| Library / Tipiṭaka / တိပိဋက • Tipiṭaka / ပရိဝာရ-အဋ္ဌကထာ • Parivāra-aṭṭhakathā |
ပဉ္စကဝာရဝဏ္ဏနာ
Pañcakavāravaṇṇanā
၃၂၅. ပဉ္စကေသု ပဉ္စ ပုဂ္ဂလာ နိယတာတိ အာနန္တရိယာနမေဝေတံ ဂဟဏံ။ ပဉ္စ ဆေဒနကာ အာပတ္တိယော နာမ ပမာဏာတိက္ကန္တေ မဉ္စပီဌေ နိသီဒနကဏ္ဍုပ္ပဋိစ္ဆာဒိဝသ္သိကသာဋိကာသု သုဂတစီဝရေ စ ဝေဒိတဗ္ဗာ။ ပဉ္စဟာကာရေဟီတိ အလဇ္ဇိတာ, အညာဏတာ, ကုက္ကုစ္စပ္ပကတတာ, အကပ္ပိယေ ကပ္ပိယသညိတာ, ကပ္ပိယေ အကပ္ပိယသညိတာတိ ဣမေဟိ ပဉ္စဟိ။ ပဉ္စ အာပတ္တိယော မုသာဝာဒပစ္စယာတိ ပာရာဇိကထုလ္လစ္စယဒုက္ကဋသင္ဃာဒိသေသပာစိတ္တိယာ။ အနာမန္တစာရောတိ ‘‘သန္တံ ဘိက္ခုံ အနာပုစ္ဆာ ပုရေဘတ္တံ ပစ္ဆာဘတ္တံ ကုလေသု စာရိတ္တံ အာပဇ္ဇေယ္ယာ’’တိ ဣမသ္သ အာပုစ္ဆိတ္ဝာ စာရသ္သ အဘာဝော။ အနဓိဋ္ဌာနန္တိ ‘‘ဂဏဘောဇနေ အညတ္ရ သမယာ’’တိ ဝုတ္တံ သမယံ အဓိဋ္ဌဟိတ္ဝာ ဘောဇနံ အဓိဋ္ဌာနံ နာမ; တထာ အကရဏံ အနဓိဋ္ဌာနံ။ အဝိကပ္ပနာ နာမ ယာ ပရမ္ပရဘောဇနေ ဝိကပ္ပနာ ဝုတ္တာ, တသ္သာ အကရဏံ။ ဣမာနိ ဟိ ပဉ္စ ပိဏ္ဍပာတိကသ္သ ဓုတင္ဂေနေဝ ပဋိက္ခိတ္တာနိ။ ဥသ္သင္ကိတပရိသင္ကိတောတိ ယေ ပသ္သန္တိ, ယေ သုဏန္တိ, တေဟိ ဥသ္သင္ကိတော စေဝ ပရိသင္ကိတော စ။ အပိ အကုပ္ပဓမ္မော ခီဏာသဝောပိ သမာနော, တသ္မာ အဂောစရာ ပရိဟရိတဗ္ဗာ။ န ဟိ ဧတေသု သန္ဒိသ္သမာနော အယသတော ဝာ ဂရဟတော ဝာ မုစ္စတိ။ သောသာနိကန္တိ သုသာနေ ပတိတကံ။ ပာပဏိကန္တိ အာပဏဒ္ဝာရေ ပတိတကံ။ ထူပစီဝရန္တိ ဝမ္မိကံ ပရိက္ခိပိတ္ဝာ ဗလိကမ္မကတံ။ အာဘိသေကိကန္တိ နဟာနဋ္ဌာနေ ဝာ ရညော အဘိသေကဋ္ဌာနေ ဝာ ဆဍ္ဍိတစီဝရံ။ ဘတပဋိယာဘတန္တိ သုသာနံ နေတ္ဝာ ပုန အာနီတကံ။ ပဉ္စ မဟာစောရာ ဥတ္တရိမနုသ္သဓမ္မေ ဝုတ္တာ။
325.Pañcakesupañca puggalā niyatāti ānantariyānamevetaṃ gahaṇaṃ. Pañca chedanakā āpattiyo nāma pamāṇātikkante mañcapīṭhe nisīdanakaṇḍuppaṭicchādivassikasāṭikāsu sugatacīvare ca veditabbā. Pañcahākārehīti alajjitā, aññāṇatā, kukkuccappakatatā, akappiye kappiyasaññitā, kappiye akappiyasaññitāti imehi pañcahi. Pañca āpattiyo musāvādapaccayāti pārājikathullaccayadukkaṭasaṅghādisesapācittiyā. Anāmantacāroti ‘‘santaṃ bhikkhuṃ anāpucchā purebhattaṃ pacchābhattaṃ kulesu cārittaṃ āpajjeyyā’’ti imassa āpucchitvā cārassa abhāvo. Anadhiṭṭhānanti ‘‘gaṇabhojane aññatra samayā’’ti vuttaṃ samayaṃ adhiṭṭhahitvā bhojanaṃ adhiṭṭhānaṃ nāma; tathā akaraṇaṃ anadhiṭṭhānaṃ. Avikappanā nāma yā paramparabhojane vikappanā vuttā, tassā akaraṇaṃ. Imāni hi pañca piṇḍapātikassa dhutaṅgeneva paṭikkhittāni. Ussaṅkitaparisaṅkitoti ye passanti, ye suṇanti, tehi ussaṅkito ceva parisaṅkito ca. Api akuppadhammo khīṇāsavopi samāno, tasmā agocarā pariharitabbā. Na hi etesu sandissamāno ayasato vā garahato vā muccati. Sosānikanti susāne patitakaṃ. Pāpaṇikanti āpaṇadvāre patitakaṃ. Thūpacīvaranti vammikaṃ parikkhipitvā balikammakataṃ. Ābhisekikanti nahānaṭṭhāne vā rañño abhisekaṭṭhāne vā chaḍḍitacīvaraṃ. Bhatapaṭiyābhatanti susānaṃ netvā puna ānītakaṃ. Pañca mahācorā uttarimanussadhamme vuttā.
ပဉ္စာပတ္တိယော ကာယတော သမုဋ္ဌန္တီတိ ပဌမေန အာပတ္တိသမုဋ္ဌာနေန ပဉ္စ အာပတ္တိယော အာပဇ္ဇတိ, ‘‘ဘိက္ခု ကပ္ပိယသညီ သညာစိကာယ ကုဋိံ ကရောတီ’’တိ ဧဝံ အန္တရပေယ္ယာလေ ဝုတ္တာပတ္တိယော။ ပဉ္စ အာပတ္တိယော ကာယတော စ ဝာစတော စာတိ တတိယေန အာပတ္တိသမုဋ္ဌာနေန ပဉ္စ အာပတ္တိယော အာပဇ္ဇတိ, ‘‘ဘိက္ခု ကပ္ပိယသညီ သံဝိဒဟိတ္ဝာ ကုဋိံ ကရောတီ’’တိ ဧဝံ တတ္ထေဝ ဝုတ္တာ အာပတ္တိယော။ ဒေသနာဂာမိနိယောတိ ဌပေတ္ဝာ ပာရာဇိကဉ္စ သင္ဃာဒိသေသဉ္စ အဝသေသာ။
Pañcāpattiyo kāyato samuṭṭhantīti paṭhamena āpattisamuṭṭhānena pañca āpattiyo āpajjati, ‘‘bhikkhu kappiyasaññī saññācikāya kuṭiṃ karotī’’ti evaṃ antarapeyyāle vuttāpattiyo. Pañca āpattiyo kāyato ca vācato cāti tatiyena āpattisamuṭṭhānena pañca āpattiyo āpajjati, ‘‘bhikkhu kappiyasaññī saṃvidahitvā kuṭiṃ karotī’’ti evaṃ tattheva vuttā āpattiyo. Desanāgāminiyoti ṭhapetvā pārājikañca saṅghādisesañca avasesā.
ပဉ္စ ကမ္မာနီတိ တဇ္ဇနီယနိယသ္သပဗ္ဗာဇနီယပဋိသာရဏီယာနိ စတ္တာရိ ဥက္ခေပနီယဉ္စ တိဝိဓမ္ပိ ဧကန္တိ ပဉ္စ။ ယာဝတတိယကေ ပဉ္စာတိ ဥက္ခိတ္တာနုဝတ္တိကာယ ဘိက္ခုနိယာ ယာဝတတိယံ သမနုဘာသနာယ အပ္ပဋိနိသ္သဇ္ဇန္တိယာ ပာရာဇိကံ ထုလ္လစ္စယံ ဒုက္ကဋန္တိ တိသ္သော , ဘေဒကာနုဝတ္တကာဒိသမနုဘာသနာသု သင္ဃာဒိသေသော, ပာပိကာယ ဒိဋ္ဌိယာ အပ္ပဋိနိသ္သဂ္ဂေ ပာစိတ္တိယံ။ အဒိန္နန္တိ အညေန အဒိန္နံ။ အဝိဒိတန္တိ ပဋိဂ္ဂဏ္ဟာမီတိ စေတနာယ အဘာဝေန အဝိဒိတံ။ အကပ္ပိယန္တိ ပဉ္စဟိ သမဏကပ္ပေဟိ အကပ္ပိယကတံ; ယံ ဝာ ပနညမ္ပိ အကပ္ပိယမံသံ အကပ္ပိယဘောဇနံ။ အကတာတိရိတ္တန္တိ ပဝာရေတ္ဝာ အတိရိတ္တံ အကတံ။ သမဇ္ဇဒာနန္တိ နဋသမဇ္ဇာဒိဒာနံ။ ဥသဘဒာနန္တိ ဂောဂဏသ္သ အန္တရေ ဥသဘဝိသ္သဇ္ဇနံ။ စိတ္တကမ္မဒာနန္တိ အာဝာသံ ကာရေတ္ဝာ တတ္ထ စိတ္တကမ္မံ ကာရေတုံ ဝဋ္ဋတိ။ ဣဒံ ပန ပဋိဘာနစိတ္တကမ္မဒာနံ သန္ဓာယ ဝုတ္တံ။ ဣမာနိ ဟိ ပဉ္စ ကိဉ္စာပိ လောကသ္သ ပုညသမ္မတာနိ, အထ ခော အပုညာနိ အကုသလာနိယေဝ ။ ဥပ္ပန္နံ ပဋိဘာနန္တိ ဧတ္ထ ပဋိဘာနန္တိ ကထေတုကမ္ယတာ ဝုစ္စတိ။ ဣမေ ပဉ္စ ဒုပ္ပဋိဝိနောဒယာတိ န သုပဋိဝိနောဒယာ; ဥပာယေန ပန ကာရဏေန အနုရူပာဟိ ပစ္စဝေက္ခနာအနုသာသနာဒီဟိ သက္ကာ ပဋိဝိနောဒေတုန္တိ အတ္ထော။
Pañca kammānīti tajjanīyaniyassapabbājanīyapaṭisāraṇīyāni cattāri ukkhepanīyañca tividhampi ekanti pañca. Yāvatatiyake pañcāti ukkhittānuvattikāya bhikkhuniyā yāvatatiyaṃ samanubhāsanāya appaṭinissajjantiyā pārājikaṃ thullaccayaṃ dukkaṭanti tisso , bhedakānuvattakādisamanubhāsanāsu saṅghādiseso, pāpikāya diṭṭhiyā appaṭinissagge pācittiyaṃ. Adinnanti aññena adinnaṃ. Aviditanti paṭiggaṇhāmīti cetanāya abhāvena aviditaṃ. Akappiyanti pañcahi samaṇakappehi akappiyakataṃ; yaṃ vā panaññampi akappiyamaṃsaṃ akappiyabhojanaṃ. Akatātirittanti pavāretvā atirittaṃ akataṃ. Samajjadānanti naṭasamajjādidānaṃ. Usabhadānanti gogaṇassa antare usabhavissajjanaṃ. Cittakammadānanti āvāsaṃ kāretvā tattha cittakammaṃ kāretuṃ vaṭṭati. Idaṃ pana paṭibhānacittakammadānaṃ sandhāya vuttaṃ. Imāni hi pañca kiñcāpi lokassa puññasammatāni, atha kho apuññāni akusalāniyeva . Uppannaṃ paṭibhānanti ettha paṭibhānanti kathetukamyatā vuccati. Ime pañca duppaṭivinodayāti na supaṭivinodayā; upāyena pana kāraṇena anurūpāhi paccavekkhanāanusāsanādīhi sakkā paṭivinodetunti attho.
သကစိတ္တံ ပသီဒတီတိ ဧတ္ထ ဣမာနိ ဝတ္ထူနိ – ကဋအန္ဓကာရဝာသီ ဖုသ္သဒေဝတ္ထေရော ကိရ စေတိယင္ဂဏံ သမ္မဇ္ဇိတ္ဝာ ဧကံသံ ဥတ္တရာသင္ဂံ ကရိတ္ဝာ သိန္ဒုဝာရကုသုမသန္ထတမိဝ သမဝိပ္ပကိဏ္ဏဝာလိကံ စေတိယင္ဂဏံ ဩလောကေန္တော ဗုဒ္ဓာရမ္မဏံ ပီတိပာမောဇ္ဇံ ဥပ္ပာဒေတ္ဝာ အဋ္ဌာသိ။ တသ္မိံ ခဏေ မာရော ပဗ္ဗတပာဒေ နိဗ္ဗတ္တကာဠမက္ကဋော ဝိယ ဟုတ္ဝာ စေတိယင္ဂဏေ ဂောမယံ ဝိပ္ပကိရန္တော ဂတော။ ထေရော နာသက္ခိ အရဟတ္တံ ပာပုဏိတုံ, သမ္မဇ္ဇိတ္ဝာ အဂမာသိ။ ဒုတိယဒိဝသေပိ ဇရဂ္ဂဝော ဟုတ္ဝာ တာဒိသမေဝ ဝိပ္ပကာရံ အကာသိ။ တတိယဒိဝသေ ဝင္ကပာဒံ မနုသ္သတ္တဘာဝံ နိမ္မိနိတ္ဝာ ပာဒေန ပရိကသန္တော အဂမာသိ။ ထေရော ‘‘ဧဝရူပော ဗီဘစ္ဆပုရိသော သမန္တာ ယောဇနပ္ပမာဏေသု ဂောစရဂာမေသု နတ္ထိ, သိယာ နု ခော မာရော’’တိ စိန္တေတ္ဝာ ‘‘မာရောသိ တ္ဝ’’န္တိ အာဟ။ ‘‘အာမ, ဘန္တေ, မာရောမ္ဟိ, န ဒာနိ တေ ဝဉ္စေတုံ အသက္ခိ’’န္တိ။ ‘‘ဒိဋ္ဌပုဗ္ဗော တယာ တထာဂတော’’တိ? ‘‘အာမ, ဒိဋ္ဌပုဗ္ဗော’’တိ။ ‘‘မာရော နာမ မဟာနုဘာဝော ဟောတိ, ဣင္ဃ တာဝ ဗုဒ္ဓသ္သ ဘဂဝတော အတ္တဘာဝသဒိသံ အတ္တဘာဝံ နိမ္မိနာဟီ’’တိ? ‘‘န သက္ကာ, ဘန္တေ, တာဒိသံ ရူပံ နိမ္မိနိတုံ; အပိစ ခော ပန တံသရိက္ခကံ ပတိရူပကံ နိမ္မိနိသ္သာမီ’’တိ သကဘာဝံ ဝိဇဟိတ္ဝာ ဗုဒ္ဓရူပသဒိသေန အတ္တဘာဝေန အဋ္ဌာသိ ။ ထေရော မာရံ ဩလောကေတ္ဝာ ‘‘အယံ တာဝ သရာဂဒောသမောဟော ဧဝံ သောဘတိ, ကထံ နု ခော ဘဂဝာ န သောဘတိ သဗ္ဗသော ဝီတရာဂဒောသမောဟော’’တိ ဗုဒ္ဓာရမ္မဏံ ပီတိံ ပဋိလဘိတ္ဝာ ဝိပသ္သနံ ဝဍ္ဎေတ္ဝာ အရဟတ္တံ ပာပုဏိ။ မာရော ‘‘ဝဉ္စိတောမ္ဟိ တယာ, ဘန္တေ’’တိ အာဟ။ ထေရောပိ ‘‘ကိံ အတ္ထိ ဇရမာရ, တာဒိသံ ဝဉ္စေတု’’န္တိ အာဟ။ လောကန္တရဝိဟာရေပိ ဒတ္တော နာမ ဒဟရဘိက္ခု စေတိယင္ဂဏံ သမ္မဇ္ဇိတ္ဝာ ဩလောကေန္တော ဩဒာတကသိဏံ ပဋိလဘိ။ အဋ္ဌ သမာပတ္တိယော နိဗ္ဗတ္တေသိ။ တတော ဝိပသ္သနံ ဝဍ္ဎေတ္ဝာ ဖလတ္တယံ သစ္ဆာကာသိ။
Sakacittaṃ pasīdatīti ettha imāni vatthūni – kaṭaandhakāravāsī phussadevatthero kira cetiyaṅgaṇaṃ sammajjitvā ekaṃsaṃ uttarāsaṅgaṃ karitvā sinduvārakusumasanthatamiva samavippakiṇṇavālikaṃ cetiyaṅgaṇaṃ olokento buddhārammaṇaṃ pītipāmojjaṃ uppādetvā aṭṭhāsi. Tasmiṃ khaṇe māro pabbatapāde nibbattakāḷamakkaṭo viya hutvā cetiyaṅgaṇe gomayaṃ vippakiranto gato. Thero nāsakkhi arahattaṃ pāpuṇituṃ, sammajjitvā agamāsi. Dutiyadivasepi jaraggavo hutvā tādisameva vippakāraṃ akāsi. Tatiyadivase vaṅkapādaṃ manussattabhāvaṃ nimminitvā pādena parikasanto agamāsi. Thero ‘‘evarūpo bībhacchapuriso samantā yojanappamāṇesu gocaragāmesu natthi, siyā nu kho māro’’ti cintetvā ‘‘mārosi tva’’nti āha. ‘‘Āma, bhante, māromhi, na dāni te vañcetuṃ asakkhi’’nti. ‘‘Diṭṭhapubbo tayā tathāgato’’ti? ‘‘Āma, diṭṭhapubbo’’ti. ‘‘Māro nāma mahānubhāvo hoti, iṅgha tāva buddhassa bhagavato attabhāvasadisaṃ attabhāvaṃ nimmināhī’’ti? ‘‘Na sakkā, bhante, tādisaṃ rūpaṃ nimminituṃ; apica kho pana taṃsarikkhakaṃ patirūpakaṃ nimminissāmī’’ti sakabhāvaṃ vijahitvā buddharūpasadisena attabhāvena aṭṭhāsi . Thero māraṃ oloketvā ‘‘ayaṃ tāva sarāgadosamoho evaṃ sobhati, kathaṃ nu kho bhagavā na sobhati sabbaso vītarāgadosamoho’’ti buddhārammaṇaṃ pītiṃ paṭilabhitvā vipassanaṃ vaḍḍhetvā arahattaṃ pāpuṇi. Māro ‘‘vañcitomhi tayā, bhante’’ti āha. Theropi ‘‘kiṃ atthi jaramāra, tādisaṃ vañcetu’’nti āha. Lokantaravihārepi datto nāma daharabhikkhu cetiyaṅgaṇaṃ sammajjitvā olokento odātakasiṇaṃ paṭilabhi. Aṭṭha samāpattiyo nibbattesi. Tato vipassanaṃ vaḍḍhetvā phalattayaṃ sacchākāsi.
ပရစိတ္တံ ပသီဒတီတိ ဧတ္ထ ဣမာနိ ဝတ္ထူနိ – တိသ္သော နာမ ဒဟရဘိက္ခု ဇမ္ဗုကောလစေတိယင္ဂဏံ သမ္မဇ္ဇိတ္ဝာ သင္ကာရဆဍ္ဍနိံ ဟတ္ထေန ဂဟေတ္ဝာဝ အဋ္ဌာသိ ။ တသ္မိံ ခဏေ တိသ္သဒတ္တတ္ထေရော နာမ နာဝာတော ဩရုယ္ဟ စေတိယင္ဂဏံ ဩလောကေန္တော ဘာဝိတစိတ္တေန သမ္မဋ္ဌဋ္ဌာနန္တိ ဉတ္ဝာ ပဉ္ဟာသဟသ္သံ ပုစ္ဆိ, ဣတရော သဗ္ဗံ ဝိသ္သဇ္ဇေသိ။ အညတရသ္မိမ္ပိ ဝိဟာရေ ထေရော စေတိယင္ဂဏံ သမ္မဇ္ဇိတ္ဝာ ဝတ္တံ ပရိစ္ဆိန္ဒိ။ ယောနကဝိသယတော စေတိယဝန္ဒကာ စတ္တာရော ထေရာ အာဂန္တ္ဝာ စေတိယင္ဂဏံ ဒိသ္ဝာ အန္တော အပ္ပဝိသိတ္ဝာ ဒ္ဝာရေယေဝ ဌတ္ဝာ ဧကော ထေရော အဋ္ဌ ကပ္ပေ အနုသ္သရိ, ဧကော သောဠသ, ဧကော ဝီသတိ, ဧကော တိံသ ကပ္ပေ အနုသ္သရိ။
Paracittaṃpasīdatīti ettha imāni vatthūni – tisso nāma daharabhikkhu jambukolacetiyaṅgaṇaṃ sammajjitvā saṅkārachaḍḍaniṃ hatthena gahetvāva aṭṭhāsi . Tasmiṃ khaṇe tissadattatthero nāma nāvāto oruyha cetiyaṅgaṇaṃ olokento bhāvitacittena sammaṭṭhaṭṭhānanti ñatvā pañhāsahassaṃ pucchi, itaro sabbaṃ vissajjesi. Aññatarasmimpi vihāre thero cetiyaṅgaṇaṃ sammajjitvā vattaṃ paricchindi. Yonakavisayato cetiyavandakā cattāro therā āgantvā cetiyaṅgaṇaṃ disvā anto appavisitvā dvāreyeva ṭhatvā eko thero aṭṭha kappe anussari, eko soḷasa, eko vīsati, eko tiṃsa kappe anussari.
ဒေဝတာ အတ္တမနာ ဟောန္တီတိ ဧတ္ထ ဣဒံ ဝတ္ထု – ဧကသ္မိံ ကိရ ဝိဟာရေ ဧကော ဘိက္ခု စေတိယင္ဂဏဉ္စ ဗောဓိယင္ဂဏဉ္စ သမ္မဇ္ဇိတ္ဝာ နဟာယိတုံ ဂတော။ ဒေဝတာ ‘‘ဣမသ္သ ဝိဟာရသ္သ ကတကာလတော ပဋ္ဌာယ ဧဝံ ဝတ္တံ ပူရေတ္ဝာ သမ္မဋ္ဌပုဗ္ဗော ဘိက္ခု နတ္ထီ’’တိ ပသန္နစိတ္တာ ပုပ္ဖဟတ္ထာ အဋ္ဌံသု။ ထေရော အာဂန္တ္ဝာ ‘‘ကတရဂာမဝာသိကာတ္ထာ’’တိ အာဟ။ ‘‘ဘန္တေ, ဣဓေဝ ဝသာမ, ဣမသ္သ ဝိဟာရသ္သ ကတကာလတော ပဋ္ဌာယ ဧဝံ ဝတ္တံ ပူရေတ္ဝာ သမ္မဋ္ဌပုဗ္ဗော ဘိက္ခု နတ္ထီတိ တုမ္ဟာကံ, ဘန္တေ, ဝတ္တေ ပသီဒိတ္ဝာ ပုပ္ဖဟတ္ထာ ဌိတာမ္ဟာ’’တိ ဒေဝတာ အာဟံသု။
Devatā attamanā hontīti ettha idaṃ vatthu – ekasmiṃ kira vihāre eko bhikkhu cetiyaṅgaṇañca bodhiyaṅgaṇañca sammajjitvā nahāyituṃ gato. Devatā ‘‘imassa vihārassa katakālato paṭṭhāya evaṃ vattaṃ pūretvā sammaṭṭhapubbo bhikkhu natthī’’ti pasannacittā pupphahatthā aṭṭhaṃsu. Thero āgantvā ‘‘kataragāmavāsikātthā’’ti āha. ‘‘Bhante, idheva vasāma, imassa vihārassa katakālato paṭṭhāya evaṃ vattaṃ pūretvā sammaṭṭhapubbo bhikkhu natthīti tumhākaṃ, bhante, vatte pasīditvā pupphahatthā ṭhitāmhā’’ti devatā āhaṃsu.
ပာသာဒိကသံဝတ္တနိကန္တိ ဧတ္ထ ဣဒံ ဝတ္ထု – ဧကံ ကိရ အမစ္စပုတ္တံ အဘယတ္ထေရဉ္စ အာရဗ္ဘ အယံ ကထာ ဥဒပာဒိ ‘‘ကိံ နု ခော အမစ္စပုတ္တော ပာသာဒိကော, အဘယတ္ထေရောတိ ဥဘောပိ နေ ဧကသ္မိံ ဌာနေ ဩလောကေသ္သာမာ’’တိ။ ဉာတကာ အမစ္စပုတ္တံ အလင္ကရိတ္ဝာ မဟာစေတိယံ ဝန္ဒာပေသ္သာမာတိ အဂမံသု။ ထေရမာတာပိ ပာသာဒိကံ စီဝရံ ကာရေတ္ဝာ ပုတ္တသ္သ ပဟိဏိ, ‘‘ပုတ္တော မေ ကေသေ ဆိန္ဒာပေတ္ဝာ ဣမံ စီဝရံ ပာရုပိတ္ဝာ ဘိက္ခုသင္ဃပရိဝုတော မဟာစေတိယံ ဝန္ဒတူ’’တိ။ အမစ္စပုတ္တော ဉာတိပရိဝုတော ပာစီနဒ္ဝာရေန စေတိယင္ဂဏံ အာရုဠ္ဟော, အဘယတ္ထေရော ဘိက္ခုသင္ဃပရိဝုတော ဒက္ခိဏဒ္ဝာရေန စေတိယင္ဂဏံ အာရုဟိတ္ဝာ စေတိယင္ဂဏေ တေန သဒ္ဓိံ သမာဂန္တ္ဝာ အာဟ – ‘‘ကိံ တ္ဝံ, အာဝုသော, မဟလ္လကတ္ထေရသ္သ သမ္မဋ္ဌဋ္ဌာနေ ကစဝရံ ဆဍ္ဍေတ္ဝာ မယာ သဒ္ဓိံ ယုဂဂ္ဂာဟံ ဂဏ္ဟာသီ’’တိ။ အတီတတ္တဘာဝေ ကိရ အဘယတ္ထေရော မဟလ္လကတ္ထေရော နာမ ဟုတ္ဝာ ဂောစရဂာမေ စေတိယင္ဂဏံ သမ္မဇ္ဇိ, အမစ္စပုတ္တော မဟာဥပာသကော ဟုတ္ဝာ သမ္မဋ္ဌဋ္ဌာနေ ကစဝရံ ဂဟေတ္ဝာ ဆဍ္ဍေသိ။
Pāsādikasaṃvattanikanti ettha idaṃ vatthu – ekaṃ kira amaccaputtaṃ abhayattherañca ārabbha ayaṃ kathā udapādi ‘‘kiṃ nu kho amaccaputto pāsādiko, abhayattheroti ubhopi ne ekasmiṃ ṭhāne olokessāmā’’ti. Ñātakā amaccaputtaṃ alaṅkaritvā mahācetiyaṃ vandāpessāmāti agamaṃsu. Theramātāpi pāsādikaṃ cīvaraṃ kāretvā puttassa pahiṇi, ‘‘putto me kese chindāpetvā imaṃ cīvaraṃ pārupitvā bhikkhusaṅghaparivuto mahācetiyaṃ vandatū’’ti. Amaccaputto ñātiparivuto pācīnadvārena cetiyaṅgaṇaṃ āruḷho, abhayatthero bhikkhusaṅghaparivuto dakkhiṇadvārena cetiyaṅgaṇaṃ āruhitvā cetiyaṅgaṇe tena saddhiṃ samāgantvā āha – ‘‘kiṃ tvaṃ, āvuso, mahallakattherassa sammaṭṭhaṭṭhāne kacavaraṃ chaḍḍetvā mayā saddhiṃ yugaggāhaṃ gaṇhāsī’’ti. Atītattabhāve kira abhayatthero mahallakatthero nāma hutvā gocaragāme cetiyaṅgaṇaṃ sammajji, amaccaputto mahāupāsako hutvā sammaṭṭhaṭṭhāne kacavaraṃ gahetvā chaḍḍesi.
သတ္ထုသာသနံ ကတံ ဟောတီတိ ဣဒံ သမ္မဇ္ဇနဝတ္တံ နာမ ဗုဒ္ဓေဟိ ဝဏ္ဏိတံ, တသ္မာ တံ ကရောန္တေန သတ္ထုသာသနံ ကတံ ဟောတိ။ တတ္ရိဒံ ဝတ္ထု – အာယသ္မာ ကိရ သာရိပုတ္တော ဟိမဝန္တံ ဂန္တ္ဝာ ဧကသ္မိံ ပဗ္ဘာရေ အသမ္မဇ္ဇိတ္ဝာဝ နိရောဓံ သမာပဇ္ဇိတ္ဝာ နိသီဒိ။ ဘဂဝာ အာဝဇ္ဇန္တော ထေရသ္သ အသမ္မဇ္ဇိတ္ဝာ နိသိန္နဘာဝံ ဉတ္ဝာ အာကာသေန ဂန္တ္ဝာ ထေရသ္သ ပုရတော အသမ္မဋ္ဌဋ္ဌာနေ ပာဒာနိ ဒသ္သေတ္ဝာ ပစ္စာဂဉ္ဆိ။ ထေရော သမာပတ္တိတော ဝုဋ္ဌိတော ဘဂဝတော ပာဒာနိ ဒိသ္ဝာ ဗလဝဟိရောတ္တပ္ပံ ပစ္စုပဋ္ဌာပေတ္ဝာ ဇဏ္ဏုကေဟိ ပတိဋ္ဌာယ ‘‘အသမ္မဇ္ဇိတ္ဝာ နိသိန္နဘာဝံ ဝတ မေ သတ္ထာ အညာသိ, သင္ဃမဇ္ဈေ ဒာနိ စောဒနံ ကာရေသ္သာမီ’’တိ ဒသဗလသ္သ သန္တိကံ ဂန္တ္ဝာ ဝန္ဒိတ္ဝာ နိသီဒိ။ ဘဂဝာ ‘‘ကုဟိံ ဂတောသိ, သာရိပုတ္တာ’’တိ ဝတ္ဝာ ‘‘န ပတိရူပံ ဒာနိ တေ မယ္ဟံ အနန္တရေ ဌာနေ ဌတ္ဝာ ဝိစရန္တသ္သ အသမ္မဇ္ဇိတ္ဝာ နိသီဒိတု’’န္တိ အာဟ။ တတော ပဋ္ဌာယ ထေရော ဂဏ္ဌိကပဋိမုဉ္စနဋ္ဌာနေပိ တိဋ္ဌန္တော ပာဒေန ကစဝရံ ဝိယူဟိတ္ဝာဝ တိဋ္ဌတိ။
Satthusāsanaṃ kataṃ hotīti idaṃ sammajjanavattaṃ nāma buddhehi vaṇṇitaṃ, tasmā taṃ karontena satthusāsanaṃ kataṃ hoti. Tatridaṃ vatthu – āyasmā kira sāriputto himavantaṃ gantvā ekasmiṃ pabbhāre asammajjitvāva nirodhaṃ samāpajjitvā nisīdi. Bhagavā āvajjanto therassa asammajjitvā nisinnabhāvaṃ ñatvā ākāsena gantvā therassa purato asammaṭṭhaṭṭhāne pādāni dassetvā paccāgañchi. Thero samāpattito vuṭṭhito bhagavato pādāni disvā balavahirottappaṃ paccupaṭṭhāpetvā jaṇṇukehi patiṭṭhāya ‘‘asammajjitvā nisinnabhāvaṃ vata me satthā aññāsi, saṅghamajjhe dāni codanaṃ kāressāmī’’ti dasabalassa santikaṃ gantvā vanditvā nisīdi. Bhagavā ‘‘kuhiṃ gatosi, sāriputtā’’ti vatvā ‘‘na patirūpaṃ dāni te mayhaṃ anantare ṭhāne ṭhatvā vicarantassa asammajjitvā nisīditu’’nti āha. Tato paṭṭhāya thero gaṇṭhikapaṭimuñcanaṭṭhānepi tiṭṭhanto pādena kacavaraṃ viyūhitvāva tiṭṭhati.
အတ္တနော ဘာသပရိယန္တံ န ဥဂ္ဂဏ္ဟာတီတိ ‘‘ဣမသ္မိံ ဝတ္ထုသ္မိံ ဧတ္တကံ သုတ္တံ ဥပလဗ္ဘတိ, ဧတ္တကော ဝိနိစ္ဆယော, ဧတ္တကံ သုတ္တဉ္စ ဝိနိစ္ဆယဉ္စ ဝက္ခာမီ’’တိ ဧဝံ အတ္တနော ဘာသပရိယန္တံ န ဥဂ္ဂဏ္ဟာတိ။ ‘‘အယံ စောဒကသ္သ ပုရိမကထာ, အယံ ပစ္ဆိမကထာ, အယံ စုဒိတကသ္သ ပုရိမကထာ, အယံ ပစ္ဆိမကထာ, ဧတ္တကံ ဂယ္ဟူပဂံ, ဧတ္တကံ န ဂယ္ဟူပဂ’’န္တိ ဧဝံ အနုဂ္ဂဏ္ဟန္တော ပန ပရသ္သ ဘာသပရိယန္တံ န ဥဂ္ဂဏ္ဟာတိ နာမ။ အာပတ္တိံ န ဇာနာတီတိ ပာရာဇိကံ ဝာ သင္ဃာဒိသေသံ ဝာတိ သတ္တန္နံ အာပတ္တိက္ခန္ဓာနံ နာနာကရဏံ န ဇာနာတိ။ မူလန္တိ ဒ္ဝေ အာပတ္တိယာ မူလာနိ ကာယော စ ဝာစာ စ, တာနိ န ဇာနာတိ။ သမုဒယန္တိ ဆ အာပတ္တိသမုဋ္ဌာနာနိ အာပတ္တိသမုဒယော နာမ, တာနိ န ဇာနာတိ။ ပာရာဇိကာဒီနံ ဝတ္ထုံ န ဇာနာတီတိပိ ဝုတ္တံ ဟောတိ။ နိရောဓန္တိ အယံ အာပတ္တိ ဒေသနာယ နိရုဇ္ဈတိ, ဝူပသမ္မတိ, အယံ ဝုဋ္ဌာနေနာတိ ဧဝံ အာပတ္တိနိရောဓံ န ဇာနာတိ။ သတ္တ သမထေ အဇာနန္တော ပန အာပတ္တိနိရောဓဂာမိနိပဋိပဒံ န ဇာနာတိ။
Attano bhāsapariyantaṃ na uggaṇhātīti ‘‘imasmiṃ vatthusmiṃ ettakaṃ suttaṃ upalabbhati, ettako vinicchayo, ettakaṃ suttañca vinicchayañca vakkhāmī’’ti evaṃ attano bhāsapariyantaṃ na uggaṇhāti. ‘‘Ayaṃ codakassa purimakathā, ayaṃ pacchimakathā, ayaṃ cuditakassa purimakathā, ayaṃ pacchimakathā, ettakaṃ gayhūpagaṃ, ettakaṃ na gayhūpaga’’nti evaṃ anuggaṇhanto pana parassa bhāsapariyantaṃ na uggaṇhāti nāma. Āpattiṃ na jānātīti pārājikaṃ vā saṅghādisesaṃ vāti sattannaṃ āpattikkhandhānaṃ nānākaraṇaṃ na jānāti. Mūlanti dve āpattiyā mūlāni kāyo ca vācā ca, tāni na jānāti. Samudayanti cha āpattisamuṭṭhānāni āpattisamudayo nāma, tāni na jānāti. Pārājikādīnaṃ vatthuṃ na jānātītipi vuttaṃ hoti. Nirodhanti ayaṃ āpatti desanāya nirujjhati, vūpasammati, ayaṃ vuṭṭhānenāti evaṃ āpattinirodhaṃ na jānāti. Satta samathe ajānanto pana āpattinirodhagāminipaṭipadaṃ na jānāti.
အဓိကရဏပဉ္စကေ အဓိကရဏံ နာမ စတ္တာရိ အဓိကရဏာနိ။ အဓိကရဏသ္သ မူလံ နာမ တေတ္တိံသ မူလာနိ – ဝိဝာဒာဓိကရဏသ္သ ဒ္ဝာဒသ မူလာနိ, အနုဝာဒာဓိကရဏသ္သ စုဒ္ဒသ, အာပတ္တာဓိကရဏသ္သ ဆ, ကိစ္စာဓိကရဏသ္သ ဧကံ; တာနိ ပရတော အာဝိ ဘဝိသ္သန္တိ။ အဓိကရဏသမုဒယော နာမ အဓိကရဏသမုဋ္ဌာနံ။ ဝိဝာဒာဓိကရဏံ အဋ္ဌာရသ ဘေဒကရဝတ္ထူနိ နိသ္သာယ ဥပ္ပဇ္ဇတိ; အနုဝာဒာဓိကရဏံ စတသ္သော ဝိပတ္တိယော; အာပတ္တာဓိကရဏံ သတ္တာပတ္တိက္ခန္ဓေ; ကိစ္စာဓိကရဏံ စတ္တာရိ သင္ဃကိစ္စာနီတိ ဣမံ ဝိဘာဂံ န ဇာနာတီတိ အတ္ထော ။ အဓိကရဏနိရောဓံ န ဇာနာတီတိ ဓမ္မေန ဝိနယေန သတ္ထုသာသနေန မူလာမူလံ ဂန္တ္ဝာ ဝိနိစ္ဆယသမထံ ပာပေတုံ န သက္ကောတိ ; ‘‘ဣဒံ အဓိကရဏံ ဒ္ဝီဟိ, ဣဒံ စတူဟိ, ဣဒံ တီဟိ ဣဒံ ဧကေန သမထေန သမ္မတီ’’တိ ဧဝံ သတ္တ သမထေ အဇာနန္တော ပန အဓိကရဏနိရောဓဂာမိနိပဋိပဒံ န ဇာနာတိ နာမ။ ဝတ္ထုံ န ဇာနာတီတိ ‘‘ဣဒံ ပာရာဇိကသ္သ ဝတ္ထု, ဣဒံ သင္ဃာဒိသေသသ္သာ’’တိ ဧဝံ သတ္တန္နံ အာပတ္တိက္ခန္ဓာနံ ဝတ္ထုံ န ဇာနာတိ။ နိဒာနန္တိ ‘‘သတ္တန္နံ နိဒာနာနံ ဣဒံ သိက္ခာပဒံ ဧတ္ထ ပညတ္တံ, ဣဒံ ဧတ္ထာ’’တိ န ဇာနာတိ။ ပညတ္တိံ န ဇာနာတီတိ တသ္မိံ တသ္မိံ သိက္ခာပဒေ ပဌမပညတ္တိံ န ဇာနာတိ။ အနုပညတ္တိန္တိ ပုနပ္ပုနံ ပညတ္တိံ န ဇာနာတိ။ အနုသန္ဓိဝစနပထန္တိ ကထာနုသန္ဓိ-ဝိနိစ္ဆယာနုသန္ဓိဝသေန ဝတ္ထုံ န ဇာနာတိ။ ဉတ္တိံ န ဇာနာတီတိ သဗ္ဗေန သဗ္ဗံ ဉတ္တိံ န ဇာနာတိ။ ဉတ္တိယာ ကရဏံ န ဇာနာတီတိ ဉတ္တိကိစ္စံ န ဇာနာတိ, ဩသာရဏာဒီသု နဝသု ဌာနေသု ဉတ္တိကမ္မံ နာမ ဟောတိ, ဉတ္တိဒုတိယဉတ္တိစတုတ္ထကမ္မေသု ဉတ္တိယာ ကမ္မပ္ပတ္တော ဟုတ္ဝာ တိဋ္ဌတီတိ န ဇာနာတိ။ န ပုဗ္ဗကုသလော ဟောတိ န အပရကုသလောတိ ပုဗ္ဗေ ကထေတဗ္ဗဉ္စ ပစ္ဆာ ကထေတဗ္ဗဉ္စ န ဇာနာတိ, ဉတ္တိ နာမ ပုဗ္ဗေ ဌပေတဗ္ဗာ, ပစ္ဆာ န ဌပေတဗ္ဗာတိပိ န ဇာနာတိ။ အကာလညူ စ ဟောတီတိ ကာလံ န ဇာနာတိ, အနဇ္ဈိဋ္ဌော အယာစိတော ဘာသတိ, ဉတ္တိကာလမ္ပိ ဉတ္တိခေတ္တမ္ပိ ဉတ္တိဩကာသမ္ပိ န ဇာနာတိ။
Adhikaraṇapañcake adhikaraṇaṃ nāma cattāri adhikaraṇāni. Adhikaraṇassa mūlaṃ nāma tettiṃsa mūlāni – vivādādhikaraṇassa dvādasa mūlāni, anuvādādhikaraṇassa cuddasa, āpattādhikaraṇassa cha, kiccādhikaraṇassa ekaṃ; tāni parato āvi bhavissanti. Adhikaraṇasamudayo nāma adhikaraṇasamuṭṭhānaṃ. Vivādādhikaraṇaṃ aṭṭhārasa bhedakaravatthūni nissāya uppajjati; anuvādādhikaraṇaṃ catasso vipattiyo; āpattādhikaraṇaṃ sattāpattikkhandhe; kiccādhikaraṇaṃ cattāri saṅghakiccānīti imaṃ vibhāgaṃ na jānātīti attho . Adhikaraṇanirodhaṃ na jānātīti dhammena vinayena satthusāsanena mūlāmūlaṃ gantvā vinicchayasamathaṃ pāpetuṃ na sakkoti ; ‘‘idaṃ adhikaraṇaṃ dvīhi, idaṃ catūhi, idaṃ tīhi idaṃ ekena samathena sammatī’’ti evaṃ satta samathe ajānanto pana adhikaraṇanirodhagāminipaṭipadaṃ na jānāti nāma. Vatthuṃ na jānātīti ‘‘idaṃ pārājikassa vatthu, idaṃ saṅghādisesassā’’ti evaṃ sattannaṃ āpattikkhandhānaṃ vatthuṃ na jānāti. Nidānanti ‘‘sattannaṃ nidānānaṃ idaṃ sikkhāpadaṃ ettha paññattaṃ, idaṃ etthā’’ti na jānāti. Paññattiṃ na jānātīti tasmiṃ tasmiṃ sikkhāpade paṭhamapaññattiṃ na jānāti. Anupaññattinti punappunaṃ paññattiṃ na jānāti. Anusandhivacanapathanti kathānusandhi-vinicchayānusandhivasena vatthuṃ na jānāti. Ñattiṃ na jānātīti sabbena sabbaṃ ñattiṃ na jānāti. Ñattiyā karaṇaṃ na jānātīti ñattikiccaṃ na jānāti, osāraṇādīsu navasu ṭhānesu ñattikammaṃ nāma hoti, ñattidutiyañatticatutthakammesu ñattiyā kammappatto hutvā tiṭṭhatīti na jānāti. Na pubbakusalo hoti na aparakusaloti pubbe kathetabbañca pacchā kathetabbañca na jānāti, ñatti nāma pubbe ṭhapetabbā, pacchā na ṭhapetabbātipi na jānāti. Akālaññū ca hotīti kālaṃ na jānāti, anajjhiṭṭho ayācito bhāsati, ñattikālampi ñattikhettampi ñattiokāsampi na jānāti.
မန္ဒတ္တာ မောမူဟတ္တာတိ ကေဝလံ အညာဏေန မောမူဟဘာဝေန ဓုတင္ဂေ အာနိသံသံ အဇာနိတ္ဝာ။ ပာပိစ္ဆောတိ တေန အရညဝာသေန ပစ္စယလာဘံ ပတ္ထယမာနော။ ပဝိဝေကန္တိ ကာယစိတ္တဥပဓိဝိဝေကံ။ ဣဒမတ္ထိတန္တိ ဣမာယ ကလ္ယာဏာယ ပဋိပတ္တိယာ အတ္ထော ဧတသ္သာတိ ဣဒမတ္ထိ, ဣဒမတ္ထိနော ဘာဝော ဣဒမတ္ထိတာ; တံ ဣဒမတ္ထိတံယေဝ နိသ္သာယ န အညံ ကိဉ္စိ လောကာမိသန္တိ အတ္ထော။
Mandattā momūhattāti kevalaṃ aññāṇena momūhabhāvena dhutaṅge ānisaṃsaṃ ajānitvā. Pāpicchoti tena araññavāsena paccayalābhaṃ patthayamāno. Pavivekanti kāyacittaupadhivivekaṃ. Idamatthitanti imāya kalyāṇāya paṭipattiyā attho etassāti idamatthi, idamatthino bhāvo idamatthitā; taṃ idamatthitaṃyeva nissāya na aññaṃ kiñci lokāmisanti attho.
ဥပောသထံ န ဇာနာတီတိ နဝဝိဓံ ဥပောသထံ န ဇာနာတိ။ ဥပောသထကမ္မန္တိ အဓမ္မေနဝဂ္ဂာဒိဘေဒံ စတုဗ္ဗိဓံ ဥပောသထကမ္မံ န ဇာနာတိ။ ပာတိမောက္ခန္တိ ဒ္ဝေ မာတိကာ န ဇာနာတိ။ ပာတိမောက္ခုဒ္ဒေသန္တိ သဗ္ဗမ္ပိ နဝဝိဓံ ပာတိမောက္ခုဒ္ဒေသံ န ဇာနာတိ။ ပဝာရဏန္တိ နဝဝိဓံ ပဝာရဏံ န ဇာနာတိ။ ပဝာရဏာကမ္မံ ဥပောသထကမ္မသဒိသမေဝ။
Uposathaṃ na jānātīti navavidhaṃ uposathaṃ na jānāti. Uposathakammanti adhammenavaggādibhedaṃ catubbidhaṃ uposathakammaṃ na jānāti. Pātimokkhanti dve mātikā na jānāti. Pātimokkhuddesanti sabbampi navavidhaṃ pātimokkhuddesaṃ na jānāti. Pavāraṇanti navavidhaṃ pavāraṇaṃ na jānāti. Pavāraṇākammaṃ uposathakammasadisameva.
အပာသာဒိကပဉ္စကေ – အပာသာဒိကန္တိ ကာယဒုစ္စရိတာဒိ အကုသလကမ္မံ ဝုစ္စတိ။ ပာသာဒိကန္တိ ကာယသုစရိတာဒိ ကုသလကမ္မံ ဝုစ္စတိ။ အတိဝေလန္တိ ဝေလံ အတိက္ကမ္မ ဗဟုတရံ ကာလံ ကုလေသု အပ္ပံ ဝိဟာရေတိ အတ္ထော။ ဩတာရောတိ ကိလေသာနံ အန္တော ဩတရဏံ။ သံကိလိဋ္ဌန္တိ ဒုဋ္ဌုလ္လာပတ္တိကာယသံသဂ္ဂာဒိဘေဒံ ။ ဝိသုဒ္ဓိပဉ္စကေပဝာရဏာဂ္ဂဟဏေန နဝဝိဓာပိ ပဝာရဏာ ဝေဒိတဗ္ဗာ။ သေသံ သဗ္ဗတ္ထ ဥတ္တာနမေဝာတိ။
Apāsādikapañcake – apāsādikanti kāyaduccaritādi akusalakammaṃ vuccati. Pāsādikanti kāyasucaritādi kusalakammaṃ vuccati. Ativelanti velaṃ atikkamma bahutaraṃ kālaṃ kulesu appaṃ vihāreti attho. Otāroti kilesānaṃ anto otaraṇaṃ. Saṃkiliṭṭhanti duṭṭhullāpattikāyasaṃsaggādibhedaṃ . Visuddhipañcakepavāraṇāggahaṇena navavidhāpi pavāraṇā veditabbā. Sesaṃ sabbattha uttānamevāti.
ပဉ္စကဝာရဝဏ္ဏနာ နိဋ္ဌိတာ။
Pañcakavāravaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / ပရိဝာရပာဠိ • Parivārapāḷi / ၅. ပဉ္စကဝာရော • 5. Pañcakavāro
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ပဉ္စကဝာရဝဏ္ဏနာ • Pañcakavāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ပဉ္စကဝာရဝဏ္ဏနာ • Pañcakavāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ပဉ္စကဝာရဝဏ္ဏနာ • Pañcakavāravaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ဧကုတ္တရိကနယော ပဉ္စကဝာရဝဏ္ဏနာ • Ekuttarikanayo pañcakavāravaṇṇanā
