| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៩-១០. បញ្ចកង្គសុត្តាទិវណ្ណនា
9-10. Pañcakaṅgasuttādivaṇṇanā
២៦៧-២៦៨. ទណ្ឌមុគ្គរំ អគ្គសោណ្ឌមុគ្គរំ។ កាឡសុត្តបក្ខិបនំ កាឡសុត្តនាឡិ។ វាសិអាទីនិ បញ្ច អង្គានិ អស្សាតិ បញ្ចកង្គោ។ វត្ថុវិជ្ជាយ វុត្តវិធិនា កត្តព្ពនិស្សយានិ ឋបេតីតិ ថបតិ។ បណ្ឌិតឧទាយិត្ថេរោ, ន លាឡុទាយិត្ថេរោ។ ទ្វេបានន្ទាតិ អដ្ឋកថាយ បទុទ្ធារោ កតោ – ‘‘ទ្វេបិ មយា អានន្ទា’’តិ បន បាឡិយំ។ បសាទកាយសន្និស្សិតា កាយិកា, ចេតោសន្និស្សិតា ចេតសិកា។ អាធិបច្ចដ្ឋេន សុខមេវ ឥន្ទ្រិយន្តិ សុខិន្ទ្រិយំ។ ឧបវិចារវសេនាតិ រូបាទីនិ ឧបេច្ច វិចរណវសេន។ អតីតេ អារម្មណេ។ បច្ចុប្បន្នេតិ អទ្ធាបច្ចុប្បន្នេ។ ឯវំ អដ្ឋាធិកំ សតំ អដ្ឋសតំ។
267-268.Daṇḍamuggaraṃ aggasoṇḍamuggaraṃ. Kāḷasuttapakkhipanaṃ kāḷasuttanāḷi. Vāsiādīni pañca aṅgāni assāti pañcakaṅgo. Vatthuvijjāya vuttavidhinā kattabbanissayāni ṭhapetīti thapati. Paṇḍitaudāyitthero, na lāḷudāyitthero. Dvepānandāti aṭṭhakathāya paduddhāro kato – ‘‘dvepi mayā ānandā’’ti pana pāḷiyaṃ. Pasādakāyasannissitā kāyikā, cetosannissitā cetasikā. Ādhipaccaṭṭhena sukhameva indriyanti sukhindriyaṃ. Upavicāravasenāti rūpādīni upecca vicaraṇavasena. Atīte ārammaṇe. Paccuppanneti addhāpaccuppanne. Evaṃ aṭṭhādhikaṃ sataṃ aṭṭhasataṃ.
បាដិយេក្កោ អនុសន្ធីតិ បុច្ឆានុសន្ធិអាទីហិ វិសុំ តេហិ អសម្មិស្សោ ឯកោ អនុសន្ធិ។ ឯកាបិ វេទនា កថិតា ‘‘តត្រ, ភិក្ខវេ, សុតវា អរិយសាវកោ’’តិ អាហរិត្វា ‘‘ផស្សបច្ចយា វេទនា’’តិ។ យស្មា ភគវា ចតុត្ថជ្ឈានុបេក្ខាវេទនំ វត្វា – ‘‘អត្ថានន្ទ, ឯតស្មា សុខា អញ្ញំ សុខ’’ន្តិអាទិំ វទន្តោ ថបតិនោ វាទំ ឧបត្ថម្ភេតិ នាម។ តេន ហិ ឧបេក្ខាវេទនា ‘‘សុខ’’ន្តេវ វុត្តា សន្តសភាវត្តា។ អភិក្កន្តតរន្តិ អតិវិយ កន្តតរំ មនោរមតរំ។ តេនាហ ‘‘សុន្ទរតរ’’ន្តិ។ បណីតតរន្តិ បធានភាវំ នីតតាយ ឧឡារតរំ។ តេនាហ ‘‘អតប្បកតរ’’ន្តិ។ សុខន្តិ វុត្តា បដិបក្ខស្ស សុដ្ឋុ ខាទនេន, សុករំ ឱកាសទានមស្សាតិ វា។ និរោធោ សុខំ នាម សព្ពសោ ឧទយព្ពយាភាវតោ។ តេនាហ ‘‘និទ្ទុក្ខភាវសង្ខាតេន សុខដ្ឋេនា’’តិ។
Pāṭiyekko anusandhīti pucchānusandhiādīhi visuṃ tehi asammisso eko anusandhi. Ekāpi vedanā kathitā ‘‘tatra, bhikkhave, sutavā ariyasāvako’’ti āharitvā ‘‘phassapaccayā vedanā’’ti. Yasmā bhagavā catutthajjhānupekkhāvedanaṃ vatvā – ‘‘atthānanda, etasmā sukhā aññaṃ sukha’’ntiādiṃ vadanto thapatino vādaṃ upatthambheti nāma. Tena hi upekkhāvedanā ‘‘sukha’’nteva vuttā santasabhāvattā. Abhikkantataranti ativiya kantataraṃ manoramataraṃ. Tenāha ‘‘sundaratara’’nti. Paṇītataranti padhānabhāvaṃ nītatāya uḷārataraṃ. Tenāha ‘‘atappakatara’’nti. Sukhanti vuttā paṭipakkhassa suṭṭhu khādanena, sukaraṃ okāsadānamassāti vā. Nirodho sukhaṃ nāma sabbaso udayabbayābhāvato. Tenāha ‘‘niddukkhabhāvasaṅkhātena sukhaṭṭhenā’’ti.
សុខស្មិំយេវាតិ សុខមិច្ចេវ បញ្ញបេតិ។ និរោធសមាបត្តិំ សីសំ កត្វាតិ និរោធសមាបត្តិទេសនាយ សីសំ ឧត្តមំ កត្វា។ ទេសនាយ ឧទ្ទេសាធិមុត្តេ ឧដ្ឋាបេត្វា វិត្ថារិតត្តា ‘‘នេយ្យបុគ្គលស្ស វសេនា’’តិ វុត្តំ។ ទសមំ អនន្តរសុត្តេ វុត្តនយត្តា ឧត្តានត្ថមេវ។
Sukhasmiṃyevāti sukhamicceva paññapeti. Nirodhasamāpattiṃ sīsaṃ katvāti nirodhasamāpattidesanāya sīsaṃ uttamaṃ katvā. Desanāya uddesādhimutte uṭṭhāpetvā vitthāritattā ‘‘neyyapuggalassa vasenā’’ti vuttaṃ. Dasamaṃ anantarasutte vuttanayattā uttānatthameva.
បញ្ចកង្គសុត្តាទិវណ្ណនា និដ្ឋិតា។
Pañcakaṅgasuttādivaṇṇanā niṭṭhitā.
រហោគតវគ្គវណ្ណនា និដ្ឋិតា។
Rahogatavaggavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya
៩. បញ្ចកង្គសុត្តំ • 9. Pañcakaṅgasuttaṃ
១០. ភិក្ខុសុត្តំ • 10. Bhikkhusuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៩-១០. បញ្ចកង្គសុត្តាទិវណ្ណនា • 9-10. Pañcakaṅgasuttādivaṇṇanā
