| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
5. பஞ்சமனயோ அஸங்க³ஹிதேனஅஸங்க³ஹிதபத³வண்ணனா
5. Pañcamanayo asaṅgahitenaasaṅgahitapadavaṇṇanā
193. இதா³னி அஸங்க³ஹிதேன அஸங்க³ஹிதபத³ங் பா⁴ஜேதுங் ரூபக்க²ந்தே⁴னாதிஆதி³ ஆரத்³த⁴ங். தத்த² யங் க²ந்தா⁴தீ³ஹி அஸங்க³ஹிதேன க²ந்தா⁴தி³வஸேன அஸங்க³ஹிதங், புன தஸ்ஸேவ க²ந்தா⁴தீ³ஹி அஸங்க³ஹங் புச்சி²த்வா விஸ்ஸஜ்ஜனங் கதங். தங் பஞ்சக்க²ந்த⁴க்³கா³ஹகேஸு து³க்க²ஸச்சாதீ³ஸு விஞ்ஞாணேன ஸத்³தி⁴ங் ஸுகு²மரூபக்³கா³ஹகேஸு அனித³ஸ்ஸனஅப்படிகா⁴தீ³ஸு ச பதே³ஸு ந யுஜ்ஜதி. தாதி³ஸேன ஹி பதே³ன நிப்³பா³னங் க²ந்த⁴ஸங்க³ஹமத்தங் ந க³ச்செ²ய்ய. ஸேஸா க²ந்தா⁴தீ³ஹி அஸங்க³ஹிதத⁴ம்மா நாம நத்தி². தஸ்மா ததா²ரூபானி பதா³னி இமஸ்மிங் வாரே ந க³ஹிதானி. யானி பன பஞ்சக்க²ந்தே⁴ விஞ்ஞாணஞ்ச ஸுகு²மரூபேன ஸத்³தி⁴ங் ஏகதோ ந தீ³பெந்தி, தானி இத⁴ க³ஹிதானி. தேஸங் இத³முத்³தா³னங் –
193. Idāni asaṅgahitena asaṅgahitapadaṃ bhājetuṃ rūpakkhandhenātiādi āraddhaṃ. Tattha yaṃ khandhādīhi asaṅgahitena khandhādivasena asaṅgahitaṃ, puna tasseva khandhādīhi asaṅgahaṃ pucchitvā vissajjanaṃ kataṃ. Taṃ pañcakkhandhaggāhakesu dukkhasaccādīsu viññāṇena saddhiṃ sukhumarūpaggāhakesu anidassanaappaṭighādīsu ca padesu na yujjati. Tādisena hi padena nibbānaṃ khandhasaṅgahamattaṃ na gaccheyya. Sesā khandhādīhi asaṅgahitadhammā nāma natthi. Tasmā tathārūpāni padāni imasmiṃ vāre na gahitāni. Yāni pana pañcakkhandhe viññāṇañca sukhumarūpena saddhiṃ ekato na dīpenti, tāni idha gahitāni. Tesaṃ idamuddānaṃ –
‘‘ஸப்³பே³ க²ந்தா⁴ ததா²யதனதா⁴துயோ ஸச்சதோ தயோ;
‘‘Sabbe khandhā tathāyatanadhātuyo saccato tayo;
இந்த்³ரியானிபி ஸப்³பா³னி, தேவீஸதி படிச்சதோ.
Indriyānipi sabbāni, tevīsati paṭiccato.
‘‘பரதோ ஸோளஸ பதா³, தேசத்தாலீஸகங் திகே;
‘‘Parato soḷasa padā, tecattālīsakaṃ tike;
கொ³ச்ச²கே ஸத்ததி த்³வே ச, ஸத்த சூளந்தரே பதா³.
Gocchake sattati dve ca, satta cūḷantare padā.
‘‘மஹந்தரே பதா³ வுத்தா, அட்டா²ரஸ ததோ பரங்;
‘‘Mahantare padā vuttā, aṭṭhārasa tato paraṃ;
அட்டா²ரஸேவ ஞாதப்³பா³, ஸேஸா இத⁴ ந பா⁴ஸிதா’’தி.
Aṭṭhāraseva ñātabbā, sesā idha na bhāsitā’’ti.
பஞ்ஹா பனெத்த² ஸதி³ஸவிஸ்ஸஜ்ஜனானங் வஸேன ஸமோதா⁴னெத்வா கதிஹி ஸத்³தி⁴ங் ஸப்³பே³பி சதுத்திங்ஸ ஹொந்தி. தத்த² யங் புச்சா²ய உத்³த⁴டங் பத³ங், ததே³வ யேஹி க²ந்தா⁴தீ³ஹி அஸங்க³ஹிதங், தே த⁴ம்மே ஸந்தா⁴ய ஏகேன க²ந்தே⁴னாதிஆதி³ வுத்தங்.
Pañhā panettha sadisavissajjanānaṃ vasena samodhānetvā katihi saddhiṃ sabbepi catuttiṃsa honti. Tattha yaṃ pucchāya uddhaṭaṃ padaṃ, tadeva yehi khandhādīhi asaṅgahitaṃ, te dhamme sandhāya ekena khandhenātiādi vuttaṃ.
தத்ராயங் நயோ – ரூபக்க²ந்தே⁴ன ஹி சத்தாரோ க²ந்தா⁴ நிப்³பா³னஞ்ச க²ந்த⁴ஸங்க³ஹேன அஸங்க³ஹிதா. ஆயதனதா⁴துஸங்க³ஹேன பன ட²பெத்வா விஞ்ஞாணங் அவஸேஸா ஸங்க³ஹிதாதி விஞ்ஞாணமேவ தீஹிபி க²ந்த⁴ஸங்க³ஹாதீ³ஹி அஸங்க³ஹிதங் நாம. புன தேன விஞ்ஞாணேன ஸத்³தி⁴ங் நிப்³பா³னேன சத்தாரோ க²ந்தா⁴ க²ந்தா⁴தி³ஸங்க³ஹேன அஸங்க³ஹிதா. தே ஸப்³பே³பி புன விஞ்ஞாணேனேவ க²ந்தா⁴தி³ஸங்க³ஹேன அஸங்க³ஹிதாதி ஏகேன க²ந்தே⁴ன, ஏகேனாயதனேன, ஸத்தஹி தா⁴தூஹி அஸங்க³ஹிதா நாம ஹொந்தி. அத² வா – யதே³தங் ரூபக்க²ந்தே⁴ன விஞ்ஞாணமேவ தீஹி க²ந்தா⁴தி³ஸங்க³ஹேஹி அஸங்க³ஹிதங், தேஹிபி விஞ்ஞாணத⁴ம்மேஹி தே ரூபத⁴ம்மாவ தீஹி ஸங்க³ஹேஹி அஸங்க³ஹிதா. புன தே ரூபத⁴ம்மா விஞ்ஞாணேனேவ தீஹி ஸங்க³ஹேஹி அஸங்க³ஹிதா. விஞ்ஞாணஞ்ச க²ந்த⁴தோ ஏகோ விஞ்ஞாணக்க²ந்தோ⁴ ஹோதி, ஆயதனதோ ஏகங் மனாயதனங், தா⁴துதோ ஸத்த விஞ்ஞாணதா⁴துயோ. தஸ்மா ‘‘ஏகேன க²ந்தே⁴னா’’திஆதி³ வுத்தங். இமினா உபாயேன ஸப்³ப³த்த² யங் புச்சா²ய உத்³த⁴டங் பத³ங், ததே³வ யேஹி த⁴ம்மேஹி க²ந்தா⁴தி³வஸேன அஸங்க³ஹிதங், தேஸங் த⁴ம்மானங் வஸேன க²ந்தா⁴த³யோ வேதி³தப்³பா³. தத்த² து³தியபஞ்ஹே தாவ – ரூபவிஞ்ஞாணானங் வஸேன வேதி³தப்³பா³. வேத³னாத³யோ ஹி ரூபவிஞ்ஞாணேஹேவ க²ந்தா⁴தி³ஸங்க³ஹேன அஸங்க³ஹிதா. தே ச த்³வே க²ந்தா⁴ ஏகாத³ஸாயதனானி ஸத்தரஸ தா⁴துயோ ஹொந்தி.
Tatrāyaṃ nayo – rūpakkhandhena hi cattāro khandhā nibbānañca khandhasaṅgahena asaṅgahitā. Āyatanadhātusaṅgahena pana ṭhapetvā viññāṇaṃ avasesā saṅgahitāti viññāṇameva tīhipi khandhasaṅgahādīhi asaṅgahitaṃ nāma. Puna tena viññāṇena saddhiṃ nibbānena cattāro khandhā khandhādisaṅgahena asaṅgahitā. Te sabbepi puna viññāṇeneva khandhādisaṅgahena asaṅgahitāti ekena khandhena, ekenāyatanena, sattahi dhātūhi asaṅgahitā nāma honti. Atha vā – yadetaṃ rūpakkhandhena viññāṇameva tīhi khandhādisaṅgahehi asaṅgahitaṃ, tehipi viññāṇadhammehi te rūpadhammāva tīhi saṅgahehi asaṅgahitā. Puna te rūpadhammā viññāṇeneva tīhi saṅgahehi asaṅgahitā. Viññāṇañca khandhato eko viññāṇakkhandho hoti, āyatanato ekaṃ manāyatanaṃ, dhātuto satta viññāṇadhātuyo. Tasmā ‘‘ekena khandhenā’’tiādi vuttaṃ. Iminā upāyena sabbattha yaṃ pucchāya uddhaṭaṃ padaṃ, tadeva yehi dhammehi khandhādivasena asaṅgahitaṃ, tesaṃ dhammānaṃ vasena khandhādayo veditabbā. Tattha dutiyapañhe tāva – rūpaviññāṇānaṃ vasena veditabbā. Vedanādayo hi rūpaviññāṇeheva khandhādisaṅgahena asaṅgahitā. Te ca dve khandhā ekādasāyatanāni sattarasa dhātuyo honti.
195. ததியபஞ்ஹே – விஞ்ஞாணங் ரூபாதீ³ஹி சதூஹி அஸங்க³ஹிதந்தி தேஸங் வஸேன க²ந்தா⁴த³யோ வேதி³தப்³பா³.
195. Tatiyapañhe – viññāṇaṃ rūpādīhi catūhi asaṅgahitanti tesaṃ vasena khandhādayo veditabbā.
196. சதுத்த²பஞ்ஹே – சக்கா²யதனங் வேத³னாதீ³ஹி சதூஹீதி இமினா நயேன ஸப்³ப³த்த² க²ந்தா⁴த³யோ வேதி³தப்³பா³. பரியோஸானே – ரூபஞ்ச த⁴ம்மாயதனந்தி உத்³தா³னகா³தா²ய த³ஸ்ஸிதத⁴ம்மாயேவ அஞ்ஞேனாகாரேன ஸங்கி²பித்வா த³ஸ்ஸிதாதி.
196. Catutthapañhe – cakkhāyatanaṃ vedanādīhi catūhīti iminā nayena sabbattha khandhādayo veditabbā. Pariyosāne – rūpañca dhammāyatananti uddānagāthāya dassitadhammāyeva aññenākārena saṅkhipitvā dassitāti.
அஸங்க³ஹிதேனஅஸங்க³ஹிதபத³வண்ணனா.
Asaṅgahitenaasaṅgahitapadavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / தா⁴துகதா²பாளி • Dhātukathāpāḷi / 5. அஸங்க³ஹிதேனஅஸங்க³ஹிதபத³னித்³தே³ஸோ • 5. Asaṅgahitenaasaṅgahitapadaniddeso
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 5. பஞ்சமனயோ அஸங்க³ஹிதேனஅஸங்க³ஹிதபத³வண்ணனா • 5. Pañcamanayo asaṅgahitenaasaṅgahitapadavaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 5. பஞ்சமனயோ அஸங்க³ஹிதேனஅஸங்க³ஹிதபத³வண்ணனா • 5. Pañcamanayo asaṅgahitenaasaṅgahitapadavaṇṇanā
