| Library / Tipiṭaka / ਤਿਪਿਟਕ • Tipiṭaka / ਪਞ੍ਚਪਕਰਣ-ਅਟ੍ਠਕਥਾ • Pañcapakaraṇa-aṭṭhakathā |
੫. ਪਞ੍ਚਕਨਿਦ੍ਦੇਸવਣ੍ਣਨਾ
5. Pañcakaniddesavaṇṇanā
੧੯੧. ਪਞ੍ਚਕੇ – ਤਤ੍ਰਾਤਿ ਤੇਸੁ ‘‘ਆਰਭਤਿ ਚ વਿਪ੍ਪਟਿਸਾਰੀ ਚ ਹੋਤੀ’’ਤਿਆਦਿਨਾ ਨਯੇਨ ਹੇਟ੍ਠਾ ਉਦ੍ਦਿਟ੍ਠਪੁਗ੍ਗਲੇਸੁ। ਯ੍વਾਯਨ੍ਤਿ ਯੋ ਅਯਂ। ਆਰਭਤੀਤਿ ਏਤ੍ਥ ਆਰਮ੍ਭਸਦ੍ਦੋ ਕਮ੍ਮਕਿਰਿਯਾਹਿਂਸਨવੀਰਿਯવਿਕੋਪਨਾਪਤ੍ਤਿવੀਤਿਕ੍ਕਮੇਸੁ વਤ੍ਤਤਿ। ਤਥਾ ਹੇਸ ‘‘ਯਂਕਿਞ੍ਚਿ ਦੁਕ੍ਖਂ ਸਮ੍ਭੋਤਿ, ਸਬ੍ਬਂ ਆਰਮ੍ਭਪਚ੍ਚਯਾ’’ਤਿ (ਸੁ॰ ਨਿ॰ ੭੪੮) ਕਮ੍ਮੇ ਆਗਤੋ। ‘‘ਮਹਾਯਞ੍ਞਾ ਮਹਾਰਮ੍ਭਾ, ਨ ਤੇ ਹੋਨ੍ਤਿ ਮਹਪ੍ਫਲਾ’’ਤਿ (ਅ॰ ਨਿ॰ ੪.੩੯) ਕਿਰਿਯਾਯਂ। ‘‘ਸਮਣਂ ਗੋਤਮਂ ਉਦ੍ਦਿਸ੍ਸ ਪਾਣਂ ਆਰਭਨ੍ਤੀ’’ਤਿ (ਮ॰ ਨਿ॰ ੨.੫੧-੫੨) ਹਿਂਸਨੇ। ‘‘ਆਰਭਥ, ਨਿਕ੍ਖਮਥ, ਯੁਞ੍ਜਥ ਬੁਦ੍ਧਸਾਸਨੇ’’ਤਿ (ਸਂ॰ ਨਿ॰ ੧.੧੮੫) વੀਰਿਯੇ। ‘‘ਬੀਜਗਾਮਭੂਤਗਾਮਸਮਾਰਮ੍ਭਾ ਪਟਿવਿਰਤੋ ਹੋਤੀ’’ਤਿ (ਦੀ॰ ਨਿ॰ ੧.੧੦, ੧੯੪; ਮ॰ ਨਿ॰ ੧.੨੯੩) વਿਕੋਪਨੇ। ‘‘ਆਰਭਤਿ ਚ વਿਪ੍ਪਟਿਸਾਰੀ ਚ ਹੋਤੀ’’ਤਿ (ਅ॰ ਨਿ॰ ੫.੧੪੨) ਅਯਂ ਪਨ ਆਪਤ੍ਤਿવੀਤਿਕ੍ਕਮੇ ਆਗਤੋ। ਤਸ੍ਮਾ ਆਪਤ੍ਤਿવੀਤਿਕ੍ਕਮવਸੇਨ ਆਰਭਤਿ ਚੇવ ਤਪ੍ਪਚ੍ਚਯਾ વਿਪ੍ਪਟਿਸਾਰੀ ਚ ਹੋਤੀਤਿ ਅਯਮੇਤ੍ਥ ਅਤ੍ਥੋ।
191. Pañcake – tatrāti tesu ‘‘ārabhati ca vippaṭisārī ca hotī’’tiādinā nayena heṭṭhā uddiṭṭhapuggalesu. Yvāyanti yo ayaṃ. Ārabhatīti ettha ārambhasaddo kammakiriyāhiṃsanavīriyavikopanāpattivītikkamesu vattati. Tathā hesa ‘‘yaṃkiñci dukkhaṃ sambhoti, sabbaṃ ārambhapaccayā’’ti (su. ni. 748) kamme āgato. ‘‘Mahāyaññā mahārambhā, na te honti mahapphalā’’ti (a. ni. 4.39) kiriyāyaṃ. ‘‘Samaṇaṃ gotamaṃ uddissa pāṇaṃ ārabhantī’’ti (ma. ni. 2.51-52) hiṃsane. ‘‘Ārabhatha, nikkhamatha, yuñjatha buddhasāsane’’ti (saṃ. ni. 1.185) vīriye. ‘‘Bījagāmabhūtagāmasamārambhā paṭivirato hotī’’ti (dī. ni. 1.10, 194; ma. ni. 1.293) vikopane. ‘‘Ārabhati ca vippaṭisārī ca hotī’’ti (a. ni. 5.142) ayaṃ pana āpattivītikkame āgato. Tasmā āpattivītikkamavasena ārabhati ceva tappaccayā vippaṭisārī ca hotīti ayamettha attho.
ਯਥਾਭੂਤਂ ਨਪ੍ਪਜਾਨਾਤੀਤਿ ਅਨਧਿਗਤਤ੍ਤਾ ਯਥਾਸਭਾવਤੋ ਨ ਜਾਨਾਤਿ। ਯਤ੍ਥਸ੍ਸਾਤਿ ਯਸ੍ਮਿਂ ਅਸ੍ਸ, ਯਂ ਠਾਨਂ ਪਤ੍વਾ ਏਤਸ੍ਸ ਪੁਗ੍ਗਲਸ੍ਸ ਉਪ੍ਪਨ੍ਨਾ ਪਾਪਕਾ ਅਕੁਸਲਾ ਧਮ੍ਮਾ ਅਪਰਿਸੇਸਾ ਨਿਰੁਜ੍ਝਨ੍ਤੀਤਿ ਅਤ੍ਥੋ। ਕਿਂ ਪਨ ਪਤ੍વਾ ਤੇ ਨਿਰੁਜ੍ਝਨ੍ਤੀਤਿ? ਅਰਹਤ੍ਤਮਗ੍ਗਂ। ਫਲਪ੍ਪਤ੍ਤਸ੍ਸ ਪਨ ਨਿਰੁਦ੍ਧਾ ਨਾਮ ਹੋਨ੍ਤਿ। ਏવਂ ਸਨ੍ਤੇਪਿ ਇਧ ਮਗ੍ਗਕਿਚ੍ਚવਸੇਨ ਫਲਮੇવ વੁਤ੍ਤਨ੍ਤਿ વੇਦਿਤਬ੍ਬਂ। ਆਰਮ੍ਭਜਾਤਿ ਆਪਤ੍ਤਿવੀਤਿਕ੍ਕਮਸਮ੍ਭવਾ। વਿਪ੍ਪਟਿਸਾਰਜਾਤਿ વਿਪ੍ਪਟਿਸਾਰਤੋ ਜਾਤਾ। ਪવਡ੍ਢਨ੍ਤੀਤਿ ਪੁਨਪ੍ਪੁਨਂ ਉਪ੍ਪਜ੍ਜਨੇਨ વਡ੍ਢਨ੍ਤਿ। ਸਾਧੂਤਿ ਆਯਾਚਨਸਾਧੁ। ਇਦਂ વੁਤ੍ਤਂ ਹੋਤਿ – ਯਾવ ਅਪਰਦ੍ਧਞ੍ਚ વਤ ਆਯਸ੍ਮਤਾ, ਏવਂ ਸਨ੍ਤੇਪਿ ਮਯਂ ਆਯਸ੍ਮਨ੍ਤਂ ਯਾਚਾਮ – ‘‘ਦੇਸੇਤਬ੍ਬਯੁਤ੍ਤਕਸ੍ਸ ਦੇਸਨਾਯ, વੁਟ੍ਠਾਤਬ੍ਬਯੁਤ੍ਤਕਸ੍ਸ વੁਟ੍ਠਾਨੇਨ, ਆવਿਕਾਤਬ੍ਬਯੁਤ੍ਤਕਸ੍ਸ ਆવਿਕਿਰਿਯਾਯ, ਆਰਮ੍ਭਜੇ ਆਸવੇ ਪਹਾਯ, ਸੁਦ੍ਧਨ੍ਤੇ ਠਿਤਭਾવਪਚ੍ਚવੇਕ੍ਖਣੇਨ વਿਪ੍ਪਟਿਸਾਰਜੇ ਆਸવੇ ਪਟਿવਿਨੋਦੇਤ੍વਾ ਨੀਹਰਿਤ੍વਾ વਿਪਸ੍ਸਨਾਚਿਤ੍ਤਞ੍ਚੇવ વਿਪਸ੍ਸਨਾਪਞ੍ਞਞ੍ਚ ਭਾવੇਤੂ’’ਤਿ। ਅਮੁਨਾ ਪਞ੍ਚਮੇਨ ਪੁਗ੍ਗਲੇਨਾਤਿ ਏਤੇਨ ਪਞ੍ਚਮੇਨ ਖੀਣਾਸવਪੁਗ੍ਗਲੇਨ। ਸਮਸਮੋ ਭવਿਸ੍ਸਤੀਤਿ ਲੋਕੁਤ੍ਤਰਗੁਣੇਹਿ ਸਮਭਾવੇਨੇવ ਸਮੋ ਭવਿਸ੍ਸਤੀਤਿ ਏવਂ ਖੀਣਾਸવੇਨ ਓવਦਿਤਬ੍ਬੋਤਿ ਅਤ੍ਥੋ।
Yathābhūtaṃ nappajānātīti anadhigatattā yathāsabhāvato na jānāti. Yatthassāti yasmiṃ assa, yaṃ ṭhānaṃ patvā etassa puggalassa uppannā pāpakā akusalā dhammā aparisesā nirujjhantīti attho. Kiṃ pana patvā te nirujjhantīti? Arahattamaggaṃ. Phalappattassa pana niruddhā nāma honti. Evaṃ santepi idha maggakiccavasena phalameva vuttanti veditabbaṃ. Ārambhajāti āpattivītikkamasambhavā. Vippaṭisārajāti vippaṭisārato jātā. Pavaḍḍhantīti punappunaṃ uppajjanena vaḍḍhanti. Sādhūti āyācanasādhu. Idaṃ vuttaṃ hoti – yāva aparaddhañca vata āyasmatā, evaṃ santepi mayaṃ āyasmantaṃ yācāma – ‘‘desetabbayuttakassa desanāya, vuṭṭhātabbayuttakassa vuṭṭhānena, āvikātabbayuttakassa āvikiriyāya, ārambhaje āsave pahāya, suddhante ṭhitabhāvapaccavekkhaṇena vippaṭisāraje āsave paṭivinodetvā nīharitvā vipassanācittañceva vipassanāpaññañca bhāvetū’’ti. Amunā pañcamena puggalenāti etena pañcamena khīṇāsavapuggalena. Samasamo bhavissatīti lokuttaraguṇehi samabhāveneva samo bhavissatīti evaṃ khīṇāsavena ovaditabboti attho.
ਆਰਭਤਿ ਨ વਿਪ੍ਪਟਿਸਾਰੀ ਹੋਤੀਤਿ ਆਪਤ੍ਤਿਂ ਆਪਜ੍ਜਤਿ। ਤਂ ਪਨ ਦੇਸੇਤੁਂ ਸਭਾਗਪੁਗ੍ਗਲਂ ਪਰਿਯੇਸਤਿ। ਤਸ੍ਮਾ ਨ વਿਪ੍ਪਟਿਸਾਰੀ ਹੋਤਿ। ਅਙ੍ਗੁਤ੍ਤਰਟ੍ਠਕਥਾਯਂ ਪਨ ‘‘વੁਟ੍ਠਿਤਤ੍ਤਾ ਨ વਿਪ੍ਪਟਿਸਾਰੀ ਹੋਤੀ’’ਤਿ વੁਤ੍ਤਂ। ਨ ਆਰਭਤਿ વਿਪ੍ਪਟਿਸਾਰੀ ਹੋਤੀਤਿ ਆਪਤ੍ਤਿਂ ਨਾਪਜ੍ਜਤਿ, વਿਨਯਪਞ੍ਞਤ੍ਤਿਯਂ ਪਨ ਅਕੋવਿਦਤ੍ਤਾ ਅਨਾਪਤ੍ਤਿਯਂ ਆਪਤ੍ਤਿਸਞ੍ਞੀ ਹੁਤ੍વਾ વਿਪ੍ਪਟਿਸਾਰੀ ਹੋਤਿ। ਅਙ੍ਗੁਤ੍ਤਰਟ੍ਠਕਥਾਯਂ ਪਨ ‘‘ਸਕਿਂ ਆਪਤ੍ਤਿਂ ਆਪਜ੍ਜਿਤ੍વਾ ਤਤੋ વੁਟ੍ਠਾਯ ਪਚ੍ਛਾ ਕਿਞ੍ਚਾਪਿ ਨਾਪਜ੍ਜਤਿ, વਿਪ੍ਪਟਿਸਾਰਂ ਪਨ વਿਨੋਦੇਤੁਂ ਨ ਸਕ੍ਕੋਤੀ’’ਤਿ વੁਤ੍ਤਂ। ਨ ਆਰਭਤਿ ਨ વਿਪ੍ਪਟਿਸਾਰੀ ਹੋਤੀਤਿ ਨੇવ ਆਪਤ੍ਤਿਂ ਆਪਜ੍ਜਤਿ, ਨ વਿਪ੍ਪਟਿਸਾਰੀ ਹੋਤਿ। ਕਤਮੋ ਪਨੇਸ ਪੁਗ੍ਗਲੋਤਿ? ਓਸ੍ਸਟ੍ਠવੀਰਿਯਪੁਗ੍ਗਲੋ। ਸੋ ਹਿ ‘‘ਕਿਂ ਮੇ ਇਮਸ੍ਮਿਂ ਬੁਦ੍ਧਕਾਲੇ ਪਰਿਨਿਬ੍ਬਾਨੇਨ, ਅਨਾਗਤੇ ਮੇਤ੍ਤੇਯ੍ਯਸਮ੍ਮਾਸਮ੍ਬੁਦ੍ਧਕਾਲੇ ਪਰਿਨਿਬ੍ਬਾਯਿਸ੍ਸਾਮੀ’’ਤਿ વਿਸੁਦ੍ਧਸੀਲੋਪਿ ਪਟਿਪਤ੍ਤਿਂ ਨ ਪੂਰੇਤਿ। ਸੋਪਿ ‘‘ਕਿਮਤ੍ਥਂ ਆਯਸ੍ਮਾ ਪਮਤ੍ਤੋ વਿਹਰਤਿ ਪੁਥੁਜ੍ਜਨਸ੍ਸ ਨਾਮ ਗਤਿ ਅਨਿਬਦ੍ਧਾ। ਆਯਸ੍ਮਾ ਹਿ ਮੇਤ੍ਤੇਯ੍ਯਸਮ੍ਮਾਸਮ੍ਬੁਦ੍ਧਸ੍ਸ ਸਮ੍ਮੁਖਭਾવਂ ਲਭੇਯ੍ਯਪਿ ਨ ਲਭੇਯ੍ਯਾਪੀਤਿ ਅਰਹਤ੍ਤਤ੍ਥਾਯ વਿਪਸ੍ਸਨਂ ਭਾવੇਹੀ’’ਤਿ ਓવਦਿਤਬ੍ਬੋવ। ਸੇਸਂ ਸਬ੍ਬਤ੍ਥ વੁਤ੍ਤਨਯੇਨੇવ વੇਦਿਤਬ੍ਬਂ।
Ārabhati na vippaṭisārī hotīti āpattiṃ āpajjati. Taṃ pana desetuṃ sabhāgapuggalaṃ pariyesati. Tasmā na vippaṭisārī hoti. Aṅguttaraṭṭhakathāyaṃ pana ‘‘vuṭṭhitattā na vippaṭisārī hotī’’ti vuttaṃ. Na ārabhati vippaṭisārī hotīti āpattiṃ nāpajjati, vinayapaññattiyaṃ pana akovidattā anāpattiyaṃ āpattisaññī hutvā vippaṭisārī hoti. Aṅguttaraṭṭhakathāyaṃ pana ‘‘sakiṃ āpattiṃ āpajjitvā tato vuṭṭhāya pacchā kiñcāpi nāpajjati, vippaṭisāraṃ pana vinodetuṃ na sakkotī’’ti vuttaṃ. Na ārabhati na vippaṭisārī hotīti neva āpattiṃ āpajjati, na vippaṭisārī hoti. Katamo panesa puggaloti? Ossaṭṭhavīriyapuggalo. So hi ‘‘kiṃ me imasmiṃ buddhakāle parinibbānena, anāgate metteyyasammāsambuddhakāle parinibbāyissāmī’’ti visuddhasīlopi paṭipattiṃ na pūreti. Sopi ‘‘kimatthaṃ āyasmā pamatto viharati puthujjanassa nāma gati anibaddhā. Āyasmā hi metteyyasammāsambuddhassa sammukhabhāvaṃ labheyyapi na labheyyāpīti arahattatthāya vipassanaṃ bhāvehī’’ti ovaditabbova. Sesaṃ sabbattha vuttanayeneva veditabbaṃ.
੧੯੨. ਦਤ੍વਾ ਅવਜਾਨਾਤੀਤਿਆਦੀਸੁ – ਏਕੋ ਭਿਕ੍ਖੁ ਮਹਾਪੁਞ੍ਞੋ ਚਤੁਪਚ੍ਚਯਲਾਭੀ ਹੋਤਿ। ਸੋ ਚੀવਰਾਦੀਨਿ ਲਭਿਤ੍વਾ ਅਞ੍ਞਂ ਅਪ੍ਪਪੁਞ੍ਞਂ ਆਪੁਚ੍ਛਤਿ। ਸੋਪਿ ਤਸ੍ਮਿਂ ਪੁਨਪ੍ਪੁਨਂ ਆਪੁਚ੍ਛਨ੍ਤੇਪਿ ਗਣ੍ਹਾਤਿਯੇવ। ਅਥਸ੍ਸ ਇਤਰੋ ਥੋਕਂ ਕੁਪਿਤੋ ਹੁਤ੍વਾ ਮਙ੍ਕੁਭਾવਂ ਉਪ੍ਪਾਦੇਤੁਕਾਮੋ વਦਤਿ – ‘‘ਅਯਂ ਅਤ੍ਤਨੋ ਧਮ੍ਮਤਾਯ ਚੀવਰਾਦੀਨਿ ਨ ਲਭਤਿ, ਅਮ੍ਹੇ ਨਿਸ੍ਸਾਯ ਲਭਤੀ’’ਤਿ। ਏવਂ ਪੁਗ੍ਗਲੋ ਦਤ੍વਾ ਅવਜਾਨਾਤਿ ਨਾਮ। ਏਕੋ ਪਨ ਏਕੇਨ ਸਦ੍ਧਿਂ ਦ੍વੇ ਤੀਣਿ વਸ੍ਸਾਨਿ વਸਨ੍ਤੋ ਪੁਬ੍ਬੇ ਤਂ ਪੁਗ੍ਗਲਂ ਗਰੁਂ ਕਤ੍વਾ ਪਚ੍ਛਾ ਗਚ੍ਛਨ੍ਤੇ ਗਚ੍ਛਨ੍ਤੇ ਕਾਲੇ ਚਿਤ੍ਤੀਕਾਰਂ ਨ ਕਰੋਤਿ, ਆਸਨਾਪਿ ਨ વੁਟ੍ਠਾਤਿ, ਉਪਟ੍ਠਾਨਮ੍ਪਿ ਨ ਗਚ੍ਛਤਿ। ਏવਂ ਪੁਗ੍ਗਲੋ ਸਂવਾਸੇਨ ਅવਜਾਨਾਤਿ ਨਾਮ।
192. Datvā avajānātītiādīsu – eko bhikkhu mahāpuñño catupaccayalābhī hoti. So cīvarādīni labhitvā aññaṃ appapuññaṃ āpucchati. Sopi tasmiṃ punappunaṃ āpucchantepi gaṇhātiyeva. Athassa itaro thokaṃ kupito hutvā maṅkubhāvaṃ uppādetukāmo vadati – ‘‘ayaṃ attano dhammatāya cīvarādīni na labhati, amhe nissāya labhatī’’ti. Evaṃ puggalo datvā avajānāti nāma. Eko pana ekena saddhiṃ dve tīṇi vassāni vasanto pubbe taṃ puggalaṃ garuṃ katvā pacchā gacchante gacchante kāle cittīkāraṃ na karoti, āsanāpi na vuṭṭhāti, upaṭṭhānampi na gacchati. Evaṃ puggalo saṃvāsena avajānāti nāma.
ਆਧੇਯ੍ਯਮੁਖੋਤਿ ਆਦਿਤੋ ਧੇਯ੍ਯਮੁਖੋ। ਪਠਮવਚਨਸ੍ਮਿਂਯੇવ ਠਪਿਤਮੁਖੋਤਿ ਅਤ੍ਥੋ। ਅਧਿਮੁਚ੍ਚਿਤਾ ਹੋਤੀਤਿ ਸਦ੍ਧਾਤਾ ਹੋਤਿ। ਤਤ੍ਰਾਯਂ ਨਯੋ – ਏਕੋ ਪੁਗ੍ਗਲੋ ਸਾਰੁਪ੍ਪਂਯੇવ ਭਿਕ੍ਖੁਂ ‘ਅਸਾਰੁਪ੍ਪੋ ਏਸੋ’ਤਿ ਕਥੇਤਿ, ਤਂ ਸੁਤ੍વਾ ਏਸ ਨਿਟ੍ਠਂ ਗਚ੍ਛਤਿ। ਪੁਨ ਅਞ੍ਞੇਨ ਸਭਾਗੇਨ ਭਿਕ੍ਖੁਨਾ ‘ਸਾਰੁਪ੍ਪੋ ਅਯ’ਨ੍ਤਿ વੁਤ੍ਤੇਪਿ ਤਸ੍ਸ વਚਨਂ ਨ ਗਣ੍ਹਾਤਿ ‘‘ਅਸੁਕੇਨ ਨਾਮ ‘ਅਸਾਰੁਪ੍ਪੋ ਅਯ’ਨ੍ਤਿ ਅਮ੍ਹਾਕਂ ਕਥਿਤ’’ਨ੍ਤਿ ਪੁਰਿਮਭਿਕ੍ਖੁਨੋવ ਕਥਂ ਗਣ੍ਹਾਤਿ। ਅਪਰੋਪਿਸ੍ਸ ਦੁਸ੍ਸੀਲਂ ‘ਸੀਲવਾ’ਤਿ ਕਥੇਤਿ। ਤਸ੍ਸ વਚਨਂ ਸਦ੍ਦਹਿਤ੍વਾ ਪੁਨ ਅਞ੍ਞੇਨ ‘‘ਅਸਾਰੁਪ੍ਪੋ ਏਸ ਭਿਕ੍ਖੁ, ਨਾਯਂ ਤੁਮ੍ਹਾਕਂ ਸਨ੍ਤਿਕਂ ਉਪਸਙ੍ਕਮਿਤੁਂ ਯੁਤ੍ਤੋ’’ਤਿ વੁਤ੍ਤੋਪਿ ਤਸ੍ਸ વਚਨਂ ਅਗ੍ਗਹੇਤ੍વਾ ਪੁਰਿਮਸ੍ਸੇવ ਕਥਂ ਗਣ੍ਹਾਤਿ। ਅਪਰੋ વਣ੍ਣਮ੍ਪਿ ਕਥਿਤਂ ਗਣ੍ਹਾਤਿ, ਅવਣ੍ਣਮ੍ਪਿ ਕਥਿਤਂ ਗਣ੍ਹਾਤਿਯੇવ। ਅਯਮ੍ਪਿ ਆਧੇਯ੍ਯਮੁਖੋਯੇવ ਨਾਮ। ਆਧਾਤਬ੍ਬਮੁਖੋ ਯਂ ਯਂ ਸੁਣਾਤਿ, ਤਤ੍ਥ ਤਤ੍ਥ ਠਪਿਤਮੁਖੋਤਿ ਅਤ੍ਥੋ।
Ādheyyamukhoti ādito dheyyamukho. Paṭhamavacanasmiṃyeva ṭhapitamukhoti attho. Adhimuccitā hotīti saddhātā hoti. Tatrāyaṃ nayo – eko puggalo sāruppaṃyeva bhikkhuṃ ‘asāruppo eso’ti katheti, taṃ sutvā esa niṭṭhaṃ gacchati. Puna aññena sabhāgena bhikkhunā ‘sāruppo aya’nti vuttepi tassa vacanaṃ na gaṇhāti ‘‘asukena nāma ‘asāruppo aya’nti amhākaṃ kathita’’nti purimabhikkhunova kathaṃ gaṇhāti. Aparopissa dussīlaṃ ‘sīlavā’ti katheti. Tassa vacanaṃ saddahitvā puna aññena ‘‘asāruppo esa bhikkhu, nāyaṃ tumhākaṃ santikaṃ upasaṅkamituṃ yutto’’ti vuttopi tassa vacanaṃ aggahetvā purimasseva kathaṃ gaṇhāti. Aparo vaṇṇampi kathitaṃ gaṇhāti, avaṇṇampi kathitaṃ gaṇhātiyeva. Ayampi ādheyyamukhoyeva nāma. Ādhātabbamukho yaṃ yaṃ suṇāti, tattha tattha ṭhapitamukhoti attho.
ਲੋਲੋਤਿ ਸਦ੍ਧਾਦੀਨਂ ਇਤ੍ਤਰਕਾਲਟ੍ਠਿਤਿਕਤ੍ਤਾ ਅਸ੍ਸਦ੍ਧਿਯਾਦੀਹਿ ਲੁਲਿਤਭਾવੇਨ ਲੋਲੋ। ਇਤ੍ਤਰਸਦ੍ਧੋਤਿ ਪਰਿਤ੍ਤਸਦ੍ਧੋ, ਅਪਰਿਪੁਣ੍ਣਸਦ੍ਧੋ। ਸੇਸੇਸੁਪਿ ਏਸੇવ ਨਯੋ। ਏਤ੍ਥ ਪਨ ਪੁਨਪ੍ਪੁਨਂ ਭਜਨવਸੇਨ ਸਦ੍ਧਾવ ਭਤ੍ਤਿ। ਪੇਮਂ ਸਦ੍ਧਾਪੇਮਂ ਗੇਹਸਿਤਪੇਮਮ੍ਪਿ વਟ੍ਟਤਿ। ਪਸਾਦੋ ਸਦ੍ਧਾਪਸਾਦੋવ। ਏવਂ ਪੁਗ੍ਗਲੋ ਲੋਲੋ ਹੋਤੀਤਿ ਏવਂ ਇਤ੍ਤਰਸਦ੍ਧਾਦਿਤਾਯ ਪੁਗ੍ਗਲੋ ਲੋਲੋ ਨਾਮ ਹੋਤਿ। ਹਲਿਦ੍ਦਿਰਾਗੋ વਿਯ , ਥੁਸਰਾਸਿਮ੍ਹਿ ਕੋਟ੍ਟਿਤਖਾਣੁਕੋ વਿਯ, ਅਸ੍ਸਪਿਟ੍ਠਿਯਂ ਠਪਿਤਕੁਮ੍ਭਣ੍ਡਂ વਿਯ ਚ ਅਨਿਬਦ੍ਧਟ੍ਠਾਨੋ ਮੁਹੁਤ੍ਤੇਨ ਪਸੀਦਤਿ, ਮੁਹੁਤ੍ਤੇਨ ਕੁਪ੍ਪਤਿ।
Loloti saddhādīnaṃ ittarakālaṭṭhitikattā assaddhiyādīhi lulitabhāvena lolo. Ittarasaddhoti parittasaddho, aparipuṇṇasaddho. Sesesupi eseva nayo. Ettha pana punappunaṃ bhajanavasena saddhāva bhatti. Pemaṃ saddhāpemaṃ gehasitapemampi vaṭṭati. Pasādo saddhāpasādova. Evaṃ puggalo lolo hotīti evaṃ ittarasaddhāditāya puggalo lolo nāma hoti. Haliddirāgo viya , thusarāsimhi koṭṭitakhāṇuko viya, assapiṭṭhiyaṃ ṭhapitakumbhaṇḍaṃ viya ca anibaddhaṭṭhāno muhuttena pasīdati, muhuttena kuppati.
ਮਨ੍ਦੋ ਮੋਮੂਹੋਤਿ ਅਞ੍ਞਾਣਭਾવੇਨ ਮਨ੍ਦੋ ਅવਿਸਦਤਾਯ ਮੋਮੂਹੋ। ਮਹਾਮੂਲ਼੍ਹੋਤਿ ਅਤ੍ਥੋ।
Mando momūhoti aññāṇabhāvena mando avisadatāya momūho. Mahāmūḷhoti attho.
੧੯੩. ਯੋਧਾਜੀવੂਪਮੇਸੁ – ਯੋਧਾਜੀવਾਤਿ ਯੁਦ੍ਧੂਪਜੀવਿਨੋ। ਰਜਗ੍ਗਨ੍ਤਿ ਹਤ੍ਥਿਅਸ੍ਸਾਦੀਨਂ ਪਾਦਪ੍ਪਹਾਰਭਿਨ੍ਨਾਯ ਭੂਮਿਯਾ ਉਗ੍ਗਤਂ ਰਜਕ੍ਖਨ੍ਧਂ। ਨ ਸਨ੍ਥਮ੍ਭਤੀਤਿ ਸਨ੍ਥਮ੍ਭਿਤ੍વਾ ਠਾਤੁਂ ਨ ਸਕ੍ਕੋਤਿ। ਸਹਤਿ ਰਜਗ੍ਗਨ੍ਤਿ ਰਜਕ੍ਖਨ੍ਧਂ ਦਿਸ੍વਾਪਿ ਅਧਿવਾਸੇਤਿ। ਧਜਗ੍ਗਨ੍ਤਿ ਹਤ੍ਥਿਅਸ੍ਸਾਦਿਪਿਟ੍ਠੇਸੁ વਾ ਰਥੇਸੁ વਾ ਉਸ੍ਸਾਪਿਤਾਨਂ ਧਜਾਨਂ ਅਗ੍ਗਂ। ਉਸ੍ਸਾਰਣਨ੍ਤਿ ਹਤ੍ਥਿਅਸ੍ਸਰਥਾਦੀਨਞ੍ਚੇવ ਬਲਕਾਯਸ੍ਸ ਚ ਉਚ੍ਚਾਸਦ੍ਦਮਹਾਸਦ੍ਦਂ। ਸਮ੍ਪਹਾਰੇਤਿ ਸਮਾਗਤੇ ਅਪ੍ਪਮਤ੍ਤਕੇਪਿ ਪਹਾਰੇ। ਹਞ੍ਞਤੀਤਿ વਿਹਞ੍ਞਤਿ, વਿਘਾਤਂ ਆਪਜ੍ਜਤਿ। ਬ੍ਯਾਪਜ੍ਜਤੀਤਿ વਿਪਤ੍ਤਿਂ ਆਪਜ੍ਜਤਿ, ਪਕਤਿਭਾવਂ ਜਹਤਿ। ਸਹਤਿ ਸਮ੍ਪਹਾਰਨ੍ਤਿ ਦ੍વੇ ਤਯੋ ਪਹਾਰੇ ਪਤ੍વਾਪਿ ਸਹਤਿ, ਅਧਿવਾਸੇਤਿ । ਤਮੇવ ਸਙ੍ਗਾਮਸੀਸਨ੍ਤਿ ਤਮੇવ ਜਯਖਨ੍ਧਾવਾਰਟ੍ਠਾਨਂ। ਅਜ੍ਝਾવਸਤੀਤਿ ਸਤ੍ਤਾਹਮਤ੍ਤਂ ਅਭਿਭવਿਤ੍વਾ ਆવਸਤਿ। ਕਿਂ ਕਾਰਣਾ? ਲਦ੍ਧਪ੍ਪਹਾਰਾਨਂ ਪਹਾਰਜਗ੍ਗਨਤ੍ਥਞ੍ਚੇવ ਕਤਕਮ੍ਮਾਨਂ વਿਸੇਸਂ ਞਤ੍વਾ ਠਾਨਨ੍ਤਰਦਾਨਤ੍ਥਞ੍ਚ ਇਸ੍ਸਰਿਯਸੁਖਾਨੁਭવਨਤ੍ਥਞ੍ਚ।
193. Yodhājīvūpamesu – yodhājīvāti yuddhūpajīvino. Rajagganti hatthiassādīnaṃ pādappahārabhinnāya bhūmiyā uggataṃ rajakkhandhaṃ. Na santhambhatīti santhambhitvā ṭhātuṃ na sakkoti. Sahati rajagganti rajakkhandhaṃ disvāpi adhivāseti. Dhajagganti hatthiassādipiṭṭhesu vā rathesu vā ussāpitānaṃ dhajānaṃ aggaṃ. Ussāraṇanti hatthiassarathādīnañceva balakāyassa ca uccāsaddamahāsaddaṃ. Sampahāreti samāgate appamattakepi pahāre. Haññatīti vihaññati, vighātaṃ āpajjati. Byāpajjatīti vipattiṃ āpajjati, pakatibhāvaṃ jahati. Sahati sampahāranti dve tayo pahāre patvāpi sahati, adhivāseti . Tameva saṅgāmasīsanti tameva jayakhandhāvāraṭṭhānaṃ. Ajjhāvasatīti sattāhamattaṃ abhibhavitvā āvasati. Kiṃ kāraṇā? Laddhappahārānaṃ pahārajagganatthañceva katakammānaṃ visesaṃ ñatvā ṭhānantaradānatthañca issariyasukhānubhavanatthañca.
੧੯੪. ਇਦਾਨਿ ਯਸ੍ਮਾ ਸਤ੍ਥੁ ਯੋਧਾਜੀવੇਹਿ ਕਿਚ੍ਚਂ ਨਤ੍ਥਿ, ਇਮਸ੍ਮਿਂ ਪਨ ਸਾਸਨੇ ਤਥਾਰੂਪੇ ਪਞ੍ਚ ਪੁਗ੍ਗਲੇ ਦਸ੍ਸੇਤੁਂ ਇਦਂ ਓਪਮ੍ਮਂ ਆਭਤਂ, ਤਸ੍ਮਾ ਤੇ ਪੁਗ੍ਗਲੇ ਦਸ੍ਸੇਨ੍ਤੋ ਏવਮੇવਨ੍ਤਿਆਦਿਮਾਹ।
194. Idāni yasmā satthu yodhājīvehi kiccaṃ natthi, imasmiṃ pana sāsane tathārūpe pañca puggale dassetuṃ idaṃ opammaṃ ābhataṃ, tasmā te puggale dassento evamevantiādimāha.
ਤਤ੍ਥ ਸਂਸੀਦਤੀਤਿ ਮਿਚ੍ਛਾવਿਤਕ੍ਕਸ੍ਮਿਂ વਿਸੀਦਤਿ, ਅਨੁਪવਿਸਤਿ। ਨ ਸਕ੍ਕੋਤਿ ਬ੍ਰਹ੍ਮਚਰਿਯਂ ਸਨ੍ਧਾਰੇਤੁਨ੍ਤਿ ਬ੍ਰਹ੍ਮਚਰਿਯવਾਸਂ ਅਨੁਪਚ੍ਛਿਜ੍ਜਮਾਨਂ ਗੋਪੇਤੁਂ ਨ ਸਕ੍ਕੋਤਿ। ਸਿਕ੍ਖਾਦੁਬ੍ਬਲ੍ਯਂ ਆવਿਕਤ੍વਾਤਿ ਸਿਕ੍ਖਾਯ ਦੁਬ੍ਬਲਭਾવਂ ਪਕਾਸੇਤ੍વਾ। ਕਿਮਸ੍ਸ ਰਜਗ੍ਗਸ੍ਮਿਨ੍ਤਿ ਕਿਂ ਤਸ੍ਸ ਪੁਗ੍ਗਲਸ੍ਸ ਰਜਗ੍ਗਂ ਨਾਮਾਤਿ વਦਤਿ। ਅਭਿਰੂਪਾਤਿ ਅਭਿਰੂਪવਤੀ। ਦਸ੍ਸਨੀਯਾਤਿ ਦਸ੍ਸਨਯੋਗ੍ਗਾ। ਪਾਸਾਦਿਕਾਤਿ ਦਸ੍ਸਨੇਨੇવ ਚਿਤ੍ਤਪ੍ਪਸਾਦਾવਹਾ। ਪਰਮਾਯਾਤਿ ਉਤ੍ਤਮਾਯ। વਣ੍ਣਪੋਕ੍ਖਰਤਾਯਾਤਿ ਸਰੀਰવਣ੍ਣੇਨ ਚੇવ ਅਙ੍ਗਸਣ੍ਠਾਨੇਨ ਚ।
Tattha saṃsīdatīti micchāvitakkasmiṃ visīdati, anupavisati. Na sakkoti brahmacariyaṃ sandhāretunti brahmacariyavāsaṃ anupacchijjamānaṃ gopetuṃ na sakkoti. Sikkhādubbalyaṃ āvikatvāti sikkhāya dubbalabhāvaṃ pakāsetvā. Kimassa rajaggasminti kiṃ tassa puggalassa rajaggaṃ nāmāti vadati. Abhirūpāti abhirūpavatī. Dassanīyāti dassanayoggā. Pāsādikāti dassaneneva cittappasādāvahā. Paramāyāti uttamāya. Vaṇṇapokkharatāyāti sarīravaṇṇena ceva aṅgasaṇṭhānena ca.
੧੯੬. ਊਹਸਤੀਤਿ ਅવਹਸਤਿ। ਉਲ੍ਲਪਤੀਤਿ ਕਥੇਤਿ। ਉਜ੍ਜਗ੍ਘਤੀਤਿ ਪਾਣਿਂ ਪਹਰਿਤ੍વਾ ਮਹਾਹਸਿਤਂ ਹਸਤਿ। ਉਪ੍ਪਣ੍ਡੇਤੀਤਿ ਉਪ੍ਪਣ੍ਡਨਕਥਂ ਕਥੇਤਿ।
196. Ūhasatīti avahasati. Ullapatīti katheti. Ujjagghatīti pāṇiṃ paharitvā mahāhasitaṃ hasati. Uppaṇḍetīti uppaṇḍanakathaṃ katheti.
੧੯੭. ਅਭਿਨਿਸੀਦਤੀਤਿ ਅਭਿਭવਿਤ੍વਾ ਸਨ੍ਤਿਕੇ વਾ ਏਕਾਸਨੇ વਾ ਨਿਸੀਦਤਿ। ਦੁਤਿਯਪਦੇਪਿ ਏਸੇવ ਨਯੋ। ਅਜ੍ਝੋਤ੍ਥਰਤੀਤਿ ਅવਤ੍ਥਰਤਿ।
197. Abhinisīdatīti abhibhavitvā santike vā ekāsane vā nisīdati. Dutiyapadepi eseva nayo. Ajjhottharatīti avattharati.
੧੯੮. વਿਨਿવੇਠੇਤ੍વਾ વਿਨਿਮੋਚੇਤ੍વਾਤਿ ਗਹਿਤਟ੍ਠਾਨਤੋ ਤਸ੍ਸ ਹਤ੍ਥਂ વਿਨਿવੇਠੇਤ੍વਾ ਚੇવ, ਮੋਚੇਤ੍વਾ ਚ। ਸੇਸਮੇਤ੍ਥ ਉਤ੍ਤਾਨਤ੍ਥਮੇવ।
198. Viniveṭhetvā vinimocetvāti gahitaṭṭhānato tassa hatthaṃ viniveṭhetvā ceva, mocetvā ca. Sesamettha uttānatthameva.
੧੯੯. ਪਿਣ੍ਡਪਾਤਿਕੇਸੁ – ਮਨ੍ਦਤ੍ਤਾ ਮੋਮੂਹਤ੍ਤਾਤਿ ਨੇવ ਸਮਾਦਾਨਂ ਜਾਨਾਤਿ, ਨ ਆਨਿਸਂਸਂ; ਅਤ੍ਤਨੋ ਪਨ ਮਨ੍ਦਤ੍ਤਾ ਮੋਮੂਹਤ੍ਤਾ ਅਞ੍ਞਾਣੇਨੇવ ਪਿਣ੍ਡਪਾਤਿਕੋ ਹੋਤਿ। ਪਾਪਿਚ੍ਛੋ ਇਚ੍ਛਾਪਕਤੋਤਿ ਪਿਣ੍ਡਪਾਤਿਕਸ੍ਸ ਮੇ ਸਤੋ ‘‘ਅਯਂ ਪਿਣ੍ਡਪਾਤਿਕੋ’’ਤਿ ਚਤੁਪਚ੍ਚਯਸਕ੍ਕਾਰਂ ਕਰਿਸ੍ਸਨ੍ਤਿ। ਲਜ੍ਜੀ, ਅਪ੍ਪਿਚ੍ਛੋਤਿਆਦੀਹਿ ਚ ਗੁਣੇਹਿ ਸਮ੍ਭਾવੇਸ੍ਸਨ੍ਤੀਤਿ। ਏવਂ ਪਾਪਿਕਾਯ ਇਚ੍ਛਾਯ ਠਤ੍વਾ ਤਾਯ ਪਾਪਿਚ੍ਛਾਯ ਅਭਿਭੂਤੋ ਹੁਤ੍વਾ ਪਿਣ੍ਡਪਾਤਿਕੋ ਹੋਤਿ। ਉਮ੍ਮਾਦવਸੇਨ ਪਿਣ੍ਡਾਯ ਚਰਨ੍ਤੋ ਪਨ ਉਮ੍ਮਾਦਾ ਚਿਤ੍ਤવਿਕ੍ਖੇਪਾ ਪਿਣ੍ਡਪਾਤਿਕੋ ਨਾਮ ਹੋਤਿ। વਣ੍ਣਿਤਨ੍ਤਿ ਇਦਂ ਪਿਣ੍ਡਪਾਤਿਕਙ੍ਗਂ ਨਾਮ ਬੁਦ੍ਧੇਹਿ ਚ ਬੁਦ੍ਧਸਾવਕੇਹਿ ਚ વਣ੍ਣਿਤਂ ਪਸਤ੍ਥਨ੍ਤਿ ਪਿਣ੍ਡਪਾਤਿਕੋ ਹੋਤਿ। ਅਪ੍ਪਿਚ੍ਛਤਂਯੇવ ਨਿਸ੍ਸਾਯਾਤਿਆਦੀਸੁ – ‘‘ਇਤਿ ਅਪ੍ਪਿਚ੍ਛੋ ਭવਿਸ੍ਸਾਮਿ, ਇਦਂ ਮੇ ਪਿਣ੍ਡਪਾਤਿਕਙ੍ਗਂ ਅਪ੍ਪਿਚ੍ਛਤਾਯ ਸਂવਤ੍ਤਿਸ੍ਸਤਿ; ‘ਇਤਿ ਸਨ੍ਤੁਟ੍ਠੋ ਭવਿਸ੍ਸਾਮਿ ਇਦਂ ਮੇ ਪਿਣ੍ਡਪਾਤਿਕਙ੍ਗਂ ਸਨ੍ਤੁਟ੍ਠਿਯਾ ਸਂવਤ੍ਤਿਸ੍ਸਤਿ’; ‘ਇਤਿ ਕਿਲੇਸੇ ਸਂਲਿਖਿਸ੍ਸਾਮਿ’, ਇਦਂ ਮੇ ਪਿਣ੍ਡਪਾਤਿਕਙ੍ਗਂ ਕਿਲੇਸਸਲ੍ਲੇਖਨਤ੍ਥਾਯ ਸਂવਤ੍ਤਿਸ੍ਸਤੀ’’ਤਿ ਪਿਣ੍ਡਪਾਤਿਕੋ ਹੋਤਿ। ਇਦਮਤ੍ਥਿਤਨ੍ਤਿ ਇਮਾਯ ਕਲ੍ਯਾਣਾਯ ਪਟਿਪਤ੍ਤਿਯਾ ਅਤ੍ਥਿਕਭਾવਂ, ਇਮਿਨਾ વਾ ਪਿਣ੍ਡਪਾਤਮਤ੍ਤੇਨ ਅਤ੍ਥਿਕਭਾવਂ। ਯਂ ਯਂ ਲਦ੍ਧਂ ਤੇਨ ਤੇਨੇવ ਯਾਪਨਭਾવਂ ਨਿਸ੍ਸਾਯਾਤਿ ਅਤ੍ਥੋ। ਅਗ੍ਗੋਤਿ ਜੇਟ੍ਠਕੋ। ਸੇਸਾਨਿ ਤਸ੍ਸੇવ વੇવਚਨਾਨਿ।
199. Piṇḍapātikesu – mandattā momūhattāti neva samādānaṃ jānāti, na ānisaṃsaṃ; attano pana mandattā momūhattā aññāṇeneva piṇḍapātiko hoti. Pāpiccho icchāpakatoti piṇḍapātikassa me sato ‘‘ayaṃ piṇḍapātiko’’ti catupaccayasakkāraṃ karissanti. Lajjī, appicchotiādīhi ca guṇehi sambhāvessantīti. Evaṃ pāpikāya icchāya ṭhatvā tāya pāpicchāya abhibhūto hutvā piṇḍapātiko hoti. Ummādavasena piṇḍāya caranto pana ummādā cittavikkhepā piṇḍapātiko nāma hoti. Vaṇṇitanti idaṃ piṇḍapātikaṅgaṃ nāma buddhehi ca buddhasāvakehi ca vaṇṇitaṃ pasatthanti piṇḍapātiko hoti. Appicchataṃyeva nissāyātiādīsu – ‘‘iti appiccho bhavissāmi, idaṃ me piṇḍapātikaṅgaṃ appicchatāya saṃvattissati; ‘iti santuṭṭho bhavissāmi idaṃ me piṇḍapātikaṅgaṃ santuṭṭhiyā saṃvattissati’; ‘iti kilese saṃlikhissāmi’, idaṃ me piṇḍapātikaṅgaṃ kilesasallekhanatthāya saṃvattissatī’’ti piṇḍapātiko hoti. Idamatthitanti imāya kalyāṇāya paṭipattiyā atthikabhāvaṃ, iminā vā piṇḍapātamattena atthikabhāvaṃ. Yaṃ yaṃ laddhaṃ tena teneva yāpanabhāvaṃ nissāyāti attho. Aggoti jeṭṭhako. Sesāni tasseva vevacanāni.
ਗવਾ ਖੀਰਨ੍ਤਿ ਗਾવਿਤੋ ਖੀਰਂ ਨਾਮ ਹੋਤਿ, ਨ વਿਨਾ ਗਾવਿਯਾ। ਖੀਰਮ੍ਹਾ ਦਧੀਤਿਆਦੀਸੁਪਿ ਏਸੇવ ਨਯੋ। ਏવਮੇવਨ੍ਤਿ ਯਥਾ ਏਤੇਸੁ ਪਞ੍ਚਸੁ ਗੋਰਸੇਸੁ ਸਪ੍ਪਿਮਣ੍ਡੋ ਅਗ੍ਗੋ; ਏવਮੇવਂ ਇਮੇਸੁ ਪਞ੍ਚਸੁ ਪਿਣ੍ਡਪਾਤਿਕੇਸੁ ਯ੍વਾਯਂ ਅਪ੍ਪਿਚ੍ਛਤਾਦੀਨਿ ਨਿਸ੍ਸਾਯ ਪਿਣ੍ਡਪਾਤਿਕੋ ਹੋਤਿ। ਅਯਂ ਅਗ੍ਗੋ ਚ ਸੇਟ੍ਠੋ ਚ ਪਾਮੋਕ੍ਖੋ ਚ ਉਤ੍ਤਮੋ ਚ ਪવਰੋ ਚ। ਇਮੇਸੁ ਪਨ ਪਞ੍ਚਸੁ ਪਿਣ੍ਡਪਾਤਿਕੇਸੁ ਦ੍વੇવ ਜਨਾ ਪਿਣ੍ਡਪਾਤਿਕਾ , ਤਯੋ ਨ ਪਿਣ੍ਡਪਾਤਿਕਾ। ਨਾਮਮਤ੍ਤੇਨ ਪਨ ਪਿਣ੍ਡਪਾਤਿਕਾਤਿ વੇਦਿਤਬ੍ਬਾ। ਖਲੁਪਚ੍ਛਾਭਤ੍ਤਿਕਾਦੀਸੁਪਿ ਏਸੇવ ਨਯੋਤਿ।
Gavā khīranti gāvito khīraṃ nāma hoti, na vinā gāviyā. Khīramhā dadhītiādīsupi eseva nayo. Evamevanti yathā etesu pañcasu gorasesu sappimaṇḍo aggo; evamevaṃ imesu pañcasu piṇḍapātikesu yvāyaṃ appicchatādīni nissāya piṇḍapātiko hoti. Ayaṃ aggo ca seṭṭho ca pāmokkho ca uttamo ca pavaro ca. Imesu pana pañcasu piṇḍapātikesu dveva janā piṇḍapātikā , tayo na piṇḍapātikā. Nāmamattena pana piṇḍapātikāti veditabbā. Khalupacchābhattikādīsupi eseva nayoti.
ਪਞ੍ਚਕਨਿਦ੍ਦੇਸવਣ੍ਣਨਾ।
Pañcakaniddesavaṇṇanā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਅਭਿਧਮ੍ਮਪਿਟਕ • Abhidhammapiṭaka / ਪੁਗ੍ਗਲਪਞ੍ਞਤ੍ਤਿਪਾਲ਼ਿ • Puggalapaññattipāḷi / ੫. ਪਞ੍ਚਕਪੁਗ੍ਗਲਪਞ੍ਞਤ੍ਤਿ • 5. Pañcakapuggalapaññatti
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / ਪਞ੍ਚਪਕਰਣ-ਮੂਲਟੀਕਾ • Pañcapakaraṇa-mūlaṭīkā / ੫. ਪਞ੍ਚਕਨਿਦ੍ਦੇਸવਣ੍ਣਨਾ • 5. Pañcakaniddesavaṇṇanā
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / ਪਞ੍ਚਪਕਰਣ-ਅਨੁਟੀਕਾ • Pañcapakaraṇa-anuṭīkā / ੫. ਪਞ੍ਚਕਨਿਦ੍ਦੇਸવਣ੍ਣਨਾ • 5. Pañcakaniddesavaṇṇanā
