| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
6. பே⁴ஸஜ்ஜக்க²ந்த⁴கவண்ணனா
6. Bhesajjakkhandhakavaṇṇanā
பஞ்சபே⁴ஸஜ்ஜாதி³கதா²வண்ணனா
Pañcabhesajjādikathāvaṇṇanā
260. ‘‘யங் பே⁴ஸஜ்ஜஞ்சேவ அஸ்ஸா’’தி பரதோ ‘‘தது³ப⁴யேன பி⁴ய்யோஸோ மத்தாய கிஸ்ஸா ஹொந்தீ’’திஆதி³னா விரோத⁴த³ஸ்ஸனதோ நிதா³னானபெக்க²ங் யதா²லாப⁴வஸேன வுத்தந்தி வேதி³தப்³ப³ங். யதா²னிதா³னங் கஸ்மா ந வுத்தந்தி சே? தத³ஞ்ஞாபெக்கா²தி⁴ப்பாயதோ. ஸப்³ப³பு³த்³த⁴காலேபி ஹி ஸப்பிஆதீ³னங் ஸத்தாஹகாலிகபா⁴வாபெக்கா²தி ததா² வசனேன ப⁴க³வதோ அதி⁴ப்பாயோ, தேனேவ ‘‘ஆஹாரத்த²ஞ்ச ப²ரெய்ய, ந ச ஓளாரிகோ ஆஹாரோ பஞ்ஞாயெய்யா’’தி வுத்தங். ததா² ஹி காலே படிக்³க³ஹெத்வா காலே பரிபு⁴ஞ்ஜிதுந்தி எத்த² ச காலபரிச்சே²தோ³ ந கதோ. குதோயேவ பன லப்³பா⁴ தத³ஞ்ஞாபெக்கா²தி⁴ப்பாயோ ப⁴க³வதோ மூலபே⁴ஸஜ்ஜாதீ³னி தானி படிக்³க³ஹெத்வா யாவஜீவந்தி காலபரிச்சே²தோ³. யங் பன ‘‘அனுஜானாமி, பி⁴க்க²வே, தானி பஞ்ச பே⁴ஸஜ்ஜானி காலே படிக்³க³ஹெத்வா காலே பரிபு⁴ஞ்ஜிது’’ந்தி வசனங், தங் ‘‘ஸன்னிதி⁴ங் கத்வா அபராபரஸ்மிங் தி³வஸே காலே ஏவ பரிபு⁴ஞ்ஜிதுங் அனுஜானாமீ’’தி அதி⁴ப்பாயதோ வுத்தந்தி வேதி³தப்³ப³ங். அஞ்ஞதா² அதிஸயத்தாபா⁴வதோ ‘‘யங் பே⁴ஸஜ்ஜஞ்சேவ அஸ்ஸா’’திஆதி³ விதக்குப்பாதோ³ ந ஸம்ப⁴வதி. பணீதபோ⁴ஜனானுமதியா பஸித்³த⁴த்தா ஆபா³தா⁴னுரூபஸப்பாயாபெக்கா²ய வுத்தானீதி சே? தஞ்ச ந, பி⁴ய்யோஸோ மத்தாய கிஸாதி³பா⁴வாபத்தித³ஸ்ஸனதோ. யதா² ‘‘உச்சு²ரஸங் உபாதா³ய பா²ணித’’ந்தி வுத்தங், ததா² ‘‘நவனீதங் உபாதா³ய ஸப்பி’’ந்தி வத்தப்³ப³தோ நவனீதங் விஸுங் ந வத்தப்³ப³ந்தி சே? ந, விஸேஸத³ஸ்ஸனாதி⁴ப்பாயதோ. யதா² பா²ணிதக்³க³ஹணேன ஸித்³தே⁴பி பரதோ உச்சு²ரஸோ விஸுங் அனுஞ்ஞாதோ உச்சு²ஸாமஞ்ஞதோ கு³ளோத³கட்டா²னே ட²பனாதி⁴ப்பாயதோ. ததா² நவனீதே விஸேஸவிதி⁴த³ஸ்ஸனாதி⁴ப்பாயதோ நவனீதங் விஸுங் அனுஞ்ஞாதந்தி வேதி³தப்³ப³ங். விஸேஸவிதி⁴ பனஸ்ஸ பே⁴ஸஜ்ஜஸிக்கா²பத³ட்ட²கதா²வஸேன வேதி³தப்³ப³ங். வுத்தஞ்ஹி தத்த² ‘‘பசித்வா ஸப்பிங் கத்வா பரிபு⁴ஞ்ஜிதுகாமேன அதோ⁴தம்பி பசிதுங் வட்டதீ’’தி (பாரா॰ அட்ட²॰ 2.622). தத்த² ஸப்பி பக்காவ ஹோதி, நாபக்கா. ததா² பா²ணிதம்பி. நவனீதங் அபக்கமேவ.
260.‘‘Yaṃbhesajjañceva assā’’ti parato ‘‘tadubhayena bhiyyoso mattāya kissā hontī’’tiādinā virodhadassanato nidānānapekkhaṃ yathālābhavasena vuttanti veditabbaṃ. Yathānidānaṃ kasmā na vuttanti ce? Tadaññāpekkhādhippāyato. Sabbabuddhakālepi hi sappiādīnaṃ sattāhakālikabhāvāpekkhāti tathā vacanena bhagavato adhippāyo, teneva ‘‘āhāratthañca phareyya, na ca oḷāriko āhāro paññāyeyyā’’ti vuttaṃ. Tathā hi kāle paṭiggahetvā kāle paribhuñjitunti ettha ca kālaparicchedo na kato. Kutoyeva pana labbhā tadaññāpekkhādhippāyo bhagavato mūlabhesajjādīni tāni paṭiggahetvā yāvajīvanti kālaparicchedo. Yaṃ pana ‘‘anujānāmi, bhikkhave, tāni pañca bhesajjāni kāle paṭiggahetvā kāle paribhuñjitu’’nti vacanaṃ, taṃ ‘‘sannidhiṃ katvā aparāparasmiṃ divase kāle eva paribhuñjituṃ anujānāmī’’ti adhippāyato vuttanti veditabbaṃ. Aññathā atisayattābhāvato ‘‘yaṃ bhesajjañceva assā’’tiādi vitakkuppādo na sambhavati. Paṇītabhojanānumatiyā pasiddhattā ābādhānurūpasappāyāpekkhāya vuttānīti ce? Tañca na, bhiyyoso mattāya kisādibhāvāpattidassanato. Yathā ‘‘ucchurasaṃ upādāya phāṇita’’nti vuttaṃ, tathā ‘‘navanītaṃ upādāya sappi’’nti vattabbato navanītaṃ visuṃ na vattabbanti ce? Na, visesadassanādhippāyato. Yathā phāṇitaggahaṇena siddhepi parato ucchuraso visuṃ anuññāto ucchusāmaññato guḷodakaṭṭhāne ṭhapanādhippāyato. Tathā navanīte visesavidhidassanādhippāyato navanītaṃ visuṃ anuññātanti veditabbaṃ. Visesavidhi panassa bhesajjasikkhāpadaṭṭhakathāvasena veditabbaṃ. Vuttañhi tattha ‘‘pacitvā sappiṃ katvā paribhuñjitukāmena adhotampi pacituṃ vaṭṭatī’’ti (pārā. aṭṭha. 2.622). Tattha sappi pakkāva hoti, nāpakkā. Tathā phāṇitampi. Navanītaṃ apakkameva.
எத்தா²ஹ – நவனீதங் விய உச்சு²ரஸோபி ஸத்தாஹகாலிகபாளியங் ஏவ வத்தப்³போ³தி? ந வத்தப்³போ³. கஸ்மா? ஸத்தாஹகாலிகபாளியங் வுத்தே உச்சு²ரஸோ கு³ளாபதே³ஸேன யதா² அகி³லானஸ்ஸ பா²ணிதங் படிஸித்³த⁴ங், ததா² உச்சு²ரஸோபீதி ஆபஜ்ஜதி, அவுத்தே பன கு³ளங் விய ஸோ பா²ணிதஸங்க்²யங் ந க³ச்ச²தி. இத⁴ அவத்வா பச்சா² வசனேன கு³ளோத³கட்டா²னேவ ட²பிதோ ஹோதி. தத³த்த²மேவ பச்சா²ப⁴த்தங் வட்டனகபானகாதி⁴காரே வுத்தோ, தஸ்மா ஏவ யாமகாலிகோதி சே? ந, அட்ட²கதா²விரோத⁴தோ. ந உபாதா³யத்த²ஸ்ஸ நிஸ்ஸயத்த²த்தாதி சே? கிங் வுத்தங் ஹோதி – ‘‘உச்சு²ரஸங் உபாதா³ய உச்சு²விகதி பா²ணிதந்தி வேதி³தப்³பா³’’தி (பாரா॰ அட்ட²॰ 2.623) யதே³தங் நிஸ்ஸக்³கி³யட்ட²கதா²வசனங், தத்த² ‘‘உபாதா³யா’’தி இமஸ்ஸ நிஸ்ஸாய பச்சயங் கத்வாதி அத்தோ²தி. ந, பரதோ அபரகிரியாய அத³ஸ்ஸனதோ. யதா² ‘‘சக்கு²ஞ்ச படிச்ச ரூபே சா’’திஆதீ³ஸு (ம॰ நி॰ 1.204, 400; 3.421, 425; ஸங்॰ நி॰ 2.43) ‘‘படிச்சா’’தி இமஸ்ஸ உஸ்ஸுக்கவசனஸ்ஸ ‘‘உப்பஜ்ஜதீ’’தி அபரகிரியா தி³ஸ்ஸதி, ந ததா² ‘‘உச்சு²ரஸங் உபாதா³யா’’தி எத்த² அபரகிரியா தி³ஸ்ஸதீதி. அயுத்தமேதங் தத்த² தத³பா⁴வேபி ஸித்³த⁴த்தா. யதா² ‘‘சத்தாரோ ச மஹாபூ⁴தா சதுன்னஞ்ச மஹாபூ⁴தானங் உபாதா³ய ரூப’’ந்தி (த⁴॰ ஸ॰ 584) எத்த² அபரகிரியாய அபா⁴வேபி உஸ்ஸுக்கவசனங் ஸித்³த⁴ங், ததா² எத்தா²பி ஸியாதி? ந, தத்த² பாட²ஸேஸாபெக்க²த்தா. யதா² சத்தாரோ மஹாபூ⁴தா உபாதா³ய வுத்தங், பவத்தகங் வா ரூபந்தி இமங் பாட²ஸேஸங் ஸா பாளி அபெக்க²தி, ந ததா² இத³ங் அட்ட²கதா²வசனங் கஞ்சி பாட²ங் அபெக்க²தி. பரிபுண்ணவாதி³னோ ஹி அட்ட²கதா²சரியா. ஸஞ்ஞாகரணமத்தங் வா தஸ்ஸ ரூபஸ்ஸ. ‘‘அத்தி² ரூபங் உபாதா³யா’’திஆதீ³ஸு (த⁴॰ ஸ॰ 584) ஹி ஸஞ்ஞாகரணமத்தங், ஏவமிதா⁴பீதி வேதி³தப்³ப³ங். இத⁴ பன ‘‘உச்சு²ரஸங் உபாதா³யா’’தி உச்சு²ரஸங் ஆதி³ங் கத்வா, ததோ பட்டா²யாதி அத்தோ², தஸ்மா ‘‘உச்சு²ரஸேன ஸங்ஸட்ட²ங் ப⁴த்தங் அகி³லானோ பி⁴க்கு² விஞ்ஞாபெத்வா பு⁴ஞ்ஜந்தோ பணீதபோ⁴ஜனஸிக்கா²பதே³ன காரேதப்³போ³, பி⁴க்கு²னீ பாடிதே³ஸனியேனா’’தி வுத்தங், தங் அயுத்தந்தி ஏகே. தே விஸேஸஹேதுனோ அபா⁴வங் த³ஸ்ஸெத்வா பஞ்ஞாபேதப்³பா³.
Etthāha – navanītaṃ viya ucchurasopi sattāhakālikapāḷiyaṃ eva vattabboti? Na vattabbo. Kasmā? Sattāhakālikapāḷiyaṃ vutte ucchuraso guḷāpadesena yathā agilānassa phāṇitaṃ paṭisiddhaṃ, tathā ucchurasopīti āpajjati, avutte pana guḷaṃ viya so phāṇitasaṅkhyaṃ na gacchati. Idha avatvā pacchā vacanena guḷodakaṭṭhāneva ṭhapito hoti. Tadatthameva pacchābhattaṃ vaṭṭanakapānakādhikāre vutto, tasmā eva yāmakālikoti ce? Na, aṭṭhakathāvirodhato. Na upādāyatthassa nissayatthattāti ce? Kiṃ vuttaṃ hoti – ‘‘ucchurasaṃ upādāya ucchuvikati phāṇitanti veditabbā’’ti (pārā. aṭṭha. 2.623) yadetaṃ nissaggiyaṭṭhakathāvacanaṃ, tattha ‘‘upādāyā’’ti imassa nissāya paccayaṃ katvāti atthoti. Na, parato aparakiriyāya adassanato. Yathā ‘‘cakkhuñca paṭicca rūpe cā’’tiādīsu (ma. ni. 1.204, 400; 3.421, 425; saṃ. ni. 2.43) ‘‘paṭiccā’’ti imassa ussukkavacanassa ‘‘uppajjatī’’ti aparakiriyā dissati, na tathā ‘‘ucchurasaṃ upādāyā’’ti ettha aparakiriyā dissatīti. Ayuttametaṃ tattha tadabhāvepi siddhattā. Yathā ‘‘cattāro ca mahābhūtā catunnañca mahābhūtānaṃ upādāya rūpa’’nti (dha. sa. 584) ettha aparakiriyāya abhāvepi ussukkavacanaṃ siddhaṃ, tathā etthāpi siyāti? Na, tattha pāṭhasesāpekkhattā. Yathā cattāro mahābhūtā upādāya vuttaṃ, pavattakaṃ vā rūpanti imaṃ pāṭhasesaṃ sā pāḷi apekkhati, na tathā idaṃ aṭṭhakathāvacanaṃ kañci pāṭhaṃ apekkhati. Paripuṇṇavādino hi aṭṭhakathācariyā. Saññākaraṇamattaṃ vā tassa rūpassa. ‘‘Atthi rūpaṃ upādāyā’’tiādīsu (dha. sa. 584) hi saññākaraṇamattaṃ, evamidhāpīti veditabbaṃ. Idha pana ‘‘ucchurasaṃ upādāyā’’ti ucchurasaṃ ādiṃ katvā, tato paṭṭhāyāti attho, tasmā ‘‘ucchurasena saṃsaṭṭhaṃ bhattaṃ agilāno bhikkhu viññāpetvā bhuñjanto paṇītabhojanasikkhāpadena kāretabbo, bhikkhunī pāṭidesaniyenā’’ti vuttaṃ, taṃ ayuttanti eke. Te visesahetuno abhāvaṃ dassetvā paññāpetabbā.
எத்தாவதா ‘‘உச்சு²ரஸங் உபாதா³யாதி உச்சு²ரஸங் ஆதி³ங் கத்வா’’திஆதீ³னங் பதா³னங் அத்த²ங் மிச்சா² க³ஹெத்வா யதி³ ‘‘உச்சு²ரஸங் உபாதா³யா’’தி வசனேன உச்சு²ரஸோ பா²ணிதங் ஸியா, ‘‘அபக்கா வா’’தி வசனங் நிரத்த²கங் அபக்கவசனேன உச்சு²ரஸஸ்ஸ க³ஹிதத்தா. அத² ‘‘பக்கா வா’’தி வசனேன உச்சு²ரஸோ பா²ணிதந்தி ஸித்³த⁴ங், ‘‘உச்சு²ரஸங் உபாதா³யா’’தி வசனங் நிரத்த²கந்தி உத்தரங் வுத்தங், தங் அனுத்தரந்தி ஸாதி⁴தங் ஹோதி. ஸோ சேதேஹி அபக்கா வாதி ஸாமங் பி⁴க்கு²னா அபக்கா வா. அவத்து²கபக்கா வாதி பி⁴க்கு²னாவ ஸாமங் வினா வத்து²னா பக்கா வாதி அத்தோ². தஸ்மா அஞ்ஞதா² ‘‘ஸவத்து²கபக்கா வா’’தி ச வத்தப்³ப³ந்தி அத்தோ² த³ஸ்ஸிதோ, ஸோ து³ட்டு² த³ஸ்ஸிதோ. கஸ்மா? மஹாஅட்ட²கதா²யங் ‘‘ஜா²மஉச்சு²பா²ணிதங் வா கொட்டிதஉச்சு²பா²ணிதங் வா புரேப⁴த்தமேவ வட்டதீ’’தி வுத்தத்தா, ‘‘ஸவத்து²கபக்கா வா’’தி வசனஸ்ஸ ச லத்³தி⁴விரோத⁴தோ அவுத்தத்தா. ‘‘மஹாபச்சரியங் பன ‘ஏதங் ஸவத்து²கபக்கங் வட்டதி நோ வட்டதீ’தி புச்ச²ங் கத்வா ‘உச்சு²பா²ணிதங் பச்சா²ப⁴த்தங் நோ வட்டனகங் நாம நத்தீ²’தி வுத்தங், தங் யுத்த’’ந்தி (பாரா॰ அட்ட²॰ 2.623) வுத்தத்தா ச ஸவத்து²கபக்கா வாதி அத்தோ² ச வுத்தோயேவ ஹோதி, தஸ்மா து³த்³த³ஸ்ஸிதோதி ஸித்³த⁴ங். ஆஹாரத்த²ந்தி ஆஹாரபயோஜனங். ஆஹாரகிச்சங் யாபனந்தி அத்தோ²தி ச.
Ettāvatā ‘‘ucchurasaṃ upādāyāti ucchurasaṃ ādiṃ katvā’’tiādīnaṃ padānaṃ atthaṃ micchā gahetvā yadi ‘‘ucchurasaṃ upādāyā’’ti vacanena ucchuraso phāṇitaṃ siyā, ‘‘apakkā vā’’ti vacanaṃ niratthakaṃ apakkavacanena ucchurasassa gahitattā. Atha ‘‘pakkā vā’’ti vacanena ucchuraso phāṇitanti siddhaṃ, ‘‘ucchurasaṃ upādāyā’’ti vacanaṃ niratthakanti uttaraṃ vuttaṃ, taṃ anuttaranti sādhitaṃ hoti. So cetehi apakkā vāti sāmaṃ bhikkhunā apakkā vā. Avatthukapakkā vāti bhikkhunāva sāmaṃ vinā vatthunā pakkā vāti attho. Tasmā aññathā ‘‘savatthukapakkā vā’’ti ca vattabbanti attho dassito, so duṭṭhu dassito. Kasmā? Mahāaṭṭhakathāyaṃ ‘‘jhāmaucchuphāṇitaṃ vā koṭṭitaucchuphāṇitaṃ vā purebhattameva vaṭṭatī’’ti vuttattā, ‘‘savatthukapakkā vā’’ti vacanassa ca laddhivirodhato avuttattā. ‘‘Mahāpaccariyaṃ pana ‘etaṃ savatthukapakkaṃ vaṭṭati no vaṭṭatī’ti pucchaṃ katvā ‘ucchuphāṇitaṃ pacchābhattaṃ no vaṭṭanakaṃ nāma natthī’ti vuttaṃ, taṃ yutta’’nti (pārā. aṭṭha. 2.623) vuttattā ca savatthukapakkā vāti attho ca vuttoyeva hoti, tasmā duddassitoti siddhaṃ. Āhāratthanti āhārapayojanaṃ. Āhārakiccaṃ yāpananti atthoti ca.
262. தேலபரிபோ⁴கே³னாதி ஸத்தாஹகாலிகபரிபோ⁴கே³ன.
262.Telaparibhogenāti sattāhakālikaparibhogena.
263. ஸதி பச்சயேதி எத்த² ஸதிபச்சயதா கி³லானாகி³லானவஸேன த்³விதா⁴ வேதி³தப்³பா³. விகாலபோ⁴ஜனஸிக்கா²பத³ஸ்ஸ ஹி அனாபத்திவாரே யாமகாலிகாதீ³னங் திண்ணம்பி அவிஸேஸேன ஸதிபச்சயதா வுத்தா. இமஸ்மிங் க²ந்த⁴கே ‘‘அனுஜானாமி, பி⁴க்க²வே, கி³லானஸ்ஸ கு³ளங், அகி³லானஸ்ஸ கு³ளோத³கங், அனுஜானாமி, பி⁴க்க²வே, கி³லானஸ்ஸ லோணஸோவீரகங், அகி³லானஸ்ஸ உத³கஸம்பி⁴ன்ன’’ந்தி வுத்தங். தஸ்மா ஸித்³த⁴ங் ஸதிபச்சயதா கி³லானாகி³லானவஸேன து³விதா⁴தி. அஞ்ஞதா² அஸதி பச்சயே கு³ளோத³காதீ³ஸு ஆபஜ்ஜதி. ததோ ச பாளிவிரோதோ⁴.
263.Sati paccayeti ettha satipaccayatā gilānāgilānavasena dvidhā veditabbā. Vikālabhojanasikkhāpadassa hi anāpattivāre yāmakālikādīnaṃ tiṇṇampi avisesena satipaccayatā vuttā. Imasmiṃ khandhake ‘‘anujānāmi, bhikkhave, gilānassa guḷaṃ, agilānassa guḷodakaṃ, anujānāmi, bhikkhave, gilānassa loṇasovīrakaṃ, agilānassa udakasambhinna’’nti vuttaṃ. Tasmā siddhaṃ satipaccayatā gilānāgilānavasena duvidhāti. Aññathā asati paccaye guḷodakādīsu āpajjati. Tato ca pāḷivirodho.
பிட்டே²ஹீதி பிஸிததேலேஹி. கொட்ட²ப²லந்தி கொட்ட²ருக்க²ஸ்ஸ ப²லங். ‘‘மத³னப²லங் வா’’தி ச லிகி²தங். ஹிங்கு³ஜது நாம ஹிங்கு³ருக்க²ஸ்ஸ த³ண்ட³பல்லவபவாளபாகனிப்ப²ன்னா. ஹிங்கு³ஸிபாடிகா நாம தஸ்ஸ மூலஸாக²பாகனிப்ப²ன்னா. தகங் நாம தஸ்ஸ ருக்க²ஸ்ஸ தசபாகோத³கங். தகபத்தீதி தஸ்ஸ பத்தபாகோத³கங். தகபண்ணீதி தஸ்ஸ ப²லபாகோத³கங். அத² வா ‘‘தகங் நாம லாகா². தகபத்தீதி கித்திமலோமலாகா². தகபண்ணீதி பக்கலாகா²’’தி லிகி²தங். உப்³பி⁴த³ங் நாம ஊஸபங்ஸுமயங்.
Piṭṭhehīti pisitatelehi. Koṭṭhaphalanti koṭṭharukkhassa phalaṃ. ‘‘Madanaphalaṃ vā’’ti ca likhitaṃ. Hiṅgujatu nāma hiṅgurukkhassa daṇḍapallavapavāḷapākanipphannā. Hiṅgusipāṭikā nāma tassa mūlasākhapākanipphannā. Takaṃ nāma tassa rukkhassa tacapākodakaṃ. Takapattīti tassa pattapākodakaṃ. Takapaṇṇīti tassa phalapākodakaṃ. Atha vā ‘‘takaṃ nāma lākhā. Takapattīti kittimalomalākhā. Takapaṇṇīti pakkalākhā’’ti likhitaṃ. Ubbhidaṃ nāma ūsapaṃsumayaṃ.
264. ச²கணங் கோ³மயங். பாகதிகசுண்ணங் நாம அபக்ககஸாவசுண்ணங், தேன ‘‘ட²பெத்வா க³ந்த⁴சுண்ணங் ஸப்³ப³ங் வட்டதீ’’தி வத³ந்தி. சாலிதேஹீதி பரிஸ்ஸாவிதேஹி.
264.Chakaṇaṃ gomayaṃ. Pākatikacuṇṇaṃ nāma apakkakasāvacuṇṇaṃ, tena ‘‘ṭhapetvā gandhacuṇṇaṃ sabbaṃ vaṭṭatī’’ti vadanti. Cālitehīti parissāvitehi.
265. நானாஸம்பா⁴ரேஹி கதந்தி நானோஸதே⁴ஹி.
265.Nānāsambhārehi katanti nānosadhehi.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
160. பஞ்சபே⁴ஸஜ்ஜகதா² • 160. Pañcabhesajjakathā
161. மூலாதி³பே⁴ஸஜ்ஜகதா² • 161. Mūlādibhesajjakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / பஞ்சபே⁴ஸஜ்ஜாதி³கதா² • Pañcabhesajjādikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பஞ்சபே⁴ஸஜ்ஜாதி³கதா²வண்ணனா • Pañcabhesajjādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பஞ்சபே⁴ஸஜ்ஜாதி³கதா²வண்ணனா • Pañcabhesajjādikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi
160. பஞ்சபே⁴ஸஜ்ஜாதி³கதா² • 160. Pañcabhesajjādikathā
161. மூலாதி³பே⁴ஸஜ்ஜகதா² • 161. Mūlādibhesajjakathā
