| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
9-10. பஞ்சகங்க³ஸுத்தாதி³வண்ணனா
9-10. Pañcakaṅgasuttādivaṇṇanā
267-268. நவமே பஞ்சகங்கோ³ த²பதீதி பஞ்சகங்கோ³தி தஸ்ஸ நாமங், வாஸிப²ரஸுனிகா²த³னத³ண்ட³முக்³க³ரகாளஸுத்தனாளிஸங்கா²தேஹி வா பஞ்சஹி அங்கே³ஹி ஸமன்னாக³தத்தா ஸோ பஞ்சகங்கோ³தி பஞ்ஞாதோ. த²பதீதி வட்³ட⁴கீஜெட்ட²கோ. உதா³யீதி பண்டி³தஉதா³யித்தே²ரோ. பரியாயந்தி காரணங். த்³வேபானந்தா³தி த்³வேபி, ஆனந்த³, பரியாயேனாதி காரணேன. எத்த² ச காயிகசேதஸிகவஸேன த்³வே வேதி³தப்³பா³, ஸுகா²தி³வஸேன திஸ்ஸோபி, இந்த்³ரியவஸேன ஸுகி²ந்த்³ரியாதி³கா பஞ்ச, த்³வாரவஸேன சக்கு²ஸம்ப²ஸ்ஸஜாதி³கா ச², உபவிசாரவஸேன ‘‘சக்கு²னா ரூபங் தி³ஸ்வா ஸோமனஸ்ஸடா²னியங் ரூபங் உபவிசரதீ’’திஆதி³கா அட்டா²ரஸ, ச² கே³ஹஸிதானி ஸோமனஸ்ஸானி, ச² நெக்க²ம்மஸிதானி, ச² கே³ஹஸிதானி தோ³மனஸ்ஸானி, ச² நெக்க²ம்மஸிதானி, ச² கே³ஹஸிதா உபெக்கா², ச² நெக்க²ம்மஸிதாதி ஏவங் ச²த்திங்ஸ. தா அதீதே ச²த்திங்ஸ, அனாக³தே ச²த்திங்ஸ, பச்சுப்பன்னே ச²த்திங்ஸாதி ஏவங் அட்ட²ஸதங் வேத³னா வேதி³தப்³பா³.
267-268. Navame pañcakaṅgo thapatīti pañcakaṅgoti tassa nāmaṃ, vāsipharasunikhādanadaṇḍamuggarakāḷasuttanāḷisaṅkhātehi vā pañcahi aṅgehi samannāgatattā so pañcakaṅgoti paññāto. Thapatīti vaḍḍhakījeṭṭhako. Udāyīti paṇḍitaudāyitthero. Pariyāyanti kāraṇaṃ. Dvepānandāti dvepi, ānanda, pariyāyenāti kāraṇena. Ettha ca kāyikacetasikavasena dve veditabbā, sukhādivasena tissopi, indriyavasena sukhindriyādikā pañca, dvāravasena cakkhusamphassajādikā cha, upavicāravasena ‘‘cakkhunā rūpaṃ disvā somanassaṭhāniyaṃ rūpaṃ upavicaratī’’tiādikā aṭṭhārasa, cha gehasitāni somanassāni, cha nekkhammasitāni, cha gehasitāni domanassāni, cha nekkhammasitāni, cha gehasitā upekkhā, cha nekkhammasitāti evaṃ chattiṃsa. Tā atīte chattiṃsa, anāgate chattiṃsa, paccuppanne chattiṃsāti evaṃ aṭṭhasataṃ vedanā veditabbā.
பஞ்சிமே ஆனந்த³ காமகு³ணாதி அயங் பாடியேக்கோ அனுஸந்தி⁴. ந கேவலஞ்ஹி த்³வே ஆதி³ங் கத்வா வேத³னா ப⁴க³வதா பஞ்ஞத்தா, பரியாயேன ஏகாபி வேத³னா கதி²தா, தங் த³ஸ்ஸெந்தோ பஞ்சகங்க³ஸ்ஸ த²பதினோ வாத³ங் உபத்த²ம்பே⁴துங் இமங் தே³ஸனங் ஆரபி⁴. அபி⁴க்கந்ததரந்தி ஸுந்த³ரதரங். பணீததரந்தி அதப்பகதரங். எத்த² ச சதுத்த²ஜ்ஜா²னதோ பட்டா²ய அது³க்க²மஸுகா² வேத³னா, ஸாபி ஸந்தட்டே²ன பணீதட்டே²ன ச ஸுக²ந்தி வுத்தா. நிரோதோ⁴ அவேத³யிதஸுக²வஸேன ஸுக²ங் நாம ஜாதோ. பஞ்சகாமகு³ணவஸேன ஹி அட்ட²ஸமாபத்திவஸேன ச உப்பன்னங் வேத³யிதங் ஸுக²ங் நாம, நிரோதோ⁴ அவேத³யிதஸுக²ங் நாம. இதி வேத³யிதஸுக²ங் வா ஹோது அவேத³யிதஸுக²ங் வா, நித்³து³க்க²பா⁴வஸங்கா²தேன ஸுக²ட்டே²ன ஏகந்தஸுக²மேவ ஜாதங்.
Pañcimeānanda kāmaguṇāti ayaṃ pāṭiyekko anusandhi. Na kevalañhi dve ādiṃ katvā vedanā bhagavatā paññattā, pariyāyena ekāpi vedanā kathitā, taṃ dassento pañcakaṅgassa thapatino vādaṃ upatthambhetuṃ imaṃ desanaṃ ārabhi. Abhikkantataranti sundarataraṃ. Paṇītataranti atappakataraṃ. Ettha ca catutthajjhānato paṭṭhāya adukkhamasukhā vedanā, sāpi santaṭṭhena paṇītaṭṭhena ca sukhanti vuttā. Nirodho avedayitasukhavasena sukhaṃ nāma jāto. Pañcakāmaguṇavasena hi aṭṭhasamāpattivasena ca uppannaṃ vedayitaṃ sukhaṃ nāma, nirodho avedayitasukhaṃ nāma. Iti vedayitasukhaṃ vā hotu avedayitasukhaṃ vā, niddukkhabhāvasaṅkhātena sukhaṭṭhena ekantasukhameva jātaṃ.
யத்த² யத்தா²தி யஸ்மிங் யஸ்மிங் டா²னே. ஸுக²ங் உபலப்³ப⁴தீதி வேத³யிதங் ஸுக²ங் வா அவேத³யிதங் ஸுக²ங் வா உபலப்³ப⁴தி. தங் தங் ததா²க³தோ ஸுக²ஸ்மிங் பஞ்ஞபேதி, தங் ஸப்³ப³ங் ததா²க³தோ நித்³து³க்க²பா⁴வங் ஸுக²ஸ்மிங்யேவ பஞ்ஞபேதீதி இத⁴ ப⁴க³வா நிரோத⁴ஸமாபத்திங் ஸீஸங் கத்வா நெய்யபுக்³க³லஸ்ஸ வஸேன அரஹத்தனிகூடேனேவ தே³ஸனங் நிட்டா²பேஸி. த³ஸமங் உத்தானத்த²மேவாதி.
Yattha yatthāti yasmiṃ yasmiṃ ṭhāne. Sukhaṃ upalabbhatīti vedayitaṃ sukhaṃ vā avedayitaṃ sukhaṃ vā upalabbhati. Taṃ taṃ tathāgato sukhasmiṃ paññapeti, taṃ sabbaṃ tathāgato niddukkhabhāvaṃ sukhasmiṃyeva paññapetīti idha bhagavā nirodhasamāpattiṃ sīsaṃ katvā neyyapuggalassa vasena arahattanikūṭeneva desanaṃ niṭṭhāpesi. Dasamaṃ uttānatthamevāti.
ரஹோக³தவக்³கோ³ து³தியோ.
Rahogatavaggo dutiyo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
9. பஞ்சகங்க³ஸுத்தங் • 9. Pañcakaṅgasuttaṃ
10. பி⁴க்கு²ஸுத்தங் • 10. Bhikkhusuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9-10. பஞ்சகங்க³ஸுத்தாதி³வண்ணனா • 9-10. Pañcakaṅgasuttādivaṇṇanā
