| Library / Tipiṭaka / តិបិដក • Tipiṭaka / បញ្ចបករណ-មូលដីកា • Pañcapakaraṇa-mūlaṭīkā |
៥. បញ្ចកនិទ្ទេសវណ្ណនា
5. Pañcakaniddesavaṇṇanā
១៩១. បឋមបញ្ចកេ ឧទ្ទេសេនេវ បុគ្គលវិភាគោ វិញ្ញាយតីតិ យថា តេសុ បដិបជ្ជិតព្ពំ , តាយ បដិបត្តិយា តេ វិភជន្តោ ‘‘តត្រ យ្វាយ’’ន្តិអាទិមាហ។ អារម្ភសទ្ទោតិ អារម្ភកិរិយាវាចកោ សទ្ទោតិ អត្ថោ។ ផលុប្បត្តិយា មគ្គកិច្ចំ និដ្ឋិតំ ហោតីតិ ‘‘មគ្គកិច្ចវសេន ផលមេវ វុត្ត’’ន្តិ អាហ។ អាយាចនសាធូតិ ន បសំសនាទិសាធូតិ អត្ថោ។
191. Paṭhamapañcake uddeseneva puggalavibhāgo viññāyatīti yathā tesu paṭipajjitabbaṃ , tāya paṭipattiyā te vibhajanto ‘‘tatra yvāya’’ntiādimāha. Ārambhasaddoti ārambhakiriyāvācako saddoti attho. Phaluppattiyā maggakiccaṃ niṭṭhitaṃ hotīti ‘‘maggakiccavasena phalameva vutta’’nti āha. Āyācanasādhūti na pasaṃsanādisādhūti attho.
១៩២. អាទិតោ ធេយ្យំ ឋបេតព្ពំ អាធេយ្យំ, ទស្សនសវនបដិវចនទានវសេន មុខេន វិយ បវត្តំ គហណំ មុខន្តិ ទដ្ឋព្ពំ។ តំ មុខំ អាធេយ្យំ, គហណត្ថំ បកតិមុខមេវ វា អាធេយ្យំ យស្ស សោ អាធេយ្យមុខោ, អវិចារេត្វា អាទិកថាយ ឯវ ឋបិតគហណោតិ វុត្តំ ហោតិ។
192. Ādito dheyyaṃ ṭhapetabbaṃ ādheyyaṃ, dassanasavanapaṭivacanadānavasena mukhena viya pavattaṃ gahaṇaṃ mukhanti daṭṭhabbaṃ. Taṃ mukhaṃ ādheyyaṃ, gahaṇatthaṃ pakatimukhameva vā ādheyyaṃ yassa so ādheyyamukho, avicāretvā ādikathāya eva ṭhapitagahaṇoti vuttaṃ hoti.
១៩៤. រជគ្គស្មិន្តិ រជគ្គភាវេ។
194. Rajaggasminti rajaggabhāve.
១៩៩. គវា ខីរំ អគ្គមក្ខាយតីតិ ន ឯវំ សម្ពន្ធោ, ឧប្បត្តិតោ បន បញ្ច គោរសេ ទស្សេត្វា តេសុ សប្បិមណ្ឌស្ស អគ្គភាវទស្សនត្ថំ ‘‘គវា ខីរ’’ន្តិអាទិ វុត្តំ។ តេនាហ ‘‘គាវិតោ ខីរំ នាម ហោតី’’តិអាទិ។
199. Gavā khīraṃ aggamakkhāyatīti na evaṃ sambandho, uppattito pana pañca gorase dassetvā tesu sappimaṇḍassa aggabhāvadassanatthaṃ ‘‘gavā khīra’’ntiādi vuttaṃ. Tenāha ‘‘gāvito khīraṃ nāma hotī’’tiādi.
បញ្ចកនិទ្ទេសវណ្ណនា និដ្ឋិតា។
Pañcakaniddesavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / អភិធម្មបិដក • Abhidhammapiṭaka / បុគ្គលបញ្ញត្តិបាឡិ • Puggalapaññattipāḷi / ៥. បញ្ចកបុគ្គលបញ្ញត្តិ • 5. Pañcakapuggalapaññatti
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៥. បញ្ចកនិទ្ទេសវណ្ណនា • 5. Pañcakaniddesavaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៥. បញ្ចកនិទ្ទេសវណ្ណនា • 5. Pañcakaniddesavaṇṇanā
