| Library / Tipiṭaka / д̇ибидага • Tipiṭaka / махааваг̇г̇абаал̣и • Mahāvaggapāḷi |
181. бан̃жаг̇орасаад̣̇иануж̇аананаа
181. Pañcagorasādianujānanā
299. ат̇а ко бхаг̇аваа бхад̣̇д̣̇ияз яат̇аабхиранд̇ам̣ вихарид̇ваа мзн̣д̣агам̣ г̇ахабад̇им̣ анаабужчаа язна ан̇г̇уд̇д̇араабо д̇зна жааригам̣ баггаами махад̇аа бхигкусан̇гхзна сад̣̇д̇хим̣ ад̣дхад̇зласзхи бхигкусад̇зхи. ассоси ко мзн̣д̣аго г̇ахабад̇и – ‘‘бхаг̇аваа гира язна ан̇г̇уд̇д̇араабо д̇зна жааригам̣ багганд̇о махад̇аа бхигкусан̇гхзна сад̣̇д̇хим̣ ад̣дхад̇зласзхи бхигкусад̇зхий’’д̇и. ат̇а ко мзн̣д̣аго г̇ахабад̇и д̣̇аасз жа гаммагарз жа аан̣аабзси – ‘‘д̇зна хи, бхан̣з, б̣ахум̣ лон̣амби, д̇зламби, д̇ан̣д̣уламби, каад̣̇анийяамби сагадзсу ааробзд̇ваа ааг̇ажчат̇а, ад̣дхад̇зласаани жа г̇обаалагасад̇аани ад̣дхад̇зласаани жа д̇хзнусад̇аани аад̣̇ааяа ааг̇ажчанд̇у, яад̇т̇а бхаг̇аванд̇ам̣ бассиссаама д̇ад̇т̇а д̇арун̣зна 1 кийрзна бхож̇зссаамаа’’д̇и. ат̇а ко мзн̣д̣аго г̇ахабад̇и бхаг̇аванд̇ам̣ анд̇араамаг̇г̇з ганд̇аарз самбхаавзси. ат̇а ко мзн̣д̣аго г̇ахабад̇и язна бхаг̇аваа д̇знубасан̇гами; убасан̇гамид̇ваа бхаг̇аванд̇ам̣ абхиваад̣̇зд̇ваа згаманд̇ам̣ адтааси. згаманд̇ам̣ тид̇о ко мзн̣д̣аго г̇ахабад̇и бхаг̇аванд̇ам̣ зд̇ад̣̇авожа – ‘‘ад̇хиваасзд̇у мз, бханд̇з, бхаг̇аваа сваад̇анааяа бхад̇д̇ам̣ сад̣̇д̇хим̣ бхигкусан̇гхзнаа’’д̇и. ад̇хиваасзси бхаг̇аваа д̇ун̣хийбхаавзна. ат̇а ко мзн̣д̣аго г̇ахабад̇и бхаг̇авад̇о ад̇хиваасанам̣ вид̣̇ид̇ваа бхаг̇аванд̇ам̣ абхиваад̣̇зд̇ваа бад̣̇агкин̣ам̣ гад̇ваа баггаами.
299. Atha kho bhagavā bhaddiye yathābhirantaṃ viharitvā meṇḍakaṃ gahapatiṃ anāpucchā yena aṅguttarāpo tena cārikaṃ pakkāmi mahatā bhikkhusaṅghena saddhiṃ aḍḍhatelasehi bhikkhusatehi. Assosi kho meṇḍako gahapati – ‘‘bhagavā kira yena aṅguttarāpo tena cārikaṃ pakkanto mahatā bhikkhusaṅghena saddhiṃ aḍḍhatelasehi bhikkhusatehī’’ti. Atha kho meṇḍako gahapati dāse ca kammakare ca āṇāpesi – ‘‘tena hi, bhaṇe, bahuṃ loṇampi, telampi, taṇḍulampi, khādanīyampi sakaṭesu āropetvā āgacchatha, aḍḍhatelasāni ca gopālakasatāni aḍḍhatelasāni ca dhenusatāni ādāya āgacchantu, yattha bhagavantaṃ passissāma tattha taruṇena 2 khīrena bhojessāmā’’ti. Atha kho meṇḍako gahapati bhagavantaṃ antarāmagge kantāre sambhāvesi. Atha kho meṇḍako gahapati yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhito kho meṇḍako gahapati bhagavantaṃ etadavoca – ‘‘adhivāsetu me, bhante, bhagavā svātanāya bhattaṃ saddhiṃ bhikkhusaṅghenā’’ti. Adhivāsesi bhagavā tuṇhībhāvena. Atha kho meṇḍako gahapati bhagavato adhivāsanaṃ viditvā bhagavantaṃ abhivādetvā padakkhiṇaṃ katvā pakkāmi.
ат̇а ко мзн̣д̣аго г̇ахабад̇и д̇ассаа рад̇д̇ияаа ажжаязна бан̣ийд̇ам̣ каад̣̇анийяам̣ бхож̇анийяам̣ бадияаад̣̇аабзд̇ваа бхаг̇авад̇о гаалам̣ аарожаабзси – ‘‘гаало, бханд̇з, нидтид̇ам̣ бхад̇д̇а’’нд̇и. ат̇а ко бхаг̇аваа буб̣б̣ан̣хасамаяам̣ ниваасзд̇ваа бад̇д̇ажийварамаад̣̇ааяа язна мзн̣д̣агасса г̇ахабад̇исса баривзсанаа д̇знубасан̇гами ; убасан̇гамид̇ваа бан̃н̃ад̇д̇з аасанз нисийд̣̇и сад̣̇д̇хим̣ бхигкусан̇гхзна. ат̇а ко мзн̣д̣аго г̇ахабад̇и ад̣дхад̇зласаани г̇обаалагасад̇аани аан̣аабзси – ‘‘д̇знахи, бхан̣з, згамзгам̣ д̇хзнум̣ г̇ахзд̇ваа згамзгасса бхигкуно убад̇идтат̇а д̇арун̣зна кийрзна бхож̇зссаамаа’’д̇и. ат̇а ко мзн̣д̣аго г̇ахабад̇и б̣уд̣̇д̇хаббамукам̣ бхигкусан̇гхам̣ бан̣ийд̇зна каад̣̇анийязна бхож̇анийязна сахад̇т̇аа санд̇аббзси самбаваарзси, д̇арун̣зна жа кийрзна. бхигкуу гуггужжааяанд̇аа кийрам̣ на бадиг̇г̇ан̣ханд̇и. бадиг̇г̇ан̣хат̇а, бхигкавз, барибхун̃ж̇ат̇аад̇и. ат̇а ко мзн̣д̣аго г̇ахабад̇и б̣уд̣̇д̇хаббамукам̣ бхигкусан̇гхам̣ бан̣ийд̇зна каад̣̇анийязна бхож̇анийязна сахад̇т̇аа санд̇аббзд̇ваа самбаваарзд̇ваа д̇арун̣зна жа кийрзна бхаг̇аванд̇ам̣ бхуд̇д̇аавим̣ онийд̇абад̇д̇абаан̣им̣ згаманд̇ам̣ нисийд̣̇и. згаманд̇ам̣ нисинно ко мзн̣д̣аго г̇ахабад̇и бхаг̇аванд̇ам̣ зд̇ад̣̇авожа – ‘‘санд̇и, бханд̇з, маг̇г̇аа ганд̇аараа, аббод̣̇агаа аббабхагкаа, на сугараа абаат̇зяязна г̇анд̇ум̣. саад̇ху, бханд̇з, бхаг̇аваа бхигкуунам̣ баат̇зяяам̣ ануж̇аанаад̇уу’’д̇и. ат̇а ко бхаг̇аваа мзн̣д̣агам̣ г̇ахабад̇им̣ д̇хаммияаа гат̇ааяа санд̣̇ассзд̇ваа самаад̣̇абзд̇ваа самуд̇д̇зж̇зд̇ваа самбахам̣сзд̇ваа удтааяаасанаа баггаами. ат̇а ко бхаг̇аваа зд̇асмим̣ нид̣̇аанз зд̇асмим̣ багаран̣з д̇хаммим̣ гат̇ам̣ гад̇ваа бхигкуу ааманд̇зси – ‘‘ануж̇аанаами, бхигкавз, бан̃жа г̇орасз – кийрам̣, д̣̇ад̇хим̣, д̇аггам̣, наванийд̇ам̣, саббим̣. санд̇и, бхигкавз, маг̇г̇аа ганд̇аараа аббод̣̇агаа аббабхагкаа, на сугараа абаат̇зяязна г̇анд̇ум̣. ануж̇аанаами, бхигкавз, баат̇зяяам̣ бариязсид̇ум̣ д̇ан̣д̣уло д̇ан̣д̣улад̇т̇игзна, муг̇г̇о муг̇г̇ад̇т̇игзна, маасо маасад̇т̇игзна, лон̣ам̣ лон̣ад̇т̇игзна , г̇ул̣о г̇ул̣ад̇т̇игзна, д̇злам̣ д̇злад̇т̇игзна, сабби саббид̇т̇игзна. санд̇и, бхигкавз, мануссаа, сад̣̇д̇хаа басаннаа, д̇з габбияагаарагаанам̣ хад̇т̇з хиран̃н̃ам̣ убанигкибанд̇и – ‘иминаа аяяасса яам̣ габбияам̣ д̇ам̣ д̣̇зт̇аа’д̇и. ануж̇аанаами, бхигкавз, яам̣ д̇ад̇о габбияам̣ д̇ам̣ саад̣̇ид̇ум̣; на д̇взваахам̣, бхигкавз, гзнажи барияааязна ж̇аад̇аруубараж̇ад̇ам̣ саад̣̇ид̇аб̣б̣ам̣ бариязсид̇аб̣б̣анд̇и вад̣̇аамий’’д̇и.
Atha kho meṇḍako gahapati tassā rattiyā accayena paṇītaṃ khādanīyaṃ bhojanīyaṃ paṭiyādāpetvā bhagavato kālaṃ ārocāpesi – ‘‘kālo, bhante, niṭṭhitaṃ bhatta’’nti. Atha kho bhagavā pubbaṇhasamayaṃ nivāsetvā pattacīvaramādāya yena meṇḍakassa gahapatissa parivesanā tenupasaṅkami ; upasaṅkamitvā paññatte āsane nisīdi saddhiṃ bhikkhusaṅghena. Atha kho meṇḍako gahapati aḍḍhatelasāni gopālakasatāni āṇāpesi – ‘‘tenahi, bhaṇe, ekamekaṃ dhenuṃ gahetvā ekamekassa bhikkhuno upatiṭṭhatha taruṇena khīrena bhojessāmā’’ti. Atha kho meṇḍako gahapati buddhappamukhaṃ bhikkhusaṅghaṃ paṇītena khādanīyena bhojanīyena sahatthā santappesi sampavāresi, taruṇena ca khīrena. Bhikkhū kukkuccāyantā khīraṃ na paṭiggaṇhanti. Paṭiggaṇhatha, bhikkhave, paribhuñjathāti. Atha kho meṇḍako gahapati buddhappamukhaṃ bhikkhusaṅghaṃ paṇītena khādanīyena bhojanīyena sahatthā santappetvā sampavāretvā taruṇena ca khīrena bhagavantaṃ bhuttāviṃ onītapattapāṇiṃ ekamantaṃ nisīdi. Ekamantaṃ nisinno kho meṇḍako gahapati bhagavantaṃ etadavoca – ‘‘santi, bhante, maggā kantārā, appodakā appabhakkhā, na sukarā apātheyyena gantuṃ. Sādhu, bhante, bhagavā bhikkhūnaṃ pātheyyaṃ anujānātū’’ti. Atha kho bhagavā meṇḍakaṃ gahapatiṃ dhammiyā kathāya sandassetvā samādapetvā samuttejetvā sampahaṃsetvā uṭṭhāyāsanā pakkāmi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, pañca gorase – khīraṃ, dadhiṃ, takkaṃ, navanītaṃ, sappiṃ. Santi, bhikkhave, maggā kantārā appodakā appabhakkhā, na sukarā apātheyyena gantuṃ. Anujānāmi, bhikkhave, pātheyyaṃ pariyesituṃ taṇḍulo taṇḍulatthikena, muggo muggatthikena, māso māsatthikena, loṇaṃ loṇatthikena , guḷo guḷatthikena, telaṃ telatthikena, sappi sappitthikena. Santi, bhikkhave, manussā, saddhā pasannā, te kappiyakārakānaṃ hatthe hiraññaṃ upanikkhipanti – ‘iminā ayyassa yaṃ kappiyaṃ taṃ dethā’ti. Anujānāmi, bhikkhave, yaṃ tato kappiyaṃ taṃ sādituṃ; na tvevāhaṃ, bhikkhave, kenaci pariyāyena jātarūparajataṃ sāditabbaṃ pariyesitabbanti vadāmī’’ti.
бан̃жаг̇орасаад̣̇иануж̇аананаа нидтид̇аа.
Pañcagorasādianujānanā niṭṭhitā.
Footnotes:
Related texts:
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā / габбияабхуумиануж̇аананагат̇аа • Kappiyabhūmianujānanakathā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / габбияабхуумиануж̇аананагат̇ааван̣н̣анаа • Kappiyabhūmianujānanakathāvaṇṇanā
