| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
(5.) பஞ்சகனித்³தே³ஸவண்ணனா
(5.) Pañcakaniddesavaṇṇanā
804. பஞ்சவிதே⁴ன ஞாணவத்து²னித்³தே³ஸே பீதிப²ரணதாதீ³ஸு பீதிங் ப²ரமானா உப்பஜ்ஜதீதி த்³வீஸு ஜா²னேஸு பஞ்ஞா பீதிப²ரணதா நாம. ஸுக²ங் ப²ரமானா உப்பஜ்ஜதீதி தீஸு ஜா²னேஸு பஞ்ஞா ஸுக²ப²ரணதா நாம. பரேஸங் சேதோப²ரமானா உப்பஜ்ஜதீதி சேதோபரியபஞ்ஞா சேதோப²ரணதா நாம. ஆலோகங் ப²ரமானா உப்பஜ்ஜதீதி தி³ப்³ப³சக்கு²பஞ்ஞா ஆலோகப²ரணதா நாம. பச்சவெக்க²ணஞாணங் பச்சவெக்க²ணானிமித்தங் நாம. தேனேவ வுத்தங் ‘‘த்³வீஸு ஜா²னேஸு பஞ்ஞா பீதிப²ரணதா’’திஆதி³. தத்த² ச பீதிப²ரணதா ஸுக²ப²ரணதா த்³வே பாதா³ விய, சேதோப²ரணதா ஆலோகப²ரணதா த்³வே ஹத்தா² விய, அபி⁴ஞ்ஞாபாத³கஜ்ஜா²னங் மஜ்ஜி²மகாயோ விய, பச்சவெக்க²ணானிமித்தங் ஸீஸங் விய. இதி ப⁴க³வா பஞ்சங்கி³கங் ஸம்மாஸமாதி⁴ங் அங்க³பச்சங்க³ஸம்பன்னங் புரிஸங் விய கத்வா த³ஸ்ஸேஸி. அயங் பஞ்சங்கி³கோ ஸம்மாஸமாதீ⁴தி அயங் ஹத்த²பாத³ஸீஸஸதி³ஸேஹி பஞ்சஹி அங்கே³ஹி யுத்தோ ஸம்மாஸமாதீ⁴தி பாத³கஜ்ஜா²னஸமாதி⁴ங் கதே²ஸி.
804. Pañcavidhena ñāṇavatthuniddese pītipharaṇatādīsu pītiṃ pharamānā uppajjatīti dvīsu jhānesu paññā pītipharaṇatā nāma. Sukhaṃ pharamānā uppajjatīti tīsu jhānesu paññā sukhapharaṇatā nāma. Paresaṃ cetopharamānā uppajjatīti cetopariyapaññā cetopharaṇatā nāma. Ālokaṃ pharamānā uppajjatīti dibbacakkhupaññā ālokapharaṇatā nāma. Paccavekkhaṇañāṇaṃ paccavekkhaṇānimittaṃ nāma. Teneva vuttaṃ ‘‘dvīsu jhānesu paññā pītipharaṇatā’’tiādi. Tattha ca pītipharaṇatā sukhapharaṇatā dve pādā viya, cetopharaṇatā ālokapharaṇatā dve hatthā viya, abhiññāpādakajjhānaṃ majjhimakāyo viya, paccavekkhaṇānimittaṃ sīsaṃ viya. Iti bhagavā pañcaṅgikaṃ sammāsamādhiṃ aṅgapaccaṅgasampannaṃ purisaṃ viya katvā dassesi. Ayaṃ pañcaṅgiko sammāsamādhīti ayaṃ hatthapādasīsasadisehi pañcahi aṅgehi yutto sammāsamādhīti pādakajjhānasamādhiṃ kathesi.
அயங் ஸமாதி⁴ பச்சுப்பன்னஸுகோ² சேவாதிஆதீ³ஸு அரஹத்தப²லஸமாதி⁴ அதி⁴ப்பேதோ. ஸோ ஹி அப்பிதப்பிதக்க²ணே ஸுக²த்தா பச்சுப்பன்னஸுகோ². புரிமோ புரிமோ பச்சி²மஸ்ஸ பச்சி²மஸ்ஸ ஸமாதி⁴ஸுக²ஸ்ஸ பச்சயத்தா ஆயதிங் ஸுக²விபாகோ. ஸந்தங் ஸுகு²மங் ப²லசித்தங் பணீதங் மது⁴ரரூபங் ஸமுட்டா²பேதி. ப²லஸமாபத்தியா வுட்டி²தஸ்ஸ ஹி ஸப்³ப³காயானுக³தங் ஸுக²ஸம்ப²ஸ்ஸங் பொ²ட்ட²ப்³ப³ங் படிச்ச ஸுக²ஸஹக³தங் காயவிஞ்ஞாணங் உப்பஜ்ஜதி. இமினாபி பரியாயேன ஆயதிங் ஸுக²விபாகோ. கிலேஸேஹி ஆரகத்தா அரியோ. காமாமிஸவட்டாமிஸலோகாமிஸானங் அபா⁴வா நிராமிஸோ. பு³த்³தா⁴தீ³ஹி மஹாபுரிஸேஹி ஸேவிதத்தா அகாபுரிஸஸேவிதோ. அங்க³ஸந்ததாய ஆரம்மணஸந்ததாய ஸப்³ப³கிலேஸத³ரத²ஸந்ததாய ச ஸந்தோ. அதப்பனீயட்டே²ன பணீதோ. கிலேஸபடிப்பஸ்ஸத்³தி⁴யா லத்³த⁴த்தா கிலேஸபடிப்பஸ்ஸத்³தி⁴பா⁴வஸ்ஸ வா லத்³த⁴த்தா படிப்பஸ்ஸத்³தி⁴லத்³தோ⁴. படிப்பஸ்ஸத்³த⁴ங் படிப்பஸ்ஸத்³தீ⁴தி ஹி இத³ங் அத்த²தோ ஏகங். படிப்பஸ்ஸத்³த⁴கிலேஸேன வா அரஹதா லத்³த⁴த்தாபி படிப்பஸ்ஸத்³தி⁴லத்³தோ⁴. ஏகோதி³பா⁴வேன அதி⁴க³தத்தா ஏகோதி³பா⁴வமேவ வா அதி⁴க³தத்தா ஏகோதி³பா⁴வாதி⁴க³தோ. அப்பகு³ணஸாஸவஸமாதி⁴ விய ஸஸங்கா²ரேன ஸப்பயோகே³ன சித்தேன பச்சனீகத⁴ம்மே நிக்³க³ய்ஹ கிலேஸே வாரெத்வா அனதி⁴க³தத்தா ந ஸஸங்கா²ரனிக்³க³ய்ஹவாரிதக³தோ. தஞ்ச ஸமாதி⁴ங் ஸமாபஜ்ஜந்தோ ததோ வா வுட்ட²ஹந்தோ ஸதிவேபுல்லப்பத்தத்தா ஸதோவ ஸமாபஜ்ஜதி ஸதோவ வுட்ட²ஹதி. யதா²பரிச்சி²ன்னகாலவஸேன வா ஸதோ ஸமாபஜ்ஜதி ஸதோ வுட்ட²ஹதி. தஸ்மா யதெ³த்த² ‘‘அயங் ஸமாதி⁴ பச்சுப்பன்னஸுகோ² சேவ ஆயதிஞ்ச ஸுக²விபாகோ’’தி ஏவங் பச்சவெக்க²மானஸ்ஸ பச்சத்தங்யேவ அபரப்பச்சயங் ஞாணங் உப்பஜ்ஜதி – தங் ஏகமங்க³ங். ஏஸ நயோ ஸேஸேஸுபி. ஏவமிமேஹி பஞ்சஹி பச்சவெக்க²ணஞாணேஹி அயங் ஸமாதி⁴ பஞ்சஞாணிகோ ஸம்மாஸமாதி⁴ நாம வுத்தோதி.
Ayaṃ samādhi paccuppannasukho cevātiādīsu arahattaphalasamādhi adhippeto. So hi appitappitakkhaṇe sukhattā paccuppannasukho. Purimo purimo pacchimassa pacchimassa samādhisukhassa paccayattā āyatiṃ sukhavipāko. Santaṃ sukhumaṃ phalacittaṃ paṇītaṃ madhurarūpaṃ samuṭṭhāpeti. Phalasamāpattiyā vuṭṭhitassa hi sabbakāyānugataṃ sukhasamphassaṃ phoṭṭhabbaṃ paṭicca sukhasahagataṃ kāyaviññāṇaṃ uppajjati. Imināpi pariyāyena āyatiṃ sukhavipāko. Kilesehi ārakattā ariyo. Kāmāmisavaṭṭāmisalokāmisānaṃ abhāvā nirāmiso. Buddhādīhi mahāpurisehi sevitattā akāpurisasevito. Aṅgasantatāya ārammaṇasantatāya sabbakilesadarathasantatāya ca santo. Atappanīyaṭṭhena paṇīto. Kilesapaṭippassaddhiyā laddhattā kilesapaṭippassaddhibhāvassa vā laddhattā paṭippassaddhiladdho. Paṭippassaddhaṃ paṭippassaddhīti hi idaṃ atthato ekaṃ. Paṭippassaddhakilesena vā arahatā laddhattāpi paṭippassaddhiladdho. Ekodibhāvena adhigatattā ekodibhāvameva vā adhigatattā ekodibhāvādhigato. Appaguṇasāsavasamādhi viya sasaṅkhārena sappayogena cittena paccanīkadhamme niggayha kilese vāretvā anadhigatattā na sasaṅkhāraniggayhavāritagato. Tañca samādhiṃ samāpajjanto tato vā vuṭṭhahanto sativepullappattattā satova samāpajjati satova vuṭṭhahati. Yathāparicchinnakālavasena vā sato samāpajjati sato vuṭṭhahati. Tasmā yadettha ‘‘ayaṃ samādhi paccuppannasukho ceva āyatiñca sukhavipāko’’ti evaṃ paccavekkhamānassa paccattaṃyeva aparappaccayaṃ ñāṇaṃ uppajjati – taṃ ekamaṅgaṃ. Esa nayo sesesupi. Evamimehi pañcahi paccavekkhaṇañāṇehi ayaṃ samādhi pañcañāṇiko sammāsamādhi nāma vuttoti.
பஞ்சகனித்³தே³ஸவண்ணனா.
Pañcakaniddesavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 16. ஞாணவிப⁴ங்கோ³ • 16. Ñāṇavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-மூலடீகா • Vibhaṅga-mūlaṭīkā / 16. ஞாணவிப⁴ங்கோ³ • 16. Ñāṇavibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-அனுடீகா • Vibhaṅga-anuṭīkā / 16. ஞாணவிப⁴ங்கோ³ • 16. Ñāṇavibhaṅgo
