| Library / Tipiṭaka / д̇ибидага • Tipiṭaka / бан̃жабагаран̣а-адтагат̇аа • Pañcapakaraṇa-aṭṭhakathā |
5. бан̃жаганид̣̇д̣̇зсаван̣н̣анаа
5. Pañcakaniddesavaṇṇanā
191. бан̃жагз – д̇ад̇раад̇и д̇зсу ‘‘аарабхад̇и жа виббадисаарий жа ход̇ий’’д̇иаад̣̇инаа наязна хздтаа уд̣̇д̣̇идтабуг̇г̇алзсу. явааяанд̇и яо аяам̣. аарабхад̇ийд̇и зд̇т̇а аарамбхасад̣̇д̣̇о гаммагирияаахим̣санавийрияавигобанаабад̇д̇ивийд̇иггамзсу вад̇д̇ад̇и. д̇ат̇аа хзса ‘‘яам̣гин̃жи д̣̇угкам̣ самбход̇и, саб̣б̣ам̣ аарамбхабажжаяаа’’д̇и (су. ни. 748) гаммз ааг̇ад̇о. ‘‘махааяан̃н̃аа махаарамбхаа, на д̇з хонд̇и махабпалаа’’д̇и (а. ни. 4.39) гирияааяам̣. ‘‘саман̣ам̣ г̇од̇амам̣ уд̣̇д̣̇исса баан̣ам̣ аарабханд̇ий’’д̇и (ма. ни. 2.51-52) хим̣санз. ‘‘аарабхат̇а, нигкамат̇а, яун̃ж̇ат̇а б̣уд̣̇д̇хасаасанз’’д̇и (сам̣. ни. 1.185) вийрияз. ‘‘б̣ийж̇аг̇аамабхууд̇аг̇аамасамаарамбхаа бадивирад̇о ход̇ий’’д̇и (д̣̇ий. ни. 1.10, 194; ма. ни. 1.293) вигобанз. ‘‘аарабхад̇и жа виббадисаарий жа ход̇ий’’д̇и (а. ни. 5.142) аяам̣ бана аабад̇д̇ивийд̇иггамз ааг̇ад̇о. д̇асмаа аабад̇д̇ивийд̇иггамавасзна аарабхад̇и жзва д̇аббажжаяаа виббадисаарий жа ход̇ийд̇и аяамзд̇т̇а ад̇т̇о.
191. Pañcake – tatrāti tesu ‘‘ārabhati ca vippaṭisārī ca hotī’’tiādinā nayena heṭṭhā uddiṭṭhapuggalesu. Yvāyanti yo ayaṃ. Ārabhatīti ettha ārambhasaddo kammakiriyāhiṃsanavīriyavikopanāpattivītikkamesu vattati. Tathā hesa ‘‘yaṃkiñci dukkhaṃ sambhoti, sabbaṃ ārambhapaccayā’’ti (su. ni. 748) kamme āgato. ‘‘Mahāyaññā mahārambhā, na te honti mahapphalā’’ti (a. ni. 4.39) kiriyāyaṃ. ‘‘Samaṇaṃ gotamaṃ uddissa pāṇaṃ ārabhantī’’ti (ma. ni. 2.51-52) hiṃsane. ‘‘Ārabhatha, nikkhamatha, yuñjatha buddhasāsane’’ti (saṃ. ni. 1.185) vīriye. ‘‘Bījagāmabhūtagāmasamārambhā paṭivirato hotī’’ti (dī. ni. 1.10, 194; ma. ni. 1.293) vikopane. ‘‘Ārabhati ca vippaṭisārī ca hotī’’ti (a. ni. 5.142) ayaṃ pana āpattivītikkame āgato. Tasmā āpattivītikkamavasena ārabhati ceva tappaccayā vippaṭisārī ca hotīti ayamettha attho.
яат̇аабхууд̇ам̣ наббаж̇аанаад̇ийд̇и анад̇хиг̇ад̇ад̇д̇аа яат̇аасабхаавад̇о на ж̇аанаад̇и. яад̇т̇ассаад̇и яасмим̣ асса, яам̣ таанам̣ бад̇ваа зд̇асса буг̇г̇аласса уббаннаа баабагаа агусалаа д̇хаммаа абарисзсаа нируж̇жханд̇ийд̇и ад̇т̇о. гим̣ бана бад̇ваа д̇з нируж̇жханд̇ийд̇и? арахад̇д̇амаг̇г̇ам̣. палаббад̇д̇асса бана нируд̣̇д̇хаа наама хонд̇и. звам̣ санд̇зби ид̇ха маг̇г̇агижжавасзна паламзва вуд̇д̇анд̇и взд̣̇ид̇аб̣б̣ам̣. аарамбхаж̇аад̇и аабад̇д̇ивийд̇иггамасамбхаваа. виббадисаараж̇аад̇и виббадисаарад̇о ж̇аад̇аа. бавад̣дханд̇ийд̇и бунаббунам̣ уббаж̇ж̇анзна вад̣дханд̇и. саад̇хууд̇и ааяаажанасаад̇ху. ид̣̇ам̣ вуд̇д̇ам̣ ход̇и – яаава абарад̣̇д̇хан̃жа вад̇а ааяасмад̇аа, звам̣ санд̇зби маяам̣ ааяасманд̇ам̣ яаажаама – ‘‘д̣̇зсзд̇аб̣б̣аяуд̇д̇агасса д̣̇зсанааяа, вудтаад̇аб̣б̣аяуд̇д̇агасса вудтаанзна, аавигаад̇аб̣б̣аяуд̇д̇агасса аавигирияааяа, аарамбхаж̇з аасавз бахааяа, суд̣̇д̇ханд̇з тид̇абхаавабажжавзгкан̣зна виббадисаараж̇з аасавз бадивинод̣̇зд̇ваа нийхарид̇ваа вибассанаажид̇д̇ан̃жзва вибассанаабан̃н̃ан̃жа бхаавзд̇уу’’д̇и. амунаа бан̃жамзна буг̇г̇алзнаад̇и зд̇зна бан̃жамзна кийн̣аасавабуг̇г̇алзна. самасамо бхависсад̇ийд̇и логуд̇д̇араг̇ун̣зхи самабхаавзнзва само бхависсад̇ийд̇и звам̣ кийн̣аасавзна овад̣̇ид̇аб̣б̣од̇и ад̇т̇о.
Yathābhūtaṃ nappajānātīti anadhigatattā yathāsabhāvato na jānāti. Yatthassāti yasmiṃ assa, yaṃ ṭhānaṃ patvā etassa puggalassa uppannā pāpakā akusalā dhammā aparisesā nirujjhantīti attho. Kiṃ pana patvā te nirujjhantīti? Arahattamaggaṃ. Phalappattassa pana niruddhā nāma honti. Evaṃ santepi idha maggakiccavasena phalameva vuttanti veditabbaṃ. Ārambhajāti āpattivītikkamasambhavā. Vippaṭisārajāti vippaṭisārato jātā. Pavaḍḍhantīti punappunaṃ uppajjanena vaḍḍhanti. Sādhūti āyācanasādhu. Idaṃ vuttaṃ hoti – yāva aparaddhañca vata āyasmatā, evaṃ santepi mayaṃ āyasmantaṃ yācāma – ‘‘desetabbayuttakassa desanāya, vuṭṭhātabbayuttakassa vuṭṭhānena, āvikātabbayuttakassa āvikiriyāya, ārambhaje āsave pahāya, suddhante ṭhitabhāvapaccavekkhaṇena vippaṭisāraje āsave paṭivinodetvā nīharitvā vipassanācittañceva vipassanāpaññañca bhāvetū’’ti. Amunā pañcamena puggalenāti etena pañcamena khīṇāsavapuggalena. Samasamo bhavissatīti lokuttaraguṇehi samabhāveneva samo bhavissatīti evaṃ khīṇāsavena ovaditabboti attho.
аарабхад̇и на виббадисаарий ход̇ийд̇и аабад̇д̇им̣ аабаж̇ж̇ад̇и. д̇ам̣ бана д̣̇зсзд̇ум̣ сабхааг̇абуг̇г̇алам̣ бариязсад̇и. д̇асмаа на виббадисаарий ход̇и. ан̇г̇уд̇д̇арадтагат̇ааяам̣ бана ‘‘вудтид̇ад̇д̇аа на виббадисаарий ход̇ий’’д̇и вуд̇д̇ам̣. на аарабхад̇и виббадисаарий ход̇ийд̇и аабад̇д̇им̣ наабаж̇ж̇ад̇и, винаяабан̃н̃ад̇д̇ияам̣ бана аговид̣̇ад̇д̇аа анаабад̇д̇ияам̣ аабад̇д̇исан̃н̃ий худ̇ваа виббадисаарий ход̇и. ан̇г̇уд̇д̇арадтагат̇ааяам̣ бана ‘‘сагим̣ аабад̇д̇им̣ аабаж̇ж̇ид̇ваа д̇ад̇о вудтааяа бажчаа гин̃жааби наабаж̇ж̇ад̇и, виббадисаарам̣ бана винод̣̇зд̇ум̣ на саггод̇ий’’д̇и вуд̇д̇ам̣. на аарабхад̇и на виббадисаарий ход̇ийд̇и нзва аабад̇д̇им̣ аабаж̇ж̇ад̇и, на виббадисаарий ход̇и. гад̇амо банзса буг̇г̇алод̇и? оссадтавийрияабуг̇г̇ало. со хи ‘‘гим̣ мз имасмим̣ б̣уд̣̇д̇хагаалз бариниб̣б̣аанзна, анааг̇ад̇з мзд̇д̇зяяасаммаасамб̣уд̣̇д̇хагаалз бариниб̣б̣ааяиссаамий’’д̇и висуд̣̇д̇хасийлоби бадибад̇д̇им̣ на буурзд̇и. соби ‘‘гимад̇т̇ам̣ ааяасмаа бамад̇д̇о вихарад̇и бут̇уж̇ж̇анасса наама г̇ад̇и аниб̣ад̣̇д̇хаа. ааяасмаа хи мзд̇д̇зяяасаммаасамб̣уд̣̇д̇хасса саммукабхаавам̣ лабхзяяаби на лабхзяяаабийд̇и арахад̇д̇ад̇т̇ааяа вибассанам̣ бхаавзхий’’д̇и овад̣̇ид̇аб̣б̣ова. сзсам̣ саб̣б̣ад̇т̇а вуд̇д̇анаязнзва взд̣̇ид̇аб̣б̣ам̣.
Ārabhati na vippaṭisārī hotīti āpattiṃ āpajjati. Taṃ pana desetuṃ sabhāgapuggalaṃ pariyesati. Tasmā na vippaṭisārī hoti. Aṅguttaraṭṭhakathāyaṃ pana ‘‘vuṭṭhitattā na vippaṭisārī hotī’’ti vuttaṃ. Na ārabhati vippaṭisārī hotīti āpattiṃ nāpajjati, vinayapaññattiyaṃ pana akovidattā anāpattiyaṃ āpattisaññī hutvā vippaṭisārī hoti. Aṅguttaraṭṭhakathāyaṃ pana ‘‘sakiṃ āpattiṃ āpajjitvā tato vuṭṭhāya pacchā kiñcāpi nāpajjati, vippaṭisāraṃ pana vinodetuṃ na sakkotī’’ti vuttaṃ. Na ārabhati na vippaṭisārī hotīti neva āpattiṃ āpajjati, na vippaṭisārī hoti. Katamo panesa puggaloti? Ossaṭṭhavīriyapuggalo. So hi ‘‘kiṃ me imasmiṃ buddhakāle parinibbānena, anāgate metteyyasammāsambuddhakāle parinibbāyissāmī’’ti visuddhasīlopi paṭipattiṃ na pūreti. Sopi ‘‘kimatthaṃ āyasmā pamatto viharati puthujjanassa nāma gati anibaddhā. Āyasmā hi metteyyasammāsambuddhassa sammukhabhāvaṃ labheyyapi na labheyyāpīti arahattatthāya vipassanaṃ bhāvehī’’ti ovaditabbova. Sesaṃ sabbattha vuttanayeneva veditabbaṃ.
192. д̣̇ад̇ваа аваж̇аанаад̇ийд̇иаад̣̇ийсу – зго бхигку махаабун̃н̃о жад̇убажжаяалаабхий ход̇и. со жийвараад̣̇ийни лабхид̇ваа ан̃н̃ам̣ аббабун̃н̃ам̣ аабужчад̇и. соби д̇асмим̣ бунаббунам̣ аабужчанд̇зби г̇ан̣хаад̇иязва. ат̇асса ид̇аро т̇огам̣ губид̇о худ̇ваа ман̇губхаавам̣ уббаад̣̇зд̇угаамо вад̣̇ад̇и – ‘‘аяам̣ ад̇д̇ано д̇хаммад̇ааяа жийвараад̣̇ийни на лабхад̇и, амхз ниссааяа лабхад̇ий’’д̇и. звам̣ буг̇г̇ало д̣̇ад̇ваа аваж̇аанаад̇и наама. зго бана згзна сад̣̇д̇хим̣ д̣̇вз д̇ийн̣и вассаани васанд̇о буб̣б̣з д̇ам̣ буг̇г̇алам̣ г̇арум̣ гад̇ваа бажчаа г̇ажчанд̇з г̇ажчанд̇з гаалз жид̇д̇ийгаарам̣ на гарод̇и, аасанааби на вудтаад̇и, убадтаанамби на г̇ажчад̇и. звам̣ буг̇г̇ало сам̣ваасзна аваж̇аанаад̇и наама.
192. Datvā avajānātītiādīsu – eko bhikkhu mahāpuñño catupaccayalābhī hoti. So cīvarādīni labhitvā aññaṃ appapuññaṃ āpucchati. Sopi tasmiṃ punappunaṃ āpucchantepi gaṇhātiyeva. Athassa itaro thokaṃ kupito hutvā maṅkubhāvaṃ uppādetukāmo vadati – ‘‘ayaṃ attano dhammatāya cīvarādīni na labhati, amhe nissāya labhatī’’ti. Evaṃ puggalo datvā avajānāti nāma. Eko pana ekena saddhiṃ dve tīṇi vassāni vasanto pubbe taṃ puggalaṃ garuṃ katvā pacchā gacchante gacchante kāle cittīkāraṃ na karoti, āsanāpi na vuṭṭhāti, upaṭṭhānampi na gacchati. Evaṃ puggalo saṃvāsena avajānāti nāma.
аад̇хзяяамукод̇и аад̣̇ид̇о д̇хзяяамуко. батамаважанасмим̣язва табид̇амукод̇и ад̇т̇о. ад̇химужжид̇аа ход̇ийд̇и сад̣̇д̇хаад̇аа ход̇и. д̇ад̇рааяам̣ наяо – зго буг̇г̇ало сааруббам̣язва бхигкум̣ ‘асааруббо зсо’д̇и гат̇зд̇и, д̇ам̣ суд̇ваа зса нидтам̣ г̇ажчад̇и. буна ан̃н̃зна сабхааг̇зна бхигкунаа ‘сааруббо аяа’нд̇и вуд̇д̇зби д̇асса важанам̣ на г̇ан̣хаад̇и ‘‘асугзна наама ‘асааруббо аяа’нд̇и амхаагам̣ гат̇ид̇а’’нд̇и буримабхигкунова гат̇ам̣ г̇ан̣хаад̇и. абаробисса д̣̇уссийлам̣ ‘сийлаваа’д̇и гат̇зд̇и. д̇асса важанам̣ сад̣̇д̣̇ахид̇ваа буна ан̃н̃зна ‘‘асааруббо зса бхигку, нааяам̣ д̇умхаагам̣ санд̇игам̣ убасан̇гамид̇ум̣ яуд̇д̇о’’д̇и вуд̇д̇оби д̇асса важанам̣ аг̇г̇ахзд̇ваа буримассзва гат̇ам̣ г̇ан̣хаад̇и. абаро ван̣н̣амби гат̇ид̇ам̣ г̇ан̣хаад̇и, аван̣н̣амби гат̇ид̇ам̣ г̇ан̣хаад̇иязва. аяамби аад̇хзяяамукоязва наама. аад̇хаад̇аб̣б̣амуко яам̣ яам̣ сун̣аад̇и, д̇ад̇т̇а д̇ад̇т̇а табид̇амукод̇и ад̇т̇о.
Ādheyyamukhoti ādito dheyyamukho. Paṭhamavacanasmiṃyeva ṭhapitamukhoti attho. Adhimuccitā hotīti saddhātā hoti. Tatrāyaṃ nayo – eko puggalo sāruppaṃyeva bhikkhuṃ ‘asāruppo eso’ti katheti, taṃ sutvā esa niṭṭhaṃ gacchati. Puna aññena sabhāgena bhikkhunā ‘sāruppo aya’nti vuttepi tassa vacanaṃ na gaṇhāti ‘‘asukena nāma ‘asāruppo aya’nti amhākaṃ kathita’’nti purimabhikkhunova kathaṃ gaṇhāti. Aparopissa dussīlaṃ ‘sīlavā’ti katheti. Tassa vacanaṃ saddahitvā puna aññena ‘‘asāruppo esa bhikkhu, nāyaṃ tumhākaṃ santikaṃ upasaṅkamituṃ yutto’’ti vuttopi tassa vacanaṃ aggahetvā purimasseva kathaṃ gaṇhāti. Aparo vaṇṇampi kathitaṃ gaṇhāti, avaṇṇampi kathitaṃ gaṇhātiyeva. Ayampi ādheyyamukhoyeva nāma. Ādhātabbamukho yaṃ yaṃ suṇāti, tattha tattha ṭhapitamukhoti attho.
лолод̇и сад̣̇д̇хаад̣̇ийнам̣ ид̇д̇арагааладтид̇игад̇д̇аа ассад̣̇д̇хияаад̣̇ийхи лулид̇абхаавзна лоло. ид̇д̇арасад̣̇д̇ход̇и барид̇д̇асад̣̇д̇хо, абарибун̣н̣асад̣̇д̇хо. сзсзсуби зсзва наяо. зд̇т̇а бана бунаббунам̣ бхаж̇анавасзна сад̣̇д̇хаава бхад̇д̇и. бзмам̣ сад̣̇д̇хаабзмам̣ г̇зхасид̇абзмамби ваддад̇и. басаад̣̇о сад̣̇д̇хаабасаад̣̇ова. звам̣ буг̇г̇ало лоло ход̇ийд̇и звам̣ ид̇д̇арасад̣̇д̇хаад̣̇ид̇ааяа буг̇г̇ало лоло наама ход̇и. халид̣̇д̣̇ирааг̇о вияа , т̇усараасимхи годдид̇акаан̣уго вияа, ассабидтияам̣ табид̇агумбхан̣д̣ам̣ вияа жа аниб̣ад̣̇д̇хадтаано мухуд̇д̇зна басийд̣̇ад̇и, мухуд̇д̇зна губбад̇и.
Loloti saddhādīnaṃ ittarakālaṭṭhitikattā assaddhiyādīhi lulitabhāvena lolo. Ittarasaddhoti parittasaddho, aparipuṇṇasaddho. Sesesupi eseva nayo. Ettha pana punappunaṃ bhajanavasena saddhāva bhatti. Pemaṃ saddhāpemaṃ gehasitapemampi vaṭṭati. Pasādo saddhāpasādova. Evaṃ puggalo lolo hotīti evaṃ ittarasaddhāditāya puggalo lolo nāma hoti. Haliddirāgo viya , thusarāsimhi koṭṭitakhāṇuko viya, assapiṭṭhiyaṃ ṭhapitakumbhaṇḍaṃ viya ca anibaddhaṭṭhāno muhuttena pasīdati, muhuttena kuppati.
манд̣̇о момууход̇и ан̃н̃аан̣абхаавзна манд̣̇о ависад̣̇ад̇ааяа момуухо. махаамуул̣ход̇и ад̇т̇о.
Mando momūhoti aññāṇabhāvena mando avisadatāya momūho. Mahāmūḷhoti attho.
193. яод̇хааж̇ийвуубамзсу – яод̇хааж̇ийваад̇и яуд̣̇д̇хуубаж̇ийвино. раж̇аг̇г̇анд̇и хад̇т̇иассаад̣̇ийнам̣ баад̣̇аббахаарабхиннааяа бхуумияаа уг̇г̇ад̇ам̣ раж̇агканд̇хам̣. на сант̇амбхад̇ийд̇и сант̇амбхид̇ваа таад̇ум̣ на саггод̇и. сахад̇и раж̇аг̇г̇анд̇и раж̇агканд̇хам̣ д̣̇исвааби ад̇хиваасзд̇и. д̇хаж̇аг̇г̇анд̇и хад̇т̇иассаад̣̇ибидтзсу ваа рат̇зсу ваа уссаабид̇аанам̣ д̇хаж̇аанам̣ аг̇г̇ам̣. уссааран̣анд̇и хад̇т̇иассарат̇аад̣̇ийнан̃жзва б̣алагааяасса жа ужжаасад̣̇д̣̇амахаасад̣̇д̣̇ам̣. самбахаарзд̇и самааг̇ад̇з аббамад̇д̇агзби бахаарз. хан̃н̃ад̇ийд̇и вихан̃н̃ад̇и, вигхаад̇ам̣ аабаж̇ж̇ад̇и. б̣яаабаж̇ж̇ад̇ийд̇и вибад̇д̇им̣ аабаж̇ж̇ад̇и, багад̇ибхаавам̣ ж̇ахад̇и. сахад̇и самбахааранд̇и д̣̇вз д̇аяо бахаарз бад̇вааби сахад̇и, ад̇хиваасзд̇и . д̇амзва сан̇г̇аамасийсанд̇и д̇амзва ж̇аяаканд̇хааваарадтаанам̣. аж̇жхаавасад̇ийд̇и сад̇д̇аахамад̇д̇ам̣ абхибхавид̇ваа аавасад̇и. гим̣ гааран̣аа? лад̣̇д̇хаббахаараанам̣ бахаараж̇аг̇г̇анад̇т̇ан̃жзва гад̇агаммаанам̣ висзсам̣ н̃ад̇ваа таананд̇арад̣̇аанад̇т̇ан̃жа иссарияасукаанубхаванад̇т̇ан̃жа.
193. Yodhājīvūpamesu – yodhājīvāti yuddhūpajīvino. Rajagganti hatthiassādīnaṃ pādappahārabhinnāya bhūmiyā uggataṃ rajakkhandhaṃ. Na santhambhatīti santhambhitvā ṭhātuṃ na sakkoti. Sahati rajagganti rajakkhandhaṃ disvāpi adhivāseti. Dhajagganti hatthiassādipiṭṭhesu vā rathesu vā ussāpitānaṃ dhajānaṃ aggaṃ. Ussāraṇanti hatthiassarathādīnañceva balakāyassa ca uccāsaddamahāsaddaṃ. Sampahāreti samāgate appamattakepi pahāre. Haññatīti vihaññati, vighātaṃ āpajjati. Byāpajjatīti vipattiṃ āpajjati, pakatibhāvaṃ jahati. Sahati sampahāranti dve tayo pahāre patvāpi sahati, adhivāseti . Tameva saṅgāmasīsanti tameva jayakhandhāvāraṭṭhānaṃ. Ajjhāvasatīti sattāhamattaṃ abhibhavitvā āvasati. Kiṃ kāraṇā? Laddhappahārānaṃ pahārajagganatthañceva katakammānaṃ visesaṃ ñatvā ṭhānantaradānatthañca issariyasukhānubhavanatthañca.
194. ид̣̇аани яасмаа сад̇т̇у яод̇хааж̇ийвзхи гижжам̣ над̇т̇и, имасмим̣ бана саасанз д̇ат̇ааруубз бан̃жа буг̇г̇алз д̣̇ассзд̇ум̣ ид̣̇ам̣ обаммам̣ аабхад̇ам̣, д̇асмаа д̇з буг̇г̇алз д̣̇ассзнд̇о звамзванд̇иаад̣̇имааха.
194. Idāni yasmā satthu yodhājīvehi kiccaṃ natthi, imasmiṃ pana sāsane tathārūpe pañca puggale dassetuṃ idaṃ opammaṃ ābhataṃ, tasmā te puggale dassento evamevantiādimāha.
д̇ад̇т̇а сам̣сийд̣̇ад̇ийд̇и мижчаавид̇аггасмим̣ висийд̣̇ад̇и, анубависад̇и. на саггод̇и б̣рахмажарияам̣ санд̇хаарзд̇унд̇и б̣рахмажарияаваасам̣ анубажчиж̇ж̇амаанам̣ г̇обзд̇ум̣ на саггод̇и. сигкаад̣̇уб̣б̣аляам̣ аавигад̇ваад̇и сигкааяа д̣̇уб̣б̣алабхаавам̣ багаасзд̇ваа. гимасса раж̇аг̇г̇асминд̇и гим̣ д̇асса буг̇г̇аласса раж̇аг̇г̇ам̣ наамаад̇и вад̣̇ад̇и. абхируубаад̇и абхируубавад̇ий. д̣̇ассанийяаад̇и д̣̇ассанаяог̇г̇аа. баасаад̣̇игаад̇и д̣̇ассанзнзва жид̇д̇аббасаад̣̇аавахаа. барамааяаад̇и уд̇д̇амааяа. ван̣н̣абогкарад̇ааяаад̇и сарийраван̣н̣зна жзва ан̇г̇асан̣таанзна жа.
Tattha saṃsīdatīti micchāvitakkasmiṃ visīdati, anupavisati. Na sakkoti brahmacariyaṃ sandhāretunti brahmacariyavāsaṃ anupacchijjamānaṃ gopetuṃ na sakkoti. Sikkhādubbalyaṃ āvikatvāti sikkhāya dubbalabhāvaṃ pakāsetvā. Kimassa rajaggasminti kiṃ tassa puggalassa rajaggaṃ nāmāti vadati. Abhirūpāti abhirūpavatī. Dassanīyāti dassanayoggā. Pāsādikāti dassaneneva cittappasādāvahā. Paramāyāti uttamāya. Vaṇṇapokkharatāyāti sarīravaṇṇena ceva aṅgasaṇṭhānena ca.
196. уухасад̇ийд̇и авахасад̇и. уллабад̇ийд̇и гат̇зд̇и. уж̇ж̇аг̇гхад̇ийд̇и баан̣им̣ бахарид̇ваа махаахасид̇ам̣ хасад̇и. уббан̣д̣зд̇ийд̇и уббан̣д̣анагат̇ам̣ гат̇зд̇и.
196. Ūhasatīti avahasati. Ullapatīti katheti. Ujjagghatīti pāṇiṃ paharitvā mahāhasitaṃ hasati. Uppaṇḍetīti uppaṇḍanakathaṃ katheti.
197. абхинисийд̣̇ад̇ийд̇и абхибхавид̇ваа санд̇игз ваа згаасанз ваа нисийд̣̇ад̇и. д̣̇уд̇ияабад̣̇зби зсзва наяо. аж̇жход̇т̇арад̇ийд̇и авад̇т̇арад̇и.
197. Abhinisīdatīti abhibhavitvā santike vā ekāsane vā nisīdati. Dutiyapadepi eseva nayo. Ajjhottharatīti avattharati.
198. винивзтзд̇ваа виниможзд̇ваад̇и г̇ахид̇адтаанад̇о д̇асса хад̇т̇ам̣ винивзтзд̇ваа жзва, можзд̇ваа жа. сзсамзд̇т̇а уд̇д̇аанад̇т̇амзва.
198. Viniveṭhetvā vinimocetvāti gahitaṭṭhānato tassa hatthaṃ viniveṭhetvā ceva, mocetvā ca. Sesamettha uttānatthameva.
199. бин̣д̣абаад̇игзсу – манд̣̇ад̇д̇аа момуухад̇д̇аад̇и нзва самаад̣̇аанам̣ ж̇аанаад̇и, на аанисам̣сам̣; ад̇д̇ано бана манд̣̇ад̇д̇аа момуухад̇д̇аа ан̃н̃аан̣знзва бин̣д̣абаад̇иго ход̇и. баабижчо ижчаабагад̇од̇и бин̣д̣абаад̇игасса мз сад̇о ‘‘аяам̣ бин̣д̣абаад̇иго’’д̇и жад̇убажжаяасаггаарам̣ гариссанд̇и. лаж̇ж̇ий, аббижчод̇иаад̣̇ийхи жа г̇ун̣зхи самбхаавзссанд̇ийд̇и. звам̣ баабигааяа ижчааяа тад̇ваа д̇ааяа баабижчааяа абхибхууд̇о худ̇ваа бин̣д̣абаад̇иго ход̇и. уммаад̣̇авасзна бин̣д̣ааяа жаранд̇о бана уммаад̣̇аа жид̇д̇авигкзбаа бин̣д̣абаад̇иго наама ход̇и. ван̣н̣ид̇анд̇и ид̣̇ам̣ бин̣д̣абаад̇иган̇г̇ам̣ наама б̣уд̣̇д̇хзхи жа б̣уд̣̇д̇хасаавагзхи жа ван̣н̣ид̇ам̣ басад̇т̇анд̇и бин̣д̣абаад̇иго ход̇и. аббижчад̇ам̣язва ниссааяаад̇иаад̣̇ийсу – ‘‘ид̇и аббижчо бхависсаами, ид̣̇ам̣ мз бин̣д̣абаад̇иган̇г̇ам̣ аббижчад̇ааяа сам̣вад̇д̇иссад̇и; ‘ид̇и санд̇удто бхависсаами ид̣̇ам̣ мз бин̣д̣абаад̇иган̇г̇ам̣ санд̇удтияаа сам̣вад̇д̇иссад̇и’; ‘ид̇и гилзсз сам̣ликиссаами’, ид̣̇ам̣ мз бин̣д̣абаад̇иган̇г̇ам̣ гилзсасаллзканад̇т̇ааяа сам̣вад̇д̇иссад̇ий’’д̇и бин̣д̣абаад̇иго ход̇и. ид̣̇амад̇т̇ид̇анд̇и имааяа галяаан̣ааяа бадибад̇д̇ияаа ад̇т̇игабхаавам̣, иминаа ваа бин̣д̣абаад̇амад̇д̇зна ад̇т̇игабхаавам̣. яам̣ яам̣ лад̣̇д̇хам̣ д̇зна д̇знзва яаабанабхаавам̣ ниссааяаад̇и ад̇т̇о. аг̇г̇од̇и ж̇здтаго. сзсаани д̇ассзва взважанаани.
199. Piṇḍapātikesu – mandattā momūhattāti neva samādānaṃ jānāti, na ānisaṃsaṃ; attano pana mandattā momūhattā aññāṇeneva piṇḍapātiko hoti. Pāpiccho icchāpakatoti piṇḍapātikassa me sato ‘‘ayaṃ piṇḍapātiko’’ti catupaccayasakkāraṃ karissanti. Lajjī, appicchotiādīhi ca guṇehi sambhāvessantīti. Evaṃ pāpikāya icchāya ṭhatvā tāya pāpicchāya abhibhūto hutvā piṇḍapātiko hoti. Ummādavasena piṇḍāya caranto pana ummādā cittavikkhepā piṇḍapātiko nāma hoti. Vaṇṇitanti idaṃ piṇḍapātikaṅgaṃ nāma buddhehi ca buddhasāvakehi ca vaṇṇitaṃ pasatthanti piṇḍapātiko hoti. Appicchataṃyeva nissāyātiādīsu – ‘‘iti appiccho bhavissāmi, idaṃ me piṇḍapātikaṅgaṃ appicchatāya saṃvattissati; ‘iti santuṭṭho bhavissāmi idaṃ me piṇḍapātikaṅgaṃ santuṭṭhiyā saṃvattissati’; ‘iti kilese saṃlikhissāmi’, idaṃ me piṇḍapātikaṅgaṃ kilesasallekhanatthāya saṃvattissatī’’ti piṇḍapātiko hoti. Idamatthitanti imāya kalyāṇāya paṭipattiyā atthikabhāvaṃ, iminā vā piṇḍapātamattena atthikabhāvaṃ. Yaṃ yaṃ laddhaṃ tena teneva yāpanabhāvaṃ nissāyāti attho. Aggoti jeṭṭhako. Sesāni tasseva vevacanāni.
г̇аваа кийранд̇и г̇аавид̇о кийрам̣ наама ход̇и, на винаа г̇аавияаа. кийрамхаа д̣̇ад̇хийд̇иаад̣̇ийсуби зсзва наяо. звамзванд̇и яат̇аа зд̇зсу бан̃жасу г̇орасзсу саббиман̣д̣о аг̇г̇о; звамзвам̣ имзсу бан̃жасу бин̣д̣абаад̇игзсу явааяам̣ аббижчад̇аад̣̇ийни ниссааяа бин̣д̣абаад̇иго ход̇и. аяам̣ аг̇г̇о жа сздто жа баамогко жа уд̇д̇амо жа баваро жа. имзсу бана бан̃жасу бин̣д̣абаад̇игзсу д̣̇взва ж̇анаа бин̣д̣абаад̇игаа , д̇аяо на бин̣д̣абаад̇игаа. наамамад̇д̇зна бана бин̣д̣абаад̇игаад̇и взд̣̇ид̇аб̣б̣аа. калубажчаабхад̇д̇игаад̣̇ийсуби зсзва наяод̇и.
Gavā khīranti gāvito khīraṃ nāma hoti, na vinā gāviyā. Khīramhā dadhītiādīsupi eseva nayo. Evamevanti yathā etesu pañcasu gorasesu sappimaṇḍo aggo; evamevaṃ imesu pañcasu piṇḍapātikesu yvāyaṃ appicchatādīni nissāya piṇḍapātiko hoti. Ayaṃ aggo ca seṭṭho ca pāmokkho ca uttamo ca pavaro ca. Imesu pana pañcasu piṇḍapātikesu dveva janā piṇḍapātikā , tayo na piṇḍapātikā. Nāmamattena pana piṇḍapātikāti veditabbā. Khalupacchābhattikādīsupi eseva nayoti.
бан̃жаганид̣̇д̣̇зсаван̣н̣анаа.
Pañcakaniddesavaṇṇanā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / буг̇г̇алабан̃н̃ад̇д̇ибаал̣и • Puggalapaññattipāḷi / 5. бан̃жагабуг̇г̇алабан̃н̃ад̇д̇и • 5. Pañcakapuggalapaññatti
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-мууладийгаа • Pañcapakaraṇa-mūlaṭīkā / 5. бан̃жаганид̣̇д̣̇зсаван̣н̣анаа • 5. Pañcakaniddesavaṇṇanā
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-анудийгаа • Pañcapakaraṇa-anuṭīkā / 5. бан̃жаганид̣̇д̣̇зсаван̣н̣анаа • 5. Pañcakaniddesavaṇṇanā
