| Library / Tipiṭaka / តិបិដក • Tipiṭaka / វិមតិវិនោទនី-ដីកា • Vimativinodanī-ṭīkā |
បញ្ចកវារវណ្ណនា
Pañcakavāravaṇṇanā
៣២៥. បញ្ចកេសុ អាបុច្ឆិត្វា ចារស្ស អភាវោតិ បិណ្ឌបាតិកស្ស ‘‘និមន្តិតោ សភត្តោ’’តិ ឥមស្ស អង្គស្ស អភាវា តេន សិក្ខាបទេន តស្ស សព្ពថា អនាបត្តីតិ អធិប្បាយោ ។ សុសានំ នេត្វា បុន អានីតកន្តិ សុសានេ បេតកិច្ចំ កត្វា និក្ខន្តេហិ ន្ហត្វា ឆឌ្ឌិតានិ និវត្ថបារុតវត្ថានិ ឯវំ វុច្ចន្តិ។
325. Pañcakesu āpucchitvā cārassa abhāvoti piṇḍapātikassa ‘‘nimantito sabhatto’’ti imassa aṅgassa abhāvā tena sikkhāpadena tassa sabbathā anāpattīti adhippāyo . Susānaṃ netvā puna ānītakanti susāne petakiccaṃ katvā nikkhantehi nhatvā chaḍḍitāni nivatthapārutavatthāni evaṃ vuccanti.
បាឡិយំ បញ្ចហាការេហីតិ បញ្ចហិ អវហារង្គេហិ។ វត្ថុតោ បន គរុកលហុកភេទេន បារាជិកថុល្លច្ចយទុក្កដានិ វុត្តានិ។ ឥត្ថិបុរិសសំយោគាទិកំ កិលេសសមុទាចារហេតុកំ បដិភានចិត្តកម្មំ នាម។ បញ្ហាសហស្សំ បុច្ឆីតិ សមថវិបស្សនាកម្មដ្ឋានេសុ បញ្ហាសហស្សំ សម្មជ្ជិត្វា ឋិតំ ទហរំ បុច្ឆិ។ ឥតរោបិ ទហរោ អត្តនោ គតមគ្គត្តា សព្ពំ វិស្សជ្ជេសិ, តេន ថេរោ បសីទិ។ វត្តំ បរិច្ឆិន្ទីតិ វត្តំ និដ្ឋាបេសិ។ កិំ ត្វំ អាវុសោតិអាទិកំ ថេរោ ខីណាសវោ សម្មជ្ជនានិសំសំ សព្ពេសំ បាកដំ កាតុំ អវោចាតិ ទដ្ឋព្ពំ។
Pāḷiyaṃ pañcahākārehīti pañcahi avahāraṅgehi. Vatthuto pana garukalahukabhedena pārājikathullaccayadukkaṭāni vuttāni. Itthipurisasaṃyogādikaṃ kilesasamudācārahetukaṃ paṭibhānacittakammaṃ nāma. Pañhāsahassaṃ pucchīti samathavipassanākammaṭṭhānesu pañhāsahassaṃ sammajjitvā ṭhitaṃ daharaṃ pucchi. Itaropi daharo attano gatamaggattā sabbaṃ vissajjesi, tena thero pasīdi. Vattaṃ paricchindīti vattaṃ niṭṭhāpesi. Kiṃ tvaṃ āvusotiādikaṃ thero khīṇāsavo sammajjanānisaṃsaṃ sabbesaṃ pākaṭaṃ kātuṃ avocāti daṭṭhabbaṃ.
‘‘ជណ្ណុកេហិ បតិដ្ឋាយ បទចេតិយ’’ន្តិ បាឋសេសោ។ ចោទនំ ការេស្សាមីតិ ភគវតា អត្តានំ ចោទាបេស្សាមិ, អត្តានំ និគ្គណ្ហាបេស្សាមីតិ អត្ថោ។
‘‘Jaṇṇukehi patiṭṭhāya padacetiya’’nti pāṭhaseso. Codanaṃ kāressāmīti bhagavatā attānaṃ codāpessāmi, attānaṃ niggaṇhāpessāmīti attho.
ឯត្តកំ គយ្ហូបគន្តិ ឯត្តកំ អធិករណវូបសមត្ថាយ គហេតព្ពវចនន្តិ យថា សុត្វា វិញ្ញាតុំ សក្កោតិ, ឯវំ អនុគ្គណ្ហន្តោតិ យោជនា។ ឯត្ថ ច ‘‘អត្តនោ ភាសបរិយន្តំ អនុគ្គហេត្វា បរស្ស ភាសបរិយន្តំ អនុគ្គហេត្វា’’តិ ឯកំ, ‘‘អធម្មេន ករោតី’’តិ ឯកំ, ‘‘អប្បដិញ្ញាយា’’តិ ឯកញ្ច កត្វា បុរិមេហិ ទ្វីហិ បញ្ចង្គានិ វេទិតព្ពានិ។ វត្ថុន្តិ មេថុនាទិវីតិក្កមំ។ កថានុសន្ធិវិនិច្ឆយានុលោមសន្ធិវសេន វត្ថុំ ន ជានាតីតិ ចោទកេន វា ចុទិតកេន វា វុត្តកថានុសន្ធិនា តេសំ វចនបដិវចនានុរូបេន វទន្តោ កថានុសន្ធិនា វត្ថុំ ន ជានាតិ នាម, តញ្ច សុត្តវិភង្គេ វិនីតវត្ថុសង្ខាតេន វិនិច្ឆយានុលោមេនេវ វទន្តោ វិនិច្ឆយានុលោមសន្ធិវសេន វត្ថុំ ន ជានាតិ នាម។ ញត្តិកម្មំ នាម ហោតីតិ ញត្តិកម្មំ និដ្ឋិតំ នាម ហោតីតិ ន ជានាតីតិ សម្ពន្ធោ។ ញត្តិយា កម្មប្បត្តោតិ ញត្តិយា និដ្ឋិតាយបិ កម្មប្បត្តោ ឯវ ហោតិ។ អនុស្សាវនដ្ឋានេ ឯវ កម្មំ និដ្ឋិតំ ហោតីតិ ញត្តិកម្មំ និដ្ឋិតំ នាម ហោតិ, តំ ញត្តិយា ការណំ ន ជានាតីតិ អត្ថោ។
Ettakaṃ gayhūpaganti ettakaṃ adhikaraṇavūpasamatthāya gahetabbavacananti yathā sutvā viññātuṃ sakkoti, evaṃ anuggaṇhantoti yojanā. Ettha ca ‘‘attano bhāsapariyantaṃ anuggahetvā parassa bhāsapariyantaṃ anuggahetvā’’ti ekaṃ, ‘‘adhammena karotī’’ti ekaṃ, ‘‘appaṭiññāyā’’ti ekañca katvā purimehi dvīhi pañcaṅgāni veditabbāni. Vatthunti methunādivītikkamaṃ. Kathānusandhivinicchayānulomasandhivasena vatthuṃ na jānātīti codakena vā cuditakena vā vuttakathānusandhinā tesaṃ vacanapaṭivacanānurūpena vadanto kathānusandhinā vatthuṃ na jānāti nāma, tañca suttavibhaṅge vinītavatthusaṅkhātena vinicchayānulomeneva vadanto vinicchayānulomasandhivasena vatthuṃ na jānāti nāma. Ñattikammaṃ nāma hotīti ñattikammaṃ niṭṭhitaṃ nāma hotīti na jānātīti sambandho. Ñattiyā kammappattoti ñattiyā niṭṭhitāyapi kammappatto eva hoti. Anussāvanaṭṭhāne eva kammaṃ niṭṭhitaṃ hotīti ñattikammaṃ niṭṭhitaṃ nāma hoti, taṃ ñattiyā kāraṇaṃ na jānātīti attho.
បាឡិយំ បញ្ច វិសុទ្ធិយោតិ អាបត្តិតោ វិសុទ្ធិហេតុត្តា, វិសុទ្ធេហិ កត្តព្ពតោ ច បាតិមោក្ខុទ្ទេសា វុត្តា។
Pāḷiyaṃ pañca visuddhiyoti āpattito visuddhihetuttā, visuddhehi kattabbato ca pātimokkhuddesā vuttā.
បញ្ចកវារវណ្ណនា និដ្ឋិតា។
Pañcakavāravaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / បរិវារបាឡិ • Parivārapāḷi / ៥. បញ្ចកវារោ • 5. Pañcakavāro
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / បរិវារ-អដ្ឋកថា • Parivāra-aṭṭhakathā / បញ្ចកវារវណ្ណនា • Pañcakavāravaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / បញ្ចកវារវណ្ណនា • Pañcakavāravaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / បញ្ចកវារវណ្ណនា • Pañcakavāravaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ឯកុត្តរិកនយោ បញ្ចកវារវណ្ណនា • Ekuttarikanayo pañcakavāravaṇṇanā
