| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
5. பஞ்சஹத்தி²யத்தே²ரஅபதா³னவண்ணனா
5. Pañcahatthiyattheraapadānavaṇṇanā
ஸுமேதோ⁴ நாம ஸம்பு³த்³தோ⁴திஆதி³கங் ஆயஸ்மதோ பஞ்சஹத்தி²யத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸுமேத⁴ஸ்ஸ ப⁴க³வதோ காலே ஏகஸ்மிங் குலகே³ஹே நிப்³ப³த்தோ விஞ்ஞுதங் பத்வா ரதனத்தயே பஸன்னோ விஹாஸி. தஸ்மிங் ஸமயே பஞ்சஉப்பலஹத்தா²னி ஆனேஸுங். ஸோ தேஹி பஞ்சஉப்பலஹத்தே²ஹி வீதி²யங் சரமானங் ஸுமேத⁴ங் ப⁴க³வந்தங் பூஜேஸி. தானி க³ந்த்வா ஆகாஸே விதானங் ஹுத்வா சா²யங் குருமானானி ததா²க³தேனேவ ஸத்³தி⁴ங் க³ச்சி²ங்ஸு. ஸோ தங் தி³ஸ்வா ஸோமனஸ்ஸஜாதோ பீதியா பு²ட்ட²ஸரீரோ யாவஜீவங் ததே³வ புஞ்ஞங் அனுஸ்ஸரித்வா ததோ சுதோ தே³வலோகே நிப்³ப³த்தோ அபராபரங் ஸங்ஸரந்தோ இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே நிப்³ப³த்தோ விஞ்ஞுதங் பத்தோ ஸத்³தா⁴ஜாதோ பப்³ப³ஜித்வா விபஸ்ஸனங் வட்³டெ⁴த்வா நசிரஸ்ஸேவ அரஹா அஹோஸி. கதகுஸலனாமேன பஞ்சஹத்தி²யத்தே²ரோதி பாகடோ.
Sumedhonāma sambuddhotiādikaṃ āyasmato pañcahatthiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto sumedhassa bhagavato kāle ekasmiṃ kulagehe nibbatto viññutaṃ patvā ratanattaye pasanno vihāsi. Tasmiṃ samaye pañcauppalahatthāni ānesuṃ. So tehi pañcauppalahatthehi vīthiyaṃ caramānaṃ sumedhaṃ bhagavantaṃ pūjesi. Tāni gantvā ākāse vitānaṃ hutvā chāyaṃ kurumānāni tathāgateneva saddhiṃ gacchiṃsu. So taṃ disvā somanassajāto pītiyā phuṭṭhasarīro yāvajīvaṃ tadeva puññaṃ anussaritvā tato cuto devaloke nibbatto aparāparaṃ saṃsaranto imasmiṃ buddhuppāde ekasmiṃ kulagehe nibbatto viññutaṃ patto saddhājāto pabbajitvā vipassanaṃ vaḍḍhetvā nacirasseva arahā ahosi. Katakusalanāmena pañcahatthiyattheroti pākaṭo.
77. ஸோ அத்தனோ புப்³ப³கம்மங் ஸரித்வா பச்சக்க²தோ பஞ்ஞாய தி³ட்ட²புப்³ப³சரிதாபதா³னங் பகாஸெந்தோ ஸுமேதோ⁴ நாம ஸம்பு³த்³தோ⁴திஆதி³மாஹ. தத்த² ஸுமேதோ⁴தி ஸுந்த³ரா மேதா⁴ சதுஸச்சபடிவேத⁴படிஸம்பி⁴தா³த³யோ பஞ்ஞா யஸ்ஸ ஸோ ப⁴க³வா ஸுமேதோ⁴ ஸம்பு³த்³தோ⁴ அந்தராபணே அந்தரவீதி²யங் க³ச்ச²தீதி ஸம்ப³ந்தோ⁴. ஒக்கி²த்தசக்கூ²தி அதோ⁴கி²த்தசக்கு². மிதபா⁴ணீதி பமாணங் ஞத்வா ப⁴ணனஸீலோ, பமாணங் ஜானித்வா த⁴ம்மங் தே³ஸேஸீதி அத்தோ². ஸேஸங் ஸுவிஞ்ஞெய்யமேவாதி.
77. So attano pubbakammaṃ saritvā paccakkhato paññāya diṭṭhapubbacaritāpadānaṃ pakāsento sumedho nāma sambuddhotiādimāha. Tattha sumedhoti sundarā medhā catusaccapaṭivedhapaṭisambhidādayo paññā yassa so bhagavā sumedho sambuddho antarāpaṇe antaravīthiyaṃ gacchatīti sambandho. Okkhittacakkhūti adhokhittacakkhu. Mitabhāṇīti pamāṇaṃ ñatvā bhaṇanasīlo, pamāṇaṃ jānitvā dhammaṃ desesīti attho. Sesaṃ suviññeyyamevāti.
பஞ்சஹத்தி²யத்தே²ரஅபதா³னவண்ணனா ஸமத்தா.
Pañcahatthiyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 5. பஞ்சஹத்தி²யத்தே²ரஅபதா³னங் • 5. Pañcahatthiyattheraapadānaṃ
