| Library / Tipiṭaka / തിപിടക • Tipiṭaka / സാരത്ഥദീപനീ-ടീകാ • Sāratthadīpanī-ṭīkā |
൬. ഭേസജ്ജക്ഖന്ധകം
6. Bhesajjakkhandhakaṃ
പഞ്ചഭേസജ്ജാദികഥാവണ്ണനാ
Pañcabhesajjādikathāvaṇṇanā
൨൬൧. ഭേസജ്ജക്ഖന്ധകേ നച്ഛാദേന്തീതി രുചിം ന ഉപ്പാദേന്തി.
261. Bhesajjakkhandhake nacchādentīti ruciṃ na uppādenti.
൨൬൨. സുസുകാതി സമുദ്ദേ ഭവാ ഏകാ മച്ഛജാതി. കുമ്ഭീലാതിപി വദന്തി. സംസട്ഠന്തി പരിസ്സാവിതം. തേലപരിഭോഗേനാതി സത്താഹകാലികപരിഭോഗം സന്ധായ വുത്തം.
262.Susukāti samudde bhavā ekā macchajāti. Kumbhīlātipi vadanti. Saṃsaṭṭhanti parissāvitaṃ. Telaparibhogenāti sattāhakālikaparibhogaṃ sandhāya vuttaṃ.
൨൬൩. പിട്ഠേഹീതി പിസിതേഹി. ഉബ്ഭിദം നാമ ഊസരപംസുമയം.
263.Piṭṭhehīti pisitehi. Ubbhidaṃ nāma ūsarapaṃsumayaṃ.
൨൬൪. ഛകണന്തി ഗോമയം. പാകതികചുണ്ണം നാമ അപക്കകസാവചുണ്ണം. തേന ഠപേത്വാ ഗന്ധചുണ്ണം സബ്ബം വട്ടതീതി വദന്തി.
264.Chakaṇanti gomayaṃ. Pākatikacuṇṇaṃ nāma apakkakasāvacuṇṇaṃ. Tena ṭhapetvā gandhacuṇṇaṃ sabbaṃ vaṭṭatīti vadanti.
൨൬൫. സുവണ്ണഗേരുകോതി സുവണ്ണതുത്ഥാദി. അഞ്ജനൂപപിസനന്തി അഞ്ജനത്ഥായ ഉപപിസിതബ്ബം യം കിഞ്ചി ചുണ്ണജാതം.
265.Suvaṇṇagerukoti suvaṇṇatutthādi. Añjanūpapisananti añjanatthāya upapisitabbaṃ yaṃ kiñci cuṇṇajātaṃ.
൨൬൮. സാമം ഗഹേത്വാതി ഏത്ഥ സപ്പദട്ഠസ്സ അത്ഥായ അഞ്ഞേന ഭിക്ഖുനാ ഗഹിതമ്പി സാമം ഗഹിതസങ്ഖമേവ ഗച്ഛതീതി വേദിതബ്ബം.
268.Sāmaṃ gahetvāti ettha sappadaṭṭhassa atthāya aññena bhikkhunā gahitampi sāmaṃ gahitasaṅkhameva gacchatīti veditabbaṃ.
൨൬൯. ഘരദിന്നകാബാധോ നാമ വസീകരണത്ഥായ ഘരണിയാ ദിന്നഭേസജ്ജസമുട്ഠിതോ ആബാധോ. തേനാഹ ‘‘വസീകരണപാണകസമുട്ഠിതരോഗോ’’തി. ഘര-സദ്ദോ ചേത്ഥ അഭേദേന ഘരണിയാ വത്തമാനോ അധിപ്പേതോ. ‘‘അകടയൂസേനാതി അനഭിസങ്ഖതേന മുഗ്ഗയൂസേന. കടാകടേനാതി മുഗ്ഗേ പചിത്വാ അചാലേത്വാവ പരിസ്സാവിതേന മുഗ്ഗസൂപേനാ’’തി ഗണ്ഠിപദേസു വുത്തം.
269.Gharadinnakābādho nāma vasīkaraṇatthāya gharaṇiyā dinnabhesajjasamuṭṭhito ābādho. Tenāha ‘‘vasīkaraṇapāṇakasamuṭṭhitarogo’’ti. Ghara-saddo cettha abhedena gharaṇiyā vattamāno adhippeto. ‘‘Akaṭayūsenāti anabhisaṅkhatena muggayūsena. Kaṭākaṭenāti mugge pacitvā acāletvāva parissāvitena muggasūpenā’’ti gaṇṭhipadesu vuttaṃ.
Related texts:
തിപിടക (മൂല) • Tipiṭaka (Mūla) / വിനയപിടക • Vinayapiṭaka / മഹാവഗ്ഗപാളി • Mahāvaggapāḷi
൧൬൦. പഞ്ചഭേസജ്ജകഥാ • 160. Pañcabhesajjakathā
൧൬൧. മൂലാദിഭേസജ്ജകഥാ • 161. Mūlādibhesajjakathā
അട്ഠകഥാ • Aṭṭhakathā / വിനയപിടക (അട്ഠകഥാ) • Vinayapiṭaka (aṭṭhakathā) / മഹാവഗ്ഗ-അട്ഠകഥാ • Mahāvagga-aṭṭhakathā / പഞ്ചഭേസജ്ജാദികഥാ • Pañcabhesajjādikathā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / വജിരബുദ്ധി-ടീകാ • Vajirabuddhi-ṭīkā / പഞ്ചഭേസജ്ജാദികഥാവണ്ണനാ • Pañcabhesajjādikathāvaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / വിമതിവിനോദനീ-ടീകാ • Vimativinodanī-ṭīkā / പഞ്ചഭേസജ്ജാദികഥാവണ്ണനാ • Pañcabhesajjādikathāvaṇṇanā
ടീകാ • Tīkā / വിനയപിടക (ടീകാ) • Vinayapiṭaka (ṭīkā) / പാചിത്യാദിയോജനാപാളി • Pācityādiyojanāpāḷi
൧൬൦. പഞ്ചഭേസജ്ജാദികഥാ • 160. Pañcabhesajjādikathā
൧൬൧. മൂലാദിഭേസജ്ജകഥാ • 161. Mūlādibhesajjakathā
