6. பே⁴ஸஜ்ஜக்க²ந்த⁴கங்

160. பஞ்சபே⁴ஸஜ்ஜாதி³கதா²

260. பே⁴ஸஜ்ஜக்க²ந்த⁴கே ஸரத³காலே உப்பன்னோ ஸாரதி³கோதி அத்த²ங் த³ஸ்ஸெந்தோ ஆஹ ‘‘ஸரத³காலே உப்பன்னேனா’’தி. ‘‘பித்தாபா³தே⁴னா’’தி இமினா ஆபா³த⁴ஸ்ஸ ஸரூபங் த³ஸ்ஸேதி. பித்தாபா³த⁴ஸ்ஸ காரணங் வித்தா²ரெந்தோ ஆஹ ‘‘தஸ்மிங் ஹீ’’திஆதி³. தேனாதி ஹேதுனா. தேஸந்தி பி⁴க்கூ²னங். கொட்ட²ப்³ப⁴ந்தரக³தந்தி கொட்ட²ஸ்ஸ அப்³ப⁴ந்தரங் க³தங். அந்தஸ்ஸ அந்தோ பவிஸனங் ஹோதீதி அதி⁴ப்பாயோ. ஆஹாரத்த²ந்தி ஆஹாரஸ்ஸ கிச்சங், ஆஹாரேன வா கத்தப்³ப³ங் கிச்சங்.

261. நச்சா²தெ³ந்தீதி தானி பே⁴ஸஜ்ஜானி போ⁴ஜனானி நச்சா²தெ³ந்தி. கஸ்மா? போ⁴ஜனானங் அஜீரணத்தா . இதி இமமத்த²ங் த³ஸ்ஸெந்தோ ஆஹ ‘‘ந ஜீரந்தீ’’தி. நச்சா²த³த்தா ந வாதரோக³ங் படிப்பஸ்ஸம்பே⁴துங் ஸக்கொந்தி. எத்த² ச ‘‘ந ஜீரந்தீ’’தி இமினா நச்சா²த³னஸ்ஸ காரணங் த³ஸ்ஸேதி. ‘‘ந வாத…பே॰… ஸக்கொந்தீ’’தி இமினா தஸ்ஸேவ ப²லங் த³ஸ்ஸேதீதி த³ட்ட²ப்³ப³ங். ‘‘ஸினித்³தா⁴னீ’’தி இமினா ஸினிஹந்தீதி ஸேனேஹிகானீதி அத்த²ங் த³ஸ்ஸேதி. ப⁴த்தச்ச²ன்னகேனாதி எத்த² ப⁴த்தஸ்ஸ அச்ச²ன்னகங் நாம ப⁴த்தஸ்ஸ அரோசிகங் ப⁴த்தஸ்ஸ ருசியா அனுப்பாத³கந்தி ஆஹ ‘‘ப⁴த்தாரோசகேனா’’தி.

262. அச்ச²வஸந்திஆதீ³ஸு வினிச்ச²யோ வேதி³தப்³போ³தி யோஜனா. பாளியங் ‘‘படிக்³க³ஹிதங் நிப்பக்கங் ஸங்ஸட்ட²’’ந்தி பதா³னங் கிரியாவிஸேஸனங் கத்வா ‘‘பரிபு⁴ஞ்ஜிது’’ந்தி பதே³ன ஸம்ப³ந்தி⁴தப்³ப³பா⁴வங் த³ஸ்ஸேதுங் வுத்தங் ‘‘காலே படிக்³க³ஹிதந்தி ஆதீ³ஸூ’’திஆதி³. தேலபரிபோ⁴கே³ன பரிபு⁴ஞ்ஜிதுந்தி எத்த² கித்தகங் காலங் தேலபரிபோ⁴கே³ன பரிபு⁴ஞ்ஜிதப்³ப³ந்தி ஆஹ ‘‘ஸத்தாஹகால’’ந்தி.