| Library / Tipiṭaka / តិបិដក • Tipiṭaka / ធម្មសង្គណិ-អដ្ឋកថា • Dhammasaṅgaṇi-aṭṭhakathā |
បញ្ចកនិទ្ទេសវណ្ណនា
Pañcakaniddesavaṇṇanā
៩៦៧. បញ្ចវិធសង្គហនិទ្ទេសេ កក្ខឡន្តិ ថទ្ធំ។ ខរមេវ ខរគតំ, ផរុសន្តិ អត្ថោ។ ឥតរេ ទ្វេបិ សភាវនិទ្ទេសា ឯវ។ អជ្ឈត្តន្តិ និយកជ្ឈត្តំ។ ពហិទ្ធាតិ ពាហិរំ។ ឧបាទិណ្ណន្តិ ន កម្មសមុដ្ឋានមេវ។ អវិសេសេន បន សរីរដ្ឋកស្សេតំ គហណំ។ សរីរដ្ឋកញ្ហិ ឧបាទិណ្ណំ វា ហោតុ អនុបាទិណ្ណំ វា, អាទិន្នគហិតបរាមដ្ឋវសេន សព្ពំ ឧបាទិណ្ណមេវ នាម។
967. Pañcavidhasaṅgahaniddese kakkhaḷanti thaddhaṃ. Kharameva kharagataṃ, pharusanti attho. Itare dvepi sabhāvaniddesā eva. Ajjhattanti niyakajjhattaṃ. Bahiddhāti bāhiraṃ. Upādiṇṇanti na kammasamuṭṭhānameva. Avisesena pana sarīraṭṭhakassetaṃ gahaṇaṃ. Sarīraṭṭhakañhi upādiṇṇaṃ vā hotu anupādiṇṇaṃ vā, ādinnagahitaparāmaṭṭhavasena sabbaṃ upādiṇṇameva nāma.
៩៦៩. តេជោគតន្តិ សព្ពតេជេសុ គតំ ឧណ្ហត្តលក្ខណំ, តេជោ ឯវ វា តេជោភាវំ គតន្តិ ‘តេជោគតំ’។ ឧស្មាតិ ឧស្មាការោ។ ឧស្មាគតន្តិ ឧស្មាភាវំ គតំ។ ឧស្មាការស្សេវេតំ នាមំ។ ឧសុមន្តិ ពលវឧស្មា។ ឧសុមមេវ ឧសុមភាវំ គតន្តិ ឧសុមគតំ។
969. Tejogatanti sabbatejesu gataṃ uṇhattalakkhaṇaṃ, tejo eva vā tejobhāvaṃ gatanti ‘tejogataṃ’. Usmāti usmākāro. Usmāgatanti usmābhāvaṃ gataṃ. Usmākārassevetaṃ nāmaṃ. Usumanti balavausmā. Usumameva usumabhāvaṃ gatanti usumagataṃ.
៩៧០. វាយនកវសេន វាយោ។ វាយោវ វាយោភាវំ គតត្តា វាយោគតំ។ ថម្ភិតត្តន្តិ ឧប្បលនាឡតចាទីនំ វិយ វាតបុណ្ណានំ ថម្ភិតភាវោ រូបស្ស។
970. Vāyanakavasena vāyo. Vāyova vāyobhāvaṃ gatattā vāyogataṃ. Thambhitattanti uppalanāḷatacādīnaṃ viya vātapuṇṇānaṃ thambhitabhāvo rūpassa.
Related texts:
តិបិដក (មូល) • Tipiṭaka (Mūla) / អភិធម្មបិដក • Abhidhammapiṭaka / ធម្មសង្គណីបាឡិ • Dhammasaṅgaṇīpāḷi / រូបវិភត្តិ • Rūpavibhatti
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / ធម្មសង្គណី-មូលដីកា • Dhammasaṅgaṇī-mūlaṭīkā / បញ្ចកនិទ្ទេសវណ្ណនា • Pañcakaniddesavaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / ធម្មសង្គណី-អនុដីកា • Dhammasaṅgaṇī-anuṭīkā / បញ្ចកនិទ្ទេសវណ្ណនា • Pañcakaniddesavaṇṇanā
