| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೯-೧೦. ಪಞ್ಚಕಙ್ಗಸುತ್ತಾದಿವಣ್ಣನಾ
9-10. Pañcakaṅgasuttādivaṇṇanā
೨೬೭-೨೬೮. ದಣ್ಡಮುಗ್ಗರಂ ಅಗ್ಗಸೋಣ್ಡಮುಗ್ಗರಂ। ಕಾಳಸುತ್ತಪಕ್ಖಿಪನಂ ಕಾಳಸುತ್ತನಾಳಿ। ವಾಸಿಆದೀನಿ ಪಞ್ಚ ಅಙ್ಗಾನಿ ಅಸ್ಸಾತಿ ಪಞ್ಚಕಙ್ಗೋ। ವತ್ಥುವಿಜ್ಜಾಯ ವುತ್ತವಿಧಿನಾ ಕತ್ತಬ್ಬನಿಸ್ಸಯಾನಿ ಠಪೇತೀತಿ ಥಪತಿ। ಪಣ್ಡಿತಉದಾಯಿತ್ಥೇರೋ, ನ ಲಾಳುದಾಯಿತ್ಥೇರೋ। ದ್ವೇಪಾನನ್ದಾತಿ ಅಟ್ಠಕಥಾಯ ಪದುದ್ಧಾರೋ ಕತೋ – ‘‘ದ್ವೇಪಿ ಮಯಾ ಆನನ್ದಾ’’ತಿ ಪನ ಪಾಳಿಯಂ। ಪಸಾದಕಾಯಸನ್ನಿಸ್ಸಿತಾ ಕಾಯಿಕಾ, ಚೇತೋಸನ್ನಿಸ್ಸಿತಾ ಚೇತಸಿಕಾ। ಆಧಿಪಚ್ಚಟ್ಠೇನ ಸುಖಮೇವ ಇನ್ದ್ರಿಯನ್ತಿ ಸುಖಿನ್ದ್ರಿಯಂ। ಉಪವಿಚಾರವಸೇನಾತಿ ರೂಪಾದೀನಿ ಉಪೇಚ್ಚ ವಿಚರಣವಸೇನ। ಅತೀತೇ ಆರಮ್ಮಣೇ। ಪಚ್ಚುಪ್ಪನ್ನೇತಿ ಅದ್ಧಾಪಚ್ಚುಪ್ಪನ್ನೇ। ಏವಂ ಅಟ್ಠಾಧಿಕಂ ಸತಂ ಅಟ್ಠಸತಂ।
267-268.Daṇḍamuggaraṃ aggasoṇḍamuggaraṃ. Kāḷasuttapakkhipanaṃ kāḷasuttanāḷi. Vāsiādīni pañca aṅgāni assāti pañcakaṅgo. Vatthuvijjāya vuttavidhinā kattabbanissayāni ṭhapetīti thapati. Paṇḍitaudāyitthero, na lāḷudāyitthero. Dvepānandāti aṭṭhakathāya paduddhāro kato – ‘‘dvepi mayā ānandā’’ti pana pāḷiyaṃ. Pasādakāyasannissitā kāyikā, cetosannissitā cetasikā. Ādhipaccaṭṭhena sukhameva indriyanti sukhindriyaṃ. Upavicāravasenāti rūpādīni upecca vicaraṇavasena. Atīte ārammaṇe. Paccuppanneti addhāpaccuppanne. Evaṃ aṭṭhādhikaṃ sataṃ aṭṭhasataṃ.
ಪಾಟಿಯೇಕ್ಕೋ ಅನುಸನ್ಧೀತಿ ಪುಚ್ಛಾನುಸನ್ಧಿಆದೀಹಿ ವಿಸುಂ ತೇಹಿ ಅಸಮ್ಮಿಸ್ಸೋ ಏಕೋ ಅನುಸನ್ಧಿ। ಏಕಾಪಿ ವೇದನಾ ಕಥಿತಾ ‘‘ತತ್ರ, ಭಿಕ್ಖವೇ, ಸುತವಾ ಅರಿಯಸಾವಕೋ’’ತಿ ಆಹರಿತ್ವಾ ‘‘ಫಸ್ಸಪಚ್ಚಯಾ ವೇದನಾ’’ತಿ। ಯಸ್ಮಾ ಭಗವಾ ಚತುತ್ಥಜ್ಝಾನುಪೇಕ್ಖಾವೇದನಂ ವತ್ವಾ – ‘‘ಅತ್ಥಾನನ್ದ, ಏತಸ್ಮಾ ಸುಖಾ ಅಞ್ಞಂ ಸುಖ’’ನ್ತಿಆದಿಂ ವದನ್ತೋ ಥಪತಿನೋ ವಾದಂ ಉಪತ್ಥಮ್ಭೇತಿ ನಾಮ। ತೇನ ಹಿ ಉಪೇಕ್ಖಾವೇದನಾ ‘‘ಸುಖ’’ನ್ತೇವ ವುತ್ತಾ ಸನ್ತಸಭಾವತ್ತಾ। ಅಭಿಕ್ಕನ್ತತರನ್ತಿ ಅತಿವಿಯ ಕನ್ತತರಂ ಮನೋರಮತರಂ। ತೇನಾಹ ‘‘ಸುನ್ದರತರ’’ನ್ತಿ। ಪಣೀತತರನ್ತಿ ಪಧಾನಭಾವಂ ನೀತತಾಯ ಉಳಾರತರಂ। ತೇನಾಹ ‘‘ಅತಪ್ಪಕತರ’’ನ್ತಿ। ಸುಖನ್ತಿ ವುತ್ತಾ ಪಟಿಪಕ್ಖಸ್ಸ ಸುಟ್ಠು ಖಾದನೇನ, ಸುಕರಂ ಓಕಾಸದಾನಮಸ್ಸಾತಿ ವಾ। ನಿರೋಧೋ ಸುಖಂ ನಾಮ ಸಬ್ಬಸೋ ಉದಯಬ್ಬಯಾಭಾವತೋ। ತೇನಾಹ ‘‘ನಿದ್ದುಕ್ಖಭಾವಸಙ್ಖಾತೇನ ಸುಖಟ್ಠೇನಾ’’ತಿ।
Pāṭiyekko anusandhīti pucchānusandhiādīhi visuṃ tehi asammisso eko anusandhi. Ekāpi vedanā kathitā ‘‘tatra, bhikkhave, sutavā ariyasāvako’’ti āharitvā ‘‘phassapaccayā vedanā’’ti. Yasmā bhagavā catutthajjhānupekkhāvedanaṃ vatvā – ‘‘atthānanda, etasmā sukhā aññaṃ sukha’’ntiādiṃ vadanto thapatino vādaṃ upatthambheti nāma. Tena hi upekkhāvedanā ‘‘sukha’’nteva vuttā santasabhāvattā. Abhikkantataranti ativiya kantataraṃ manoramataraṃ. Tenāha ‘‘sundaratara’’nti. Paṇītataranti padhānabhāvaṃ nītatāya uḷārataraṃ. Tenāha ‘‘atappakatara’’nti. Sukhanti vuttā paṭipakkhassa suṭṭhu khādanena, sukaraṃ okāsadānamassāti vā. Nirodho sukhaṃ nāma sabbaso udayabbayābhāvato. Tenāha ‘‘niddukkhabhāvasaṅkhātena sukhaṭṭhenā’’ti.
ಸುಖಸ್ಮಿಂಯೇವಾತಿ ಸುಖಮಿಚ್ಚೇವ ಪಞ್ಞಪೇತಿ। ನಿರೋಧಸಮಾಪತ್ತಿಂ ಸೀಸಂ ಕತ್ವಾತಿ ನಿರೋಧಸಮಾಪತ್ತಿದೇಸನಾಯ ಸೀಸಂ ಉತ್ತಮಂ ಕತ್ವಾ। ದೇಸನಾಯ ಉದ್ದೇಸಾಧಿಮುತ್ತೇ ಉಟ್ಠಾಪೇತ್ವಾ ವಿತ್ಥಾರಿತತ್ತಾ ‘‘ನೇಯ್ಯಪುಗ್ಗಲಸ್ಸ ವಸೇನಾ’’ತಿ ವುತ್ತಂ। ದಸಮಂ ಅನನ್ತರಸುತ್ತೇ ವುತ್ತನಯತ್ತಾ ಉತ್ತಾನತ್ಥಮೇವ।
Sukhasmiṃyevāti sukhamicceva paññapeti. Nirodhasamāpattiṃ sīsaṃ katvāti nirodhasamāpattidesanāya sīsaṃ uttamaṃ katvā. Desanāya uddesādhimutte uṭṭhāpetvā vitthāritattā ‘‘neyyapuggalassa vasenā’’ti vuttaṃ. Dasamaṃ anantarasutte vuttanayattā uttānatthameva.
ಪಞ್ಚಕಙ್ಗಸುತ್ತಾದಿವಣ್ಣನಾ ನಿಟ್ಠಿತಾ।
Pañcakaṅgasuttādivaṇṇanā niṭṭhitā.
ರಹೋಗತವಗ್ಗವಣ್ಣನಾ ನಿಟ್ಠಿತಾ।
Rahogatavaggavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya
೯. ಪಞ್ಚಕಙ್ಗಸುತ್ತಂ • 9. Pañcakaṅgasuttaṃ
೧೦. ಭಿಕ್ಖುಸುತ್ತಂ • 10. Bhikkhusuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೯-೧೦. ಪಞ್ಚಕಙ್ಗಸುತ್ತಾದಿವಣ್ಣನಾ • 9-10. Pañcakaṅgasuttādivaṇṇanā
