| Library / Tipiṭaka / திபிடக • Tipiṭaka / பஞ்சபகரண-மூலடீகா • Pañcapakaraṇa-mūlaṭīkā |
5. பஞ்சமனயோ அஸங்க³ஹிதேனஅஸங்க³ஹிதபத³வண்ணனா
5. Pañcamanayo asaṅgahitenaasaṅgahitapadavaṇṇanā
193. அஸங்க³ஹிதேனஅஸங்க³ஹிதபத³னித்³தே³ஸேபி வுத்தனயேனேவ யதா²னித்³தா⁴ரிதத⁴ம்மத³ஸ்ஸனங் வேதி³தப்³ப³ங். எத்த² ச ஸஸுகு²மரூபவிஞ்ஞாணஸஹிதத⁴ம்மஸமுதா³யா யே தே து³க்க²ஸச்சஅனித³ஸ்ஸனஅப்படிக⁴அசேதஸிகானுபாதா³ஸதி³ஸா ஸதிபி ஏகேன த்³வீஹி வா ஸங்க³ஹேஹி கேஸஞ்சி அஸங்கா³ஹகத்தே தீஹிபி அஸங்க³ஹேதப்³ப³ஸ்ஸ அபா⁴வதோ பரிபுண்ணஸங்க³ஹாஸங்கா³ஹகா ந ஹொந்தி, அப்³யாகதத⁴ம்மஸதி³ஸா கேனசி ஸங்க³ஹேன அஸங்க³ஹேதப்³ப³பா⁴வதோ அஸங்கா³ஹகா ஏவ ந ஹொந்தி, தேன தே அஸங்கா³ஹகபா⁴வேன ந உத்³த⁴டா, இதரே பன தப்³பி³பரியாயேன உத்³த⁴டாதி.
193. Asaṅgahitenaasaṅgahitapadaniddesepi vuttanayeneva yathāniddhāritadhammadassanaṃ veditabbaṃ. Ettha ca sasukhumarūpaviññāṇasahitadhammasamudāyā ye te dukkhasaccaanidassanaappaṭighaacetasikānupādāsadisā satipi ekena dvīhi vā saṅgahehi kesañci asaṅgāhakatte tīhipi asaṅgahetabbassa abhāvato paripuṇṇasaṅgahāsaṅgāhakā na honti, abyākatadhammasadisā kenaci saṅgahena asaṅgahetabbabhāvato asaṅgāhakā eva na honti, tena te asaṅgāhakabhāvena na uddhaṭā, itare pana tabbipariyāyena uddhaṭāti.
யங் பன அட்ட²கதா²யங் ‘‘தாதி³ஸேன ஹி பதே³ன நிப்³பா³னங் க²ந்த⁴ஸங்க³ஹமத்தங் ந க³ச்செ²ய்யா’’தி வுத்தங், தங் து³க்க²ஸச்சங் ஸந்தா⁴ய வுத்தங். அனித³ஸ்ஸனஅப்படிகே⁴ஸு பன அஸங்கா³ஹகேஸு நிப்³பா³னங் அந்தோக³த⁴ங், ந ச ததே³வ தஸ்ஸ அஸங்கா³ஹகந்தி. ஸதி³ஸவிஸ்ஸஜ்ஜனானங் வஸேன ஸமோதா⁴னெத்வா கதேஹி ஸத்³தி⁴ந்தி ஏவங் கதேஹி து³தியபஞ்ஹாதீ³ஹி ஸத்³தி⁴ங் பட²மபஞ்ஹனாமரூபபஞ்ஹாத³யோ ஸப்³பே³பி சதுத்திங்ஸ ஹொந்தீதி அத்தோ². யங் புச்சா²ய உத்³த⁴டங் பத³ங், ததே³வாதி ரூபக்க²ந்தா⁴தி³விஸேஸகபத³ங் வத³தி, ந நித்³தா⁴ரிதே புச்சி²தப்³ப³த⁴ம்மே. தே ஹி லக்க²ணதோ த³ஸ்ஸிதா, ந பதே³ன ஸரூபதோதி. தத்த² ததே³வாதி ஏவ-ஸத்³தே³ன ந தங் கதா³சி ஸங்க³ஹிதேன அஸங்க³ஹிதங் ந ஹோதீதி உத்³த⁴டஸ்ஸேவ அஸங்க³ஹிதேனஅஸங்க³ஹிதபா⁴வே நியததங் அஞ்ஞஸ்ஸ ச அனியததங் த³ஸ்ஸேதீதி வேதி³தப்³ப³ங். ‘‘ததே³வ யேஹி அஸங்க³ஹித’’ந்தி எத்த² ஹி ‘‘நியமதோ’’தி ஸக்கா வசனஸேஸோ யோஜேதுந்தி. அத² வா ததே³வாதி புச்சா²ய உத்³த⁴டமேவ ஏவங்பகாரமேவ ஹுத்வா யேஹி அஸங்க³ஹிதந்தி தஸ்ஸ புச்சா²ய உத்³த⁴டபா⁴வேன ஏவங் அஸங்க³ஹிதேனஅஸங்க³ஹிதபா⁴வனியமனத்தோ² ஏவ-ஸத்³தோ³, ந அஞ்ஞஸ்ஸ அஸங்க³ஹிதேனஅஸங்க³ஹிததானிவாரணத்தோ²தி த³ட்ட²ப்³போ³. புச்சா²ய உத்³த⁴டஞ்ஹி அஞ்ஞஸஹிதங் அஸஹிதஞ்ச அஸங்க³ஹிதேன அஸங்க³ஹிதங் ஹோதி. ரூபக்க²ந்தா⁴தீ³னி ஹி அஞ்ஞஸஹிதானி விஞ்ஞாணக்க²ந்தா⁴தீ³னி அஸஹிதானீதி.
Yaṃ pana aṭṭhakathāyaṃ ‘‘tādisena hi padena nibbānaṃ khandhasaṅgahamattaṃ na gaccheyyā’’ti vuttaṃ, taṃ dukkhasaccaṃ sandhāya vuttaṃ. Anidassanaappaṭighesu pana asaṅgāhakesu nibbānaṃ antogadhaṃ, na ca tadeva tassa asaṅgāhakanti. Sadisavissajjanānaṃ vasena samodhānetvā katehi saddhinti evaṃ katehi dutiyapañhādīhi saddhiṃ paṭhamapañhanāmarūpapañhādayo sabbepi catuttiṃsa hontīti attho. Yaṃ pucchāya uddhaṭaṃ padaṃ, tadevāti rūpakkhandhādivisesakapadaṃ vadati, na niddhārite pucchitabbadhamme. Te hi lakkhaṇato dassitā, na padena sarūpatoti. Tattha tadevāti eva-saddena na taṃ kadāci saṅgahitena asaṅgahitaṃ na hotīti uddhaṭasseva asaṅgahitenaasaṅgahitabhāve niyatataṃ aññassa ca aniyatataṃ dassetīti veditabbaṃ. ‘‘Tadeva yehi asaṅgahita’’nti ettha hi ‘‘niyamato’’ti sakkā vacanaseso yojetunti. Atha vā tadevāti pucchāya uddhaṭameva evaṃpakārameva hutvā yehi asaṅgahitanti tassa pucchāya uddhaṭabhāvena evaṃ asaṅgahitenaasaṅgahitabhāvaniyamanattho eva-saddo, na aññassa asaṅgahitenaasaṅgahitatānivāraṇatthoti daṭṭhabbo. Pucchāya uddhaṭañhi aññasahitaṃ asahitañca asaṅgahitena asaṅgahitaṃ hoti. Rūpakkhandhādīni hi aññasahitāni viññāṇakkhandhādīni asahitānīti.
அவஸேஸா ஸங்க³ஹிதாதி இத³ங் அவஸேஸா அஸங்க³ஹிதா ந ஹொந்தீதி ஏவங் த³ட்ட²ப்³ப³ங். தேஹிபி விஞ்ஞாணத⁴ம்மேஹி தே ரூபத⁴ம்மாவ தீஹி ஸங்க³ஹேஹி அஸங்க³ஹிதாதி புச்சா²ய உத்³த⁴டா தீஹிபி ஸங்க³ஹேஹி அஸங்கா³ஹகா ஹுத்வா அஸங்க³ஹிதாதி அதி⁴ப்பாயோ. அனுத்³த⁴டா வேத³னாத³யோபி ஹி அஸங்க³ஹிதா ஏவாதி. எத்த² ச பட²மே நயே வேத³னாத³யோபி விஞ்ஞாணேன அஸங்க³ஹிதாதி வுத்தா, து³தியே ரூபத⁴ம்மாவாதி அயங் விஸேஸோ. வேத³னாத³யோ ஹி ரூபவிஞ்ஞாணேஹேவ க²ந்தா⁴தி³ஸங்க³ஹேன அஸங்க³ஹிதாதி ஓளாரிகரூபேஹி விஞ்ஞாணேன ச தீஹிபி ஸங்க³ஹேஹி அஸங்க³ஹிதாதி அத்தோ². ரூபேகதே³ஸோ ஹி எத்த² ரூபக்³க³ஹணேன க³ஹிதோதி.
Avasesā saṅgahitāti idaṃ avasesā asaṅgahitā na hontīti evaṃ daṭṭhabbaṃ. Tehipi viññāṇadhammehi te rūpadhammāva tīhi saṅgahehi asaṅgahitāti pucchāya uddhaṭā tīhipi saṅgahehi asaṅgāhakā hutvā asaṅgahitāti adhippāyo. Anuddhaṭā vedanādayopi hi asaṅgahitā evāti. Ettha ca paṭhame naye vedanādayopi viññāṇena asaṅgahitāti vuttā, dutiye rūpadhammāvāti ayaṃ viseso. Vedanādayo hi rūpaviññāṇeheva khandhādisaṅgahena asaṅgahitāti oḷārikarūpehi viññāṇena ca tīhipi saṅgahehi asaṅgahitāti attho. Rūpekadeso hi ettha rūpaggahaṇena gahitoti.
196. சதுத்த²பஞ்ஹே சக்கா²யதனங் வேத³னாதீ³ஹி சதூஹீதி எத்த² சக்கா²யதனந்தி ஏதேன புச்சா²ய உத்³த⁴டங் அஸங்கா³ஹகங் த³ஸ்ஸேதீதி த³ட்ட²ப்³ப³ங். சக்கா²யதனேன பன அஸங்க³ஹிதேன அஸங்க³ஹிதானி த³ஸ ஓளாரிகாயதனானி ந சக்கா²யதனமேவாதி. ‘‘ரூபஞ்ச த⁴ம்மாயதன’’ந்திஆதி³னா யேஹி த⁴ம்மேஹி தீஹிபி ஸங்க³ஹேஹி அஸங்க³ஹிதங் தங் விஞ்ஞாணமேவ ஹோதி, அஸங்க³ஹிதேன தேன அஸங்க³ஹிதஞ்ச விஞ்ஞாணவஜ்ஜங் ஸப்³ப³ங் தேவ த⁴ம்மே உதா³னேதி. ஸதி³ஸவிஸ்ஸஜ்ஜனா ஹி ஏகதோ உதா³னெத்வா த³ஸ்ஸேதப்³பா³. தத்த² பட²மேன ரூபக்க²ந்தே⁴ன ஸதி³ஸவிஸ்ஸஜ்ஜனேஸு ஏகதோ உதா³னெத்வா த³ஸ்ஸிதேஸு அஞ்ஞே விஸதி³ஸவிஸ்ஸஜ்ஜனா நயதா³னேன த³ஸ்ஸிதா ஹொந்தி. தேனாஹ ‘‘ரூபஞ்ச த⁴ம்மாயதனந்தி…பே॰… அஞ்ஞேனாகாரேன ஸங்கி²பித்வா த³ஸ்ஸிதா’’தி. தத்த² த்³வே ப⁴வாதி அஸஞ்ஞேகவோகாரப⁴வா. த்³வேதி பா³ஹிருபாதா³த⁴ம்மே ஏவ ஸந்தா⁴ய வுத்தங். யேன அஸங்கா³ஹகேன அஸங்க³ஹிதேன அஸங்க³ஹிதங் புச்சி²தப்³ப³ங் விஸ்ஸஜ்ஜிதப்³ப³ஞ்ச பரிச்சி²ஜ்ஜதி, ஸோ ரூபக்க²ந்தா⁴தி³கோ தஸ்ஸ புச்சா²விஸ்ஸஜ்ஜனானஞ்ச நிஸ்ஸயபா⁴வதோ ‘‘விஸயோ’’தி வுத்தோ, யதா²த³ஸ்ஸிதஸ்ஸ பன உத்³தா³னஸ்ஸ நயதா³னமத்தத்தா ‘‘நயோ’’தி வுத்தங். ‘‘த்³வேவீஸனயோ சா’’திபி பாடோ², த்³வேவீஸபதி³கோ ஏஸ நயோ சாதி அத்தோ².
196. Catutthapañhe cakkhāyatanaṃ vedanādīhi catūhīti ettha cakkhāyatananti etena pucchāya uddhaṭaṃ asaṅgāhakaṃ dassetīti daṭṭhabbaṃ. Cakkhāyatanena pana asaṅgahitena asaṅgahitāni dasa oḷārikāyatanāni na cakkhāyatanamevāti. ‘‘Rūpañca dhammāyatana’’ntiādinā yehi dhammehi tīhipi saṅgahehi asaṅgahitaṃ taṃ viññāṇameva hoti, asaṅgahitena tena asaṅgahitañca viññāṇavajjaṃ sabbaṃ teva dhamme udāneti. Sadisavissajjanā hi ekato udānetvā dassetabbā. Tattha paṭhamena rūpakkhandhena sadisavissajjanesu ekato udānetvā dassitesu aññe visadisavissajjanā nayadānena dassitā honti. Tenāha ‘‘rūpañca dhammāyatananti…pe… aññenākārena saṅkhipitvā dassitā’’ti. Tattha dve bhavāti asaññekavokārabhavā. Dveti bāhirupādādhamme eva sandhāya vuttaṃ. Yena asaṅgāhakena asaṅgahitena asaṅgahitaṃ pucchitabbaṃ vissajjitabbañca paricchijjati, so rūpakkhandhādiko tassa pucchāvissajjanānañca nissayabhāvato ‘‘visayo’’ti vutto, yathādassitassa pana uddānassa nayadānamattattā ‘‘nayo’’ti vuttaṃ. ‘‘Dvevīsanayo cā’’tipi pāṭho, dvevīsapadiko esa nayo cāti attho.
பஞ்சமனயஅஸங்க³ஹிதேனஅஸங்க³ஹிதபத³வண்ணனா நிட்டி²தா.
Pañcamanayaasaṅgahitenaasaṅgahitapadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / தா⁴துகதா²பாளி • Dhātukathāpāḷi / 5. அஸங்க³ஹிதேனஅஸங்க³ஹிதபத³னித்³தே³ஸோ • 5. Asaṅgahitenaasaṅgahitapadaniddeso
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 5. பஞ்சமனயோ அஸங்க³ஹிதேனஅஸங்க³ஹிதபத³வண்ணனா • 5. Pañcamanayo asaṅgahitenaasaṅgahitapadavaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 5. பஞ்சமனயோ அஸங்க³ஹிதேனஅஸங்க³ஹிதபத³வண்ணனா • 5. Pañcamanayo asaṅgahitenaasaṅgahitapadavaṇṇanā
