| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༦. བྷེསཛྫཀྑནྡྷཀོ
6. Bhesajjakkhandhako
༡༦༠. པཉྩབྷེསཛྫཀཐཱ
160. Pañcabhesajjakathā
༢༦༠. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན བྷིཀྑཱུནཾ སཱརདིཀེན ཨཱབཱདྷེན ཕུཊྛཱནཾ ཡཱགུཔི པཱིཏཱ ཨུགྒཙྪཏི, བྷཏྟམྤི བྷུཏྟཾ ཨུགྒཙྪཏི། ཏེ ཏེན ཀིསཱ ཧོནྟི, ལཱུཁཱ, དུབྦཎྞཱ, ཨུཔྤཎྜུཔྤཎྜུཀཛཱཏཱ, དྷམནིསནྠཏགཏྟཱ། ཨདྡསཱ ཁོ བྷགཝཱ ཏེ བྷིཀྑཱུ ཀིསེ ལཱུཁེ དུབྦཎྞེ ཨུཔྤཎྜུཔྤཎྜུཀཛཱཏེ དྷམནིསནྠཏགཏྟེ, དིསྭཱན ཨཱཡསྨནྟཾ ཨཱནནྡཾ ཨཱམནྟེསི – ‘‘ཀིཾ ནུ ཁོ, ཨཱནནྡ, ཨེཏརཧི བྷིཀྑཱུ ཀིསཱ, ལཱུཁཱ, དུབྦཎྞཱ, ཨུཔྤཎྜུཔྤཎྜུཀཛཱཏཱ, དྷམནིསནྠཏགཏྟཱ’’ཏི? ‘‘ཨེཏརཧི, བྷནྟེ, བྷིཀྑཱུནཾ སཱརདིཀེན ཨཱབཱདྷེན ཕུཊྛཱནཾ ཡཱགུཔི པཱིཏཱ ཨུགྒཙྪཏི, བྷཏྟམྤི བྷུཏྟཾ ཨུགྒཙྪཏི། ཏེ ཏེན ཀིསཱ ཧོནྟི, ལཱུཁཱ, དུབྦཎྞཱ, ཨུཔྤཎྜུཔྤཎྜུཀཛཱཏཱ, དྷམནིསནྠཏགཏྟཱ’’ཏི། ཨཐ ཁོ བྷགཝཏོ རཧོགཏསྶ པཊིསལླཱིནསྶ ཨེཝཾ ཙེཏསོ པརིཝིཏཀྐོ ཨུདཔཱདི – ‘‘ཨེཏརཧི ཁོ བྷིཀྑཱུནཾ སཱརདིཀེན ཨཱབཱདྷེན ཕུཊྛཱནཾ ཡཱགུཔི པཱིཏཱ ཨུགྒཙྪཏི, བྷཏྟམྤི བྷུཏྟཾ ཨུགྒཙྪཏི། ཏེ ཏེན ཀིསཱ ཧོནྟི, ལཱུཁཱ, དུབྦཎྞཱ, ཨུཔྤཎྜུཔྤཎྜུཀཛཱཏཱ, དྷམནིསནྠཏགཏྟཱ། ཀིཾ ནུ ཁོ ཨཧཾ བྷིཀྑཱུནཾ བྷེསཛྫཾ ཨནུཛཱནེཡྻཾ, ཡཾ བྷེསཛྫཉྩེཝ ཨསྶ བྷེསཛྫསམྨཏཉྩ ལོཀསྶ, ཨཱཧཱརཏྠཉྩ ཕརེཡྻ, ན ཙ ཨོལཱ༹རིཀོ ཨཱཧཱརོ པཉྙཱཡེཡྻཱ’’ཏི? ཨཐ ཁོ བྷགཝཏོ ཨེཏདཧོསི – ‘‘ཨིམཱནི ཁོ པཉྩ བྷེསཛྫཱནི, སེཡྻཐིདཾ – སཔྤི, ནཝནཱིཏཾ, ཏེལཾ, མདྷུ, ཕཱཎིཏཾ; བྷེསཛྫཱནི ཙེཝ བྷེསཛྫསམྨཏཱནི ཙ ལོཀསྶ, ཨཱཧཱརཏྠཉྩ ཕརནྟི, ན ཙ ཨོལཱ༹རིཀོ ཨཱཧཱརོ པཉྙཱཡཏི། ཡཾནཱུནཱཧཾ བྷིཀྑཱུནཾ ཨིམཱནི པཉྩ བྷེསཛྫཱནི ཨནུཛཱནེཡྻཾ, ཀཱལེ པཊིགྒཧེཏྭཱ ཀཱལེ པརིབྷུཉྫིཏུ’’ནྟི། ཨཐ ཁོ བྷགཝཱ སཱཡནྷསམཡཾ པཊིསལླཱནཱ ཝུཊྛིཏོ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཨིདྷ མཡ྄ཧཾ, བྷིཀྑཝེ, རཧོགཏསྶ པཊིསལླཱིནསྶ ཨེཝཾ ཙེཏསོ པརིཝིཏཀྐོ ཨུདཔཱདི – ‘ཨེཏརཧི ཁོ བྷིཀྑཱུནཾ སཱརདིཀེན ཨཱབཱདྷེན ཕུཊྛཱནཾ ཡཱགུཔི པཱིཏཱ ཨུགྒཙྪཏི, བྷཏྟམྤི བྷུཏྟཾ ཨུགྒཙྪཏི། ཏེ ཏེན ཀིསཱ ཧོནྟི, ལཱུཁཱ, དུབྦཎྞཱ, ཨུཔྤཎྜུཔྤཎྜུཀཛཱཏཱ, དྷམནིསནྠཏགཏྟཱ། ཀིཾ ནུ ཁོ ཨཧཾ བྷིཀྑཱུནཾ བྷེསཛྫཾ ཨནུཛཱནེཡྻཾ, ཡཾ བྷེསཛྫཉྩེཝ ཨསྶ བྷེསཛྫསམྨཏཉྩ ལོཀསྶ, ཨཱཧཱརཏྠཉྩ ཕརེཡྻ, ན ཙ ཨོལཱ༹རིཀོ ཨཱཧཱརོ པཉྙཱཡེཡྻཱ’ཏི། ཏསྶ མཡ྄ཧཾ, བྷིཀྑཝེ, ཨེཏདཧོསི ‘ཨིམཱནི ཁོ པཉྩ བྷེསཛྫཱནི , སེཡྻཐིདཾ – སཔྤི, ནཝནཱིཏཾ, ཏེལཾ, མདྷུ, ཕཱཎིཏཾ; བྷེསཛྫཱནི ཙེཝ བྷེསཛྫསམྨཏཱནི ཙ ལོཀསྶ, ཨཱཧཱརཏྠཉྩ ཕརནྟི, ན ཙ ཨོལཱ༹རིཀོ ཨཱཧཱརོ པཉྙཱཡཏི། ཡཾནཱུནཱཧཾ བྷིཀྑཱུནཾ ཨིམཱནི པཉྩ བྷེསཛྫཱནི ཨནུཛཱནེཡྻཾ, ཀཱལེ པཊིགྒཧེཏྭཱ ཀཱལེ པརིབྷུཉྫིཏུ’ནྟི། ཨནུཛཱནཱམི, བྷིཀྑཝེ, ཏཱནི པཉྩ བྷེསཛྫཱནི ཀཱལེ པཊིགྒཧེཏྭཱ ཀཱལེ པརིབྷུཉྫིཏུ’’ནྟི།
260. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhūnaṃ sāradikena ābādhena phuṭṭhānaṃ yāgupi pītā uggacchati, bhattampi bhuttaṃ uggacchati. Te tena kisā honti, lūkhā, dubbaṇṇā, uppaṇḍuppaṇḍukajātā, dhamanisanthatagattā. Addasā kho bhagavā te bhikkhū kise lūkhe dubbaṇṇe uppaṇḍuppaṇḍukajāte dhamanisanthatagatte, disvāna āyasmantaṃ ānandaṃ āmantesi – ‘‘kiṃ nu kho, ānanda, etarahi bhikkhū kisā, lūkhā, dubbaṇṇā, uppaṇḍuppaṇḍukajātā, dhamanisanthatagattā’’ti? ‘‘Etarahi, bhante, bhikkhūnaṃ sāradikena ābādhena phuṭṭhānaṃ yāgupi pītā uggacchati, bhattampi bhuttaṃ uggacchati. Te tena kisā honti, lūkhā, dubbaṇṇā, uppaṇḍuppaṇḍukajātā, dhamanisanthatagattā’’ti. Atha kho bhagavato rahogatassa paṭisallīnassa evaṃ cetaso parivitakko udapādi – ‘‘etarahi kho bhikkhūnaṃ sāradikena ābādhena phuṭṭhānaṃ yāgupi pītā uggacchati, bhattampi bhuttaṃ uggacchati. Te tena kisā honti, lūkhā, dubbaṇṇā, uppaṇḍuppaṇḍukajātā, dhamanisanthatagattā. Kiṃ nu kho ahaṃ bhikkhūnaṃ bhesajjaṃ anujāneyyaṃ, yaṃ bhesajjañceva assa bhesajjasammatañca lokassa, āhāratthañca phareyya, na ca oḷāriko āhāro paññāyeyyā’’ti? Atha kho bhagavato etadahosi – ‘‘imāni kho pañca bhesajjāni, seyyathidaṃ – sappi, navanītaṃ, telaṃ, madhu, phāṇitaṃ; bhesajjāni ceva bhesajjasammatāni ca lokassa, āhāratthañca pharanti, na ca oḷāriko āhāro paññāyati. Yaṃnūnāhaṃ bhikkhūnaṃ imāni pañca bhesajjāni anujāneyyaṃ, kāle paṭiggahetvā kāle paribhuñjitu’’nti. Atha kho bhagavā sāyanhasamayaṃ paṭisallānā vuṭṭhito etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘idha mayhaṃ, bhikkhave, rahogatassa paṭisallīnassa evaṃ cetaso parivitakko udapādi – ‘etarahi kho bhikkhūnaṃ sāradikena ābādhena phuṭṭhānaṃ yāgupi pītā uggacchati, bhattampi bhuttaṃ uggacchati. Te tena kisā honti, lūkhā, dubbaṇṇā, uppaṇḍuppaṇḍukajātā, dhamanisanthatagattā. Kiṃ nu kho ahaṃ bhikkhūnaṃ bhesajjaṃ anujāneyyaṃ, yaṃ bhesajjañceva assa bhesajjasammatañca lokassa, āhāratthañca phareyya, na ca oḷāriko āhāro paññāyeyyā’ti. Tassa mayhaṃ, bhikkhave, etadahosi ‘imāni kho pañca bhesajjāni , seyyathidaṃ – sappi, navanītaṃ, telaṃ, madhu, phāṇitaṃ; bhesajjāni ceva bhesajjasammatāni ca lokassa, āhāratthañca pharanti, na ca oḷāriko āhāro paññāyati. Yaṃnūnāhaṃ bhikkhūnaṃ imāni pañca bhesajjāni anujāneyyaṃ, kāle paṭiggahetvā kāle paribhuñjitu’nti. Anujānāmi, bhikkhave, tāni pañca bhesajjāni kāle paṭiggahetvā kāle paribhuñjitu’’nti.
༢༦༡. ཏེན ཁོ པན སམཡེན བྷིཀྑཱུ ཏཱནི པཉྩ བྷེསཛྫཱནི ཀཱལེ པཊིགྒཧེཏྭཱ ཀཱལེ པརིབྷུཉྫནྟི། ཏེསཾ ཡཱནིཔི ཏཱནི པཱཀཏིཀཱནི ལཱུཁཱནི བྷོཛནཱནི ཏཱནིཔི ནཙྪཱདེནྟི, པགེཝ སེནེསིཏཱནི 1། ཏེ ཏེན ཙེཝ སཱརདིཀེན ཨཱབཱདྷེན ཕུཊྛཱ, ཨིམིནཱ ཙ བྷཏྟཱཙྪཱདཀེན 2, ཏདུབྷཡེན བྷིཡྻོསོམཏྟཱཡ ཀིསཱ ཧོནྟི, ལཱུཁཱ, དུབྦཎྞཱ, ཨུཔྤཎྜུཔྤཎྜུཀཛཱཏཱ, དྷམནིསནྠཏགཏྟཱ། ཨདྡསཱ ཁོ བྷགཝཱ ཏེ བྷིཀྑཱུ བྷིཡྻོསོམཏྟཱཡ ཀིསེ ལཱུཁེ དུབྦཎྞེ ཨུཔྤཎྜུཔྤཎྜུཀཛཱཏེ དྷམནིསནྠཏགཏྟེ, དིསྭཱན ཨཱཡསྨནྟཾ ཨཱནནྡཾ ཨཱམནྟེསི – ‘‘ཀིཾ ནུ ཁོ, ཨཱནནྡ, ཨེཏརཧི བྷིཀྑཱུ བྷིཡྻོསོམཏྟཱཡ ཀིསཱ, ལཱུཁཱ, དུབྦཎྞཱ, ཨུཔྤཎྜུཔྤཎྜུཀཛཱཏཱ, དྷམནིསནྠཏགཏྟཱ’’ཏི? ‘‘ཨེཏརཧི, བྷནྟེ, བྷིཀྑཱུ ཏཱནི ཙ པཉྩ བྷེསཛྫཱནི ཀཱལེ པཊིགྒཧེཏྭཱ ཀཱལེ པརིབྷུཉྫནྟི། ཏེསཾ ཡཱནིཔི ཏཱནི པཱཀཏིཀཱནི ལཱུཁཱནི བྷོཛནཱནི ཏཱནིཔི ནཙྪཱདེནྟི, པགེཝ སེནེསིཀཱནི། ཏེ ཏེན ཙེཝ སཱརདིཀེན ཨཱབཱདྷེན ཕུཊྛཱ, ཨིམིནཱ ཙ བྷཏྟཱཙྪཱདཀེན, ཏདུབྷཡེན བྷིཡྻོསོམཏྟཱཡ ཀིསཱ, ལཱུཁཱ, དུབྦཎྞཱ, ཨུཔྤཎྜུཔྤཎྜུཀཛཱཏཱ, དྷམནིསནྠཏགཏྟཱ’’ཏི། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཨནུཛཱནཱམི, བྷིཀྑཝེ, ཏཱནི པཉྩ བྷེསཛྫཱནི པཊིགྒཧེཏྭཱ ཀཱལེཔི ཝིཀཱལེཔི པརིབྷུཉྫིཏུ’’ནྟི།
261. Tena kho pana samayena bhikkhū tāni pañca bhesajjāni kāle paṭiggahetvā kāle paribhuñjanti. Tesaṃ yānipi tāni pākatikāni lūkhāni bhojanāni tānipi nacchādenti, pageva senesitāni 3. Te tena ceva sāradikena ābādhena phuṭṭhā, iminā ca bhattācchādakena 4, tadubhayena bhiyyosomattāya kisā honti, lūkhā, dubbaṇṇā, uppaṇḍuppaṇḍukajātā, dhamanisanthatagattā. Addasā kho bhagavā te bhikkhū bhiyyosomattāya kise lūkhe dubbaṇṇe uppaṇḍuppaṇḍukajāte dhamanisanthatagatte, disvāna āyasmantaṃ ānandaṃ āmantesi – ‘‘kiṃ nu kho, ānanda, etarahi bhikkhū bhiyyosomattāya kisā, lūkhā, dubbaṇṇā, uppaṇḍuppaṇḍukajātā, dhamanisanthatagattā’’ti? ‘‘Etarahi, bhante, bhikkhū tāni ca pañca bhesajjāni kāle paṭiggahetvā kāle paribhuñjanti. Tesaṃ yānipi tāni pākatikāni lūkhāni bhojanāni tānipi nacchādenti, pageva senesikāni. Te tena ceva sāradikena ābādhena phuṭṭhā, iminā ca bhattācchādakena, tadubhayena bhiyyosomattāya kisā, lūkhā, dubbaṇṇā, uppaṇḍuppaṇḍukajātā, dhamanisanthatagattā’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, tāni pañca bhesajjāni paṭiggahetvā kālepi vikālepi paribhuñjitu’’nti.
༢༦༢. ཏེན ཁོ པན སམཡེན གིལཱནཱནཾ བྷིཀྑཱུནཾ ཝསེཧི བྷེསཛྫེཧི ཨཏྠོ ཧོཏི། བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཝསཱནི བྷེསཛྫཱནི – ཨཙྪཝསཾ, མཙྪཝསཾ, སུསུཀཱཝསཾ , སཱུཀརཝསཾ, གདྲབྷཝསཾ – ཀཱལེ པཊིགྒཧིཏཾ ཀཱལེ ནིཔྤཀྐཾ 5 ཀཱལེ སཾསཊྛཾ ཏེལཔརིབྷོགེན པརིབྷུཉྫིཏུཾ། ཝིཀཱལེ ཙེ, བྷིཀྑཝེ, པཊིགྒཧིཏཾ ཝིཀཱལེ ནིཔྤཀྐཾ ཝིཀཱལེ སཾསཊྛཾ, ཏཾ ཙེ པརིབྷུཉྫེཡྻ, ཨཱཔཏྟི ཏིཎྞཾ དུཀྐཊཱནཾ། ཀཱལེ ཙེ, བྷིཀྑཝེ, པཊིགྒཧིཏཾ ཝིཀཱལེ ནིཔྤཀྐཾ ཝིཀཱལེ སཾསཊྛཾ, ཏཾ ཙེ པརིབྷུཉྫེཡྻ, ཨཱཔཏྟི དྭིནྣཾ དུཀྐཊཱནཾ། ཀཱལེ ཙེ, བྷིཀྑཝེ, པཊིགྒཧིཏཾ ཀཱལེ ནིཔྤཀྐཾ ཝིཀཱལེ སཾསཊྛཾ, ཏཾ ཙེ པརིབྷུཉྫེཡྻ, ཨཱཔཏྟི དུཀྐཊསྶ། ཀཱལེ ཙེ, བྷིཀྑཝེ, པཊིགྒཧིཏཾ ཀཱལེ ནིཔྤཀྐཾ ཀཱལེ སཾསཊྛཾ, ཏཾ ཙེ པརིབྷུཉྫེཡྻ, ཨནཱཔཏྟཱིཏི།
262. Tena kho pana samayena gilānānaṃ bhikkhūnaṃ vasehi bhesajjehi attho hoti. Bhagavato etamatthaṃ ārocesuṃ. Anujānāmi, bhikkhave, vasāni bhesajjāni – acchavasaṃ, macchavasaṃ, susukāvasaṃ , sūkaravasaṃ, gadrabhavasaṃ – kāle paṭiggahitaṃ kāle nippakkaṃ 6 kāle saṃsaṭṭhaṃ telaparibhogena paribhuñjituṃ. Vikāle ce, bhikkhave, paṭiggahitaṃ vikāle nippakkaṃ vikāle saṃsaṭṭhaṃ, taṃ ce paribhuñjeyya, āpatti tiṇṇaṃ dukkaṭānaṃ. Kāle ce, bhikkhave, paṭiggahitaṃ vikāle nippakkaṃ vikāle saṃsaṭṭhaṃ, taṃ ce paribhuñjeyya, āpatti dvinnaṃ dukkaṭānaṃ. Kāle ce, bhikkhave, paṭiggahitaṃ kāle nippakkaṃ vikāle saṃsaṭṭhaṃ, taṃ ce paribhuñjeyya, āpatti dukkaṭassa. Kāle ce, bhikkhave, paṭiggahitaṃ kāle nippakkaṃ kāle saṃsaṭṭhaṃ, taṃ ce paribhuñjeyya, anāpattīti.
པཉྩབྷེསཛྫཀཐཱ ནིཊྛིཏཱ།
Pañcabhesajjakathā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / པཉྩབྷེསཛྫཱདིཀཐཱ • Pañcabhesajjādikathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / པཉྩབྷེསཛྫཱདིཀཐཱཝཎྞནཱ • Pañcabhesajjādikathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / པཉྩབྷེསཛྫཱདིཀཐཱཝཎྞནཱ • Pañcabhesajjādikathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / པཉྩབྷེསཛྫཱདིཀཐཱཝཎྞནཱ • Pañcabhesajjādikathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡༦༠. པཉྩབྷེསཛྫཱདིཀཐཱ • 160. Pañcabhesajjādikathā
