| Library / Tipiṭaka / திபிடக • Tipiṭaka / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā |
பஞ்சகனித்³தே³ஸவண்ணனா
Pañcakaniddesavaṇṇanā
967. பஞ்சவித⁴ஸங்க³ஹனித்³தே³ஸே கக்க²ளந்தி த²த்³த⁴ங். க²ரமேவ க²ரக³தங், ப²ருஸந்தி அத்தோ². இதரே த்³வேபி ஸபா⁴வனித்³தே³ஸா ஏவ. அஜ்ஜ²த்தந்தி நியகஜ்ஜ²த்தங். ப³ஹித்³தா⁴தி பா³ஹிரங். உபாதி³ண்ணந்தி ந கம்மஸமுட்டா²னமேவ. அவிஸேஸேன பன ஸரீரட்ட²கஸ்ஸேதங் க³ஹணங். ஸரீரட்ட²கஞ்ஹி உபாதி³ண்ணங் வா ஹோது அனுபாதி³ண்ணங் வா, ஆதி³ன்னக³ஹிதபராமட்ட²வஸேன ஸப்³ப³ங் உபாதி³ண்ணமேவ நாம.
967. Pañcavidhasaṅgahaniddese kakkhaḷanti thaddhaṃ. Kharameva kharagataṃ, pharusanti attho. Itare dvepi sabhāvaniddesā eva. Ajjhattanti niyakajjhattaṃ. Bahiddhāti bāhiraṃ. Upādiṇṇanti na kammasamuṭṭhānameva. Avisesena pana sarīraṭṭhakassetaṃ gahaṇaṃ. Sarīraṭṭhakañhi upādiṇṇaṃ vā hotu anupādiṇṇaṃ vā, ādinnagahitaparāmaṭṭhavasena sabbaṃ upādiṇṇameva nāma.
969. தேஜோக³தந்தி ஸப்³ப³தேஜேஸு க³தங் உண்ஹத்தலக்க²ணங், தேஜோ ஏவ வா தேஜோபா⁴வங் க³தந்தி ‘தேஜோக³தங்’. உஸ்மாதி உஸ்மாகாரோ. உஸ்மாக³தந்தி உஸ்மாபா⁴வங் க³தங். உஸ்மாகாரஸ்ஸேவேதங் நாமங். உஸுமந்தி ப³லவஉஸ்மா. உஸுமமேவ உஸுமபா⁴வங் க³தந்தி உஸுமக³தங்.
969. Tejogatanti sabbatejesu gataṃ uṇhattalakkhaṇaṃ, tejo eva vā tejobhāvaṃ gatanti ‘tejogataṃ’. Usmāti usmākāro. Usmāgatanti usmābhāvaṃ gataṃ. Usmākārassevetaṃ nāmaṃ. Usumanti balavausmā. Usumameva usumabhāvaṃ gatanti usumagataṃ.
970. வாயனகவஸேன வாயோ. வாயோவ வாயோபா⁴வங் க³தத்தா வாயோக³தங். த²ம்பி⁴தத்தந்தி உப்பலனாளதசாதீ³னங் விய வாதபுண்ணானங் த²ம்பி⁴தபா⁴வோ ரூபஸ்ஸ.
970. Vāyanakavasena vāyo. Vāyova vāyobhāvaṃ gatattā vāyogataṃ. Thambhitattanti uppalanāḷatacādīnaṃ viya vātapuṇṇānaṃ thambhitabhāvo rūpassa.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / த⁴ம்மஸங்க³ணீபாளி • Dhammasaṅgaṇīpāḷi / ரூபவிப⁴த்தி • Rūpavibhatti
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-மூலடீகா • Dhammasaṅgaṇī-mūlaṭīkā / பஞ்சகனித்³தே³ஸவண்ணனா • Pañcakaniddesavaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-அனுடீகா • Dhammasaṅgaṇī-anuṭīkā / பஞ்சகனித்³தே³ஸவண்ணனா • Pañcakaniddesavaṇṇanā
