| Library / Tipiṭaka / д̇ибидага • Tipiṭaka / бариваарабаал̣и • Parivārapāḷi |
5. бан̃жагавааро
5. Pañcakavāro
325. бан̃жа аабад̇д̇ияо. бан̃жа аабад̇д̇игканд̇хаа. бан̃жа винийд̇авад̇т̇ууни. бан̃жа гаммаани аананд̇аригаани. бан̃жа буг̇г̇алаа нияад̇аа. бан̃жа чзд̣̇анагаа аабад̇д̇ияо. бан̃жахаагаарзхи аабад̇д̇им̣ аабаж̇ж̇ад̇и. бан̃жа аабад̇д̇ияо. мусааваад̣̇абажжаяаа бан̃жахаагаарзхи гаммам̣ на убзд̇и – саяам̣ ваа гаммам̣ на гарод̇и, барам̣ ваа на аж̇жхзсад̇и, чанд̣̇ам̣ ваа баарисуд̣̇д̇хим̣ ваа на д̣̇зд̇и, гаяирамаанз гаммз бадиггосад̇и, гад̇з ваа бана гаммз ад̇хаммад̣̇идти ход̇и. бан̃жахаагаарзхи гаммам̣ убзд̇и – саяам̣ ваа гаммам̣ гарод̇и, барам̣ ваа аж̇жхзсад̇и, чанд̣̇ам̣ ваа баарисуд̣̇д̇хим̣ ваа д̣̇зд̇и, гаяирамаанз гаммз наббадиггосад̇и, гад̇з ваа бана гаммз д̇хаммад̣̇идти ход̇и. бан̃жа бин̣д̣абаад̇игасса бхигкуно габбанд̇и – анааманд̇ажааро, г̇ан̣абхож̇анам̣, барамбарабхож̇анам̣, анад̇хидтаанам̣, авигаббанаа. 1 бан̃жахан̇г̇зхи саманнааг̇ад̇о бхигку уссан̇гид̇абарисан̇гид̇о ход̇и – баабабхигкуби агуббад̇хаммоби взсияааг̇ожаро ваа ход̇и, вид̇хавааг̇ожаро ваа ход̇и, т̇уллагумаариг̇ожаро ваа ход̇и, бан̣д̣агаг̇ожаро ваа ход̇и, бхигкуниг̇ожаро ваа ход̇и. бан̃жа д̇злаани – д̇илад̇злам̣, саасабад̇злам̣, мад̇хугад̇злам̣, зран̣д̣агад̇злам̣, васаад̇злам̣. бан̃жа васаани – ажчавасам̣, мажчавасам̣, сусугаавасам̣, суугаравасам̣, г̇ад̣̇рабхавасам̣. 2 бан̃жа б̣яасанаани – н̃аад̇иб̣яасанам̣, бхог̇аб̣яасанам̣, рог̇аб̣яасанам̣, сийлаб̣яасанам̣, д̣̇идтиб̣яасанам̣. 3 бан̃жа самбад̣̇аа – н̃аад̇исамбад̣̇аа, бхог̇асамбад̣̇аа, арог̇асамбад̣̇аа, сийласамбад̣̇аа, д̣̇идтисамбад̣̇аа. бан̃жа ниссаяабадиббассад̣̇д̇хияо убаж̇жхааяамхаа – убаж̇жхааяо багганд̇о ваа ход̇и, виб̣бханд̇о ваа, гаалан̇гад̇о ваа, багкасан̇ганд̇о ваа, аан̣ад̇д̇иязва бан̃жамий. бан̃жа буг̇г̇алаа на убасамбаад̣̇зд̇аб̣б̣аа – ад̣̇д̇хаанахийно, ан̇г̇ахийно, вад̇т̇увибанно, гаран̣ад̣̇уггадаго, абарибууро. бан̃жа бам̣сугуулаани – сосаанигам̣, баабан̣игам̣, унд̣̇уурагкааяигам̣, убажигагкааяигам̣, аг̇г̇ид̣̇ад̣дхам̣. абарааниби бан̃жа бам̣сугуулаани – г̇окааяигам̣, аж̇агкааяигам̣, т̇уубажийварам̣, аабхисзгигам̣, г̇ад̇абадияааг̇ад̇ам̣ 4. бан̃жа авахаараа – т̇зяяаавахааро, басаяхаавахааро, баригаббаавахааро , бадижчаннаавахааро, гусаавахааро. бан̃жа махаажораа санд̇о сам̣виж̇ж̇амаанаа логасмим̣. бан̃жа ависсаж̇ж̇анияаани. бан̃жа авзбхан̇г̇ияаани. бан̃жаабад̇д̇ияо гааяад̇о самудтанд̇и, на ваажад̇о на жид̇д̇ад̇о. бан̃жаабад̇д̇ияо гааяад̇о жа ваажад̇о жа самудтанд̇и, жид̇д̇ад̇о. бан̃жаабад̇д̇ияо д̣̇зсанааг̇ааминияо. бан̃жа сан̇гхаа . бан̃жа баад̇имогкуд̣̇д̣̇зсаа. саб̣б̣абажжанд̇имзсу ж̇анабад̣̇зсу винаяад̇харабан̃жамзна г̇ан̣зна убасамбаад̣̇зд̇аб̣б̣ам̣. бан̃жаанисам̣саа гат̇инад̇т̇аарз. бан̃жа гаммаани. яаавад̇ад̇ияагз бан̃жа аабад̇д̇ияо. бан̃жахаагаарзхи ад̣̇иннам̣ аад̣̇ияанд̇асса аабад̇д̇и баарааж̇игасса. бан̃жахаагаарзхи ад̣̇иннам̣ аад̣̇ияанд̇асса аабад̇д̇и т̇уллажжаяасса. бан̃жахаагаарзхи ад̣̇иннам̣ аад̣̇ияанд̇асса аабад̇д̇и д̣̇уггадасса. бан̃жа агаббияаани на барибхун̃ж̇ид̇аб̣б̣аани – ад̣̇иннан̃жа ход̇и, авид̣̇ид̇ан̃жа ход̇и, агаббияан̃жа ход̇и, аббадиг̇г̇ахид̇ан̃жа ход̇и, агад̇аад̇ирид̇д̇ан̃жа ход̇и. бан̃жа габбияаани барибхун̃ж̇ид̇аб̣б̣аани – д̣̇иннан̃жа ход̇и, вид̣̇ид̇ан̃жа ход̇и, габбияан̃жа ход̇и, бадиг̇г̇ахид̇ан̃жа ход̇и, гад̇аад̇ирид̇д̇ан̃жа ход̇и. бан̃жа д̣̇аанаани абун̃н̃аани бун̃н̃асаммад̇аани логасмим̣ 5 – маж̇ж̇ад̣̇аанам̣, самаж̇ж̇ад̣̇аанам̣, ид̇т̇ид̣̇аанам̣, усабхад̣̇аанам̣, жид̇д̇агаммад̣̇аанам̣. бан̃жа уббаннаа д̣̇уббадивинод̣̇аяаа 6 – уббанно рааг̇о д̣̇уббадивинод̣̇аяо, уббанно д̣̇осо д̣̇уббадивинод̣̇аяо, уббанно мохо д̣̇уббадивинод̣̇аяо, уббаннам̣ бадибхаанам̣ д̣̇уббадивинод̣̇аяам̣, уббаннам̣ г̇амияажид̇д̇ам̣ д̣̇уббадивинод̣̇аяам̣ . бан̃жаанисам̣саа саммаж̇ж̇анияаа – сагажид̇д̇ам̣ басийд̣̇ад̇и, баражид̇д̇ам̣ басийд̣̇ад̇и, д̣̇звад̇аа ад̇д̇аманаа хонд̇и, баасаад̣̇игасам̣вад̇д̇анигагаммам̣ убажинад̇и, гааяасса бхзд̣̇аа барам̣ маран̣аа суг̇ад̇им̣ саг̇г̇ам̣ логам̣ убабаж̇ж̇ад̇и. абарзби бан̃жаанисам̣саа саммаж̇ж̇анияаа – сагажид̇д̇ам̣ басийд̣̇ад̇и, баражид̇д̇ам̣ басийд̣̇ад̇и, д̣̇звад̇аа ад̇д̇аманаа хонд̇и, сад̇т̇усаасанам̣ гад̇ам̣ ход̇и, бажчимаа ж̇анад̇аа д̣̇идтаануг̇ад̇им̣ аабаж̇ж̇ад̇и.
325. Pañca āpattiyo. Pañca āpattikkhandhā. Pañca vinītavatthūni. Pañca kammāni ānantarikāni. Pañca puggalā niyatā. Pañca chedanakā āpattiyo. Pañcahākārehi āpattiṃ āpajjati. Pañca āpattiyo. Musāvādapaccayā pañcahākārehi kammaṃ na upeti – sayaṃ vā kammaṃ na karoti, paraṃ vā na ajjhesati, chandaṃ vā pārisuddhiṃ vā na deti, kayiramāne kamme paṭikkosati, kate vā pana kamme adhammadiṭṭhi hoti. Pañcahākārehi kammaṃ upeti – sayaṃ vā kammaṃ karoti, paraṃ vā ajjhesati, chandaṃ vā pārisuddhiṃ vā deti, kayiramāne kamme nappaṭikkosati, kate vā pana kamme dhammadiṭṭhi hoti. Pañca piṇḍapātikassa bhikkhuno kappanti – anāmantacāro, gaṇabhojanaṃ, paramparabhojanaṃ, anadhiṭṭhānaṃ, avikappanā. 7 Pañcahaṅgehi samannāgato bhikkhu ussaṅkitaparisaṅkito hoti – pāpabhikkhupi akuppadhammopi vesiyāgocaro vā hoti, vidhavāgocaro vā hoti, thullakumārigocaro vā hoti, paṇḍakagocaro vā hoti, bhikkhunigocaro vā hoti. Pañca telāni – tilatelaṃ, sāsapatelaṃ, madhukatelaṃ, eraṇḍakatelaṃ, vasātelaṃ. Pañca vasāni – acchavasaṃ, macchavasaṃ, susukāvasaṃ, sūkaravasaṃ, gadrabhavasaṃ. 8 Pañca byasanāni – ñātibyasanaṃ, bhogabyasanaṃ, rogabyasanaṃ, sīlabyasanaṃ, diṭṭhibyasanaṃ. 9 Pañca sampadā – ñātisampadā, bhogasampadā, arogasampadā, sīlasampadā, diṭṭhisampadā. Pañca nissayapaṭippassaddhiyo upajjhāyamhā – upajjhāyo pakkanto vā hoti, vibbhanto vā, kālaṅkato vā, pakkhasaṅkanto vā, āṇattiyeva pañcamī. Pañca puggalā na upasampādetabbā – addhānahīno, aṅgahīno, vatthuvipanno, karaṇadukkaṭako, aparipūro. Pañca paṃsukūlāni – sosānikaṃ, pāpaṇikaṃ, undūrakkhāyikaṃ, upacikakkhāyikaṃ, aggidaḍḍhaṃ. Aparānipi pañca paṃsukūlāni – gokhāyikaṃ, ajakkhāyikaṃ, thūpacīvaraṃ, ābhisekikaṃ, gatapaṭiyāgataṃ 10. Pañca avahārā – theyyāvahāro, pasayhāvahāro, parikappāvahāro , paṭicchannāvahāro, kusāvahāro. Pañca mahācorā santo saṃvijjamānā lokasmiṃ. Pañca avissajjaniyāni. Pañca avebhaṅgiyāni. Pañcāpattiyo kāyato samuṭṭhanti, na vācato na cittato. Pañcāpattiyo kāyato ca vācato ca samuṭṭhanti, cittato. Pañcāpattiyo desanāgāminiyo. Pañca saṅghā . Pañca pātimokkhuddesā. Sabbapaccantimesu janapadesu vinayadharapañcamena gaṇena upasampādetabbaṃ. Pañcānisaṃsā kathinatthāre. Pañca kammāni. Yāvatatiyake pañca āpattiyo. Pañcahākārehi adinnaṃ ādiyantassa āpatti pārājikassa. Pañcahākārehi adinnaṃ ādiyantassa āpatti thullaccayassa. Pañcahākārehi adinnaṃ ādiyantassa āpatti dukkaṭassa. Pañca akappiyāni na paribhuñjitabbāni – adinnañca hoti, aviditañca hoti, akappiyañca hoti, appaṭiggahitañca hoti, akatātirittañca hoti. Pañca kappiyāni paribhuñjitabbāni – dinnañca hoti, viditañca hoti, kappiyañca hoti, paṭiggahitañca hoti, katātirittañca hoti. Pañca dānāni apuññāni puññasammatāni lokasmiṃ 11 – majjadānaṃ, samajjadānaṃ, itthidānaṃ, usabhadānaṃ, cittakammadānaṃ. Pañca uppannā duppaṭivinodayā 12 – uppanno rāgo duppaṭivinodayo, uppanno doso duppaṭivinodayo, uppanno moho duppaṭivinodayo, uppannaṃ paṭibhānaṃ duppaṭivinodayaṃ, uppannaṃ gamiyacittaṃ duppaṭivinodayaṃ . Pañcānisaṃsā sammajjaniyā – sakacittaṃ pasīdati, paracittaṃ pasīdati, devatā attamanā honti, pāsādikasaṃvattanikakammaṃ upacinati, kāyassa bhedā paraṃ maraṇā sugatiṃ saggaṃ lokaṃ upapajjati. Aparepi pañcānisaṃsā sammajjaniyā – sakacittaṃ pasīdati, paracittaṃ pasīdati, devatā attamanā honti, satthusāsanaṃ kataṃ hoti, pacchimā janatā diṭṭhānugatiṃ āpajjati.
бан̃жахан̇г̇зхи саманнааг̇ад̇о винаяад̇харо ‘‘б̣аало’’ д̇взва сан̇кам̣ г̇ажчад̇и – ад̇д̇ано бхаасабарияанд̇ам̣ на уг̇г̇ан̣хаад̇и, барасса бхаасабарияанд̇ам̣ на уг̇г̇ан̣хаад̇и, ад̇д̇ано бхаасабарияанд̇ам̣ на уг̇г̇ахзд̇ваа барасса бхаасабарияанд̇ам̣ на уг̇г̇ахзд̇ваа ад̇хаммзна гаарзд̇и аббадин̃н̃ааяа. бан̃жахан̇г̇зхи саманнааг̇ад̇о винаяад̇харо ‘‘бан̣д̣ид̇о’’ д̇взва сан̇кам̣ г̇ажчад̇и – ад̇д̇ано бхаасабарияанд̇ам̣ уг̇г̇ан̣хаад̇и, барасса бхаасабарияанд̇ам̣ уг̇г̇ан̣хаад̇и, ад̇д̇ано бхаасабарияанд̇ам̣ уг̇г̇ахзд̇ваа барасса бхаасабарияанд̇ам̣ уг̇г̇ахзд̇ваа д̇хаммзна гаарзд̇и бадин̃н̃ааяа. абарзхиби бан̃жахан̇г̇зхи саманнааг̇ад̇о винаяад̇харо б̣аало д̇взва сан̇кам̣ г̇ажчад̇и – аабад̇д̇им̣ на ж̇аанаад̇и, аабад̇д̇ияаа муулам̣ на ж̇аанаад̇и, аабад̇д̇исамуд̣̇аяам̣ на ж̇аанаад̇и, аабад̇д̇инирод̇хам̣ на ж̇аанаад̇и, аабад̇д̇инирод̇хаг̇ааминим̣ бадибад̣̇ам̣ на ж̇аанаад̇и. бан̃жахан̇г̇зхи саманнааг̇ад̇о винаяад̇харо бан̣д̣ид̇о д̇взва сан̇кам̣ г̇ажчад̇и – аабад̇д̇им̣ ж̇аанаад̇и, аабад̇д̇ияаа муулам̣ ж̇аанаад̇и, аабад̇д̇исамуд̣̇аяам̣ ж̇аанаад̇и, аабад̇д̇инирод̇хам̣ ж̇аанаад̇и , аабад̇д̇инирод̇хаг̇ааминим̣ бадибад̣̇ам̣ ж̇аанаад̇и. абарзхиби бан̃жахан̇г̇зхи саманнааг̇ад̇о винаяад̇харо б̣аало д̇взва сан̇кам̣ г̇ажчад̇и – ад̇хигаран̣ам̣ на ж̇аанаад̇и, ад̇хигаран̣асса муулам̣ на ж̇аанаад̇и, ад̇хигаран̣асамуд̣̇аяам̣ на ж̇аанаад̇и, ад̇хигаран̣анирод̇хам̣ на ж̇аанаад̇и, ад̇хигаран̣анирод̇хаг̇ааминим̣ бадибад̣̇ам̣ на ж̇аанаад̇и. бан̃жахан̇г̇зхи саманнааг̇ад̇о винаяад̇харо бан̣д̣ид̇о д̇взва сан̇кам̣ г̇ажчад̇и – ад̇хигаран̣ам̣ ж̇аанаад̇и , ад̇хигаран̣асса муулам̣ ж̇аанаад̇и, ад̇хигаран̣асамуд̣̇аяам̣ ж̇аанаад̇и, ад̇хигаран̣анирод̇хам̣ ж̇аанаад̇и, ад̇хигаран̣анирод̇хаг̇ааминим̣ бадибад̣̇ам̣ ж̇аанаад̇и. абарзхиби бан̃жахан̇г̇зхи саманнааг̇ад̇о винаяад̇харо б̣аало д̇взва сан̇кам̣ г̇ажчад̇и – вад̇т̇ум̣ на ж̇аанаад̇и, нид̣̇аанам̣ на ж̇аанаад̇и, бан̃н̃ад̇д̇им̣ на ж̇аанаад̇и, анубан̃н̃ад̇д̇им̣ на ж̇аанаад̇и, анусанд̇хиважанабат̇ам̣ на ж̇аанаад̇и. бан̃жахан̇г̇зхи саманнааг̇ад̇о винаяад̇харо бан̣д̣ид̇о д̇взва сан̇кам̣ г̇ажчад̇и – вад̇т̇ум̣ ж̇аанаад̇и, нид̣̇аанам̣ ж̇аанаад̇и, бан̃н̃ад̇д̇им̣ ж̇аанаад̇и, анубан̃н̃ад̇д̇им̣ ж̇аанаад̇и, анусанд̇хиважанабат̇ам̣ ж̇аанаад̇и. абарзхиби бан̃жахан̇г̇зхи саманнааг̇ад̇о винаяад̇харо б̣аало д̇взва сан̇кам̣ г̇ажчад̇и – н̃ад̇д̇им̣ на ж̇аанаад̇и, н̃ад̇д̇ияаа гаран̣ам̣ на ж̇аанаад̇и, на буб̣б̣агусало ход̇и, на абарагусало ход̇и, агаалан̃н̃уу жа ход̇и. бан̃жахан̇г̇зхи саманнааг̇ад̇о винаяад̇харо бан̣д̣ид̇о д̇взва сан̇кам̣ г̇ажчад̇и – н̃ад̇д̇им̣ ж̇аанаад̇и, н̃ад̇д̇ияаа гаран̣ам̣ ж̇аанаад̇и, буб̣б̣агусало ход̇и, абарагусало ход̇и, гаалан̃н̃уу жа ход̇и. абарзхиби бан̃жахан̇г̇зхи саманнааг̇ад̇о винаяад̇харо б̣аало д̇взва сан̇кам̣ г̇ажчад̇и – аабад̇д̇аанаабад̇д̇им̣ на ж̇аанаад̇и, лахугаг̇аругам̣ аабад̇д̇им̣ на ж̇аанаад̇и, саавасзсаанавасзсам̣ аабад̇д̇им̣ на ж̇аанаад̇и, д̣̇удтуллаад̣̇удтуллам̣ аабад̇д̇им̣ на ж̇аанаад̇и, аажарияабарамбараа ко банасса на суг̇г̇ахид̇аа ход̇и на суманасигад̇аа на суубад̇хаарид̇аа. бан̃жахан̇г̇зхи саманнааг̇ад̇о винаяад̇харо бан̣д̣ид̇од̇взва сан̇кам̣ г̇ажчад̇и – аабад̇д̇аанаабад̇д̇им̣ ж̇аанаад̇и, лахугаг̇аругам̣ аабад̇д̇им̣ ж̇аанаад̇и, саавасзсаанавасзсам̣ аабад̇д̇им̣ ж̇аанад̇и, д̣̇удтуллаад̣̇удтуллам̣ аабад̇д̇им̣ ж̇аанаад̇и, аажарияабарамбараа ко банасса суг̇г̇ахид̇аа ход̇и суманасигад̇аа суубад̇хаарид̇аа. абарзхиби бан̃жахан̇г̇зхи саманнааг̇ад̇о винаяад̇харо б̣аало д̇взва сан̇кам̣ г̇ажчад̇и – аабад̇д̇аанаабад̇д̇им̣ на ж̇аанаад̇и, лахугаг̇аругам̣ аабад̇д̇им̣ на ж̇аанаад̇и, саавасзсаанавасзсам̣ аабад̇д̇им̣ на ж̇аанаад̇и, д̣̇удтуллаад̣̇удтуллам̣ аабад̇д̇им̣ ж̇аанаад̇и, убхаяаани ко банасса баад̇имогкаани на вид̇т̇аарзна свааг̇ад̇аани хонд̇и на сувибхад̇д̇аани на суббавад̇д̇ийни на сувинижчид̇аани суд̇д̇асо ануб̣яан̃ж̇анасо. бан̃жахан̇г̇зхи саманнааг̇ад̇о винаяад̇харо бан̣д̣ид̇о д̇взва сан̇кам̣ г̇ажчад̇и – аабад̇д̇аанаабад̇д̇им̣ ж̇аанаад̇и, лахугаг̇аругам̣ аабад̇д̇им̣ ж̇аанаад̇и, саавасзсаанавасзсам̣ аабад̇д̇им̣ ж̇аанаад̇и, д̣̇удтуллаад̣̇удтуллам̣ аабад̇д̇им̣ ж̇аанаад̇и, убхаяаани ко банасса баад̇имогкаани вид̇т̇аарзна свааг̇ад̇аани хонд̇и сувибхад̇д̇аани суббавад̇д̇ийни сувинижчид̇аани суд̇д̇асо ануб̣яан̃ж̇анасо. абарзхиби бан̃жахан̇г̇зхи саманнааг̇ад̇о винаяад̇харо б̣аало д̇взва сан̇кам̣ г̇ажчад̇и – аабад̇д̇аанаабад̇д̇им̣ на ж̇аанаад̇и, лахугаг̇аругам̣ аабад̇д̇им̣ на ж̇аанаад̇и, саавасзсаанавасзсам̣ аабад̇д̇им̣ на ж̇аанаад̇и, д̣̇удтуллаад̣̇удтуллам̣ аабад̇д̇им̣ на ж̇аанаад̇и, ад̇хигаран̣з жа на винижчаяагусало ход̇и. бан̃жахан̇г̇зхи саманнааг̇ад̇о винаяад̇харо бан̣д̣ид̇о д̇взва сан̇кам̣ г̇ажчад̇и – аабад̇д̇аанаабад̇д̇им̣ ж̇аанаад̇и, лахугаг̇аругам̣ аабад̇д̇им̣ ж̇аанаад̇и, саавасзсаанавасзсам̣ аабад̇д̇им̣ ж̇аанаад̇и, д̣̇удтуллаад̣̇удтуллам̣ аабад̇д̇им̣ ж̇аанаад̇и, ад̇хигаран̣з жа винижчаяагусало ход̇и.
Pañcahaṅgehi samannāgato vinayadharo ‘‘bālo’’ tveva saṅkhaṃ gacchati – attano bhāsapariyantaṃ na uggaṇhāti, parassa bhāsapariyantaṃ na uggaṇhāti, attano bhāsapariyantaṃ na uggahetvā parassa bhāsapariyantaṃ na uggahetvā adhammena kāreti appaṭiññāya. Pañcahaṅgehi samannāgato vinayadharo ‘‘paṇḍito’’ tveva saṅkhaṃ gacchati – attano bhāsapariyantaṃ uggaṇhāti, parassa bhāsapariyantaṃ uggaṇhāti, attano bhāsapariyantaṃ uggahetvā parassa bhāsapariyantaṃ uggahetvā dhammena kāreti paṭiññāya. Aparehipi pañcahaṅgehi samannāgato vinayadharo bālo tveva saṅkhaṃ gacchati – āpattiṃ na jānāti, āpattiyā mūlaṃ na jānāti, āpattisamudayaṃ na jānāti, āpattinirodhaṃ na jānāti, āpattinirodhagāminiṃ paṭipadaṃ na jānāti. Pañcahaṅgehi samannāgato vinayadharo paṇḍito tveva saṅkhaṃ gacchati – āpattiṃ jānāti, āpattiyā mūlaṃ jānāti, āpattisamudayaṃ jānāti, āpattinirodhaṃ jānāti , āpattinirodhagāminiṃ paṭipadaṃ jānāti. Aparehipi pañcahaṅgehi samannāgato vinayadharo bālo tveva saṅkhaṃ gacchati – adhikaraṇaṃ na jānāti, adhikaraṇassa mūlaṃ na jānāti, adhikaraṇasamudayaṃ na jānāti, adhikaraṇanirodhaṃ na jānāti, adhikaraṇanirodhagāminiṃ paṭipadaṃ na jānāti. Pañcahaṅgehi samannāgato vinayadharo paṇḍito tveva saṅkhaṃ gacchati – adhikaraṇaṃ jānāti , adhikaraṇassa mūlaṃ jānāti, adhikaraṇasamudayaṃ jānāti, adhikaraṇanirodhaṃ jānāti, adhikaraṇanirodhagāminiṃ paṭipadaṃ jānāti. Aparehipi pañcahaṅgehi samannāgato vinayadharo bālo tveva saṅkhaṃ gacchati – vatthuṃ na jānāti, nidānaṃ na jānāti, paññattiṃ na jānāti, anupaññattiṃ na jānāti, anusandhivacanapathaṃ na jānāti. Pañcahaṅgehi samannāgato vinayadharo paṇḍito tveva saṅkhaṃ gacchati – vatthuṃ jānāti, nidānaṃ jānāti, paññattiṃ jānāti, anupaññattiṃ jānāti, anusandhivacanapathaṃ jānāti. Aparehipi pañcahaṅgehi samannāgato vinayadharo bālo tveva saṅkhaṃ gacchati – ñattiṃ na jānāti, ñattiyā karaṇaṃ na jānāti, na pubbakusalo hoti, na aparakusalo hoti, akālaññū ca hoti. Pañcahaṅgehi samannāgato vinayadharo paṇḍito tveva saṅkhaṃ gacchati – ñattiṃ jānāti, ñattiyā karaṇaṃ jānāti, pubbakusalo hoti, aparakusalo hoti, kālaññū ca hoti. Aparehipi pañcahaṅgehi samannāgato vinayadharo bālo tveva saṅkhaṃ gacchati – āpattānāpattiṃ na jānāti, lahukagarukaṃ āpattiṃ na jānāti, sāvasesānavasesaṃ āpattiṃ na jānāti, duṭṭhullāduṭṭhullaṃ āpattiṃ na jānāti, ācariyaparamparā kho panassa na suggahitā hoti na sumanasikatā na sūpadhāritā. Pañcahaṅgehi samannāgato vinayadharo paṇḍitotveva saṅkhaṃ gacchati – āpattānāpattiṃ jānāti, lahukagarukaṃ āpattiṃ jānāti, sāvasesānavasesaṃ āpattiṃ jānati, duṭṭhullāduṭṭhullaṃ āpattiṃ jānāti, ācariyaparamparā kho panassa suggahitā hoti sumanasikatā sūpadhāritā. Aparehipi pañcahaṅgehi samannāgato vinayadharo bālo tveva saṅkhaṃ gacchati – āpattānāpattiṃ na jānāti, lahukagarukaṃ āpattiṃ na jānāti, sāvasesānavasesaṃ āpattiṃ na jānāti, duṭṭhullāduṭṭhullaṃ āpattiṃ jānāti, ubhayāni kho panassa pātimokkhāni na vitthārena svāgatāni honti na suvibhattāni na suppavattīni na suvinicchitāni suttaso anubyañjanaso. Pañcahaṅgehi samannāgato vinayadharo paṇḍito tveva saṅkhaṃ gacchati – āpattānāpattiṃ jānāti, lahukagarukaṃ āpattiṃ jānāti, sāvasesānavasesaṃ āpattiṃ jānāti, duṭṭhullāduṭṭhullaṃ āpattiṃ jānāti, ubhayāni kho panassa pātimokkhāni vitthārena svāgatāni honti suvibhattāni suppavattīni suvinicchitāni suttaso anubyañjanaso. Aparehipi pañcahaṅgehi samannāgato vinayadharo bālo tveva saṅkhaṃ gacchati – āpattānāpattiṃ na jānāti, lahukagarukaṃ āpattiṃ na jānāti, sāvasesānavasesaṃ āpattiṃ na jānāti, duṭṭhullāduṭṭhullaṃ āpattiṃ na jānāti, adhikaraṇe ca na vinicchayakusalo hoti. Pañcahaṅgehi samannāgato vinayadharo paṇḍito tveva saṅkhaṃ gacchati – āpattānāpattiṃ jānāti, lahukagarukaṃ āpattiṃ jānāti, sāvasesānavasesaṃ āpattiṃ jānāti, duṭṭhullāduṭṭhullaṃ āpattiṃ jānāti, adhikaraṇe ca vinicchayakusalo hoti.
13 бан̃жа ааран̃н̃игаа – манд̣̇ад̇д̇аа момуухад̇д̇аа ааран̃н̃иго ход̇и, баабижчо ижчаабагад̇о ааран̃н̃иго ход̇и, уммаад̣̇аа жид̇д̇агкзбаа ааран̃н̃иго ход̇и, ван̣н̣ид̇ам̣ б̣уд̣̇д̇хзхи б̣уд̣̇д̇хасаавагзхийд̇и ааран̃н̃иго ход̇и, аби жа аббижчан̃н̃зва ниссааяа санд̇удтин̃н̃зва ниссааяа саллзкан̃н̃зва ниссааяа бавивзган̃н̃зва ниссааяа ид̣̇амад̇т̇ид̇ан̃н̃зва 14 ниссааяа ааран̃н̃иго ход̇и. бан̃жа бин̣д̣абаад̇игаа…бз… бан̃жа бам̣сугуулигаа…бз… бан̃жа ругкамуулигаа…бз… бан̃жа сосаанигаа…бз… бан̃жа аб̣бхогаасигаа…бз… бан̃жа д̇зжийваригаа…бз… бан̃жа сабад̣̇аанажааригаа…бз… бан̃жа нзсаж̇ж̇игаа…бз… бан̃жа яат̇аасант̇ад̇игаа…бз… бан̃жа згаасанигаа…бз… бан̃жа калубажчаабхад̇д̇игаа…бз… бан̃жа бад̇д̇абин̣д̣игаа – манд̣̇ад̇д̇аа момуухад̇д̇аа бад̇д̇абин̣д̣иго ход̇и, баабижчо ижчаабагад̇о бад̇д̇абин̣д̣иго ход̇и, уммаад̣̇аа жид̇д̇агкзбаа бад̇д̇абин̣д̣иго ход̇и, ван̣н̣ид̇ам̣ б̣уд̣̇д̇хзхи б̣уд̣̇д̇хасаавагзхийд̇и бад̇д̇абин̣д̣иго ход̇и, аби жа аббижчан̃н̃зва ниссааяа санд̇удтин̃н̃зва ниссааяа саллзкан̃н̃зва ниссааяа бавивзган̃н̃зва ниссааяа ид̣̇амад̇т̇ид̇ан̃н̃зва ниссааяа бад̇д̇абин̣д̣иго ход̇и.
15 Pañca āraññikā – mandattā momūhattā āraññiko hoti, pāpiccho icchāpakato āraññiko hoti, ummādā cittakkhepā āraññiko hoti, vaṇṇitaṃ buddhehi buddhasāvakehīti āraññiko hoti, api ca appicchaññeva nissāya santuṭṭhiññeva nissāya sallekhaññeva nissāya pavivekaññeva nissāya idamatthitaññeva 16 nissāya āraññiko hoti. Pañca piṇḍapātikā…pe… pañca paṃsukūlikā…pe… pañca rukkhamūlikā…pe… pañca sosānikā…pe… pañca abbhokāsikā…pe… pañca tecīvarikā…pe… pañca sapadānacārikā…pe… pañca nesajjikā…pe… pañca yathāsanthatikā…pe… pañca ekāsanikā…pe… pañca khalupacchābhattikā…pe… pañca pattapiṇḍikā – mandattā momūhattā pattapiṇḍiko hoti, pāpiccho icchāpakato pattapiṇḍiko hoti, ummādā cittakkhepā pattapiṇḍiko hoti, vaṇṇitaṃ buddhehi buddhasāvakehīti pattapiṇḍiko hoti, api ca appicchaññeva nissāya santuṭṭhiññeva nissāya sallekhaññeva nissāya pavivekaññeva nissāya idamatthitaññeva nissāya pattapiṇḍiko hoti.
17 бан̃жахан̇г̇зхи саманнааг̇ад̇зна бхигкунаа нааниссид̇зна вад̇т̇аб̣б̣ам̣ – убосат̇ам̣ на ж̇аанаад̇и, убосат̇агаммам̣ на ж̇аанаад̇и, баад̇имогкам̣ на ж̇аанаад̇и, баад̇имогкуд̣̇д̣̇зсам̣ на ж̇аанаад̇и, уунабан̃жавассо ход̇и. бан̃жахан̇г̇зхи саманнааг̇ад̇зна бхигкунаа аниссид̇зна вад̇т̇аб̣б̣ам̣ – убосат̇ам̣ ж̇аанаад̇и, убосат̇агаммам̣ ж̇аанаад̇и, баад̇имогкам̣ ж̇аанаад̇и, баад̇имогкуд̣̇д̣̇зсам̣ ж̇аанаад̇и, бан̃жавассо ваа ход̇и ад̇ирзгабан̃жавассо ваа. абарзхиби бан̃жахан̇г̇зхи саманнааг̇ад̇зна бхигкунаа нааниссид̇зна вад̇т̇аб̣б̣ам̣ – бавааран̣ам̣ на ж̇аанаад̇и, бавааран̣аагаммам̣ на ж̇аанаад̇и, баад̇имогкам̣ на ж̇аанаад̇и, баад̇имогкуд̣̇д̣̇зсам̣ на ж̇аанаад̇и, уунабан̃жавассо ход̇и. бан̃жахан̇г̇зхи саманнааг̇ад̇зна бхигкунаа аниссид̇зна вад̇т̇аб̣б̣ам̣ – бавааран̣ам̣ ж̇аанаад̇и, бавааран̣аагаммам̣ ж̇аанаад̇и, баад̇имогкам̣ ж̇аанаад̇и, баад̇имогкуд̣̇д̣̇зсам̣ ж̇аанаад̇и, бан̃жавассо ваа ход̇и ад̇ирзгабан̃жавассо ваа. абарзхиби бан̃жахан̇г̇зхи саманнааг̇ад̇зна бхигкунаа нааниссид̇зна вад̇т̇аб̣б̣ам̣ – аабад̇д̇аанаабад̇д̇им̣ на ж̇аанаад̇и, лахугаг̇аругам̣ аабад̇д̇им̣ на ж̇аанаад̇и, саавасзсаанавасзсам̣ аабад̇д̇им̣ на ж̇аанаад̇и, д̣̇удтуллаад̣̇удтуллам̣ аабад̇д̇им̣ на ж̇аанаад̇и, уунабан̃жавассо ход̇и. бан̃жахан̇г̇зхи саманнааг̇ад̇зна бхигкунаа аниссид̇зна вад̇т̇аб̣б̣ам̣ – аабад̇д̇аанаабад̇д̇им̣ ж̇аанаад̇и, лахугаг̇аругам̣ аабад̇д̇им̣ ж̇аанаад̇и, саавасзсаанавасзсам̣ аабад̇д̇им̣ ж̇аанаад̇и, д̣̇удтуллаад̣̇удтуллам̣ аабад̇д̇им̣ ж̇аанаад̇и, бан̃жавассо ваа ход̇и ад̇ирзгабан̃жавассо ваа. бан̃жахан̇г̇зхи саманнааг̇ад̇ааяа бхигкунияаа нааниссид̇ааяа вад̇т̇аб̣б̣ам̣ – убосат̇ам̣ на ж̇аанаад̇и, убосат̇агаммам̣ на ж̇аанаад̇и, баад̇имогкам̣ на ж̇аанаад̇и, баад̇имогкуд̣̇д̣̇зсам̣ на ж̇аанаад̇и, уунабан̃жавассаа ход̇и. бан̃жахан̇г̇зхи саманнааг̇ад̇ааяа бхигкунияаа аниссид̇ааяа вад̇т̇аб̣б̣ам̣ – убосат̇ам̣ ж̇аанаад̇и, убосат̇агаммам̣ ж̇аанаад̇и, баад̇имогкам̣ ж̇аанаад̇и, баад̇имогкуд̣̇д̣̇зсам̣ ж̇аанаад̇и, бан̃жавассаа ваа ход̇и ад̇ирзгабан̃жавассаа ваа. абарзхиби бан̃жахан̇г̇зхи саманнааг̇ад̇ааяа бхигкунияаа нааниссид̇ааяа вад̇т̇аб̣б̣ам̣ – бавааран̣ам̣ на ж̇аанаад̇и, бавааран̣аагаммам̣ на ж̇аанаад̇и, баад̇имогкам̣ на ж̇аанаад̇и, баад̇имогкуд̣̇д̣̇зсам̣ на ж̇аанаад̇и, уунабан̃жавассаа ход̇и. бан̃жахан̇г̇зхи саманнааг̇ад̇ааяа бхигкунияаа аниссид̇ааяа вад̇т̇аб̣б̣ам̣ – бавааран̣ам̣ ж̇аанаад̇и, бавааран̣аагаммам̣ ж̇аанаад̇и, баад̇имогкам̣ ж̇аанаад̇и, баад̇имогкуд̣̇д̣̇зсам̣ ж̇аанаад̇и, бан̃жавассаа ваа ход̇и ад̇ирзгабан̃жавассаа ваа. абарзхиби бан̃жахан̇г̇зхи саманнааг̇ад̇ааяа бхигкунияаа нааниссид̇ааяа вад̇т̇аб̣б̣ам̣ – аабад̇д̇аанаабад̇д̇им̣ на ж̇аанаад̇и, лахугаг̇аругам̣ аабад̇д̇им̣ на ж̇аанаад̇и, саавасзсаанавасзсам̣ аабад̇д̇им̣ на ж̇аанаад̇и, д̣̇удтуллаад̣̇удтуллам̣ аабад̇д̇им̣ на ж̇аанаад̇и, уунабан̃жавассаа ход̇и. бан̃жахан̇г̇зхи саманнааг̇ад̇ааяа бхигкунияаа аниссид̇ааяа вад̇т̇аб̣б̣ам̣ – аабад̇д̇аанаабад̇д̇им̣ ж̇аанаад̇и, лахугаг̇аругам̣ аабад̇д̇им̣ ж̇аанаад̇и, саавасзсаанавасзсам̣ аабад̇д̇им̣ ж̇аанаад̇и, д̣̇удтуллаад̣̇удтуллам̣ аабад̇д̇им̣ ж̇аанаад̇и, бан̃жавассаа ваа ход̇и ад̇ирзгабан̃жавассаа ваа.
18 Pañcahaṅgehi samannāgatena bhikkhunā nānissitena vatthabbaṃ – uposathaṃ na jānāti, uposathakammaṃ na jānāti, pātimokkhaṃ na jānāti, pātimokkhuddesaṃ na jānāti, ūnapañcavasso hoti. Pañcahaṅgehi samannāgatena bhikkhunā anissitena vatthabbaṃ – uposathaṃ jānāti, uposathakammaṃ jānāti, pātimokkhaṃ jānāti, pātimokkhuddesaṃ jānāti, pañcavasso vā hoti atirekapañcavasso vā. Aparehipi pañcahaṅgehi samannāgatena bhikkhunā nānissitena vatthabbaṃ – pavāraṇaṃ na jānāti, pavāraṇākammaṃ na jānāti, pātimokkhaṃ na jānāti, pātimokkhuddesaṃ na jānāti, ūnapañcavasso hoti. Pañcahaṅgehi samannāgatena bhikkhunā anissitena vatthabbaṃ – pavāraṇaṃ jānāti, pavāraṇākammaṃ jānāti, pātimokkhaṃ jānāti, pātimokkhuddesaṃ jānāti, pañcavasso vā hoti atirekapañcavasso vā. Aparehipi pañcahaṅgehi samannāgatena bhikkhunā nānissitena vatthabbaṃ – āpattānāpattiṃ na jānāti, lahukagarukaṃ āpattiṃ na jānāti, sāvasesānavasesaṃ āpattiṃ na jānāti, duṭṭhullāduṭṭhullaṃ āpattiṃ na jānāti, ūnapañcavasso hoti. Pañcahaṅgehi samannāgatena bhikkhunā anissitena vatthabbaṃ – āpattānāpattiṃ jānāti, lahukagarukaṃ āpattiṃ jānāti, sāvasesānavasesaṃ āpattiṃ jānāti, duṭṭhullāduṭṭhullaṃ āpattiṃ jānāti, pañcavasso vā hoti atirekapañcavasso vā. Pañcahaṅgehi samannāgatāya bhikkhuniyā nānissitāya vatthabbaṃ – uposathaṃ na jānāti, uposathakammaṃ na jānāti, pātimokkhaṃ na jānāti, pātimokkhuddesaṃ na jānāti, ūnapañcavassā hoti. Pañcahaṅgehi samannāgatāya bhikkhuniyā anissitāya vatthabbaṃ – uposathaṃ jānāti, uposathakammaṃ jānāti, pātimokkhaṃ jānāti, pātimokkhuddesaṃ jānāti, pañcavassā vā hoti atirekapañcavassā vā. Aparehipi pañcahaṅgehi samannāgatāya bhikkhuniyā nānissitāya vatthabbaṃ – pavāraṇaṃ na jānāti, pavāraṇākammaṃ na jānāti, pātimokkhaṃ na jānāti, pātimokkhuddesaṃ na jānāti, ūnapañcavassā hoti. Pañcahaṅgehi samannāgatāya bhikkhuniyā anissitāya vatthabbaṃ – pavāraṇaṃ jānāti, pavāraṇākammaṃ jānāti, pātimokkhaṃ jānāti, pātimokkhuddesaṃ jānāti, pañcavassā vā hoti atirekapañcavassā vā. Aparehipi pañcahaṅgehi samannāgatāya bhikkhuniyā nānissitāya vatthabbaṃ – āpattānāpattiṃ na jānāti, lahukagarukaṃ āpattiṃ na jānāti, sāvasesānavasesaṃ āpattiṃ na jānāti, duṭṭhullāduṭṭhullaṃ āpattiṃ na jānāti, ūnapañcavassā hoti. Pañcahaṅgehi samannāgatāya bhikkhuniyā anissitāya vatthabbaṃ – āpattānāpattiṃ jānāti, lahukagarukaṃ āpattiṃ jānāti, sāvasesānavasesaṃ āpattiṃ jānāti, duṭṭhullāduṭṭhullaṃ āpattiṃ jānāti, pañcavassā vā hoti atirekapañcavassā vā.
бан̃жа аад̣̇ийнаваа абаасаад̣̇игз – ад̇д̇ааби ад̇д̇аанам̣ убавад̣̇ад̇и, анувижжаби вин̃н̃уу г̇араханд̇и, баабаго гид̇д̇исад̣̇д̣̇о аб̣бхуг̇г̇ажчад̇и, саммуул̣хо гаалам̣ гарод̇и, гааяасса бхзд̣̇аа барам̣ маран̣аа абааяам̣ д̣̇уг̇г̇ад̇им̣ винибаад̇ам̣ нираяам̣ убабаж̇ж̇ад̇и. бан̃жаанисам̣саа баасаад̣̇игз – ад̇д̇ааби ад̇д̇аанам̣ на убавад̣̇ад̇и, анувижжаби вин̃н̃уу басам̣санд̇и, галяаан̣о гид̇д̇исад̣̇д̣̇о аб̣бхуг̇г̇ажчад̇и, асаммуул̣хо гаалам̣ гарод̇и, гааяасса бхзд̣̇аа барам̣ маран̣аа суг̇ад̇им̣ саг̇г̇ам̣ логам̣ убабаж̇ж̇ад̇и. абарзби бан̃жа аад̣̇ийнаваа абаасаад̣̇игз – аббасаннаа на басийд̣̇анд̇и, басаннаанам̣ згажжаанам̣ ан̃н̃ат̇ад̇д̇ам̣ ход̇и, сад̇т̇усаасанам̣ агад̇ам̣ ход̇и, бажчимаа ж̇анад̇аа д̣̇идтаануг̇ад̇им̣ наабаж̇ж̇ад̇и, жид̇д̇амасса на басийд̣̇ад̇и. бан̃жаанисам̣саа баасаад̣̇игз – аббасаннаа басийд̣̇анд̇и, басаннаанам̣ бхияяобхаавааяа ход̇и, сад̇т̇усаасанам̣ гад̇ам̣ ход̇и, бажчимаа ж̇анад̇аа д̣̇идтаануг̇ад̇им̣ аабаж̇ж̇ад̇и, жид̇д̇амасса басийд̣̇ад̇и. бан̃жа аад̣̇ийнаваа гулуубагз – анааманд̇ажаарз аабаж̇ж̇ад̇и, рахо нисаж̇ж̇ааяа аабаж̇ж̇ад̇и, бадижчаннз аасанз аабаж̇ж̇ад̇и, маад̇уг̇аамасса уд̇д̇аричаббан̃жаваажаахи д̇хаммам̣ д̣̇зсзнд̇о аабаж̇ж̇ад̇и, гаамасан̇габбаб̣ахуло жа вихарад̇и. бан̃жа аад̣̇ийнаваа гулуубагасса бхигкуно – ад̇ивзлам̣ гулзсу сам̣садтасса вихарад̇о маад̇уг̇аамасса абхин̣хад̣̇ассанам̣, д̣̇ассанз сад̇и сам̣саг̇г̇о, сам̣саг̇г̇з сад̇и виссаасо, виссаасз сад̇и од̇ааро, од̇ин̣н̣ажид̇д̇ассзд̇ам̣ бхигкуно баадиган̇кам̣ анабхирад̇о ваа б̣рахмажарияам̣ жариссад̇и ан̃н̃ад̇арам̣ ваа сам̣гилидтам̣ аабад̇д̇им̣ аабаж̇ж̇иссад̇и сигкам̣ ваа бажжагкааяа хийнааяаавад̇д̇иссад̇и.
Pañca ādīnavā apāsādike – attāpi attānaṃ upavadati, anuviccapi viññū garahanti, pāpako kittisaddo abbhuggacchati, sammūḷho kālaṃ karoti, kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjati. Pañcānisaṃsā pāsādike – attāpi attānaṃ na upavadati, anuviccapi viññū pasaṃsanti, kalyāṇo kittisaddo abbhuggacchati, asammūḷho kālaṃ karoti, kāyassa bhedā paraṃ maraṇā sugatiṃ saggaṃ lokaṃ upapajjati. Aparepi pañca ādīnavā apāsādike – appasannā na pasīdanti, pasannānaṃ ekaccānaṃ aññathattaṃ hoti, satthusāsanaṃ akataṃ hoti, pacchimā janatā diṭṭhānugatiṃ nāpajjati, cittamassa na pasīdati. Pañcānisaṃsā pāsādike – appasannā pasīdanti, pasannānaṃ bhiyyobhāvāya hoti, satthusāsanaṃ kataṃ hoti, pacchimā janatā diṭṭhānugatiṃ āpajjati, cittamassa pasīdati. Pañca ādīnavā kulūpake – anāmantacāre āpajjati, raho nisajjāya āpajjati, paṭicchanne āsane āpajjati, mātugāmassa uttarichappañcavācāhi dhammaṃ desento āpajjati, kāmasaṅkappabahulo ca viharati. Pañca ādīnavā kulūpakassa bhikkhuno – ativelaṃ kulesu saṃsaṭṭhassa viharato mātugāmassa abhiṇhadassanaṃ, dassane sati saṃsaggo, saṃsagge sati vissāso, vissāse sati otāro, otiṇṇacittassetaṃ bhikkhuno pāṭikaṅkhaṃ anabhirato vā brahmacariyaṃ carissati aññataraṃ vā saṃkiliṭṭhaṃ āpattiṃ āpajjissati sikkhaṃ vā paccakkhāya hīnāyāvattissati.
19 бан̃жа б̣ийж̇аж̇аад̇аани – муулаб̣ийж̇ам̣, канд̇хаб̣ийж̇ам̣, пал̣уб̣ийж̇ам̣, аг̇г̇аб̣ийж̇ам̣, б̣ийж̇аб̣ийж̇ан̃н̃зва 20 бан̃жамам̣. бан̃жахи саман̣агаббзхи палам̣ барибхун̃ж̇ид̇аб̣б̣ам̣ – аг̇г̇ибариж̇ид̇ам̣, сад̇т̇абариж̇ид̇ам̣, накабариж̇ид̇ам̣, аб̣ийж̇ам̣, ниб̣б̣ад̇д̇аб̣ийж̇ан̃н̃зва 21 бан̃жамам̣. бан̃жа висуд̣̇д̇хияо – нид̣̇аанам̣ уд̣̇д̣̇исид̇ваа авасзсам̣ суд̇зна саавзд̇аб̣б̣ам̣, аяам̣ батамаа висуд̣̇д̇хи; нид̣̇аанам̣ уд̣̇д̣̇исид̇ваа жад̇д̇аари баарааж̇игаани уд̣̇д̣̇исид̇ваа авасзсам̣ суд̇зна саавзд̇аб̣б̣ам̣, аяам̣ д̣̇уд̇ияаа висуд̣̇д̇хи; нид̣̇аанам̣ уд̣̇д̣̇исид̇ваа жад̇д̇аари баарааж̇игаани уд̣̇д̣̇исид̇ваа д̇зраса сан̇гхаад̣̇исзсз уд̣̇д̣̇исид̇ваа авасзсам̣ суд̇зна саавзд̇аб̣б̣ам̣, аяам̣ д̇ад̇ияаа висуд̣̇д̇хи; нид̣̇аанам̣ уд̣̇д̣̇исид̇ваа жад̇д̇аари баарааж̇игаани уд̣̇д̣̇исид̇ваа д̇зраса сан̇гхаад̣̇исзсз уд̣̇д̣̇исид̇ваа д̣̇вз анияад̇з уд̣̇д̣̇исид̇ваа авасзсам̣ суд̇зна саавзд̇аб̣б̣ам̣, аяам̣ жад̇уд̇т̇аа висуд̣̇д̇хи; вид̇т̇аарзнзва бан̃жамий. абарааби бан̃жа висуд̣̇д̇хияо – суд̇д̇уд̣̇д̣̇зсо, баарисуд̣̇д̇хиубосат̇о, ад̇хидтаанубосат̇о, бавааран̣аа, саамаг̇г̇ийубосат̇оязва бан̃жамо. бан̃жаанисам̣саа винаяад̇харз – ад̇д̇ано сийлагканд̇хо суг̇уд̇д̇о ход̇и сурагкид̇о, гуггужжабагад̇аанам̣ бадисаран̣ам̣ ход̇и, висаарад̣̇о сан̇гхамаж̇жхз вохарад̇и, бажжад̇т̇игз сахад̇хаммзна суниг̇г̇ахид̇ам̣ ниг̇г̇ан̣хаад̇и, сад̣̇д̇хаммадтид̇ияаа бадибанно ход̇и. бан̃жа ад̇хаммигаани баад̇имогкадтабанаани . бан̃жа д̇хаммигаани баад̇имогкадтабанаанийд̇и.
22 Pañca bījajātāni – mūlabījaṃ, khandhabījaṃ, phaḷubījaṃ, aggabījaṃ, bījabījaññeva 23 pañcamaṃ. Pañcahi samaṇakappehi phalaṃ paribhuñjitabbaṃ – aggiparijitaṃ, satthaparijitaṃ, nakhaparijitaṃ, abījaṃ, nibbattabījaññeva 24 pañcamaṃ. Pañca visuddhiyo – nidānaṃ uddisitvā avasesaṃ sutena sāvetabbaṃ, ayaṃ paṭhamā visuddhi; nidānaṃ uddisitvā cattāri pārājikāni uddisitvā avasesaṃ sutena sāvetabbaṃ, ayaṃ dutiyā visuddhi; nidānaṃ uddisitvā cattāri pārājikāni uddisitvā terasa saṅghādisese uddisitvā avasesaṃ sutena sāvetabbaṃ, ayaṃ tatiyā visuddhi; nidānaṃ uddisitvā cattāri pārājikāni uddisitvā terasa saṅghādisese uddisitvā dve aniyate uddisitvā avasesaṃ sutena sāvetabbaṃ, ayaṃ catutthā visuddhi; vitthāreneva pañcamī. Aparāpi pañca visuddhiyo – suttuddeso, pārisuddhiuposatho, adhiṭṭhānuposatho, pavāraṇā, sāmaggīuposathoyeva pañcamo. Pañcānisaṃsā vinayadhare – attano sīlakkhandho sugutto hoti surakkhito, kukkuccapakatānaṃ paṭisaraṇaṃ hoti, visārado saṅghamajjhe voharati, paccatthike sahadhammena suniggahitaṃ niggaṇhāti, saddhammaṭṭhitiyā paṭipanno hoti. Pañca adhammikāni pātimokkhaṭṭhapanāni . Pañca dhammikāni pātimokkhaṭṭhapanānīti.
бан̃жагам̣ нидтид̇ам̣.
Pañcakaṃ niṭṭhitaṃ.
д̇ассуд̣̇д̣̇аанам̣ –
Tassuddānaṃ –
аабад̇д̇и аабад̇д̇игканд̇хаа, винийд̇аананд̇арзна жа;
Āpatti āpattikkhandhā, vinītānantarena ca;
буг̇г̇алаа чзд̣̇анаа жзва, аабаж̇ж̇ад̇и жа бажжаяаа.
Puggalā chedanā ceva, āpajjati ca paccayā.
на убзд̇и убзд̇и жа, габбанд̇усан̇гид̇злан̃жа;
Na upeti upeti ca, kappantusaṅkitelañca;
васам̣ б̣яасанаа самбад̣̇аа, бассад̣̇д̇хи буг̇г̇алзна жа.
Vasaṃ byasanā sampadā, passaddhi puggalena ca.
сосаанигам̣ кааяид̇ан̃жа, т̇зяяам̣ жоро жа вужжад̇и;
Sosānikaṃ khāyitañca, theyyaṃ coro ca vuccati;
ависсаж̇ж̇и авзбхан̇г̇и, гааяад̇о гааяаваажад̇о.
Avissajji avebhaṅgi, kāyato kāyavācato.
д̣̇зсанаа сан̇гхам̣ уд̣̇д̣̇зсам̣, бажжанд̇игат̇инзна жа;
Desanā saṅghaṃ uddesaṃ, paccantikathinena ca;
гаммаани яаавад̇ад̇ияам̣, баарааж̇ит̇уллад̣̇уггадам̣.
Kammāni yāvatatiyaṃ, pārājithulladukkaṭaṃ.
агаббияам̣ габбияан̃жа, абун̃н̃ад̣̇увинод̣̇аяаа;
Akappiyaṃ kappiyañca, apuññaduvinodayā;
саммаж̇ж̇аний абарз жа, бхаасам̣ аабад̇д̇имзва жа.
Sammajjanī apare ca, bhāsaṃ āpattimeva ca.
ад̇хигаран̣ам̣ вад̇т̇у н̃ад̇д̇и, аабад̇д̇аа убхаяаани жа;
Adhikaraṇaṃ vatthu ñatti, āpattā ubhayāni ca;
лахугадтамагаа зд̇з, ган̣хасуггаа виж̇аанат̇а.
Lahukaṭṭhamakā ete, kaṇhasukkā vijānatha.
аран̃н̃ам̣ бин̣д̣абаад̇ан̃жа, бам̣суругкасусаанигаа;
Araññaṃ piṇḍapātañca, paṃsurukkhasusānikā;
аб̣бхогаасо жийваран̃жа, сабад̣̇аано нисаж̇ж̇иго.
Abbhokāso cīvarañca, sapadāno nisajjiko.
сант̇ад̇и калу бажчааби, бад̇д̇абин̣д̣игамзва жа;
Santhati khalu pacchāpi, pattapiṇḍikameva ca;
убосат̇ам̣ бавааран̣ам̣, аабад̇д̇аанаабад̇д̇иби жа.
Uposathaṃ pavāraṇaṃ, āpattānāpattipi ca.
ган̣хасуггабад̣̇аа зд̇з, бхигкунийнамби д̇з д̇ат̇аа;
Kaṇhasukkapadā ete, bhikkhunīnampi te tathā;
абаасаад̣̇игабаасаад̣̇и, д̇ат̇зва абарз д̣̇увз.
Apāsādikapāsādi, tatheva apare duve.
гулуубагз ад̇ивзлам̣, б̣ийж̇ам̣ саман̣агабби жа;
Kulūpake ativelaṃ, bījaṃ samaṇakappi ca;
висуд̣̇д̇хи абарз жзва, винаяаад̇хаммигзна жа;
Visuddhi apare ceva, vinayādhammikena ca;
д̇хаммигаа жа д̇ат̇аа вуд̇д̇аа, нидтид̇аа суд̣̇д̇хибан̃жагаад̇и.
Dhammikā ca tathā vuttā, niṭṭhitā suddhipañcakāti.
Footnotes:
Related texts:
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / бариваара-адтагат̇аа • Parivāra-aṭṭhakathā / бан̃жагаваараван̣н̣анаа • Pañcakavāravaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / бан̃жагаваараван̣н̣анаа • Pañcakavāravaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / бан̃жагаваараван̣н̣анаа • Pañcakavāravaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / бан̃жагаваараван̣н̣анаа • Pañcakavāravaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / згуд̇д̇ариганаяо бан̃жагаваараван̣н̣анаа • Ekuttarikanayo pañcakavāravaṇṇanā
