| Library / Tipiṭaka / තිපිටක • Tipiṭaka / පුග්‌ගලපඤ්‌ඤත්‌තිපාළි • Puggalapaññattipāḷi |
5. පඤ්‌චකපුග්‌ගලපඤ්‌ඤත්‌ති
5. Pañcakapuggalapaññatti
191. තත්‍ර ය්‌වායං පුග්‌ගලො ආරභති ච විප්‌පටිසාරී ච හොති, තඤ්‌ච චෙතොවිමුත්‌තිං පඤ්‌ඤාවිමුත්‌තිං යථාභූතං නප්‌පජානාති, යත්‌ථස්‌ස තෙ උප්‌පන්‌නා පාපකා අකුසලා ධම්‌මා අපරිසෙසා නිරුජ්‌ඣන්‌ති , සො එවමස්‌ස වචනීයො – ‘‘ආයස්‌මතො ඛො ආරම්‌භජා 1 ආසවා සංවිජ්‌ජන්‌ති, විප්‌පටිසාරජා ආසවා පවඩ්‌ඪන්‌ති. සාධු වතායස්‌මා ආරම්‌භජෙ ආසවෙ පහාය විප්‌පටිසාරජෙ ආසවෙ පටිවිනොදෙත්‌වා චිත්‌තං පඤ්‌ඤඤ්‌ච භාවෙතු. එවමායස්‌මා අමුනා පඤ්‌චමෙන පුග්‌ගලෙන සමසමො භවිස්‌සතී’’ති.
191. Tatra yvāyaṃ puggalo ārabhati ca vippaṭisārī ca hoti, tañca cetovimuttiṃ paññāvimuttiṃ yathābhūtaṃ nappajānāti, yatthassa te uppannā pāpakā akusalā dhammā aparisesā nirujjhanti , so evamassa vacanīyo – ‘‘āyasmato kho ārambhajā 2 āsavā saṃvijjanti, vippaṭisārajā āsavā pavaḍḍhanti. Sādhu vatāyasmā ārambhaje āsave pahāya vippaṭisāraje āsave paṭivinodetvā cittaṃ paññañca bhāvetu. Evamāyasmā amunā pañcamena puggalena samasamo bhavissatī’’ti.
තත්‍ර ය්‌වායං පුග්‌ගලො ආරභති න විප්‌පටිසාරී හොති, තඤ්‌ච චෙතොවිමුත්‌තිං පඤ්‌ඤාවිමුත්‌තිං යථාභූතං නප්‌පජානාති, යත්‌ථස්‌ස තෙ උප්‌පන්‌නා පාපකා අකුසලා ධම්‌මා අපරිසෙසා නිරුජ්‌ඣන්‌ති, සො එවමස්‌ස වචනීයො – ‘‘ආයස්‌මතො ඛො ආරම්‌භජා ආසවා සංවිජ්‌ජන්‌ති, විප්‌පටිසාරජා ආසවා නප්‌පවඩ්‌ඪන්‌ති. සාධු වතායස්‌මා ආරම්‌භජෙ ආසවෙ පහාය චිත්‌තං පඤ්‌ඤඤ්‌ච භාවෙතු. එවමායස්‌මා අමුනා පඤ්‌චමෙන පුග්‌ගලෙන සමසමො භවිස්‌සතී’’ති.
Tatra yvāyaṃ puggalo ārabhati na vippaṭisārī hoti, tañca cetovimuttiṃ paññāvimuttiṃ yathābhūtaṃ nappajānāti, yatthassa te uppannā pāpakā akusalā dhammā aparisesā nirujjhanti, so evamassa vacanīyo – ‘‘āyasmato kho ārambhajā āsavā saṃvijjanti, vippaṭisārajā āsavā nappavaḍḍhanti. Sādhu vatāyasmā ārambhaje āsave pahāya cittaṃ paññañca bhāvetu. Evamāyasmā amunā pañcamena puggalena samasamo bhavissatī’’ti.
තත්‍ර ය්‌වායං පුග්‌ගලො න ආරභති විප්‌පටිසාරී හොති, තඤ්‌ච චෙතොවිමුත්‌තිං පඤ්‌ඤාවිමුත්‌තිං යථාභූතං නප්‌පජානාති, යත්‌ථස්‌ස තෙ උප්‌පන්‌නා පාපකා අකුසලා ධම්‌මා අපරිසෙසා නිරුජ්‌ඣන්‌ති, සො එවමස්‌ස වචනීයො – ‘‘ආයස්‌මතො ඛො ආරම්‌භජා ආසවා න සංවිජ්‌ජන්‌ති, විප්‌පටිසාරජා ආසවා පවඩ්‌ඪන්‌ති. සාධු වතායස්‌මා විප්‌පටිසාරජෙ ආසවෙ පටිවිනොදෙත්‌වා චිත්‌තං පඤ්‌ඤඤ්‌ච භාවෙතු. එවමායස්‌මා අමුනා පඤ්‌චමෙන පුග්‌ගලෙන සමසමො භවිස්‌සතී’’ති.
Tatra yvāyaṃ puggalo na ārabhati vippaṭisārī hoti, tañca cetovimuttiṃ paññāvimuttiṃ yathābhūtaṃ nappajānāti, yatthassa te uppannā pāpakā akusalā dhammā aparisesā nirujjhanti, so evamassa vacanīyo – ‘‘āyasmato kho ārambhajā āsavā na saṃvijjanti, vippaṭisārajā āsavā pavaḍḍhanti. Sādhu vatāyasmā vippaṭisāraje āsave paṭivinodetvā cittaṃ paññañca bhāvetu. Evamāyasmā amunā pañcamena puggalena samasamo bhavissatī’’ti.
තත්‍ර ය්‌වායං පුග්‌ගලො න ආරභති න විප්‌පටිසාරී හොති, තඤ්‌ච චෙතොවිමුත්‌තිං පඤ්‌ඤාවිමුත්‌තිං යථාභූතං නප්‌පජානාති, යත්‌ථස්‌ස තෙ පාපකා අකුසලා ධම්‌මා අපරිසෙසා නිරුජ්‌ඣන්‌ති, සො එවමස්‌ස වචනීයො – ‘‘ආයස්‌මතො ඛො ආරම්‌භජා ආසවා න සංවිජ්‌ජන්‌ති, විප්‌පටිසාරජා ආසවා නප්‌පවඩ්‌ඪන්‌ති. සාධු වතායස්‌මා චිත්‌තං පඤ්‌ඤඤ්‌ච භාවෙතු. එවමායස්‌මා අමුනා පඤ්‌චමෙන පුග්‌ගලෙන සමසමො භවිස්‌සතී’’ති. ඉමෙ චත්‌තාරො පුග්‌ගලා අමුනා පඤ්‌චමෙන පුග්‌ගලෙන එවං ඔවදියමානා එවං අනුසාසියමානා අනුපුබ්‌බෙන ආසවානං ඛයං පාපුණන්‌ති.
Tatra yvāyaṃ puggalo na ārabhati na vippaṭisārī hoti, tañca cetovimuttiṃ paññāvimuttiṃ yathābhūtaṃ nappajānāti, yatthassa te pāpakā akusalā dhammā aparisesā nirujjhanti, so evamassa vacanīyo – ‘‘āyasmato kho ārambhajā āsavā na saṃvijjanti, vippaṭisārajā āsavā nappavaḍḍhanti. Sādhu vatāyasmā cittaṃ paññañca bhāvetu. Evamāyasmā amunā pañcamena puggalena samasamo bhavissatī’’ti. Ime cattāro puggalā amunā pañcamena puggalena evaṃ ovadiyamānā evaṃ anusāsiyamānā anupubbena āsavānaṃ khayaṃ pāpuṇanti.
192. කථඤ්‌ච පුග්‌ගලො දත්‌වා අවජානාති? ඉධෙකච්‌චො පුග්‌ගලො යස්‌ස පුග්‌ගලස්‌ස දෙති චීවරපිණ්‌ඩපාතසෙනාසනගිලානපච්‌චයභෙසජ්‌ජපරික්‌ඛාරං, තස්‌ස එවං හොති – ‘‘අහං දම්‌මි, අයං 3 පටිග්‌ගණ්‌හාතී’’ති, තමෙනං දත්‌වා අවජානාති. එවං පුග්‌ගලො දත්‌වා අවජානාති.
192. Kathañca puggalo datvā avajānāti? Idhekacco puggalo yassa puggalassa deti cīvarapiṇḍapātasenāsanagilānapaccayabhesajjaparikkhāraṃ, tassa evaṃ hoti – ‘‘ahaṃ dammi, ayaṃ 4 paṭiggaṇhātī’’ti, tamenaṃ datvā avajānāti. Evaṃ puggalo datvā avajānāti.
කථඤ්‌ච පුග්‌ගලො සංවාසෙන අවජානාති? ඉධෙකච්‌චො පුග්‌ගලො යෙන පුග්‌ගලෙන සද්‌ධිං සංවසති ද්‌වෙ වා තීණි වා වස්‌සානි, තමෙනං සංවාසෙන අවජානාති. එවං පුග්‌ගලො සංවාසෙන අවජානාති.
Kathañca puggalo saṃvāsena avajānāti? Idhekacco puggalo yena puggalena saddhiṃ saṃvasati dve vā tīṇi vā vassāni, tamenaṃ saṃvāsena avajānāti. Evaṃ puggalo saṃvāsena avajānāti.
කථඤ්‌ච පුග්‌ගලො ආධෙය්‍යමුඛො හොති? ඉධෙකච්‌චො පුග්‌ගලො පරස්‌ස වණ්‌ණෙ වා අවණ්‌ණෙ වා භාසියමානෙ ඛිප්‌පඤ්‌ඤෙව අධිමුච්‌චිතා හොති. එවං පුග්‌ගලො ආධෙය්‍යමුඛො හොති .
Kathañca puggalo ādheyyamukho hoti? Idhekacco puggalo parassa vaṇṇe vā avaṇṇe vā bhāsiyamāne khippaññeva adhimuccitā hoti. Evaṃ puggalo ādheyyamukho hoti .
කථඤ්‌ච පුග්‌ගලො ලොලො හොති? ඉධෙකච්‌චො පුග්‌ගලො ඉත්‌තරසද්‌ධො හොති ඉත්‌තරභත්‌තී ඉත්‌තරපෙමො ඉත්‌තරප්‌පසාදො. එවං පුග්‌ගලො ලොලො හොති.
Kathañca puggalo lolo hoti? Idhekacco puggalo ittarasaddho hoti ittarabhattī ittarapemo ittarappasādo. Evaṃ puggalo lolo hoti.
කථඤ්‌ච පුග්‌ගලො මන්‌දො මොමූහො හොති? ඉධෙකච්‌චො පුග්‌ගලො කුසලාකුසලෙ ධම්‌මෙ න ජානාති, සාවජ්‌ජානවජ්‌ජෙ ධම්‌මෙ න ජානාති, හීනප්‌පණීතෙ ධම්‌මෙ න ජානාති, කණ්‌හසුක්‌කසප්‌පටිභාගෙ ධම්‌මෙ න ජානාති. එවං පුග්‌ගලො මන්‌දො මොමූහො හොති.
Kathañca puggalo mando momūho hoti? Idhekacco puggalo kusalākusale dhamme na jānāti, sāvajjānavajje dhamme na jānāti, hīnappaṇīte dhamme na jānāti, kaṇhasukkasappaṭibhāge dhamme na jānāti. Evaṃ puggalo mando momūho hoti.
193. තත්‌ථ කතමෙ පඤ්‌ච යොධාජීවූපමා පුග්‌ගලා? පඤ්‌ච යොධාජීවා – ඉධෙකච්‌චො යොධාජීවො රජග්‌ගඤ්‌ඤෙව දිස්‌වා සංසීදති විසීදති න සන්‌ථම්‌භති 5 න සක්‌කොති සඞ්‌ගාමං ඔතරිතුං. එවරූපොපි ඉධෙකච්‌චො යොධාජීවො හොති. අයං පඨමො යොධාජීවො සන්‌තො සංවිජ්‌ජමානො ලොකස්‌මිං.
193. Tattha katame pañca yodhājīvūpamā puggalā? Pañca yodhājīvā – idhekacco yodhājīvo rajaggaññeva disvā saṃsīdati visīdati na santhambhati 6 na sakkoti saṅgāmaṃ otarituṃ. Evarūpopi idhekacco yodhājīvo hoti. Ayaṃ paṭhamo yodhājīvo santo saṃvijjamāno lokasmiṃ.
පුන චපරං ඉධෙකච්‌චො යොධාජීවො සහති රජග්‌ගං, අපි ච ඛො ධජග්‌ගඤ්‌ඤෙව දිස්‌වා සංසීදති විසීදති න සන්‌ථම්‌භති න සක්‌කොති සඞ්‌ගාමං ඔතරිතුං. එවරූපොපි ඉධෙකච්‌චො යොධාජීවො හොති. අයං දුතියො යොධාජීවො සන්‌තො සංවිජ්‌ජමානො ලොකස්‌මිං.
Puna caparaṃ idhekacco yodhājīvo sahati rajaggaṃ, api ca kho dhajaggaññeva disvā saṃsīdati visīdati na santhambhati na sakkoti saṅgāmaṃ otarituṃ. Evarūpopi idhekacco yodhājīvo hoti. Ayaṃ dutiyo yodhājīvo santo saṃvijjamāno lokasmiṃ.
පුන චපරං ඉධෙකච්‌චො යොධාජීවො සහති රජග්‌ගං සහති ධජග්‌ගං, අපි ච ඛො උස්‌සාරණඤ්‌ඤෙව 7 සුත්‌වා සංසීදති විසීදති න සන්‌ථම්‌භති න සක්‌කොති සඞ්‌ගාමං ඔතරිතුං. එවරූපොපි ඉධෙකච්‌චො යොධාජීවො හොති. අයං තතියො යොධාජීවො සන්‌තො සංවිජ්‌ජමානො ලොකස්‌මිං.
Puna caparaṃ idhekacco yodhājīvo sahati rajaggaṃ sahati dhajaggaṃ, api ca kho ussāraṇaññeva 8 sutvā saṃsīdati visīdati na santhambhati na sakkoti saṅgāmaṃ otarituṃ. Evarūpopi idhekacco yodhājīvo hoti. Ayaṃ tatiyo yodhājīvo santo saṃvijjamāno lokasmiṃ.
පුන චපරං ඉධෙකච්‌චො යොධාජීවො සහති රජග්‌ගං සහති ධජග්‌ගං සහති උස්‌සාරණං, අපි ච ඛො සම්‌පහාරෙ හඤ්‌ඤති බ්‍යාපජ්‌ජති. එවරූපොපි ඉධෙකච්‌චො යොධාජීවො හොති. අයං චතුත්‌ථො යොධාජීවො සන්‌තො සංවිජ්‌ජමානො ලොකස්‌මිං.
Puna caparaṃ idhekacco yodhājīvo sahati rajaggaṃ sahati dhajaggaṃ sahati ussāraṇaṃ, api ca kho sampahāre haññati byāpajjati. Evarūpopi idhekacco yodhājīvo hoti. Ayaṃ catuttho yodhājīvo santo saṃvijjamāno lokasmiṃ.
පුන චපරං ඉධෙකච්‌චො යොධාජීවො සහති රජග්‌ගං සහති ධජග්‌ගං සහති උස්‌සාරණං සහති සම්‌පහාරං. සො තං සඞ්‌ගාමං අභිවිජිනිත්‌වා විජිතසඞ්‌ගාමො තමෙව සඞ්‌ගාමසීසං අජ්‌ඣාවසති. එවරූපොපි ඉධෙකච්‌චො යොධාජීවො හොති. අයං පඤ්‌චමො යොධාජීවො සන්‌තො සංවිජ්‌ජමානො ලොකස්‌මිං. ඉමෙ පඤ්‌ච යොධාජීවා සන්‌තො සංවිජ්‌ජමානා ලොකස්‌මිං.
Puna caparaṃ idhekacco yodhājīvo sahati rajaggaṃ sahati dhajaggaṃ sahati ussāraṇaṃ sahati sampahāraṃ. So taṃ saṅgāmaṃ abhivijinitvā vijitasaṅgāmo tameva saṅgāmasīsaṃ ajjhāvasati. Evarūpopi idhekacco yodhājīvo hoti. Ayaṃ pañcamo yodhājīvo santo saṃvijjamāno lokasmiṃ. Ime pañca yodhājīvā santo saṃvijjamānā lokasmiṃ.
194. එවමෙවං පඤ්‌චිමෙ යොධාජීවූපමා පුග්‌ගලා සන්‌තො සංවිජ්‌ජමානා භික්‌ඛූසු. කතමෙ පඤ්‌ච? ඉධෙකච්‌චො භික්‌ඛු රජග්‌ගඤ්‌ඤෙව දිස්‌වා සංසීදති විසීදති න සන්‌ථම්‌භති න සක්‌කොති බ්‍රහ්‌මචරියං සන්‌ධාරෙතුං 9, සික්‌ඛාදුබ්‌බල්‍යං ආවිකත්‌වා 10 සික්‌ඛං පච්‌චක්‌ඛාය හීනායාවත්‌තති. කිමස්‌ස රජග්‌ගස්‌මිං? ඉධ භික්‌ඛු සුණාති – ‘‘අසුකස්‌මිං නාම ගාමෙ වා නිගමෙ වා ඉත්‌ථී වා කුමාරී වා අභිරූපා දස්‌සනීයා පාසාදිකා පරමාය වණ්‌ණපොක්‌ඛරතාය සමන්‌නාගතා’’ති. සො තං සුත්‌වා සංසීදති විසීදති න සන්‌ථම්‌භති න සක්‌කොති බ්‍රහ්‌මචරියං සන්‌ධාරෙතුං, සික්‌ඛාදුබ්‌බල්‍යං ආවිකත්‌වා සික්‌ඛං පච්‌චක්‌ඛාය හීනායාවත්‌තති. ඉදමස්‌ස රජග්‌ගස්‌මිං.
194. Evamevaṃ pañcime yodhājīvūpamā puggalā santo saṃvijjamānā bhikkhūsu. Katame pañca? Idhekacco bhikkhu rajaggaññeva disvā saṃsīdati visīdati na santhambhati na sakkoti brahmacariyaṃ sandhāretuṃ 11, sikkhādubbalyaṃ āvikatvā 12 sikkhaṃ paccakkhāya hīnāyāvattati. Kimassa rajaggasmiṃ? Idha bhikkhu suṇāti – ‘‘asukasmiṃ nāma gāme vā nigame vā itthī vā kumārī vā abhirūpā dassanīyā pāsādikā paramāya vaṇṇapokkharatāya samannāgatā’’ti. So taṃ sutvā saṃsīdati visīdati na santhambhati na sakkoti brahmacariyaṃ sandhāretuṃ, sikkhādubbalyaṃ āvikatvā sikkhaṃ paccakkhāya hīnāyāvattati. Idamassa rajaggasmiṃ.
සෙය්‍යථාපි සො යොධාජීවො රජග්‌ගඤ්‌ඤෙව දිස්‌වා සංසීදති විසීදති න සන්‌ථම්‌භති න සක්‌කොති සඞ්‌ගාමං ඔතරිතුං, තථූපමො අයං පුග්‌ගලො. එවරූපොපි ඉධෙකච්‌චො පුග්‌ගලො හොති. අයං පඨමො යොධාජීවූපමො පුග්‌ගලො සන්‌තො සංවිජ්‌ජමානො භික්‌ඛූසු.
Seyyathāpi so yodhājīvo rajaggaññeva disvā saṃsīdati visīdati na santhambhati na sakkoti saṅgāmaṃ otarituṃ, tathūpamo ayaṃ puggalo. Evarūpopi idhekacco puggalo hoti. Ayaṃ paṭhamo yodhājīvūpamo puggalo santo saṃvijjamāno bhikkhūsu.
195. පුන චපරං ඉධෙකච්‌චො භික්‌ඛු සහති රජග්‌ගං, අපි ච ඛො ධජග්‌ගඤ්‌ඤෙව දිස්‌වා සංසීදති විසීදති න සන්‌ථම්‌භති න සක්‌කොති බ්‍රහ්‌මචරියං සන්‌ධාරෙතුං, සික්‌ඛාදුබ්‌බල්‍යං ආවිකත්‌වා සික්‌ඛං පච්‌චක්‌ඛාය හීනායාවත්‌තති. කිමස්‌ස ධජග්‌ගස්‌මිං? ඉධ භික්‌ඛු න හෙව ඛො සුණාති – ‘‘අසුකස්‌මිං නාම ගාමෙ වා නිගමෙ වා ඉත්‌ථී වා කුමාරී වා අභිරූපා දස්‌සනීයා පාසාදිකා පරමාය වණ්‌ණපොක්‌ඛරතාය සමන්‌නාගතා’’ති, අපි ච ඛො සාමං 13 පස්‌සති ඉත්‌ථිං වා කුමාරිං වා අභිරූපං දස්‌සනීයං පාසාදිකං පරමාය වණ්‌ණපොක්‌ඛරතාය සමන්‌නාගතං. සො තං දිස්‌වා සංසීදති විසීදති න සන්‌ථම්‌භති න සක්‌කොති බ්‍රහ්‌මචරියං සන්‌ධාරෙතුං, සික්‌ඛාදුබ්‌බල්‍යං ආවිකත්‌වා සික්‌ඛං පච්‌චක්‌ඛාය හීනායාවත්‌තති. ඉදමස්‌ස ධජග්‌ගස්‌මිං.
195. Puna caparaṃ idhekacco bhikkhu sahati rajaggaṃ, api ca kho dhajaggaññeva disvā saṃsīdati visīdati na santhambhati na sakkoti brahmacariyaṃ sandhāretuṃ, sikkhādubbalyaṃ āvikatvā sikkhaṃ paccakkhāya hīnāyāvattati. Kimassa dhajaggasmiṃ? Idha bhikkhu na heva kho suṇāti – ‘‘asukasmiṃ nāma gāme vā nigame vā itthī vā kumārī vā abhirūpā dassanīyā pāsādikā paramāya vaṇṇapokkharatāya samannāgatā’’ti, api ca kho sāmaṃ 14 passati itthiṃ vā kumāriṃ vā abhirūpaṃ dassanīyaṃ pāsādikaṃ paramāya vaṇṇapokkharatāya samannāgataṃ. So taṃ disvā saṃsīdati visīdati na santhambhati na sakkoti brahmacariyaṃ sandhāretuṃ, sikkhādubbalyaṃ āvikatvā sikkhaṃ paccakkhāya hīnāyāvattati. Idamassa dhajaggasmiṃ.
සෙය්‍යථාපි සො යොධාජීවො සහති රජග්‌ගං, අපි ච ඛො ධජග්‌ගඤ්‌ඤෙව දිස්‌වා සංසීදති විසීදති න සන්‌ථම්‌භති න සක්‌කොති සඞ්‌ගාමං ඔතරිතුං, තථූපමො අයං පුග්‌ගලො. එවරූපොපි ඉධෙකච්‌චො පුග්‌ගලො හොති. අයං දුතියො යොධාජීවූපමො පුග්‌ගලො සන්‌තො සංවිජ්‌ජමානො භික්‌ඛූසු.
Seyyathāpi so yodhājīvo sahati rajaggaṃ, api ca kho dhajaggaññeva disvā saṃsīdati visīdati na santhambhati na sakkoti saṅgāmaṃ otarituṃ, tathūpamo ayaṃ puggalo. Evarūpopi idhekacco puggalo hoti. Ayaṃ dutiyo yodhājīvūpamo puggalo santo saṃvijjamāno bhikkhūsu.
196. පුන චපරං ඉධෙකච්‌චො භික්‌ඛු සහති රජග්‌ගං සහති ධජග්‌ගං, අපි ච ඛො උස්‌සාරණඤ්‌ඤෙව සුත්‌වා සංසීදති විසීදති න සන්‌ථම්‌භති න සක්‌කොති බ්‍රහ්‌මචරියං සන්‌ධාරෙතුං, සික්‌ඛාදුබ්‌බල්‍යං ආවිකත්‌වා සික්‌ඛං පච්‌චක්‌ඛාය හීනායාවත්‌තති. කිමස්‌ස උස්‌සාරණාය? ඉධ භික්‌ඛුං අරඤ්‌ඤගතං වා රුක්‌ඛමූලගතං වා සුඤ්‌ඤාගාරගතං වා මාතුගාමො උපසඞ්‌කමිත්‌වා ඌහසති 15 උල්‌ලපති උජ්‌ජග්‌ඝති උප්‌පණ්‌ඩෙති. සො මාතුගාමෙන ඌහසියමානො උල්‌ලපියමානො උජ්‌ජග්‌ඝියමානො උප්‌පණ්‌ඩියමානො සංසීදති විසීදති න සන්‌ථම්‌භති න සක්‌කොති බ්‍රහ්‌මචරියං සන්‌ධාරෙතුං, සික්‌ඛාදුබ්‌බල්‍යං ආවිකත්‌වා සික්‌ඛං පච්‌චක්‌ඛාය හීනායාවත්‌තති. ඉදමස්‌ස උස්‌සාරණාය.
196. Puna caparaṃ idhekacco bhikkhu sahati rajaggaṃ sahati dhajaggaṃ, api ca kho ussāraṇaññeva sutvā saṃsīdati visīdati na santhambhati na sakkoti brahmacariyaṃ sandhāretuṃ, sikkhādubbalyaṃ āvikatvā sikkhaṃ paccakkhāya hīnāyāvattati. Kimassa ussāraṇāya? Idha bhikkhuṃ araññagataṃ vā rukkhamūlagataṃ vā suññāgāragataṃ vā mātugāmo upasaṅkamitvā ūhasati 16 ullapati ujjagghati uppaṇḍeti. So mātugāmena ūhasiyamāno ullapiyamāno ujjagghiyamāno uppaṇḍiyamāno saṃsīdati visīdati na santhambhati na sakkoti brahmacariyaṃ sandhāretuṃ, sikkhādubbalyaṃ āvikatvā sikkhaṃ paccakkhāya hīnāyāvattati. Idamassa ussāraṇāya.
සෙය්‍යථාපි සො යොධාජීවො සහති රජග්‌ගං සහති ධජග්‌ගං, අපි ච ඛො උස්‌සාරණඤ්‌ඤෙව සුත්‌වා සංසීදති විසීදති න සන්‌ථම්‌භති න සක්‌කොති සඞ්‌ගාමං ඔතරිතුං, තථූපමො අයං පුග්‌ගලො. එවරූපොපි ඉධෙකච්‌චො පුග්‌ගලො හොති. අයං තතියො යොධාජීවූපමො පුග්‌ගලො සන්‌තො සංවිජ්‌ජමානො භික්‌ඛූසු.
Seyyathāpi so yodhājīvo sahati rajaggaṃ sahati dhajaggaṃ, api ca kho ussāraṇaññeva sutvā saṃsīdati visīdati na santhambhati na sakkoti saṅgāmaṃ otarituṃ, tathūpamo ayaṃ puggalo. Evarūpopi idhekacco puggalo hoti. Ayaṃ tatiyo yodhājīvūpamo puggalo santo saṃvijjamāno bhikkhūsu.
197. පුන චපරං ඉධෙකච්‌චො භික්‌ඛු සහති රජග්‌ගං සහති ධජග්‌ගං සහති උස්‌සාරණං, අපි ච ඛො සම්‌පහාරෙ හඤ්‌ඤති බ්‍යාපජ්‌ජති. කිමස්‌ස සම්‌පහාරස්‌මිං? ඉධ භික්‌ඛුං අරඤ්‌ඤගතං වා රුක්‌ඛමූලගතං වා සුඤ්‌ඤාගාරගතං වා මාතුගාමො උපසඞ්‌කමිත්‌වා අභිනිසීදති අභිනිපජ්‌ජති අජ්‌ඣොත්‌ථරති. සො මාතුගාමෙන අභිනිසීදියමානො අභිනිපජ්‌ජියමානො අජ්‌ඣොත්‌ථරියමානො සික්‌ඛං අප්‌පච්‌චක්‌ඛාය දුබ්‌බල්‍යං අනාවිකත්‌වා මෙථුනං ධම්‌මං පටිසෙවති. ඉදමස්‌ස සම්‌පහාරස්‌මිං.
197. Puna caparaṃ idhekacco bhikkhu sahati rajaggaṃ sahati dhajaggaṃ sahati ussāraṇaṃ, api ca kho sampahāre haññati byāpajjati. Kimassa sampahārasmiṃ? Idha bhikkhuṃ araññagataṃ vā rukkhamūlagataṃ vā suññāgāragataṃ vā mātugāmo upasaṅkamitvā abhinisīdati abhinipajjati ajjhottharati. So mātugāmena abhinisīdiyamāno abhinipajjiyamāno ajjhotthariyamāno sikkhaṃ appaccakkhāya dubbalyaṃ anāvikatvā methunaṃ dhammaṃ paṭisevati. Idamassa sampahārasmiṃ.
සෙය්‍යථාපි සො යොධාජීවො සහති රජග්‌ගං සහති ධජග්‌ගං සහති උස්‌සාරණං, අපි ච ඛො සම්‌පහාරෙ හඤ්‌ඤති බ්‍යාපජ්‌ජති, තථූපමො අයං පුග්‌ගලො. එවරූපොපි ඉධෙකච්‌චො පුග්‌ගලො හොති. අයං චතුත්‌ථො යොධාජීවූපමො පුග්‌ගලො සන්‌තො සංවිජ්‌ජමානො භික්‌ඛූසු.
Seyyathāpi so yodhājīvo sahati rajaggaṃ sahati dhajaggaṃ sahati ussāraṇaṃ, api ca kho sampahāre haññati byāpajjati, tathūpamo ayaṃ puggalo. Evarūpopi idhekacco puggalo hoti. Ayaṃ catuttho yodhājīvūpamo puggalo santo saṃvijjamāno bhikkhūsu.
198. පුන චපරං ඉධෙකච්‌චො භික්‌ඛු සහති රජග්‌ගං සහති ධජග්‌ගං සහති උස්‌සාරණං සහති සම්‌පහාරං. සො තං සඞ්‌ගාමං අභිවිජිනිත්‌වා විජිතසඞ්‌ගාමො තමෙව සඞ්‌ගාමසීසං අජ්‌ඣාවසති. කිමස්‌ස සඞ්‌ගාමවිජයස්‌මිං? ඉධ භික්‌ඛුං අරඤ්‌ඤගතං වා රුක්‌ඛමූලගතං වා සුඤ්‌ඤාගාරගතං වා මාතුගාමො උපසඞ්‌කමිත්‌වා අභිනිසීදති අභිනිපජ්‌ජති අජ්‌ඣොත්‌ථරති. සො මාතුගාමෙන අභිනිසීදියමානො අභිනිපජ්‌ජියමානො අජ්‌ඣොත්‌ථරියමානො විනිවෙඨෙත්‌වා විනිමොචෙත්‌වා යෙන කාමං පක්‌කමති.
198. Puna caparaṃ idhekacco bhikkhu sahati rajaggaṃ sahati dhajaggaṃ sahati ussāraṇaṃ sahati sampahāraṃ. So taṃ saṅgāmaṃ abhivijinitvā vijitasaṅgāmo tameva saṅgāmasīsaṃ ajjhāvasati. Kimassa saṅgāmavijayasmiṃ? Idha bhikkhuṃ araññagataṃ vā rukkhamūlagataṃ vā suññāgāragataṃ vā mātugāmo upasaṅkamitvā abhinisīdati abhinipajjati ajjhottharati. So mātugāmena abhinisīdiyamāno abhinipajjiyamāno ajjhotthariyamāno viniveṭhetvā vinimocetvā yena kāmaṃ pakkamati.
සො විවිත්‌තං සෙනාසනං භජති අරඤ්‌ඤං රුක්‌ඛමූලං පබ්‌බතං කන්‌දරං ගිරිගුහං සුසානං වනපත්‌ථං අබ්‌භොකාසං පලාලපුඤ්‌ජං. සො අරඤ්‌ඤගතො වා රුක්‌ඛමූලගතො වා සුඤ්‌ඤාගාරගතො වා නිසීදති පල්‌ලඞ්‌කං ආභුජිත්‌වා උජුං කායං පණිධාය පරිමුඛං සතිං උපට්‌ඨපෙත්‌වා. සො අභිජ්‌ඣං ලොකෙ පහාය විගතාභිජ්‌ඣෙන චෙතසා විහරති, අභිජ්‌ඣාය චිත්‌තං පරිසොධෙති; බ්‍යාපාදපදොසං පහාය අබ්‍යාපන්‌නචිත්‌තො විහරති, සබ්‌බපාණභූතහිතානුකම්‌පී බ්‍යාපාදපදොසා චිත්‌තං පරිසොධෙති; ථිනමිද්‌ධං පහාය විගතථිනමිද්‌ධො විහරති ආලොකසඤ්‌ඤී සතො සම්‌පජානො, ථිනමිද්‌ධා චිත්‌තං පරිසොධෙති; උද්‌ධච්‌චකුක්‌කුච්‌චං පහාය අනුද්‌ධතො විහරති අජ්‌ඣත්‌තං වූපසන්‌තචිත්‌තො, උද්‌ධච්‌චකුක්‌කුච්‌චා චිත්‌තං පරිසොධෙති; විචිකිච්‌ඡං පහාය තිණ්‌ණවිචිකිච්‌ඡො විහරති අකථංකථී කුසලෙසු ධම්‌මෙසු, විචිකිච්‌ඡාය චිත්‌තං පරිසොධෙති.
So vivittaṃ senāsanaṃ bhajati araññaṃ rukkhamūlaṃ pabbataṃ kandaraṃ giriguhaṃ susānaṃ vanapatthaṃ abbhokāsaṃ palālapuñjaṃ. So araññagato vā rukkhamūlagato vā suññāgāragato vā nisīdati pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā. So abhijjhaṃ loke pahāya vigatābhijjhena cetasā viharati, abhijjhāya cittaṃ parisodheti; byāpādapadosaṃ pahāya abyāpannacitto viharati, sabbapāṇabhūtahitānukampī byāpādapadosā cittaṃ parisodheti; thinamiddhaṃ pahāya vigatathinamiddho viharati ālokasaññī sato sampajāno, thinamiddhā cittaṃ parisodheti; uddhaccakukkuccaṃ pahāya anuddhato viharati ajjhattaṃ vūpasantacitto, uddhaccakukkuccā cittaṃ parisodheti; vicikicchaṃ pahāya tiṇṇavicikiccho viharati akathaṃkathī kusalesu dhammesu, vicikicchāya cittaṃ parisodheti.
සො ඉමෙ පඤ්‌ච නීවරණෙ පහාය චෙතසො උපක්‌කිලෙසෙ පඤ්‌ඤාය දුබ්‌බලීකරණෙ විවිච්‌චෙව කාමෙහි විවිච්‌ච අකුසලෙහි ධම්‌මෙහි සවිතක්‌කං සවිචාරං විවෙකජං පීතිසුඛං පඨමං ඣානං උපසම්‌පජ්‌ජ විහරති; විතක්‌කවිචාරානං වූපසමා දුතියං ඣානං…පෙ.… තතියං ඣානං…පෙ.… චතුත්‌ථං ඣානං උපසම්‌පජ්‌ජ විහරති.
So ime pañca nīvaraṇe pahāya cetaso upakkilese paññāya dubbalīkaraṇe vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharati; vitakkavicārānaṃ vūpasamā dutiyaṃ jhānaṃ…pe… tatiyaṃ jhānaṃ…pe… catutthaṃ jhānaṃ upasampajja viharati.
සො එවං සමාහිතෙ චිත්‌තෙ පරිසුද්‌ධෙ පරියොදාතෙ අනඞ්‌ගණෙ විගතූපක්‌කිලෙසෙ මුදුභූතෙ කම්‌මනියෙ ඨිතෙ ආනෙඤ්‌ජප්‌පත්‌තෙ ආසවානං ඛයඤාණාය චිත්‌තං අභිනින්‌නාමෙති. සො ‘‘ඉදං දුක්‌ඛ’’න්‌ති යථාභූතං පජානාති, ‘‘අයං දුක්‌ඛසමුදයො’’ති යථාභූතං පජානාති, ‘‘අයං දුක්‌ඛනිරොධො’’ති යථාභූතං පජානාති, ‘‘අයං දුක්‌ඛනිරොධගාමිනී පටිපදා’’ති යථාභූතං පජානාති, ‘‘ඉමෙ ආසවා’’ති යථාභූතං පජානාති, ‘‘අයං ආසවසමුදයො’’ති යථාභූතං පජානාති , ‘‘අයං ආසවනිරොධො’’ති යථාභූතං පජානාති, ‘‘අයං ආසවනිරොධගාමිනී පටිපදා’’ති යථාභූතං පජානාති.
So evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte āsavānaṃ khayañāṇāya cittaṃ abhininnāmeti. So ‘‘idaṃ dukkha’’nti yathābhūtaṃ pajānāti, ‘‘ayaṃ dukkhasamudayo’’ti yathābhūtaṃ pajānāti, ‘‘ayaṃ dukkhanirodho’’ti yathābhūtaṃ pajānāti, ‘‘ayaṃ dukkhanirodhagāminī paṭipadā’’ti yathābhūtaṃ pajānāti, ‘‘ime āsavā’’ti yathābhūtaṃ pajānāti, ‘‘ayaṃ āsavasamudayo’’ti yathābhūtaṃ pajānāti , ‘‘ayaṃ āsavanirodho’’ti yathābhūtaṃ pajānāti, ‘‘ayaṃ āsavanirodhagāminī paṭipadā’’ti yathābhūtaṃ pajānāti.
තස්‌ස එවං ජානතො එවං පස්‌සතො කාමාසවාපි චිත්‌තං විමුච්‌චති, භවාසවාපි චිත්‌තං විමුච්‌චති, අවිජ්‌ජාසවාපි චිත්‌තං විමුච්‌චති. විමුත්‌තස්‌මිං විමුත්‌තමිති ඤාණං හොති. ‘‘ඛීණා ජාති, වුසිතං බ්‍රහ්‌මචරියං, කතං කරණීයං, නාපරං ඉත්‌ථත්‌තායා’’ති පජානාති. ඉදමස්‌ස සඞ්‌ගාමවිජයස්‌මිං. සෙය්‍යථාපි සො යොධාජීවො සහති රජග්‌ගං සහති ධජග්‌ගං සහති උස්‌සාරණං සහති සම්‌පහාරං, සො තං සඞ්‌ගාමං අභිවිජිනිත්‌වා විජිතසඞ්‌ගාමො තමෙව සඞ්‌ගාමසීසං අජ්‌ඣාවසති, තථූපමො අයං පුග්‌ගලො. එවරූපොපි ඉධෙකච්‌චො පුග්‌ගලො හොති. අයං පඤ්‌චමො යොධාජීවූපමො පුග්‌ගලො සන්‌තො සංවිජ්‌ජමානො භික්‌ඛූසු. ඉමෙ පඤ්‌ච යොධාජීවූපමා පුග්‌ගලා සන්‌තො සංවිජ්‌ජමානා භික්‌ඛූසු.
Tassa evaṃ jānato evaṃ passato kāmāsavāpi cittaṃ vimuccati, bhavāsavāpi cittaṃ vimuccati, avijjāsavāpi cittaṃ vimuccati. Vimuttasmiṃ vimuttamiti ñāṇaṃ hoti. ‘‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’’ti pajānāti. Idamassa saṅgāmavijayasmiṃ. Seyyathāpi so yodhājīvo sahati rajaggaṃ sahati dhajaggaṃ sahati ussāraṇaṃ sahati sampahāraṃ, so taṃ saṅgāmaṃ abhivijinitvā vijitasaṅgāmo tameva saṅgāmasīsaṃ ajjhāvasati, tathūpamo ayaṃ puggalo. Evarūpopi idhekacco puggalo hoti. Ayaṃ pañcamo yodhājīvūpamo puggalo santo saṃvijjamāno bhikkhūsu. Ime pañca yodhājīvūpamā puggalā santo saṃvijjamānā bhikkhūsu.
199. තත්‌ථ කතමෙ පඤ්‌ච පිණ්‌ඩපාතිකා? මන්‌දත්‌තා මොමූහත්‌තා පිණ්‌ඩපාතිකො හොති, පාපිච්‌ඡො ඉච්‌ඡාපකතො පිණ්‌ඩපාතිකො හොති, උම්‌මාදා චිත්‌තවික්‌ඛෙපා පිණ්‌ඩපාතිකො හොති, ‘‘වණ්‌ණිතං බුද්‌ධෙහි බුද්‌ධසාවකෙහී’’ති පිණ්‌ඩපාතිකො හොති, අපි ච අප්‌පිච්‌ඡතංයෙව 17 නිස්‌සාය සන්‌තුට්‌ඨිංයෙව නිස්‌සාය සල්‌ලෙඛංයෙව නිස්‌සාය ඉදමත්‌ථිතංයෙව 18 නිස්‌සාය පිණ්‌ඩපාතිකො හොති. තත්‍ර ය්‌වායං පිණ්‌ඩපාතිකො අප්‌පිච්‌ඡතංයෙව නිස්‌සාය සන්‌තුට්‌ඨිංයෙව නිස්‌සාය සල්‌ලෙඛංයෙව නිස්‌සාය ඉදමත්‌ථිතංයෙව නිස්‌සාය පිණ්‌ඩපාතිකො, අයං ඉමෙසං පඤ්‌චන්‌නං පිණ්‌ඩපාතිකානං අග්‌ගො ච සෙට්‌ඨො ච පාමොක්‌ඛො 19 ච උත්‌තමො ච පවරො ච.
199. Tattha katame pañca piṇḍapātikā? Mandattā momūhattā piṇḍapātiko hoti, pāpiccho icchāpakato piṇḍapātiko hoti, ummādā cittavikkhepā piṇḍapātiko hoti, ‘‘vaṇṇitaṃ buddhehi buddhasāvakehī’’ti piṇḍapātiko hoti, api ca appicchataṃyeva 20 nissāya santuṭṭhiṃyeva nissāya sallekhaṃyeva nissāya idamatthitaṃyeva 21 nissāya piṇḍapātiko hoti. Tatra yvāyaṃ piṇḍapātiko appicchataṃyeva nissāya santuṭṭhiṃyeva nissāya sallekhaṃyeva nissāya idamatthitaṃyeva nissāya piṇḍapātiko, ayaṃ imesaṃ pañcannaṃ piṇḍapātikānaṃ aggo ca seṭṭho ca pāmokkho 22 ca uttamo ca pavaro ca.
සෙය්‍යථාපි නාම ගවා ඛීරං, ඛීරම්‌හා දධි, දධිම්‌හා නවනීතං 23, නවනීතම්‌හා සප්‌පි, සප්‌පිම්‌හා සප්‌පිමණ්‌ඩො, සප්‌පිමණ්‌ඩං තත්‌ථ අග්‌ගමක්‌ඛායති; එවමෙවං ය්‌වායං පිණ්‌ඩපාතිකො අප්‌පිච්‌ඡතංයෙව නිස්‌සාය සන්‌තුට්‌ඨිංයෙව නිස්‌සාය සල්‌ලෙඛංයෙව නිස්‌සාය ඉදමත්‌ථිතංයෙව නිස්‌සාය පිණ්‌ඩපාතිකො හොති, අයං ඉමෙසං පඤ්‌චන්‌නං පිණ්‌ඩපාතිකානං අග්‌ගො ච සෙට්‌ඨො ච පාමොක්‌ඛො ච උත්‌තමො ච පවරො ච. ඉමෙ පඤ්‌ච පිණ්‌ඩපාතිකා.
Seyyathāpi nāma gavā khīraṃ, khīramhā dadhi, dadhimhā navanītaṃ 24, navanītamhā sappi, sappimhā sappimaṇḍo, sappimaṇḍaṃ tattha aggamakkhāyati; evamevaṃ yvāyaṃ piṇḍapātiko appicchataṃyeva nissāya santuṭṭhiṃyeva nissāya sallekhaṃyeva nissāya idamatthitaṃyeva nissāya piṇḍapātiko hoti, ayaṃ imesaṃ pañcannaṃ piṇḍapātikānaṃ aggo ca seṭṭho ca pāmokkho ca uttamo ca pavaro ca. Ime pañca piṇḍapātikā.
200. තත්‌ථ කතමෙ පඤ්‌ච ඛලුපච්‌ඡාභත්‌තිකා…පෙ.… පඤ්‌ච එකාසනිකා…පෙ.… පඤ්‌ච පංසුකූලිකා…පෙ.… පඤ්‌ච තෙචීවරිකා…පෙ.… පඤ්‌ච ආරඤ්‌ඤිකා…පෙ.… පඤ්‌ච රුක්‌ඛමූලිකා …පෙ.… පඤ්‌ච අබ්‌භොකාසිකා…පෙ.… පඤ්‌ච නෙසජ්‌ජිකා…පෙ.… පඤ්‌ච යථාසන්‌ථතිකා…පෙ.….
200. Tattha katame pañca khalupacchābhattikā…pe… pañca ekāsanikā…pe… pañca paṃsukūlikā…pe… pañca tecīvarikā…pe… pañca āraññikā…pe… pañca rukkhamūlikā …pe… pañca abbhokāsikā…pe… pañca nesajjikā…pe… pañca yathāsanthatikā…pe….
201. තත්‌ථ කතමෙ පඤ්‌ච සොසානිකා? මන්‌දත්‌තා මොමූහත්‌තා සොසානිකො හොති, පාපිච්‌ඡො ඉච්‌ඡාපකතො සොසානිකො හොති, උම්‌මාදා චිත්‌තවික්‌ඛෙපා සොසානිකො හොති, ‘‘වණ්‌ණිතං බුද්‌ධෙහි බුද්‌ධසාවකෙහී’’ති සොසානිකො හොති, අපි ච අප්‌පිච්‌ඡතංයෙව නිස්‌සාය සන්‌තුට්‌ඨිංයෙව නිස්‌සාය සල්‌ලෙඛංයෙව නිස්‌සාය ඉදමත්‌ථිතංයෙව නිස්‌සාය සොසානිකො හොති. තත්‍ර ය්‌වායං සොසානිකො අප්‌පිච්‌ඡතංයෙව නිස්‌සාය සන්‌තුට්‌ඨිංයෙව නිස්‌සාය සල්‌ලෙඛංයෙව නිස්‌සාය ඉදමත්‌ථිතංයෙව නිස්‌සාය සොසානිකො, අයං ඉමෙසං පඤ්‌චන්‌නං සොසානිකානං අග්‌ගො ච සෙට්‌ඨො ච පාමොක්‌ඛො ච උත්‌තමො ච පවරො ච.
201. Tattha katame pañca sosānikā? Mandattā momūhattā sosāniko hoti, pāpiccho icchāpakato sosāniko hoti, ummādā cittavikkhepā sosāniko hoti, ‘‘vaṇṇitaṃ buddhehi buddhasāvakehī’’ti sosāniko hoti, api ca appicchataṃyeva nissāya santuṭṭhiṃyeva nissāya sallekhaṃyeva nissāya idamatthitaṃyeva nissāya sosāniko hoti. Tatra yvāyaṃ sosāniko appicchataṃyeva nissāya santuṭṭhiṃyeva nissāya sallekhaṃyeva nissāya idamatthitaṃyeva nissāya sosāniko, ayaṃ imesaṃ pañcannaṃ sosānikānaṃ aggo ca seṭṭho ca pāmokkho ca uttamo ca pavaro ca.
සෙය්‍යථාපි නාම ගවා ඛීරං, ඛීරම්‌හා දධි, දධිම්‌හා නවනීතං, නවනීතම්‌හා සප්‌පි, සප්‌පිම්‌හා සප්‌පිමණ්‌ඩො, සප්‌පිමණ්‌ඩං තත්‌ථ අග්‌ගමක්‌ඛායති; එවමෙවං ය්‌වායං සොසානිකො අප්‌පිච්‌ඡතංයෙව නිස්‌සාය සන්‌තුට්‌ඨිංයෙව නිස්‌සාය සල්‌ලෙඛංයෙව නිස්‌සාය ඉදමත්‌ථිතංයෙව නිස්‌සාය සොසානිකො හොති, අයං ඉමෙසං පඤ්‌චන්‌නං සොසානිකානං අග්‌ගො ච සෙට්‌ඨො ච පාමොක්‌ඛො ච උත්‌තමො ච පවරො ච. ඉමෙ පඤ්‌ච සොසානිකා.
Seyyathāpi nāma gavā khīraṃ, khīramhā dadhi, dadhimhā navanītaṃ, navanītamhā sappi, sappimhā sappimaṇḍo, sappimaṇḍaṃ tattha aggamakkhāyati; evamevaṃ yvāyaṃ sosāniko appicchataṃyeva nissāya santuṭṭhiṃyeva nissāya sallekhaṃyeva nissāya idamatthitaṃyeva nissāya sosāniko hoti, ayaṃ imesaṃ pañcannaṃ sosānikānaṃ aggo ca seṭṭho ca pāmokkho ca uttamo ca pavaro ca. Ime pañca sosānikā.
පඤ්‌චකනිද්‌දෙසො.
Pañcakaniddeso.
Footnotes:
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 5. පඤ්‌චකනිද්‌දෙසවණ්‌ණනා • 5. Pañcakaniddesavaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 5. පඤ්‌චකනිද්‌දෙසවණ්‌ණනා • 5. Pañcakaniddesavaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 5. පඤ්‌චකනිද්‌දෙසවණ්‌ණනා • 5. Pañcakaniddesavaṇṇanā
