| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৬. ভেসজ্জক্খন্ধকং
6. Bhesajjakkhandhakaṃ
১৬০. পঞ্চভেসজ্জাদিকথা
160. Pañcabhesajjādikathā
২৬০. ভেসজ্জক্খন্ধকে সরদকালে উপ্পন্নো সারদিকোতি অত্থং দস্সেন্তো আহ ‘‘সরদকালে উপ্পন্নেনা’’তি। ‘‘পিত্তাবাধেনা’’তি ইমিনা আবাধস্স সরূপং দস্সেতি। পিত্তাবাধস্স কারণং ৰিত্থারেন্তো আহ ‘‘তস্মিং হী’’তিআদি। তেনাতি হেতুনা। তেসন্তি ভিক্খূনং। কোট্ঠব্ভন্তরগতন্তি কোট্ঠস্স অব্ভন্তরং গতং। অন্তস্স অন্তো পৰিসনং হোতীতি অধিপ্পাযো। আহারত্থন্তি আহারস্স কিচ্চং, আহারেন ৰা কত্তব্বং কিচ্চং।
260. Bhesajjakkhandhake saradakāle uppanno sāradikoti atthaṃ dassento āha ‘‘saradakāle uppannenā’’ti. ‘‘Pittābādhenā’’ti iminā ābādhassa sarūpaṃ dasseti. Pittābādhassa kāraṇaṃ vitthārento āha ‘‘tasmiṃ hī’’tiādi. Tenāti hetunā. Tesanti bhikkhūnaṃ. Koṭṭhabbhantaragatanti koṭṭhassa abbhantaraṃ gataṃ. Antassa anto pavisanaṃ hotīti adhippāyo. Āhāratthanti āhārassa kiccaṃ, āhārena vā kattabbaṃ kiccaṃ.
২৬১. নচ্ছাদেন্তীতি তানি ভেসজ্জানি ভোজনানি নচ্ছাদেন্তি। কস্মা? ভোজনানং অজীরণত্তা । ইতি ইমমত্থং দস্সেন্তো আহ ‘‘ন জীরন্তী’’তি। নচ্ছাদত্তা ন ৰাতরোগং পটিপ্পস্সম্ভেতুং সক্কোন্তি। এত্থ চ ‘‘ন জীরন্তী’’তি ইমিনা নচ্ছাদনস্স কারণং দস্সেতি। ‘‘ন ৰাত…পে॰… সক্কোন্তী’’তি ইমিনা তস্সেৰ ফলং দস্সেতীতি দট্ঠব্বং। ‘‘সিনিদ্ধানী’’তি ইমিনা সিনিহন্তীতি সেনেহিকানীতি অত্থং দস্সেতি। ভত্তচ্ছন্নকেনাতি এত্থ ভত্তস্স অচ্ছন্নকং নাম ভত্তস্স অরোচিকং ভত্তস্স রুচিযা অনুপ্পাদকন্তি আহ ‘‘ভত্তারোচকেনা’’তি।
261.Nacchādentīti tāni bhesajjāni bhojanāni nacchādenti. Kasmā? Bhojanānaṃ ajīraṇattā . Iti imamatthaṃ dassento āha ‘‘na jīrantī’’ti. Nacchādattā na vātarogaṃ paṭippassambhetuṃ sakkonti. Ettha ca ‘‘na jīrantī’’ti iminā nacchādanassa kāraṇaṃ dasseti. ‘‘Na vāta…pe… sakkontī’’ti iminā tasseva phalaṃ dassetīti daṭṭhabbaṃ. ‘‘Siniddhānī’’ti iminā sinihantīti senehikānīti atthaṃ dasseti. Bhattacchannakenāti ettha bhattassa acchannakaṃ nāma bhattassa arocikaṃ bhattassa ruciyā anuppādakanti āha ‘‘bhattārocakenā’’ti.
২৬২. অচ্ছৰসন্তিআদীসু ৰিনিচ্ছযো ৰেদিতব্বোতি যোজনা। পাল়িযং ‘‘পটিগ্গহিতং নিপ্পক্কং সংসট্ঠ’’ন্তি পদানং কিরিযাৰিসেসনং কত্ৰা ‘‘পরিভুঞ্জিতু’’ন্তি পদেন সম্বন্ধিতব্বভাৰং দস্সেতুং ৰুত্তং ‘‘কালে পটিগ্গহিতন্তি আদীসূ’’তিআদি। তেলপরিভোগেন পরিভুঞ্জিতুন্তি এত্থ কিত্তকং কালং তেলপরিভোগেন পরিভুঞ্জিতব্বন্তি আহ ‘‘সত্তাহকাল’’ন্তি।
262.Acchavasantiādīsu vinicchayo veditabboti yojanā. Pāḷiyaṃ ‘‘paṭiggahitaṃ nippakkaṃ saṃsaṭṭha’’nti padānaṃ kiriyāvisesanaṃ katvā ‘‘paribhuñjitu’’nti padena sambandhitabbabhāvaṃ dassetuṃ vuttaṃ ‘‘kāle paṭiggahitanti ādīsū’’tiādi. Telaparibhogena paribhuñjitunti ettha kittakaṃ kālaṃ telaparibhogena paribhuñjitabbanti āha ‘‘sattāhakāla’’nti.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ১৬০. পঞ্চভেসজ্জকথা • 160. Pañcabhesajjakathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / পঞ্চভেসজ্জাদিকথা • Pañcabhesajjādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পঞ্চভেসজ্জাদিকথাৰণ্ণনা • Pañcabhesajjādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পঞ্চভেসজ্জাদিকথাৰণ্ণনা • Pañcabhesajjādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পঞ্চভেসজ্জাদিকথাৰণ্ণনা • Pañcabhesajjādikathāvaṇṇanā
