| Library / Tipiṭaka / திபிடக • Tipiṭaka / ஸம்மோஹவினோத³னீ-அட்ட²கதா² • Sammohavinodanī-aṭṭhakathā |
(5.) பஞ்சகனித்³தே³ஸவண்ணனா
(5.) Pañcakaniddesavaṇṇanā
940. பஞ்சகனித்³தே³ஸே யஸ்மா யேஸங் ஸக்காயதி³ட்டி²ஆதீ³னி அப்பஹீனானி, தே ப⁴வக்³கே³பி நிப்³ப³த்தே ஏதானி ஆகட்³டி⁴த்வா காமப⁴வேயேவ பாதெந்தி, தஸ்மா ஓரம்பா⁴கி³யானி ஸங்யோஜனானீதி வுத்தானி. இதி ஏதானி பஞ்ச க³ச்ச²ந்தங் ந வாரெந்தி, க³தங் பன ஆனெந்தி. ரூபராகா³தீ³னிபி பஞ்ச க³ச்ச²ந்தங் ந வாரெந்தி, ஆக³ந்துங் பன ந தெ³ந்தி. ராகா³த³யோ பஞ்ச லக்³க³னட்டே²ன ஸங்கா³, அனுபவிட்ட²ட்டே²ன பன ஸல்லாதி வுத்தா.
940. Pañcakaniddese yasmā yesaṃ sakkāyadiṭṭhiādīni appahīnāni, te bhavaggepi nibbatte etāni ākaḍḍhitvā kāmabhaveyeva pātenti, tasmā orambhāgiyāni saṃyojanānīti vuttāni. Iti etāni pañca gacchantaṃ na vārenti, gataṃ pana ānenti. Rūparāgādīnipi pañca gacchantaṃ na vārenti, āgantuṃ pana na denti. Rāgādayo pañca lagganaṭṭhena saṅgā, anupaviṭṭhaṭṭhena pana sallāti vuttā.
941. சேதோகி²லாதி சித்தஸ்ஸ த²த்³த⁴பா⁴வா கசவரபா⁴வா கா²ணுகபா⁴வா. ஸத்த²ரி கங்க²தீதி ஸத்து² ஸரீரே வா கு³ணே வா கங்க²தி. ஸரீரே கங்க²மானோ ‘த்³வத்திங்ஸவரலக்க²ணபடிமண்டி³தங் நாம ஸரீரங் அத்தி² நு கோ² நத்தீ²’தி கங்க²தி. கு³ணே கங்க²மானோ ‘அதீதானாக³தபச்சுப்பன்னஜானநஸமத்த²ங் ஸப்³ப³ஞ்ஞுதஞாணங் அத்தி² நு கோ² நத்தீ²’தி கங்க²தி. விசிகிச்ச²தீதி விசினந்தோ கிச்ச²தி, து³க்க²ங் ஆபஜ்ஜதி, வினிச்சே²துங் ந ஸக்கோதி. நாதி⁴முச்சதீதி ‘ஏவமேத’ந்தி அதி⁴மொக்க²ங் ந படிலப⁴தி . ந ஸம்பஸீத³தீதி கு³ணேஸு ஓதரித்வா நிப்³பி³சிகிச்ச²பா⁴வேன பஸீதி³துங் அனாவிலோ ப⁴விதுங் ந ஸக்கோதி.
941. Cetokhilāti cittassa thaddhabhāvā kacavarabhāvā khāṇukabhāvā. Satthari kaṅkhatīti satthu sarīre vā guṇe vā kaṅkhati. Sarīre kaṅkhamāno ‘dvattiṃsavaralakkhaṇapaṭimaṇḍitaṃ nāma sarīraṃ atthi nu kho natthī’ti kaṅkhati. Guṇe kaṅkhamāno ‘atītānāgatapaccuppannajānanasamatthaṃ sabbaññutañāṇaṃ atthi nu kho natthī’ti kaṅkhati. Vicikicchatīti vicinanto kicchati, dukkhaṃ āpajjati, vinicchetuṃ na sakkoti. Nādhimuccatīti ‘evameta’nti adhimokkhaṃ na paṭilabhati . Na sampasīdatīti guṇesu otaritvā nibbicikicchabhāvena pasīdituṃ anāvilo bhavituṃ na sakkoti.
த⁴ம்மேதி பரியத்தித⁴ம்மே ச படிவேத⁴த⁴ம்மே ச. பரியத்தித⁴ம்மே கங்க²மானோ ‘தேபிடகங் பு³த்³த⁴வசனங் சதுராஸீதித⁴ம்மக்க²ந்த⁴ஸஹஸ்ஸானீதி வத³ந்தி, அத்தி² நு கோ² ஏதங் நத்தீ²’தி கங்க²தி. படிவேத⁴த⁴ம்மே கங்க²மானோ ‘விபஸ்ஸனானிஸ்ஸந்தோ³ மக்³கோ³ நாம , மக்³க³னிஸ்ஸந்தோ³ ப²லங் நாம, ஸப்³ப³ஸங்கா²ரபடினிஸ்ஸக்³கோ³ நிப்³பா³னங் நாமாதி வத³ந்தி, தங் அத்தி² நு கோ² நத்தீ²தி கங்க²தி’.
Dhammeti pariyattidhamme ca paṭivedhadhamme ca. Pariyattidhamme kaṅkhamāno ‘tepiṭakaṃ buddhavacanaṃ caturāsītidhammakkhandhasahassānīti vadanti, atthi nu kho etaṃ natthī’ti kaṅkhati. Paṭivedhadhamme kaṅkhamāno ‘vipassanānissando maggo nāma , magganissando phalaṃ nāma, sabbasaṅkhārapaṭinissaggo nibbānaṃ nāmāti vadanti, taṃ atthi nu kho natthīti kaṅkhati’.
ஸங்கே⁴ கங்க²தீதி ‘உஜுப்படிபன்னோதிஆதீ³னங் பதா³னங் வஸேன ஏவரூபங் படிபத³ங் படிபன்னா சத்தாரோ மக்³க³ட்டா² சத்தாரோ ப²லட்டா²தி அட்ட²ன்னங் புக்³க³லானங் ஸமூஹபூ⁴தோ ஸங்கோ⁴ நாம அத்தி² நு கோ² நத்தீ²’தி கங்க²தி. ஸிக்கா²ய கங்க²மானோ ‘அதி⁴ஸீலஸிக்கா² நாம அதி⁴சித்தஸிக்கா² நாம அதி⁴பஞ்ஞா ஸிக்கா² நாமாதி வத³ந்தி, ஸா அத்தி² நு கோ² நத்தீ²’தி கங்க²தி.
Saṅghe kaṅkhatīti ‘ujuppaṭipannotiādīnaṃ padānaṃ vasena evarūpaṃ paṭipadaṃ paṭipannā cattāro maggaṭṭhā cattāro phalaṭṭhāti aṭṭhannaṃ puggalānaṃ samūhabhūto saṅgho nāma atthi nu kho natthī’ti kaṅkhati. Sikkhāya kaṅkhamāno ‘adhisīlasikkhā nāma adhicittasikkhā nāma adhipaññā sikkhā nāmāti vadanti, sā atthi nu kho natthī’ti kaṅkhati.
சேதஸோவினிப³ந்தா⁴தி சித்தங் ப³ந்தி⁴த்வா முட்டி²யங் கத்வா விய க³ண்ஹந்தீதி சேதஸோவினிப³ந்தா⁴. காமேதி வத்து²காமேபி கிலேஸகாமேபி. காயேதி அத்தனோ காயே. ரூபேதி ப³ஹித்³தா⁴ ரூபே. யாவத³த்த²ந்தி யத்தகங் இச்ச²தி தத்தகங். உத³ராவதே³ஹகந்தி உத³ரபூரங். தஞ்ஹி உத³ரங் அவதே³ஹனதோ உத³ராவதே³ஹகந்தி வுச்சதி. ஸெய்யஸுக²ந்தி மஞ்சபீட²ஸுக²ங் உதுஸுக²ங் வா. பஸ்ஸஸுக²ந்தி யதா² ஸம்பரிவத்தகங் ஸயந்தஸ்ஸ த³க்கி²ணபஸ்ஸவாமபஸ்ஸானங் ஸுக²ங் ஹோதி, ஏவங் உப்பன்னஸுக²ங். மித்³த⁴ஸுக²ந்தி நித்³தா³ஸுக²ங். அனுயுத்தோதி யுத்தபயுத்தோ விஹரதி. பணிதா⁴யாதி பத்த²யித்வா. ஸீலேனாதிஆதீ³ஸு ஸீலந்தி சதுபாரிஸுத்³தி⁴ஸீலங். வதந்தி வதஸமாதா³னங். தபோதி தபசரணங். ப்³ரஹ்மசரியந்தி மேது²னவிரதி. தே³வோ வா ப⁴விஸ்ஸாமீதி மஹேஸக்க²தே³வோ வா ப⁴விஸ்ஸாமி. தே³வஞ்ஞதரோ வாதி அப்பேஸக்க²தே³வேஸு வா அஞ்ஞதரோ. குஸலத⁴ம்மே ஆவரந்தி நிவாரெந்தீதி நீவரணானி.
Cetasovinibandhāti cittaṃ bandhitvā muṭṭhiyaṃ katvā viya gaṇhantīti cetasovinibandhā. Kāmeti vatthukāmepi kilesakāmepi. Kāyeti attano kāye. Rūpeti bahiddhā rūpe. Yāvadatthanti yattakaṃ icchati tattakaṃ. Udarāvadehakanti udarapūraṃ. Tañhi udaraṃ avadehanato udarāvadehakanti vuccati. Seyyasukhanti mañcapīṭhasukhaṃ utusukhaṃ vā. Passasukhanti yathā samparivattakaṃ sayantassa dakkhiṇapassavāmapassānaṃ sukhaṃ hoti, evaṃ uppannasukhaṃ. Middhasukhanti niddāsukhaṃ. Anuyuttoti yuttapayutto viharati. Paṇidhāyāti patthayitvā. Sīlenātiādīsu sīlanti catupārisuddhisīlaṃ. Vatanti vatasamādānaṃ. Tapoti tapacaraṇaṃ. Brahmacariyanti methunavirati. Devo vā bhavissāmīti mahesakkhadevo vā bhavissāmi. Devaññataro vāti appesakkhadevesu vā aññataro. Kusaladhamme āvaranti nivārentīti nīvaraṇāni.
மாதா ஜீவிதா வோரோபிதா ஹோதீதி மனுஸ்ஸேனேவ ஸகஜனிகா மனுஸ்ஸமாதா ஜீவிதா வோரோபிதா ஹோதி. பிதாபி மனுஸ்ஸபிதாவ. அரஹாபி மனுஸ்ஸஅரஹாவ. து³ட்டே²ன சித்தேனாதி வத⁴கசித்தேன.
Mātā jīvitā voropitā hotīti manusseneva sakajanikā manussamātā jīvitā voropitā hoti. Pitāpi manussapitāva. Arahāpi manussaarahāva. Duṭṭhena cittenāti vadhakacittena.
ஸஞ்ஞீதி ஸஞ்ஞாஸமங்கீ³. அரோகோ³தி நிச்சோ. இத்தே²கே அபி⁴வத³ந்தீதி இத்த²ங் ஏகே அபி⁴வத³ந்தி, ஏவமேகே அபி⁴வத³ந்தீதி அத்தோ². எத்தாவதா ஸோளஸ ஸஞ்ஞீவாதா³ கதி²தா. அஸஞ்ஞீதி ஸஞ்ஞாவிரஹிதோ. இமினா பதே³ன அட்ட² அஸஞ்ஞீவாதா³ கதி²தா. ததியபதே³ன அட்ட² நேவஸஞ்ஞீனாஸஞ்ஞீவாதா³ கதி²தா. ஸதோ வா பன ஸத்தஸ்ஸாதி அத²வா பன விஜ்ஜமானஸ்ஸேவ ஸத்தஸ்ஸ. உச்சே²த³ந்தி உபச்சே²த³ங். வினாஸந்தி அத³ஸ்ஸனங். விப⁴வந்தி பா⁴வவிக³மங். ஸப்³பா³னேதானி அஞ்ஞமஞ்ஞவேவசனானேவ. தத்த² த்³வே ஜனா உச்சே²த³தி³ட்டி²ங் க³ண்ஹந்தி – லாபீ⁴ ச அலாபீ⁴ ச. தத்த² லாபீ⁴ அரஹதோ தி³ப்³பே³ன சக்கு²னா சுதிங் தி³ஸ்வா உபபத்திங் அபஸ்ஸந்தோ, யோ வா சுதிமத்தமேவ த³ட்டு²ங் ஸக்கோதி ந உபபாதங், ஸோ உச்சே²த³தி³ட்டி²ங் க³ண்ஹாதி. அலாபீ⁴ ‘கோ பரலோகங் ஜானாதீ’தி காமஸுக²கி³த்³த⁴தாய வா ‘யதா² ருக்க²தோ பண்ணானி பதிதானி ந புன விருஹந்தி, ஏவங் ஸத்தா’திஆதி³னா விதக்கேன வா உச்சே²த³ங் க³ண்ஹாதி. இத⁴ பன தண்ஹாதி³ட்டீ²னங் வஸேன ததா² ச அஞ்ஞதா² ச விகப்பெத்வாவ உப்பன்னா ஸத்த உச்சே²த³வாதா³ கதி²தா. தேஸஞ்ஹி இத³ங் ஸங்க³ஹவசனங். தி³ட்ட²த⁴ம்மனிப்³பா³னங் வா பனேகேதி எத்த² தி³ட்ட²த⁴ம்மோதி பச்சக்க²த⁴ம்மோ வுச்சதி. தத்த² தத்த² படிலத்³த⁴த்தபா⁴வஸ்ஸேதங் அதி⁴வசனங். தி³ட்ட²த⁴ம்மே நிப்³பா³னங் தி³ட்ட²த⁴ம்மனிப்³பா³னங்; இமஸ்மிங்யேவ அத்தபா⁴வே து³க்கா² வூபஸம்மந்தி அத்தோ². இத³ங் பஞ்சன்னங் தி³ட்ட²த⁴ம்மனிப்³பா³னவாதா³னங் ஸங்க³ஹவசனங்.
Saññīti saññāsamaṅgī. Arogoti nicco. Ittheke abhivadantīti itthaṃ eke abhivadanti, evameke abhivadantīti attho. Ettāvatā soḷasa saññīvādā kathitā. Asaññīti saññāvirahito. Iminā padena aṭṭha asaññīvādā kathitā. Tatiyapadena aṭṭha nevasaññīnāsaññīvādā kathitā. Sato vā pana sattassāti athavā pana vijjamānasseva sattassa. Ucchedanti upacchedaṃ. Vināsanti adassanaṃ. Vibhavanti bhāvavigamaṃ. Sabbānetāni aññamaññavevacanāneva. Tattha dve janā ucchedadiṭṭhiṃ gaṇhanti – lābhī ca alābhī ca. Tattha lābhī arahato dibbena cakkhunā cutiṃ disvā upapattiṃ apassanto, yo vā cutimattameva daṭṭhuṃ sakkoti na upapātaṃ, so ucchedadiṭṭhiṃ gaṇhāti. Alābhī ‘ko paralokaṃ jānātī’ti kāmasukhagiddhatāya vā ‘yathā rukkhato paṇṇāni patitāni na puna viruhanti, evaṃ sattā’tiādinā vitakkena vā ucchedaṃ gaṇhāti. Idha pana taṇhādiṭṭhīnaṃ vasena tathā ca aññathā ca vikappetvāva uppannā satta ucchedavādā kathitā. Tesañhi idaṃ saṅgahavacanaṃ. Diṭṭhadhammanibbānaṃ vā paneketi ettha diṭṭhadhammoti paccakkhadhammo vuccati. Tattha tattha paṭiladdhattabhāvassetaṃ adhivacanaṃ. Diṭṭhadhamme nibbānaṃ diṭṭhadhammanibbānaṃ; imasmiṃyeva attabhāve dukkhā vūpasammanti attho. Idaṃ pañcannaṃ diṭṭhadhammanibbānavādānaṃ saṅgahavacanaṃ.
942. வேராதி வேரசேதனா. ப்³யஸனாதி வினாஸா. அக்க²ந்தியாதி அனதி⁴வாஸனாய. அப்பியோதி த³ஸ்ஸனஸவனபடிகூலதாய ந பியாயிதப்³போ³. சிந்தேதும்பி படிகூலத்தா மனோ ஏதஸ்மிங் ந அப்பேதீதி அமனாபோ. வேரப³ஹுலோதி ப³ஹுவேரோ. வஜ்ஜப³ஹுலோதி ப³ஹுதோ³ஸோ.
942. Verāti veracetanā. Byasanāti vināsā. Akkhantiyāti anadhivāsanāya. Appiyoti dassanasavanapaṭikūlatāya na piyāyitabbo. Cintetumpi paṭikūlattā mano etasmiṃ na appetīti amanāpo. Verabahuloti bahuvero. Vajjabahuloti bahudoso.
ஆஜீவகப⁴யந்தி ஆஜீவங் ஜீவிதவுத்திங் படிச்ச உப்பன்னங் ப⁴யங் . தங் அகா³ரிகஸ்ஸபி ஹோதி அனகா³ரிகஸ்ஸபி. தத்த² அகா³ரிகேன தாவ ஆஜீவஹேது ப³ஹுங் அகுஸலங் கதங் ஹோதி. அத²ஸ்ஸ மரணஸமயே நிரயே உபட்ட²ஹந்தே ப⁴யங் உப்பஜ்ஜதி. அனகா³ரிகேனாபி ப³ஹு அனேஸனா கதா ஹோதி. அத²ஸ்ஸ மரணகாலே நிரயே உபட்ட²ஹந்தே ப⁴யங் உப்பஜ்ஜதி. இத³ங் ஆஜீவகப⁴யங் நாம. அஸிலோகப⁴யந்தி க³ரஹப⁴யங் பரிஸஸாரஜ்ஜப⁴யந்தி கதபாபஸ்ஸ புக்³க³லஸ்ஸ ஸன்னிபதிதங் பரிஸங் உபஸங்கமந்தஸ்ஸ ஸாரஜ்ஜஸங்கா²தங் ப⁴யங் உப்பஜ்ஜதி. இத³ங் பரிஸஸாரஜ்ஜப⁴யங் நாம. இதரத்³வயங் பாகடமேவ.
Ājīvakabhayanti ājīvaṃ jīvitavuttiṃ paṭicca uppannaṃ bhayaṃ . Taṃ agārikassapi hoti anagārikassapi. Tattha agārikena tāva ājīvahetu bahuṃ akusalaṃ kataṃ hoti. Athassa maraṇasamaye niraye upaṭṭhahante bhayaṃ uppajjati. Anagārikenāpi bahu anesanā katā hoti. Athassa maraṇakāle niraye upaṭṭhahante bhayaṃ uppajjati. Idaṃ ājīvakabhayaṃ nāma. Asilokabhayanti garahabhayaṃ parisasārajjabhayanti katapāpassa puggalassa sannipatitaṃ parisaṃ upasaṅkamantassa sārajjasaṅkhātaṃ bhayaṃ uppajjati. Idaṃ parisasārajjabhayaṃ nāma. Itaradvayaṃ pākaṭameva.
943. தி³ட்ட²த⁴ம்மனிப்³பா³னவாரேஸு பஞ்சஹி காமகு³ணேஹீதி மனாபியரூபாதீ³ஹி பஞ்சஹி காமகொட்டா²ஸேஹி ப³ந்த⁴னேஹி வா. ஸமப்பிதோதி ஸுட்டு² அப்பிதோ அல்லீனோ ஹுத்வா. ஸமங்கீ³பூ⁴தோதி ஸமன்னாக³தோ. பரிசாரேதீதி தேஸு காமகு³ணேஸு யதா²ஸுக²ங் இந்த்³ரியானி சாரேதி ஸஞ்சாரேதி இதோ சிதோ ச உபனேதி; அத² வா பன லளதி ரமதி கீளதீதி. எத்த² ச து³விதா⁴ காமகு³ணா – மானுஸ்ஸகா சேவ தி³ப்³பா³ ச. மானுஸ்ஸகா மந்தா⁴துகாமகு³ணஸதி³ஸா த³ட்ட²ப்³பா³; தி³ப்³பா³ பரனிம்மிதவஸவத்திதே³வராஜஸ்ஸ காமகு³ணஸதி³ஸாதி. ஏவரூபே காமே உபக³தஞ்ஹி தே பரமதி³ட்ட²த⁴ம்மனிப்³பா³னப்பத்தோ ஹோதீதி வத³ந்தி. தத்த² பரமதி³ட்ட²த⁴ம்மனிப்³பா³னந்தி பரமங் தி³ட்ட²த⁴ம்மனிப்³பா³னங், உத்தமந்தி அத்தோ².
943. Diṭṭhadhammanibbānavāresu pañcahi kāmaguṇehīti manāpiyarūpādīhi pañcahi kāmakoṭṭhāsehi bandhanehi vā. Samappitoti suṭṭhu appito allīno hutvā. Samaṅgībhūtoti samannāgato. Paricāretīti tesu kāmaguṇesu yathāsukhaṃ indriyāni cāreti sañcāreti ito cito ca upaneti; atha vā pana laḷati ramati kīḷatīti. Ettha ca duvidhā kāmaguṇā – mānussakā ceva dibbā ca. Mānussakā mandhātukāmaguṇasadisā daṭṭhabbā; dibbā paranimmitavasavattidevarājassa kāmaguṇasadisāti. Evarūpe kāme upagatañhi te paramadiṭṭhadhammanibbānappatto hotīti vadanti. Tattha paramadiṭṭhadhammanibbānanti paramaṃ diṭṭhadhammanibbānaṃ, uttamanti attho.
து³தியவாரே ஹுத்வா அபா⁴வட்டே²ன அனிச்சா; படிபீளனட்டே²ன து³க்கா²; பகதிஜஹனட்டே²ன விபரிணாமத⁴ம்மாதி வேதி³தப்³பா³. தேஸங் விபரிணாமஞ்ஞதா²பா⁴வாதி தேஸங் காமானங் விபரிணாமஸங்கா²தா அஞ்ஞதா²பா⁴வா. ‘யம்பி மே அஹோஸி தம்பி மே நத்தீ²’தி வுத்தனயேன உப்பஜ்ஜந்தி ஸோகபரிதே³வது³க்க²தோ³மனஸ்ஸுபாயாஸா. தத்த² அந்தோனிஜ்ஜா²யனலக்க²ணோ ஸோகோ; தன்னிஸ்ஸிதலாலப்பலக்க²ணோ பரிதே³வோ; காயபடிபீளனலக்க²ணங் து³க்க²ங்; மனோவிகா⁴தலக்க²ணங் தோ³மனஸ்ஸங்; விகா⁴தலக்க²ணோ உபாயாஸோ.
Dutiyavāre hutvā abhāvaṭṭhena aniccā; paṭipīḷanaṭṭhena dukkhā; pakatijahanaṭṭhena vipariṇāmadhammāti veditabbā. Tesaṃ vipariṇāmaññathābhāvāti tesaṃ kāmānaṃ vipariṇāmasaṅkhātā aññathābhāvā. ‘Yampi me ahosi tampi me natthī’ti vuttanayena uppajjanti sokaparidevadukkhadomanassupāyāsā. Tattha antonijjhāyanalakkhaṇo soko; tannissitalālappalakkhaṇo paridevo; kāyapaṭipīḷanalakkhaṇaṃ dukkhaṃ; manovighātalakkhaṇaṃ domanassaṃ; vighātalakkhaṇo upāyāso.
விதக்கிதந்தி அபி⁴னிரோபனவஸேன பவத்தோ விதக்கோ. விசாரிதந்தி அனுமஜ்ஜனவஸேன பவத்தோ விசாரோ. ஏதேன ஏதந்தி ஏதேன விதக்கேன ச விசாரேன ச ஏதங் பட²மஜ்ஜா²னங் ஓளாரிகங் ஸகண்டகங் விய கா²யதி.
Vitakkitanti abhiniropanavasena pavatto vitakko. Vicāritanti anumajjanavasena pavatto vicāro. Etena etanti etena vitakkena ca vicārena ca etaṃ paṭhamajjhānaṃ oḷārikaṃ sakaṇṭakaṃ viya khāyati.
பீதிக³தந்தி பீதிமேவ. சேதஸோ உப்பிலாவிதந்தி சித்தஸ்ஸ உப்பிலபா⁴வகரணங். சேதஸோ ஆபோ⁴கோ³தி ஜா²னா வுட்டா²ய தஸ்மிங் ஸுகே² புனப்புனங் சித்தஸ்ஸ ஆபோ⁴கோ³ மனஸிகாரோதி. ஸேஸங் ஸப்³ப³த்த² உத்தானத்த²மேவாதி.
Pītigatanti pītimeva. Cetaso uppilāvitanti cittassa uppilabhāvakaraṇaṃ. Cetaso ābhogoti jhānā vuṭṭhāya tasmiṃ sukhe punappunaṃ cittassa ābhogo manasikāroti. Sesaṃ sabbattha uttānatthamevāti.
பஞ்சகனித்³தே³ஸவண்ணனா நிட்டி²தா.
Pañcakaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 17. கு²த்³த³கவத்து²விப⁴ங்கோ³ • 17. Khuddakavatthuvibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-மூலடீகா • Vibhaṅga-mūlaṭīkā / 17. கு²த்³த³கவத்து²விப⁴ங்கோ³ • 17. Khuddakavatthuvibhaṅgo
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-அனுடீகா • Vibhaṅga-anuṭīkā / 17. கு²த்³த³கவத்து²விப⁴ங்கோ³ • 17. Khuddakavatthuvibhaṅgo
