| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
৬. ভেসজ্জক্খন্ধকং
6. Bhesajjakkhandhakaṃ
পঞ্চভেসজ্জাদিকথা
Pañcabhesajjādikathā
২৬০. ভেসজ্জক্খন্ধকে – সারদিকেন আবাধেনাতি সরদকালে উপ্পন্নেন পিত্তাবাধেন, তস্মিঞ্হি কালে ৰস্সোদকেনপি তেমেন্তি, কদ্দমম্পি মদ্দন্তি, অন্তরন্তরা আতপোপি খরো হোতি, তেন তেসং পিত্তং কোট্ঠব্ভন্তরগতং হোতি। আহারত্থঞ্চ ফরেয্যাতি আহারত্থং সাধেয্য।
260. Bhesajjakkhandhake – sāradikena ābādhenāti saradakāle uppannena pittābādhena, tasmiñhi kāle vassodakenapi tementi, kaddamampi maddanti, antarantarā ātapopi kharo hoti, tena tesaṃ pittaṃ koṭṭhabbhantaragataṃ hoti. Āhāratthañca phareyyāti āhāratthaṃ sādheyya.
২৬১. নচ্ছাদেন্তীতি ন জিরন্তি, ন ৰাতরোগং পটিপ্পস্সম্ভেতুং সক্কোন্তি। সেনেসিতানীতি সিনিদ্ধানি। ভত্তাচ্ছাদকেনাতি ভত্তং অরোচিকেন।
261.Nacchādentīti na jiranti, na vātarogaṃ paṭippassambhetuṃ sakkonti. Senesitānīti siniddhāni. Bhattācchādakenāti bhattaṃ arocikena.
২৬২. অচ্ছৰসন্তিআদীসু নিস্সগ্গিযৰণ্ণনাযং ৰুত্তনযেনেৰ ৰিনিচ্ছযো ৰেদিতব্বো। কালে পটিগ্গহিতন্তিআদীসু মজ্ঝন্হিকে অৰীতিৰত্তে পটিগ্গহেত্ৰা পচিত্ৰা পরিস্সাৰেত্ৰা চাতি অত্থো। তেলপরিভোগেন পরিভুঞ্জিতুন্তি সত্তাহকালিকতেলপরিভোগেন পরিভুঞ্জিতুং।
262.Acchavasantiādīsu nissaggiyavaṇṇanāyaṃ vuttanayeneva vinicchayo veditabbo. Kāle paṭiggahitantiādīsu majjhanhike avītivatte paṭiggahetvā pacitvā parissāvetvā cāti attho. Telaparibhogenaparibhuñjitunti sattāhakālikatelaparibhogena paribhuñjituṃ.
২৬৩. মূলভেসজ্জাদি ৰিনিচ্ছযোপি খুদ্দকৰণ্ণনাযং ৰুত্তোযেৰ। তস্মা ইধ যং যং পুব্বে অৰুত্তং তং তদেৰ ৰণ্ণযিস্সাম। ৰচত্তন্তি সেতৰচং। নিসদং নিসদপোতকন্তি পিসনসিলা চ পিসনপোতো চ। ফগ্গৰন্তি লতাজাতি। নত্তমালন্তি করঞ্জং। হিঙ্গুহিঙ্গুজতুহিঙ্গুসিপাটিকা হিঙ্গুজাতিযোযেৰ। তকতকপত্তিতকপণ্ণিযো লাখাজাতিযো।
263.Mūlabhesajjādi vinicchayopi khuddakavaṇṇanāyaṃ vuttoyeva. Tasmā idha yaṃ yaṃ pubbe avuttaṃ taṃ tadeva vaṇṇayissāma. Vacattanti setavacaṃ. Nisadaṃ nisadapotakanti pisanasilā ca pisanapoto ca. Phaggavanti latājāti. Nattamālanti karañjaṃ. Hiṅguhiṅgujatuhiṅgusipāṭikā hiṅgujātiyoyeva. Takatakapattitakapaṇṇiyo lākhājātiyo.
সামুদ্দন্তি সমুদ্দতীরে ৰালুকা ৰিয সন্তিট্ঠতি। কাল়লোণন্তি পকতিলোণং। সিন্ধৰন্তি সেতৰণ্ণং পব্বতে উট্ঠহতি। উব্ভিদন্তি ভূমিতো অঙ্কুরং উট্ঠহতি। বিলন্তি দব্বসম্ভারেহি সদ্ধিং পচিতং, তং রত্তৰণ্ণং।
Sāmuddanti samuddatīre vālukā viya santiṭṭhati. Kāḷaloṇanti pakatiloṇaṃ. Sindhavanti setavaṇṇaṃ pabbate uṭṭhahati. Ubbhidanti bhūmito aṅkuraṃ uṭṭhahati. Bilanti dabbasambhārehi saddhiṃ pacitaṃ, taṃ rattavaṇṇaṃ.
২৬৪-৬. কাযো ৰা দুগ্গন্ধোতি কস্সচি অস্সাদীনং ৰিয কাযগন্ধো হোতি, তস্সাপি সিরীসকোসুম্বাদিচুণ্ণানি ৰা গন্ধচুণ্ণানি ৰা সব্বানি ৰট্টন্তি। ছকণন্তি গোমযং। রজননিপ্পক্কন্তি রজনকসটং। পাকতিকচুণ্ণম্পি কোট্টেত্ৰা উদকেন তেমেত্ৰা ন্হাযিতুং ৰট্টতি; এতম্পি রজননিপ্পক্কসঙ্খেপমেৰ গচ্ছতি।
264-6.Kāyo vā duggandhoti kassaci assādīnaṃ viya kāyagandho hoti, tassāpi sirīsakosumbādicuṇṇāni vā gandhacuṇṇāni vā sabbāni vaṭṭanti. Chakaṇanti gomayaṃ. Rajananippakkanti rajanakasaṭaṃ. Pākatikacuṇṇampi koṭṭetvā udakena temetvā nhāyituṃ vaṭṭati; etampi rajananippakkasaṅkhepameva gacchati.
আমকমংসঞ্চ খাদি আমকলোহিতঞ্চ পিৰীতি ন তং ভিক্খু খাদি ন পিৰি, অমনুস্সো খাদিত্ৰা চ পিৰিত্ৰা চ পক্কন্তো, তেন ৰুত্তং – ‘‘তস্স সো অমনুস্সিকাবাধো পটিপ্পস্সম্ভী’’তি।
Āmakamaṃsañcakhādi āmakalohitañca pivīti na taṃ bhikkhu khādi na pivi, amanusso khāditvā ca pivitvā ca pakkanto, tena vuttaṃ – ‘‘tassa so amanussikābādho paṭippassambhī’’ti.
অঞ্জনন্তি সব্বসঙ্গাহিকৰচনমেতং। কাল়্ঞ্জনন্তি একা অঞ্জনজাতি। রসঞ্জনং নানাসম্ভারেহি কতং। সোতঞ্জনন্তি নদীসোতাদীসু উপ্পজ্জনকং অঞ্জনং। গেরুকো নাম সুৰণ্ণগেরুকো। কপল্লন্তি দীপসিখতো গহিতমসি। অঞ্জনূপপিংসনেহীতি অঞ্জনেন সদ্ধিং একতো পিংসিতব্বেহি, ন হি কিঞ্চি অঞ্ঞনূপপিংসনং ন ৰট্টতি। চন্দনন্তি লোহিতচন্দনাদিকং যংকিঞ্চি। তগরাদীনি পাকটানি, অঞ্ঞানিপি নীলুপ্পলাদীনি ৰট্টন্তিযেৰ।
Añjananti sabbasaṅgāhikavacanametaṃ. Kāḷñjananti ekā añjanajāti. Rasañjanaṃ nānāsambhārehi kataṃ. Sotañjananti nadīsotādīsu uppajjanakaṃ añjanaṃ. Geruko nāma suvaṇṇageruko. Kapallanti dīpasikhato gahitamasi. Añjanūpapiṃsanehīti añjanena saddhiṃ ekato piṃsitabbehi, na hi kiñci aññanūpapiṃsanaṃ na vaṭṭati. Candananti lohitacandanādikaṃ yaṃkiñci. Tagarādīni pākaṭāni, aññānipi nīluppalādīni vaṭṭantiyeva.
অট্ঠিমযন্তি মনুস্সট্ঠিং ঠপেত্ৰা অৰসেসঅট্ঠিমযং। দন্তমযন্তি হত্থিদন্তাদিসব্বদন্তমযং। ৰিসাণমযেপি অকপ্পিযং নাম নত্থি, নল়মযাদযো একন্তকপ্পিযাযেৰ। সলাকট্ঠানিযন্তি যত্থ সলাকং ওদহন্তি, তং সুসিরদণ্ডকং ৰা থৰিকং ৰা অনুজানামীতি অত্থো। অংসবদ্ধকোতি অঞ্জনিত্থৰিকায অংসবদ্ধকো। যমকনত্থুকরণিন্তি সমসোতাহি দ্ৰীহি পনাল়িকাহি একং নত্থুকরণিং।
Aṭṭhimayanti manussaṭṭhiṃ ṭhapetvā avasesaaṭṭhimayaṃ. Dantamayanti hatthidantādisabbadantamayaṃ. Visāṇamayepi akappiyaṃ nāma natthi, naḷamayādayo ekantakappiyāyeva. Salākaṭṭhāniyanti yattha salākaṃ odahanti, taṃ susiradaṇḍakaṃ vā thavikaṃ vā anujānāmīti attho. Aṃsabaddhakoti añjanitthavikāya aṃsabaddhako. Yamakanatthukaraṇinti samasotāhi dvīhi panāḷikāhi ekaṃ natthukaraṇiṃ.
২৬৭. অনুজানামি ভিক্খৰে তেলপাকন্তি যংকিঞ্চি ভেসজ্জপক্খিত্তং সব্বং অনুঞ্ঞাতমেৰ হোতি। অতিপক্খিত্তমজ্জানীতি অতিৰিয খিত্তমজ্জানি; বহুং মজ্জং পক্খিপিত্ৰা যোজিতানীতি অত্থো।
267.Anujānāmi bhikkhave telapākanti yaṃkiñci bhesajjapakkhittaṃ sabbaṃ anuññātameva hoti. Atipakkhittamajjānīti ativiya khittamajjāni; bahuṃ majjaṃ pakkhipitvā yojitānīti attho.
অঙ্গৰাতোতি হত্থপাদে ৰাতো। সম্ভারসেদন্তি নানাৰিধপণ্ণভঙ্গসেদং। মহাসেদন্তি মহন্তং সেদং; পোরিসপ্পমাণং আৰাটং অঙ্গারানং পূরেত্ৰা পংসুৰালিকাদীহি পিদহিত্ৰা তত্থ নানাৰিধানি ৰাতহরণপণ্ণানি সন্থরিত্ৰা তেলমক্খিতেন গত্তেন তত্থ নিপজ্জিত্ৰা সম্পরিৰত্তন্তেন সরীরং সেদেতুং অনুজানামীতি অত্থো। ভঙ্গোদকন্তি নানাপণ্ণভঙ্গকুথিতং উদকং; তেহি পণ্ণেহি চ উদকেন চ সিঞ্চিত্ৰা সিঞ্চিত্ৰা সেদেতব্বো। উদককোট্ঠকন্তি উদককোট্ঠে চাটিং ৰা দোণিং ৰা উণ্হোদকস্স পূরেত্ৰা তত্থ পৰিসিত্ৰা সেদকম্মকরণং অনুজানামীতি অত্থো।
Aṅgavātoti hatthapāde vāto. Sambhārasedanti nānāvidhapaṇṇabhaṅgasedaṃ. Mahāsedanti mahantaṃ sedaṃ; porisappamāṇaṃ āvāṭaṃ aṅgārānaṃ pūretvā paṃsuvālikādīhi pidahitvā tattha nānāvidhāni vātaharaṇapaṇṇāni santharitvā telamakkhitena gattena tattha nipajjitvā samparivattantena sarīraṃ sedetuṃ anujānāmīti attho. Bhaṅgodakanti nānāpaṇṇabhaṅgakuthitaṃ udakaṃ; tehi paṇṇehi ca udakena ca siñcitvā siñcitvā sedetabbo. Udakakoṭṭhakanti udakakoṭṭhe cāṭiṃ vā doṇiṃ vā uṇhodakassa pūretvā tattha pavisitvā sedakammakaraṇaṃ anujānāmīti attho.
পব্বৰাতো হোতীতি পব্বে পব্বে ৰাতো ৰিজ্ঝতি। লোহিতং মোচেতুন্তি সত্থকেন লোহিতং মোচেতুং। পজ্জং অভিসঙ্খরিতুন্তি যেন ফালিতপাদা পাকতিকা হোন্তি; তং নাল়িকেরাদীসু নানাভেসজ্জানি পক্খিপিত্ৰা পজ্জং অভিসঙ্খরিতুং; পাদানং সপ্পাযভেসজ্জং পচিতুন্তি অত্থো। তিলকক্কেন অত্থোতি পিট্ঠেহি তিলেহি অত্থো। কবল়িকন্তি ৰণমুখে সত্তুপিণ্ডং পক্খিপিতুং। সাসপকুড্ডেনাতি সাসপপিট্ঠেন। ৰড্ঢমংসন্তি অধিকমংসং আণি ৰিয উট্ঠহতি। লোণসক্খরিকায ছিন্দিতুন্তি খুরেন ছিন্দিতুং। ৰিকাসিকন্তি তেলরুন্ধনপিলোতিকং। সব্বং ৰণপটিকম্মন্তি যংকিঞ্চি ৰণপরিকম্মং নাম অত্থি; সব্বং অনুজানামীতি অত্থো।
Pabbavātohotīti pabbe pabbe vāto vijjhati. Lohitaṃ mocetunti satthakena lohitaṃ mocetuṃ. Pajjaṃ abhisaṅkharitunti yena phālitapādā pākatikā honti; taṃ nāḷikerādīsu nānābhesajjāni pakkhipitvā pajjaṃ abhisaṅkharituṃ; pādānaṃ sappāyabhesajjaṃ pacitunti attho. Tilakakkena atthoti piṭṭhehi tilehi attho. Kabaḷikanti vaṇamukhe sattupiṇḍaṃ pakkhipituṃ. Sāsapakuḍḍenāti sāsapapiṭṭhena. Vaḍḍhamaṃsanti adhikamaṃsaṃ āṇi viya uṭṭhahati. Loṇasakkharikāya chinditunti khurena chindituṃ. Vikāsikanti telarundhanapilotikaṃ. Sabbaṃ vaṇapaṭikammanti yaṃkiñci vaṇaparikammaṃ nāma atthi; sabbaṃ anujānāmīti attho.
২৬৮. সামং গহেত্ৰাতি ইদং ন কেৰলং সপ্পদট্ঠস্সেৰ, অঞ্ঞস্মিম্পি দট্ঠৰিসে সতি সামং গহেত্ৰা পরিভুঞ্জিতব্বং; অঞ্ঞেসু পন কারণেসু পটিগ্গহিতমেৰ ৰট্টতি। কতো ন পুন পটিগ্গহেতব্বোতি সচে ভূমিপ্পত্তো, পটিগ্গহেতব্বো; অপ্পত্তং পন গহেতুং ৰট্টতি।
268.Sāmaṃ gahetvāti idaṃ na kevalaṃ sappadaṭṭhasseva, aññasmimpi daṭṭhavise sati sāmaṃ gahetvā paribhuñjitabbaṃ; aññesu pana kāraṇesu paṭiggahitameva vaṭṭati. Kato na puna paṭiggahetabboti sace bhūmippatto, paṭiggahetabbo; appattaṃ pana gahetuṃ vaṭṭati.
২৬৯. ঘরদিন্নকাবাধোতি ৰসীকরণপানকসমুট্ঠিতরোগো। সীতালোল়িন্তি নঙ্গলেন কসন্তস্স ফালে লগ্গমত্তিকং উদকেন আলোল়েত্ৰা পাযেতুং অনুজানামীতি অত্থো।
269.Gharadinnakābādhoti vasīkaraṇapānakasamuṭṭhitarogo. Sītāloḷinti naṅgalena kasantassa phāle laggamattikaṃ udakena āloḷetvā pāyetuṃ anujānāmīti attho.
দুট্ঠগহণিকোতি ৰিপন্নগহণিকো; কিচ্ছেন উচ্চারো নিক্খমতীতি অত্থো। আমিসখারন্তি সুক্খোদনং ঝাপেত্ৰা তায ছারিকায পগ্ঘরিতং খারোদকং। মুত্তহরীতকন্তি গোমুত্তপরিভাৰিতং হরীতকং। অভিসন্নকাযোতি উস্সন্নদোসকাযো। অচ্ছকঞ্জিযন্তি তণ্ডুলোদকমণ্ডো। অকটযুসন্তি অসিনিদ্ধো মুগ্গপচিতপানীযো। কটাকটন্তি সোৰ ধোতসিনিদ্ধো। পটিচ্ছাদনীযেনাতি মংসরসেন।
Duṭṭhagahaṇikoti vipannagahaṇiko; kicchena uccāro nikkhamatīti attho. Āmisakhāranti sukkhodanaṃ jhāpetvā tāya chārikāya paggharitaṃ khārodakaṃ. Muttaharītakanti gomuttaparibhāvitaṃ harītakaṃ. Abhisannakāyoti ussannadosakāyo. Acchakañjiyanti taṇḍulodakamaṇḍo. Akaṭayusanti asiniddho muggapacitapānīyo. Kaṭākaṭanti sova dhotasiniddho. Paṭicchādanīyenāti maṃsarasena.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
১৬০. পঞ্চভেসজ্জকথা • 160. Pañcabhesajjakathā
১৬১. মূলাদিভেসজ্জকথা • 161. Mūlādibhesajjakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পঞ্চভেসজ্জাদিকথাৰণ্ণনা • Pañcabhesajjādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পঞ্চভেসজ্জাদিকথাৰণ্ণনা • Pañcabhesajjādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পঞ্চভেসজ্জাদিকথাৰণ্ণনা • Pañcabhesajjādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi
১৬০. পঞ্চভেসজ্জাদিকথা • 160. Pañcabhesajjādikathā
১৬১. মূলাদিভেসজ্জকথা • 161. Mūlādibhesajjakathā
