| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
7. பஞ்சதீ³பகத்தே²ரஅபதா³னவண்ணனா
7. Pañcadīpakattheraapadānavaṇṇanā
பது³முத்தரபு³த்³த⁴ஸ்ஸாதிஆதி³கங் ஆயஸ்மதோ பஞ்சதீ³பகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ உப்பன்னுப்பன்னப⁴வேஸு விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே குலகே³ஹே நிப்³ப³த்தோ வுத்³தி⁴மன்வாய க⁴ராவாஸே வஸந்தோ ப⁴க³வதோ த⁴ம்மங் ஸுத்வா ஸம்மாதி³ட்டி²யங் பதிட்டி²தோ ஸத்³தோ⁴ பஸன்னோ மஹாஜனேஹி போ³தி⁴பூஜங் கயிரமானங் தி³ஸ்வா ஸயம்பி போ³தி⁴ங் பரிவாரெத்வா தீ³பங் ஜாலெத்வா பூஜேஸி. ஸோ தேன புஞ்ஞகம்மேன தே³வமனுஸ்ஸேஸு ஸங்ஸரந்தோ சக்கவத்திஸம்பத்திஆத³யோ அனுப⁴வித்வா ஸப்³ப³த்தே²வ உப்பன்னப⁴வே ஜலமானோ ஜோதிஸம்பன்னவிமானாதீ³ஸு வஸித்வா இமஸ்மிங் பு³த்³து⁴ப்பாதே³ ஏகஸ்மிங் விப⁴வஸம்பன்னே குலகே³ஹே நிப்³ப³த்தோ வுத்³தி⁴ப்பத்தோ ஸத்³தா⁴ஜாதோ பப்³ப³ஜித்வா நசிரஸ்ஸேவ அரஹா அஹோஸி, தீ³பபூஜானிஸ்ஸந்தே³ன தீ³பகத்தே²ரோதி பாகடோ.
Padumuttarabuddhassātiādikaṃ āyasmato pañcadīpakattherassa apadānaṃ. Ayampi purimabuddhesu katādhikāro uppannuppannabhavesu vivaṭṭūpanissayāni puññāni upacinanto padumuttarassa bhagavato kāle kulagehe nibbatto vuddhimanvāya gharāvāse vasanto bhagavato dhammaṃ sutvā sammādiṭṭhiyaṃ patiṭṭhito saddho pasanno mahājanehi bodhipūjaṃ kayiramānaṃ disvā sayampi bodhiṃ parivāretvā dīpaṃ jāletvā pūjesi. So tena puññakammena devamanussesu saṃsaranto cakkavattisampattiādayo anubhavitvā sabbattheva uppannabhave jalamāno jotisampannavimānādīsu vasitvā imasmiṃ buddhuppāde ekasmiṃ vibhavasampanne kulagehe nibbatto vuddhippatto saddhājāto pabbajitvā nacirasseva arahā ahosi, dīpapūjānissandena dīpakattheroti pākaṭo.
50. ஸோ ஏகதி³வஸங் அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ பது³முத்தரபு³த்³த⁴ஸ்ஸாதிஆதி³மாஹ. தங் வுத்தத்த²மேவ. உஜுதி³ட்டி² அஹோஸஹந்தி வங்கங் மிச்சா²தி³ட்டி²ங் ச²ட்³டெ³த்வா உஜு அவங்கங் நிப்³பா³னாபி⁴முக²ங் பாபுணனஸம்மாதி³ட்டி² அஹோஸிந்தி அத்தோ².
50. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento padumuttarabuddhassātiādimāha. Taṃ vuttatthameva. Ujudiṭṭhi ahosahanti vaṅkaṃ micchādiṭṭhiṃ chaḍḍetvā uju avaṅkaṃ nibbānābhimukhaṃ pāpuṇanasammādiṭṭhi ahosinti attho.
51. பதீ³பதா³னங் பாதா³ஸிந்தி எத்த² பகாரேன தி³ப்³ப³தி ஜோததீதி பதீ³போ, தஸ்ஸ தா³னங் பதீ³பதா³னங், தங் அதா³ஸிங் பதீ³பபூஜங் அகாஸிந்தி அத்தோ². ஸேஸங் ஸப்³ப³த்த² உத்தானத்த²மேவாதி.
51.Padīpadānaṃ pādāsinti ettha pakārena dibbati jotatīti padīpo, tassa dānaṃ padīpadānaṃ, taṃ adāsiṃ padīpapūjaṃ akāsinti attho. Sesaṃ sabbattha uttānatthamevāti.
பஞ்சதீ³பகத்தே²ரஅபதா³னவண்ணனா ஸமத்தா.
Pañcadīpakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 7. பஞ்சதீ³பகத்தே²ரஅபதா³னங் • 7. Pañcadīpakattheraapadānaṃ
