| Library / Tipiṭaka / д̇ибидага • Tipiṭaka / вимад̇ивинод̣̇аний-дийгаа • Vimativinodanī-ṭīkā |
бан̃жагаваараван̣н̣анаа
Pañcakavāravaṇṇanā
325. бан̃жагзсу аабужчид̇ваа жаарасса абхаавод̇и бин̣д̣абаад̇игасса ‘‘ниманд̇ид̇о сабхад̇д̇о’’д̇и имасса ан̇г̇асса абхааваа д̇зна сигкаабад̣̇зна д̇асса саб̣б̣ат̇аа анаабад̇д̇ийд̇и ад̇хиббааяо . сусаанам̣ нзд̇ваа буна аанийд̇аганд̇и сусаанз бзд̇агижжам̣ гад̇ваа нигканд̇зхи нхад̇ваа чад̣д̣ид̇аани нивад̇т̇абааруд̇авад̇т̇аани звам̣ вужжанд̇и.
325. Pañcakesu āpucchitvā cārassa abhāvoti piṇḍapātikassa ‘‘nimantito sabhatto’’ti imassa aṅgassa abhāvā tena sikkhāpadena tassa sabbathā anāpattīti adhippāyo . Susānaṃ netvā puna ānītakanti susāne petakiccaṃ katvā nikkhantehi nhatvā chaḍḍitāni nivatthapārutavatthāni evaṃ vuccanti.
баал̣ияам̣ бан̃жахаагаарзхийд̇и бан̃жахи авахааран̇г̇зхи. вад̇т̇уд̇о бана г̇аругалахугабхзд̣̇зна баарааж̇игат̇уллажжаяад̣̇уггадаани вуд̇д̇аани. ид̇т̇ибурисасам̣яог̇аад̣̇игам̣ гилзсасамуд̣̇аажаарахзд̇угам̣ бадибхаанажид̇д̇агаммам̣ наама. бан̃хаасахассам̣ бужчийд̇и самат̇авибассанаагаммадтаанзсу бан̃хаасахассам̣ саммаж̇ж̇ид̇ваа тид̇ам̣ д̣̇ахарам̣ бужчи. ид̇ароби д̣̇ахаро ад̇д̇ано г̇ад̇амаг̇г̇ад̇д̇аа саб̣б̣ам̣ виссаж̇ж̇зси, д̇зна т̇зро басийд̣̇и. вад̇д̇ам̣ барижчинд̣̇ийд̇и вад̇д̇ам̣ нидтаабзси. гим̣ д̇вам̣ аавусод̇иаад̣̇игам̣ т̇зро кийн̣аасаво саммаж̇ж̇анаанисам̣сам̣ саб̣б̣зсам̣ баагадам̣ гаад̇ум̣ авожаад̇и д̣̇адтаб̣б̣ам̣.
Pāḷiyaṃ pañcahākārehīti pañcahi avahāraṅgehi. Vatthuto pana garukalahukabhedena pārājikathullaccayadukkaṭāni vuttāni. Itthipurisasaṃyogādikaṃ kilesasamudācārahetukaṃ paṭibhānacittakammaṃ nāma. Pañhāsahassaṃ pucchīti samathavipassanākammaṭṭhānesu pañhāsahassaṃ sammajjitvā ṭhitaṃ daharaṃ pucchi. Itaropi daharo attano gatamaggattā sabbaṃ vissajjesi, tena thero pasīdi. Vattaṃ paricchindīti vattaṃ niṭṭhāpesi. Kiṃ tvaṃ āvusotiādikaṃ thero khīṇāsavo sammajjanānisaṃsaṃ sabbesaṃ pākaṭaṃ kātuṃ avocāti daṭṭhabbaṃ.
‘‘ж̇ан̣н̣угзхи бад̇идтааяа бад̣̇ажзд̇ияа’’нд̇и баатасзсо. жод̣̇анам̣ гаарзссаамийд̇и бхаг̇авад̇аа ад̇д̇аанам̣ жод̣̇аабзссаами, ад̇д̇аанам̣ ниг̇г̇ан̣хаабзссаамийд̇и ад̇т̇о.
‘‘Jaṇṇukehi patiṭṭhāya padacetiya’’nti pāṭhaseso. Codanaṃ kāressāmīti bhagavatā attānaṃ codāpessāmi, attānaṃ niggaṇhāpessāmīti attho.
зд̇д̇агам̣ г̇аяхуубаг̇анд̇и зд̇д̇агам̣ ад̇хигаран̣авуубасамад̇т̇ааяа г̇ахзд̇аб̣б̣аважананд̇и яат̇аа суд̇ваа вин̃н̃аад̇ум̣ саггод̇и, звам̣ ануг̇г̇ан̣ханд̇од̇и яож̇анаа. зд̇т̇а жа ‘‘ад̇д̇ано бхаасабарияанд̇ам̣ ануг̇г̇ахзд̇ваа барасса бхаасабарияанд̇ам̣ ануг̇г̇ахзд̇ваа’’д̇и згам̣, ‘‘ад̇хаммзна гарод̇ий’’д̇и згам̣, ‘‘аббадин̃н̃ааяаа’’д̇и зган̃жа гад̇ваа буримзхи д̣̇вийхи бан̃жан̇г̇аани взд̣̇ид̇аб̣б̣аани. вад̇т̇унд̇и мзт̇унаад̣̇ивийд̇иггамам̣. гат̇аанусанд̇хивинижчаяаануломасанд̇хивасзна вад̇т̇ум̣ на ж̇аанаад̇ийд̇и жод̣̇агзна ваа жуд̣̇ид̇агзна ваа вуд̇д̇агат̇аанусанд̇хинаа д̇зсам̣ важанабадиважанаануруубзна вад̣̇анд̇о гат̇аанусанд̇хинаа вад̇т̇ум̣ на ж̇аанаад̇и наама, д̇ан̃жа суд̇д̇авибхан̇г̇з винийд̇авад̇т̇усан̇каад̇зна винижчаяаануломзнзва вад̣̇анд̇о винижчаяаануломасанд̇хивасзна вад̇т̇ум̣ на ж̇аанаад̇и наама. н̃ад̇д̇игаммам̣ наама ход̇ийд̇и н̃ад̇д̇игаммам̣ нидтид̇ам̣ наама ход̇ийд̇и на ж̇аанаад̇ийд̇и самб̣анд̇хо. н̃ад̇д̇ияаа гаммаббад̇д̇од̇и н̃ад̇д̇ияаа нидтид̇ааяаби гаммаббад̇д̇о зва ход̇и. ануссааванадтаанз зва гаммам̣ нидтид̇ам̣ ход̇ийд̇и н̃ад̇д̇игаммам̣ нидтид̇ам̣ наама ход̇и, д̇ам̣ н̃ад̇д̇ияаа гааран̣ам̣ на ж̇аанаад̇ийд̇и ад̇т̇о.
Ettakaṃ gayhūpaganti ettakaṃ adhikaraṇavūpasamatthāya gahetabbavacananti yathā sutvā viññātuṃ sakkoti, evaṃ anuggaṇhantoti yojanā. Ettha ca ‘‘attano bhāsapariyantaṃ anuggahetvā parassa bhāsapariyantaṃ anuggahetvā’’ti ekaṃ, ‘‘adhammena karotī’’ti ekaṃ, ‘‘appaṭiññāyā’’ti ekañca katvā purimehi dvīhi pañcaṅgāni veditabbāni. Vatthunti methunādivītikkamaṃ. Kathānusandhivinicchayānulomasandhivasena vatthuṃ na jānātīti codakena vā cuditakena vā vuttakathānusandhinā tesaṃ vacanapaṭivacanānurūpena vadanto kathānusandhinā vatthuṃ na jānāti nāma, tañca suttavibhaṅge vinītavatthusaṅkhātena vinicchayānulomeneva vadanto vinicchayānulomasandhivasena vatthuṃ na jānāti nāma. Ñattikammaṃ nāma hotīti ñattikammaṃ niṭṭhitaṃ nāma hotīti na jānātīti sambandho. Ñattiyā kammappattoti ñattiyā niṭṭhitāyapi kammappatto eva hoti. Anussāvanaṭṭhāne eva kammaṃ niṭṭhitaṃ hotīti ñattikammaṃ niṭṭhitaṃ nāma hoti, taṃ ñattiyā kāraṇaṃ na jānātīti attho.
баал̣ияам̣ бан̃жа висуд̣̇д̇хияод̇и аабад̇д̇ид̇о висуд̣̇д̇хихзд̇уд̇д̇аа, висуд̣̇д̇хзхи гад̇д̇аб̣б̣ад̇о жа баад̇имогкуд̣̇д̣̇зсаа вуд̇д̇аа.
Pāḷiyaṃ pañca visuddhiyoti āpattito visuddhihetuttā, visuddhehi kattabbato ca pātimokkhuddesā vuttā.
бан̃жагаваараван̣н̣анаа нидтид̇аа.
Pañcakavāravaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / бариваарабаал̣и • Parivārapāḷi / 5. бан̃жагавааро • 5. Pañcakavāro
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / бариваара-адтагат̇аа • Parivāra-aṭṭhakathā / бан̃жагаваараван̣н̣анаа • Pañcakavāravaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / бан̃жагаваараван̣н̣анаа • Pañcakavāravaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / бан̃жагаваараван̣н̣анаа • Pañcakavāravaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / згуд̇д̇ариганаяо бан̃жагаваараван̣н̣анаа • Ekuttarikanayo pañcakavāravaṇṇanā
