| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
6. භෙසජ්‌ජක්‌ඛන්‌ධකො
6. Bhesajjakkhandhako
පඤ්‌චභෙසජ්‌ජාදිකථාවණ්‌ණනා
Pañcabhesajjādikathāvaṇṇanā
260. භෙසජ්‌ජක්‌ඛන්‌ධකෙ පිත්‌තං කොට්‌ඨබ්‌භන්‌තරගතං හොතීති බහිසරීරෙ බ්‍යාපෙත්‌වා ඨිතං අබද්‌ධපිත්‌තං කොට්‌ඨබ්‌භන්‌තරගතං හොති, තෙන පිත්‌තං කුපිතං හොතීති අධිප්‌පායො.
260. Bhesajjakkhandhake pittaṃ koṭṭhabbhantaragataṃ hotīti bahisarīre byāpetvā ṭhitaṃ abaddhapittaṃ koṭṭhabbhantaragataṃ hoti, tena pittaṃ kupitaṃ hotīti adhippāyo.
261-2. පාළියං නච්‌ඡාදෙන්‌තීති රුචිං න උප්‌පාදෙන්‌ති. සුසුකාති සමුද්‌දෙ එකා මච්‌ඡජාති, කුම්‌භිලාතිපි වදන්‌ති. සංසට්‌ඨන්‌ති පරිස්‌සාවිතං.
261-2. Pāḷiyaṃ nacchādentīti ruciṃ na uppādenti. Susukāti samudde ekā macchajāti, kumbhilātipi vadanti. Saṃsaṭṭhanti parissāvitaṃ.
263. පිට්‌ඨෙහීති පිසිතෙහි. කසාවෙහීති තචාදීනි උදකෙ තාපෙත්‌වා ගහිතඌසරෙහි. උබ්‌භිදන්‌ති ඌසරපංසුමයං. ලොණබිලන්‌ති ලොණවිසෙසො.
263.Piṭṭhehīti pisitehi. Kasāvehīti tacādīni udake tāpetvā gahitaūsarehi. Ubbhidanti ūsarapaṃsumayaṃ. Loṇabilanti loṇaviseso.
264-5. ඡකණන්‌ති ගොමයං. පාකතිකචුණ්‌ණන්‌ති අපක්‌කකසාවචුණ්‌ණං, ගන්‌ධචුණ්‌ණං පන න වට්‌ටති. පාළියං චුණ්‌ණචාලිනින්‌ති උදුක්‌ඛලෙ කොට්‌ටිතචුණ්‌ණපරිස්‌සාවනිං. සුවණ්‌ණගෙරුකොති සුවණ්‌ණතුත්‌ථාදි. පාළියං අඤ්‌ජනූපපිසනන්‌ති අඤ්‌ජනෙ උපනෙතුං පිසිතබ්‌බභෙසජ්‌ජං.
264-5.Chakaṇanti gomayaṃ. Pākatikacuṇṇanti apakkakasāvacuṇṇaṃ, gandhacuṇṇaṃ pana na vaṭṭati. Pāḷiyaṃ cuṇṇacālininti udukkhale koṭṭitacuṇṇaparissāvaniṃ. Suvaṇṇagerukoti suvaṇṇatutthādi. Pāḷiyaṃ añjanūpapisananti añjane upanetuṃ pisitabbabhesajjaṃ.
267-9. කබළිකාති උපනාහභෙසජ්‌ජං. ඝරදින්‌නකාබාධො නාම ඝරණියා දින්‌නවසීකරණභෙසජ්‌ජසමුට්‌ඨිතආබාධො. තාය ඡාරිකාය පග්‌ඝරිතං ඛාරොදකන්‌ති පරිස්‌සාවනෙ තච්‌ඡාරිකං පක්‌ඛිපිත්‌වා උදකෙ අභිසිඤ්‌චිතෙ තතො ඡාරිකතො හෙට්‌ඨා පග්‌ඝරිතං ඛාරොදකං. පාළියං අකටයූසෙනාති අනභිසඞ්‌ඛතෙන මුග්‌ගයූසෙන. කටාකටෙනාති මුග්‌ගෙ පචිත්‌වා අචාලෙත්‌වා පරිස්‌සාවිතෙන මුග්‌ගයූසෙනාති වදන්‌ති.
267-9.Kabaḷikāti upanāhabhesajjaṃ. Gharadinnakābādho nāma gharaṇiyā dinnavasīkaraṇabhesajjasamuṭṭhitaābādho. Tāya chārikāya paggharitaṃ khārodakanti parissāvane tacchārikaṃ pakkhipitvā udake abhisiñcite tato chārikato heṭṭhā paggharitaṃ khārodakaṃ. Pāḷiyaṃ akaṭayūsenāti anabhisaṅkhatena muggayūsena. Kaṭākaṭenāti mugge pacitvā acāletvā parissāvitena muggayūsenāti vadanti.
පඤ්‌චභෙසජ්‌ජාදිකථාවණ්‌ණනා නිට්‌ඨිතා.
Pañcabhesajjādikathāvaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi
160. පඤ්‌චභෙසජ්‌ජකථා • 160. Pañcabhesajjakathā
161. මූලාදිභෙසජ්‌ජකථා • 161. Mūlādibhesajjakathā
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / පඤ්‌චභෙසජ්‌ජාදිකථා • Pañcabhesajjādikathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / පඤ්‌චභෙසජ්‌ජාදිකථාවණ්‌ණනා • Pañcabhesajjādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / පඤ්‌චභෙසජ්‌ජාදිකථාවණ්‌ණනා • Pañcabhesajjādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi
160. පඤ්‌චභෙසජ්‌ජාදිකථා • 160. Pañcabhesajjādikathā
161. මූලාදිභෙසජ්‌ජකථා • 161. Mūlādibhesajjakathā
