| Library / Tipiṭaka / तिपिटक • Tipiṭaka / विमतिविनोदनी-टीका • Vimativinodanī-ṭīkā |
६. भेसज्जक्खन्धको
6. Bhesajjakkhandhako
पञ्चभेसज्जादिकथावण्णना
Pañcabhesajjādikathāvaṇṇanā
२६०. भेसज्जक्खन्धके पित्तं कोट्ठब्भन्तरगतं होतीति बहिसरीरे ब्यापेत्वा ठितं अबद्धपित्तं कोट्ठब्भन्तरगतं होति, तेन पित्तं कुपितं होतीति अधिप्पायो।
260. Bhesajjakkhandhake pittaṃ koṭṭhabbhantaragataṃ hotīti bahisarīre byāpetvā ṭhitaṃ abaddhapittaṃ koṭṭhabbhantaragataṃ hoti, tena pittaṃ kupitaṃ hotīti adhippāyo.
२६१-२. पाळियं नच्छादेन्तीति रुचिं न उप्पादेन्ति। सुसुकाति समुद्दे एका मच्छजाति, कुम्भिलातिपि वदन्ति। संसट्ठन्ति परिस्सावितं।
261-2. Pāḷiyaṃ nacchādentīti ruciṃ na uppādenti. Susukāti samudde ekā macchajāti, kumbhilātipi vadanti. Saṃsaṭṭhanti parissāvitaṃ.
२६३. पिट्ठेहीति पिसितेहि। कसावेहीति तचादीनि उदके तापेत्वा गहितऊसरेहि। उब्भिदन्ति ऊसरपंसुमयं। लोणबिलन्ति लोणविसेसो।
263.Piṭṭhehīti pisitehi. Kasāvehīti tacādīni udake tāpetvā gahitaūsarehi. Ubbhidanti ūsarapaṃsumayaṃ. Loṇabilanti loṇaviseso.
२६४-५. छकणन्ति गोमयं। पाकतिकचुण्णन्ति अपक्ककसावचुण्णं, गन्धचुण्णं पन न वट्टति। पाळियं चुण्णचालिनिन्ति उदुक्खले कोट्टितचुण्णपरिस्सावनिं। सुवण्णगेरुकोति सुवण्णतुत्थादि। पाळियं अञ्जनूपपिसनन्ति अञ्जने उपनेतुं पिसितब्बभेसज्जं।
264-5.Chakaṇanti gomayaṃ. Pākatikacuṇṇanti apakkakasāvacuṇṇaṃ, gandhacuṇṇaṃ pana na vaṭṭati. Pāḷiyaṃ cuṇṇacālininti udukkhale koṭṭitacuṇṇaparissāvaniṃ. Suvaṇṇagerukoti suvaṇṇatutthādi. Pāḷiyaṃ añjanūpapisananti añjane upanetuṃ pisitabbabhesajjaṃ.
२६७-९. कबळिकाति उपनाहभेसज्जं। घरदिन्नकाबाधो नाम घरणिया दिन्नवसीकरणभेसज्जसमुट्ठितआबाधो। ताय छारिकाय पग्घरितं खारोदकन्ति परिस्सावने तच्छारिकं पक्खिपित्वा उदके अभिसिञ्चिते ततो छारिकतो हेट्ठा पग्घरितं खारोदकं। पाळियं अकटयूसेनाति अनभिसङ्खतेन मुग्गयूसेन। कटाकटेनाति मुग्गे पचित्वा अचालेत्वा परिस्सावितेन मुग्गयूसेनाति वदन्ति।
267-9.Kabaḷikāti upanāhabhesajjaṃ. Gharadinnakābādho nāma gharaṇiyā dinnavasīkaraṇabhesajjasamuṭṭhitaābādho. Tāya chārikāya paggharitaṃ khārodakanti parissāvane tacchārikaṃ pakkhipitvā udake abhisiñcite tato chārikato heṭṭhā paggharitaṃ khārodakaṃ. Pāḷiyaṃ akaṭayūsenāti anabhisaṅkhatena muggayūsena. Kaṭākaṭenāti mugge pacitvā acāletvā parissāvitena muggayūsenāti vadanti.
पञ्चभेसज्जादिकथावण्णना निट्ठिता।
Pañcabhesajjādikathāvaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महावग्गपाळि • Mahāvaggapāḷi
१६०. पञ्चभेसज्जकथा • 160. Pañcabhesajjakathā
१६१. मूलादिभेसज्जकथा • 161. Mūlādibhesajjakathā
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / महावग्ग-अट्ठकथा • Mahāvagga-aṭṭhakathā / पञ्चभेसज्जादिकथा • Pañcabhesajjādikathā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / पञ्चभेसज्जादिकथावण्णना • Pañcabhesajjādikathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā / पञ्चभेसज्जादिकथावण्णना • Pañcabhesajjādikathāvaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / पाचित्यादियोजनापाळि • Pācityādiyojanāpāḷi
१६०. पञ्चभेसज्जादिकथा • 160. Pañcabhesajjādikathā
१६१. मूलादिभेसज्जकथा • 161. Mūlādibhesajjakathā
