| Library / Tipiṭaka / तिपिटक • Tipiṭaka / पञ्चपकरण-मूलटीका • Pañcapakaraṇa-mūlaṭīkā |
५. पञ्चकनिद्देसवण्णना
5. Pañcakaniddesavaṇṇanā
१९१. पठमपञ्चके उद्देसेनेव पुग्गलविभागो विञ्ञायतीति यथा तेसु पटिपज्जितब्बं , ताय पटिपत्तिया ते विभजन्तो ‘‘तत्र य्वाय’’न्तिआदिमाह। आरम्भसद्दोति आरम्भकिरियावाचको सद्दोति अत्थो। फलुप्पत्तिया मग्गकिच्चं निट्ठितं होतीति ‘‘मग्गकिच्चवसेन फलमेव वुत्त’’न्ति आह। आयाचनसाधूति न पसंसनादिसाधूति अत्थो।
191. Paṭhamapañcake uddeseneva puggalavibhāgo viññāyatīti yathā tesu paṭipajjitabbaṃ , tāya paṭipattiyā te vibhajanto ‘‘tatra yvāya’’ntiādimāha. Ārambhasaddoti ārambhakiriyāvācako saddoti attho. Phaluppattiyā maggakiccaṃ niṭṭhitaṃ hotīti ‘‘maggakiccavasena phalameva vutta’’nti āha. Āyācanasādhūti na pasaṃsanādisādhūti attho.
१९२. आदितो धेय्यं ठपेतब्बं आधेय्यं, दस्सनसवनपटिवचनदानवसेन मुखेन विय पवत्तं गहणं मुखन्ति दट्ठब्बं। तं मुखं आधेय्यं, गहणत्थं पकतिमुखमेव वा आधेय्यं यस्स सो आधेय्यमुखो, अविचारेत्वा आदिकथाय एव ठपितगहणोति वुत्तं होति।
192. Ādito dheyyaṃ ṭhapetabbaṃ ādheyyaṃ, dassanasavanapaṭivacanadānavasena mukhena viya pavattaṃ gahaṇaṃ mukhanti daṭṭhabbaṃ. Taṃ mukhaṃ ādheyyaṃ, gahaṇatthaṃ pakatimukhameva vā ādheyyaṃ yassa so ādheyyamukho, avicāretvā ādikathāya eva ṭhapitagahaṇoti vuttaṃ hoti.
१९४. रजग्गस्मिन्ति रजग्गभावे।
194. Rajaggasminti rajaggabhāve.
१९९. गवा खीरं अग्गमक्खायतीति न एवं सम्बन्धो, उप्पत्तितो पन पञ्च गोरसे दस्सेत्वा तेसु सप्पिमण्डस्स अग्गभावदस्सनत्थं ‘‘गवा खीर’’न्तिआदि वुत्तं। तेनाह ‘‘गावितो खीरं नाम होती’’तिआदि।
199. Gavā khīraṃ aggamakkhāyatīti na evaṃ sambandho, uppattito pana pañca gorase dassetvā tesu sappimaṇḍassa aggabhāvadassanatthaṃ ‘‘gavā khīra’’ntiādi vuttaṃ. Tenāha ‘‘gāvito khīraṃ nāma hotī’’tiādi.
पञ्चकनिद्देसवण्णना निट्ठिता।
Pañcakaniddesavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / अभिधम्मपिटक • Abhidhammapiṭaka / पुग्गलपञ्ञत्तिपाळि • Puggalapaññattipāḷi / ५. पञ्चकपुग्गलपञ्ञत्ति • 5. Pañcakapuggalapaññatti
अट्ठकथा • Aṭṭhakathā / अभिधम्मपिटक (अट्ठकथा) • Abhidhammapiṭaka (aṭṭhakathā) / पञ्चपकरण-अट्ठकथा • Pañcapakaraṇa-aṭṭhakathā / ५. पञ्चकनिद्देसवण्णना • 5. Pañcakaniddesavaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-अनुटीका • Pañcapakaraṇa-anuṭīkā / ५. पञ्चकनिद्देसवण्णना • 5. Pañcakaniddesavaṇṇanā
