| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৯-১০. পঞ্চকঙ্গসুত্তাদিৰণ্ণনা
9-10. Pañcakaṅgasuttādivaṇṇanā
২৬৭-২৬৮. নৰমে পঞ্চকঙ্গো থপতীতি পঞ্চকঙ্গোতি তস্স নামং, ৰাসিফরসুনিখাদনদণ্ডমুগ্গরকাল়সুত্তনাল়িসঙ্খাতেহি ৰা পঞ্চহি অঙ্গেহি সমন্নাগতত্তা সো পঞ্চকঙ্গোতি পঞ্ঞাতো। থপতীতি ৰড্ঢকীজেট্ঠকো। উদাযীতি পণ্ডিতউদাযিত্থেরো। পরিযাযন্তি কারণং। দ্ৰেপানন্দাতি দ্ৰেপি, আনন্দ, পরিযাযেনাতি কারণেন। এত্থ চ কাযিকচেতসিকৰসেন দ্ৰে ৰেদিতব্বা, সুখাদিৰসেন তিস্সোপি, ইন্দ্রিযৰসেন সুখিন্দ্রিযাদিকা পঞ্চ, দ্ৰারৰসেন চক্খুসম্ফস্সজাদিকা ছ, উপৰিচারৰসেন ‘‘চক্খুনা রূপং দিস্ৰা সোমনস্সঠানিযং রূপং উপৰিচরতী’’তিআদিকা অট্ঠারস, ছ গেহসিতানি সোমনস্সানি, ছ নেক্খম্মসিতানি, ছ গেহসিতানি দোমনস্সানি, ছ নেক্খম্মসিতানি, ছ গেহসিতা উপেক্খা, ছ নেক্খম্মসিতাতি এৰং ছত্তিংস। তা অতীতে ছত্তিংস, অনাগতে ছত্তিংস, পচ্চুপ্পন্নে ছত্তিংসাতি এৰং অট্ঠসতং ৰেদনা ৰেদিতব্বা।
267-268. Navame pañcakaṅgo thapatīti pañcakaṅgoti tassa nāmaṃ, vāsipharasunikhādanadaṇḍamuggarakāḷasuttanāḷisaṅkhātehi vā pañcahi aṅgehi samannāgatattā so pañcakaṅgoti paññāto. Thapatīti vaḍḍhakījeṭṭhako. Udāyīti paṇḍitaudāyitthero. Pariyāyanti kāraṇaṃ. Dvepānandāti dvepi, ānanda, pariyāyenāti kāraṇena. Ettha ca kāyikacetasikavasena dve veditabbā, sukhādivasena tissopi, indriyavasena sukhindriyādikā pañca, dvāravasena cakkhusamphassajādikā cha, upavicāravasena ‘‘cakkhunā rūpaṃ disvā somanassaṭhāniyaṃ rūpaṃ upavicaratī’’tiādikā aṭṭhārasa, cha gehasitāni somanassāni, cha nekkhammasitāni, cha gehasitāni domanassāni, cha nekkhammasitāni, cha gehasitā upekkhā, cha nekkhammasitāti evaṃ chattiṃsa. Tā atīte chattiṃsa, anāgate chattiṃsa, paccuppanne chattiṃsāti evaṃ aṭṭhasataṃ vedanā veditabbā.
পঞ্চিমে আনন্দ কামগুণাতি অযং পাটিযেক্কো অনুসন্ধি। ন কেৰলঞ্হি দ্ৰে আদিং কত্ৰা ৰেদনা ভগৰতা পঞ্ঞত্তা, পরিযাযেন একাপি ৰেদনা কথিতা, তং দস্সেন্তো পঞ্চকঙ্গস্স থপতিনো ৰাদং উপত্থম্ভেতুং ইমং দেসনং আরভি। অভিক্কন্ততরন্তি সুন্দরতরং। পণীততরন্তি অতপ্পকতরং। এত্থ চ চতুত্থজ্ঝানতো পট্ঠায অদুক্খমসুখা ৰেদনা, সাপি সন্তট্ঠেন পণীতট্ঠেন চ সুখন্তি ৰুত্তা। নিরোধো অৰেদযিতসুখৰসেন সুখং নাম জাতো। পঞ্চকামগুণৰসেন হি অট্ঠসমাপত্তিৰসেন চ উপ্পন্নং ৰেদযিতং সুখং নাম, নিরোধো অৰেদযিতসুখং নাম। ইতি ৰেদযিতসুখং ৰা হোতু অৰেদযিতসুখং ৰা, নিদ্দুক্খভাৰসঙ্খাতেন সুখট্ঠেন একন্তসুখমেৰ জাতং।
Pañcimeānanda kāmaguṇāti ayaṃ pāṭiyekko anusandhi. Na kevalañhi dve ādiṃ katvā vedanā bhagavatā paññattā, pariyāyena ekāpi vedanā kathitā, taṃ dassento pañcakaṅgassa thapatino vādaṃ upatthambhetuṃ imaṃ desanaṃ ārabhi. Abhikkantataranti sundarataraṃ. Paṇītataranti atappakataraṃ. Ettha ca catutthajjhānato paṭṭhāya adukkhamasukhā vedanā, sāpi santaṭṭhena paṇītaṭṭhena ca sukhanti vuttā. Nirodho avedayitasukhavasena sukhaṃ nāma jāto. Pañcakāmaguṇavasena hi aṭṭhasamāpattivasena ca uppannaṃ vedayitaṃ sukhaṃ nāma, nirodho avedayitasukhaṃ nāma. Iti vedayitasukhaṃ vā hotu avedayitasukhaṃ vā, niddukkhabhāvasaṅkhātena sukhaṭṭhena ekantasukhameva jātaṃ.
যত্থ যত্থাতি যস্মিং যস্মিং ঠানে। সুখং উপলব্ভতীতি ৰেদযিতং সুখং ৰা অৰেদযিতং সুখং ৰা উপলব্ভতি। তং তং তথাগতো সুখস্মিং পঞ্ঞপেতি, তং সব্বং তথাগতো নিদ্দুক্খভাৰং সুখস্মিংযেৰ পঞ্ঞপেতীতি ইধ ভগৰা নিরোধসমাপত্তিং সীসং কত্ৰা নেয্যপুগ্গলস্স ৰসেন অরহত্তনিকূটেনেৰ দেসনং নিট্ঠাপেসি। দসমং উত্তানত্থমেৰাতি।
Yattha yatthāti yasmiṃ yasmiṃ ṭhāne. Sukhaṃ upalabbhatīti vedayitaṃ sukhaṃ vā avedayitaṃ sukhaṃ vā upalabbhati. Taṃ taṃ tathāgato sukhasmiṃ paññapeti, taṃ sabbaṃ tathāgato niddukkhabhāvaṃ sukhasmiṃyeva paññapetīti idha bhagavā nirodhasamāpattiṃ sīsaṃ katvā neyyapuggalassa vasena arahattanikūṭeneva desanaṃ niṭṭhāpesi. Dasamaṃ uttānatthamevāti.
রহোগতৰগ্গো দুতিযো।
Rahogatavaggo dutiyo.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya
৯. পঞ্চকঙ্গসুত্তং • 9. Pañcakaṅgasuttaṃ
১০. ভিক্খুসুত্তং • 10. Bhikkhusuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৯-১০. পঞ্চকঙ্গসুত্তাদিৰণ্ণনা • 9-10. Pañcakaṅgasuttādivaṇṇanā
