviseso. Kīṭoyeva ibho kīṭibho, kuṭṭhābādhaviseso, yaṃ loke ‘‘kuṭṭābādha viseso’’iti voharanti. Daddūti kacchu. Sā hi sarīraṃ daṃsati vidaṃsati, hiṃsatīti vā dadduti vuccati. Ekassa dakārassa rakāraṃ katvā ‘‘daddu’’tipi pāṭho. Yaṃ loke ‘‘pve?’’Iti voharanti. Khajjūti kaṇḍuvanaṃ. Tañhi sarīraṃ khajjati byathati khadati, hiṃsatīti vā khajjūti vuccati. Yaṃ loke ‘‘khajja’’iti voharanti. ‘‘Kacchū’’tipi pāṭho, so apāṭho daddusaddena tassa gahitattā. Tanti kuṭṭhaṃ. Pakatipaṭicchannaṭṭhāneti pakatiyā paṭicchannaṭṭhāne, yathānivatthapārutaṭṭhāneti attho. Iminā visesato paṭicchannaṃ nivatteti. Avaḍḍhanakapakkhe ṭhitaṃ sace hotīti yojanā. Pakativaṇṇeti =07 pakatichaviyaṃ. Yathā avaṇā chavi hoti, tathāti attho. Idaṃ vaṇavatthuṃ sandhāya na vuttaṃ.
মেদগণ্ডোতি মেদো অস্মিং অত্থীতি মেদো, গণ্ডতি ফোটো ভৰতীতি গণ্ডো, মেদোযেৰ গণ্ডো মেদগণ্ডো। যং লোকে ‘‘মেদগণ্ডোইতি ৰোহরন্তি। কোলট্ঠীতি কোলং ৰুচ্চতি বদরফলং, তস্স অট্ঠি কোলট্ঠি। অৰড্ঢনকপক্খে ঠিতে সতীতি যোজনা। সঞ্ছৰিন্তি সংৰিজ্জমানছৰিং, সঞ্জাতছৰিং ৰা। উণ্ণিগণ্ডাতি উদ্ধং নমন্তীতি উণ্ণিযো, তাযেৰ গণ্ডা উণ্ণিগণ্ডা। যে লোকে ‘‘উণ্ণিগণ্ডা’’ ইতি ৰোহরন্তি। তত্থ তত্থাতি তস্মিং তস্মিং সরীরপদেসে। খীরপীল়কাতি খীরং এত্থ অত্থীতি খীরা, তা এৰ পীল়কা খীরপীল়কা। যা লোকে ‘‘খীরপীল়কা’’ ইতি চ ইতি চ ৰোহরন্তি। তাসূতি পীল়কাসু। খীরপীল়কা নাম গণ্ডা হোন্তীতি সম্বন্ধো। খরপীল়কাতি খরসভাৰা পীল়কা। খরসভাৰত্তা তেন সত্তা মরণম্পি গচ্ছন্তি, মরণমত্তম্পি দুক্খং। যা লোকে ইতি ‘‘খীরপীল়কা’’ ৰোহরন্তি। পদুমকণ্ণিকা নাম গণ্ডা হোন্তীতি সম্বন্ধো। পদুমস্স কণ্ণিকা ৰিয পদুমকণ্ণিকা। যা লোকে ‘‘পদুমকণ্ণিকা’’ইতি ৰোহরন্তি। সাসপবীজকা নাম গণ্ডাতি সম্বন্ধো। সাসপস্স বীজং পমাণমেতাসন্তি সাসপবীজকা। যা লোকে ‘‘সাসপবীজকা’’ ইতি ৰোহরন্তি। তা সব্বাতি সব্বা তা পীল়কা, গণ্ডজাতিযো ৰা। তাসূতি পীল়কাসু, গণ্ডজাতীসু ৰা।
Medagaṇḍoti medo asmiṃ atthīti medo, gaṇḍati phoṭo bhavatīti gaṇḍo, medoyeva gaṇḍo medagaṇḍo. Yaṃ loke ‘‘medagaṇḍoiti voharanti. Kolaṭṭhīti kolaṃ vuccati badaraphalaṃ, tassa aṭṭhi kolaṭṭhi. Avaḍḍhanakapakkhe ṭhite satīti yojanā. Sañchavinti saṃvijjamānachaviṃ, sañjātachaviṃ vā. Uṇṇigaṇḍāti uddhaṃ namantīti uṇṇiyo, tāyeva gaṇḍā uṇṇigaṇḍā. Ye loke ‘‘uṇṇigaṇḍā’’ iti voharanti. Tattha tatthāti tasmiṃ tasmiṃ sarīrapadese. Khīrapīḷakāti khīraṃ ettha atthīti khīrā, tā eva pīḷakā khīrapīḷakā. Yā loke ‘‘khīrapīḷakā’’ iti ca iti ca voharanti. Tāsūti pīḷakāsu. Khīrapīḷakā nāma gaṇḍā hontīti sambandho. Kharapīḷakāti kharasabhāvā pīḷakā. Kharasabhāvattā tena sattā maraṇampi gacchanti, maraṇamattampi dukkhaṃ. Yā loke iti ‘‘khīrapīḷakā’’ voharanti. Padumakaṇṇikā nāma gaṇḍā hontīti sambandho. Padumassa kaṇṇikā viya padumakaṇṇikā. Yā loke ‘‘padumakaṇṇikā’’iti voharanti. Sāsapabījakā nāma gaṇḍāti sambandho. Sāsapassa bījaṃ pamāṇametāsanti sāsapabījakā. Yā loke ‘‘sāsapabījakā’’ iti voharanti. Tā sabbāti sabbā tā pīḷakā, gaṇḍajātiyo vā. Tāsūti pīḷakāsu, gaṇḍajātīsu vā.
পদুমপুণ্ডরীকপত্তৰণ্ণন্তি পদুমং নাম রত্তং, পুণ্ডরীকং নাম সেতং, তেসং পুপ্ফপত্তস্স ৰণ্ণং ৰিয ৰণ্ণমেতস্সাতি পদুমপুণ্ডরীকপত্তৰণ্ণং, সঙ্খকুট্ঠং। যং লোকে ‘‘পদুমপুণ্ডরীকপত্তৰণ্ণং, সঙ্খকুট্ঠং’’ ইতি ৰোহরন্তি। যেনাতি কুট্ঠেন। গুন্নং সরীরং সবলং ৰিয মনুস্সানং সরীরং সবলং হোতীতি যোজনা। তস্মিন্তি কিলাসে। সোসব্যাধীতি খযরোগো। সো হি যস্মা মংসলোহিতাদীনি সোসাপেতি, তস্মা সোসোতি ৰুচ্চতি। যং লোকে ‘‘সাংস’’ ইতি চ ‘‘সোসব্যাধি’’ ইতি চ ৰোহরন্তি। তস্মিন্তি সোসব্যাধিম্হি। অপমারোতি অপস্মারো। সো হি সারতো অপগতত্তা ‘‘অপমারো’’তি ৰুচ্চতি সকারস্স মকারং কত্ৰা। যং লোকে ‘‘অপমার’’ ইতি চ ‘‘অরূ?’’ইতি চ ৰোহরন্তি। তত্থাতি দ্ৰীসু উম্মাদেসু। আধারে চেতং ভুম্মৰচনং। দুত্তিকিচ্ছো হোতীতি সম্বন্ধো।
Padumapuṇḍarīkapattavaṇṇanti padumaṃ nāma rattaṃ, puṇḍarīkaṃ nāma setaṃ, tesaṃ pupphapattassa vaṇṇaṃ viya vaṇṇametassāti padumapuṇḍarīkapattavaṇṇaṃ, saṅkhakuṭṭhaṃ. Yaṃ loke ‘‘padumapuṇḍarīkapattavaṇṇaṃ, saṅkhakuṭṭhaṃ’’ iti voharanti. Yenāti kuṭṭhena. Gunnaṃ sarīraṃ sabalaṃ viya manussānaṃ sarīraṃ sabalaṃ hotīti yojanā. Tasminti kilāse. Sosabyādhīti khayarogo. So hi yasmā maṃsalohitādīni sosāpeti, tasmā sosoti vuccati. Yaṃ loke ‘‘sāṃsa’’ iti ca ‘‘sosabyādhi’’ iti ca voharanti. Tasminti sosabyādhimhi. Apamāroti apasmāro. So hi sārato apagatattā ‘‘apamāro’’ti vuccati sakārassa makāraṃ katvā. Yaṃ loke ‘‘apamāra’’ iti ca ‘‘arū?’’Iti ca voharanti. Tatthāti dvīsu ummādesu. Ādhāre cetaṃ bhummavacanaṃ. Duttikiccho hotīti sambandho.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ২৬. পঞ্চাবাধৰত্থু • 26. Pañcābādhavatthu
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / পঞ্চাবাধৰত্থুকথা • Pañcābādhavatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পঞ্চাবাধৰত্থুকথাৰণ্ণনা • Pañcābādhavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পঞ্চাবাধৰত্থুকথাৰণ্ণনা • Pañcābādhavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পঞ্চাবাধৰত্থুকথাৰণ্ণনা • Pañcābādhavatthukathāvaṇṇanā
