| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
5. பஞ்சமஸங்கா⁴தி³ஸேஸஸிக்கா²பத³ங்
5. Pañcamasaṅghādisesasikkhāpadaṃ
699. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸுந்த³ரீனந்தா³ பி⁴க்கு²னீ அபி⁴ரூபா ஹோதி த³ஸ்ஸனீயா பாஸாதி³கா. மனுஸ்ஸா ப⁴த்தக்³கே³ ஸுந்த³ரீனந்த³ங் பி⁴க்கு²னிங் பஸ்ஸித்வா அவஸ்ஸுதா அவஸ்ஸுதாய ஸுந்த³ரீனந்தா³ய பி⁴க்கு²னியா அக்³க³மக்³கா³னி போ⁴ஜனானி தெ³ந்தி. ஸுந்த³ரீனந்தா³ பி⁴க்கு²னீ யாவத³த்த²ங் பு⁴ஞ்ஜதி; அஞ்ஞா பி⁴க்கு²னியோ ந சித்தரூபங் லப⁴ந்தி. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அய்யா ஸுந்த³ரீனந்தா³ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ ஹத்த²தோ கா²த³னீயங் வா போ⁴ஜனீயங் வா ஸஹத்தா² படிக்³க³ஹெத்வா கா²தி³ஸ்ஸதி பு⁴ஞ்ஜிஸ்ஸதீ’’தி…பே॰… ஸச்சங் கிர, பி⁴க்க²வே, ஸுந்த³ரீனந்தா³ பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ ஹத்த²தோ கா²த³னீயங் வா போ⁴ஜனீயங் வா ஸஹத்தா² படிக்³க³ஹெத்வா கா²த³தி பு⁴ஞ்ஜதீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, ஸுந்த³ரீனந்தா³ பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ ஹத்த²தோ கா²த³னீயங் வா போ⁴ஜனீயங் வா ஸஹத்தா² படிக்³க³ஹெத்வா கா²தி³ஸ்ஸதி பு⁴ஞ்ஜிஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
699. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sundarīnandā bhikkhunī abhirūpā hoti dassanīyā pāsādikā. Manussā bhattagge sundarīnandaṃ bhikkhuniṃ passitvā avassutā avassutāya sundarīnandāya bhikkhuniyā aggamaggāni bhojanāni denti. Sundarīnandā bhikkhunī yāvadatthaṃ bhuñjati; aññā bhikkhuniyo na cittarūpaṃ labhanti. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā sundarīnandā avassutā avassutassa purisapuggalassa hatthato khādanīyaṃ vā bhojanīyaṃ vā sahatthā paṭiggahetvā khādissati bhuñjissatī’’ti…pe… saccaṃ kira, bhikkhave, sundarīnandā bhikkhunī avassutā avassutassa purisapuggalassa hatthato khādanīyaṃ vā bhojanīyaṃ vā sahatthā paṭiggahetvā khādati bhuñjatīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, sundarīnandā bhikkhunī avassutā avassutassa purisapuggalassa hatthato khādanīyaṃ vā bhojanīyaṃ vā sahatthā paṭiggahetvā khādissati bhuñjissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
700. ‘‘யா பன பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ ஹத்த²தோ கா²த³னீயங் வா போ⁴ஜனீயங் வா ஸஹத்தா² படிக்³க³ஹெத்வா கா²தெ³ய்ய வா பு⁴ஞ்ஜெய்ய வா, அயம்பி பி⁴க்கு²னீ பட²மாபத்திகங் த⁴ம்மங் ஆபன்னா நிஸ்ஸாரணீயங் ஸங்கா⁴தி³ஸேஸ’’ந்தி.
700.‘‘Yāpana bhikkhunī avassutā avassutassa purisapuggalassa hatthato khādanīyaṃ vā bhojanīyaṃ vā sahatthā paṭiggahetvā khādeyya vā bhuñjeyya vā, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesa’’nti.
701. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
701.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
அவஸ்ஸுதா நாம ஸாரத்தா அபெக்க²வதீ படிப³த்³த⁴சித்தா.
Avassutā nāma sārattā apekkhavatī paṭibaddhacittā.
அவஸ்ஸுதோ நாம ஸாரத்தோ அபெக்க²வா படிப³த்³த⁴சித்தோ.
Avassuto nāma sāratto apekkhavā paṭibaddhacitto.
புரிஸபுக்³க³லோ நாம மனுஸ்ஸபுரிஸோ, ந யக்கோ² ந பேதோ ந திரச்சா²னக³தோ, விஞ்ஞூ படிப³லோ ஸாரஜ்ஜிதுங்.
Purisapuggalo nāma manussapuriso, na yakkho na peto na tiracchānagato, viññū paṭibalo sārajjituṃ.
கா²த³னீயங் நாம பஞ்ச போ⁴ஜனானி – உத³கத³ந்தபோனங் ட²பெத்வா அவஸேஸங் கா²த³னீயங் நாம.
Khādanīyaṃ nāma pañca bhojanāni – udakadantaponaṃ ṭhapetvā avasesaṃ khādanīyaṃ nāma.
போ⁴ஜனீயங் நாம பஞ்ச போ⁴ஜனானி – ஓத³னோ, கும்மாஸோ, ஸத்து, மச்சோ², மங்ஸங்.
Bhojanīyaṃ nāma pañca bhojanāni – odano, kummāso, sattu, maccho, maṃsaṃ.
‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து²ல்லச்சயஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி ஸங்கா⁴தி³ஸேஸஸ்ஸ.
‘‘Khādissāmi bhuñjissāmī’’ti paṭiggaṇhāti, āpatti thullaccayassa. Ajjhohāre ajjhohāre āpatti saṅghādisesassa.
அயம்பீதி புரிமாயோ உபாதா³ய வுச்சதி.
Ayampīti purimāyo upādāya vuccati.
பட²மாபத்திகந்தி ஸஹ வத்து²ஜ்ஜா²சாரா ஆபஜ்ஜதி அஸமனுபா⁴ஸனாய.
Paṭhamāpattikanti saha vatthujjhācārā āpajjati asamanubhāsanāya.
நிஸ்ஸாரணீயந்தி ஸங்க⁴ம்ஹா நிஸ்ஸாரீயதி.
Nissāraṇīyanti saṅghamhā nissārīyati.
ஸங்கா⁴தி³ஸேஸோதி…பே॰… தேனபி வுச்சதி ஸங்கா⁴தி³ஸேஸோதி.
Saṅghādisesoti…pe… tenapi vuccati saṅghādisesoti.
உத³கத³ந்தபோனங் படிக்³க³ண்ஹாதி, ஆபத்தி து³க்கடஸ்ஸ. ஏகதோஅவஸ்ஸுதே ‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ.
Udakadantaponaṃ paṭiggaṇhāti, āpatti dukkaṭassa. Ekatoavassute ‘‘khādissāmi bhuñjissāmī’’ti paṭiggaṇhāti, āpatti dukkaṭassa.
702. அஜ்ஜோ²ஹாரே அஜ்ஜோ²ஹாரே ஆபத்தி து²ல்லச்சயஸ்ஸ. உத³கத³ந்தபோனங் படிக்³க³ண்ஹாதி, ஆபத்தி து³க்கடஸ்ஸ. உப⁴தோஅவஸ்ஸுதே யக்க²ஸ்ஸ வா பேதஸ்ஸ வா பண்ட³கஸ்ஸ வா திரச்சா²னக³தமனுஸ்ஸவிக்³க³ஹஸ்ஸ வா ஹத்த²தோ ‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி து²ல்லச்சயஸ்ஸ. உத³கத³ந்தபோனங் படிக்³க³ண்ஹாதி, ஆபத்தி து³க்கடஸ்ஸ. ஏகதோஅவஸ்ஸுதே ‘‘கா²தி³ஸ்ஸாமி பு⁴ஞ்ஜிஸ்ஸாமீ’’தி படிக்³க³ண்ஹாதி, ஆபத்தி து³க்கடஸ்ஸ. அஜ்ஜோ²ஹாரே அஜ்ஜோ²ஹாரே ஆபத்தி து³க்கடஸ்ஸ. உத³கத³ந்தபோனங் படிக்³க³ண்ஹாதி, ஆபத்தி து³க்கடஸ்ஸ.
702. Ajjhohāre ajjhohāre āpatti thullaccayassa. Udakadantaponaṃ paṭiggaṇhāti, āpatti dukkaṭassa. Ubhatoavassute yakkhassa vā petassa vā paṇḍakassa vā tiracchānagatamanussaviggahassa vā hatthato ‘‘khādissāmi bhuñjissāmī’’ti paṭiggaṇhāti, āpatti dukkaṭassa. Ajjhohāre ajjhohāre āpatti thullaccayassa. Udakadantaponaṃ paṭiggaṇhāti, āpatti dukkaṭassa. Ekatoavassute ‘‘khādissāmi bhuñjissāmī’’ti paṭiggaṇhāti, āpatti dukkaṭassa. Ajjhohāre ajjhohāre āpatti dukkaṭassa. Udakadantaponaṃ paṭiggaṇhāti, āpatti dukkaṭassa.
703. அனாபத்தி உப⁴தோஅனவஸ்ஸுதா ஹொந்தி, ‘‘அனவஸ்ஸுதோ’’தி ஜானந்தீ படிக்³க³ண்ஹாதி, உம்மத்திகாய, ஆதி³கம்மிகாயாதி.
703. Anāpatti ubhatoanavassutā honti, ‘‘anavassuto’’ti jānantī paṭiggaṇhāti, ummattikāya, ādikammikāyāti.
பஞ்சமஸங்கா⁴தி³ஸேஸஸிக்கா²பத³ங் நிட்டி²தங்.
Pañcamasaṅghādisesasikkhāpadaṃ niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 5. பஞ்சமஸங்கா⁴தி³ஸேஸஸிக்கா²பத³வண்ணனா • 5. Pañcamasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 5. பஞ்சமஸங்கா⁴தி³ஸேஸஸிக்கா²பத³வண்ணனா • 5. Pañcamasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 5. பஞ்சமஸங்கா⁴தி³ஸேஸஸிக்கா²பத³வண்ணனா • 5. Pañcamasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 5. பஞ்சமஸங்கா⁴தி³ஸேஸஸிக்கா²பத³வண்ணனா • 5. Pañcamasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 5. பஞ்சமஸங்கா⁴தி³ஸேஸஸிக்கா²பத³ங் • 5. Pañcamasaṅghādisesasikkhāpadaṃ
