| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
5. පඤ්‌චමසඞ්‌ඝාදිසෙසසික්‌ඛාපදං
5. Pañcamasaṅghādisesasikkhāpadaṃ
699. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන සුන්‌දරීනන්‌දා භික්‌ඛුනී අභිරූපා හොති දස්‌සනීයා පාසාදිකා. මනුස්‌සා භත්‌තග්‌ගෙ සුන්‌දරීනන්‌දං භික්‌ඛුනිං පස්‌සිත්‌වා අවස්‌සුතා අවස්‌සුතාය සුන්‌දරීනන්‌දාය භික්‌ඛුනියා අග්‌ගමග්‌ගානි භොජනානි දෙන්‌ති. සුන්‌දරීනන්‌දා භික්‌ඛුනී යාවදත්‌ථං භුඤ්‌ජති; අඤ්‌ඤා භික්‌ඛුනියො න චිත්‌තරූපං ලභන්‌ති. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම අය්‍යා සුන්‌දරීනන්‌දා අවස්‌සුතා අවස්‌සුතස්‌ස පුරිසපුග්‌ගලස්‌ස හත්‌ථතො ඛාදනීයං වා භොජනීයං වා සහත්‌ථා පටිග්‌ගහෙත්‌වා ඛාදිස්‌සති භුඤ්‌ජිස්‌සතී’’ති…පෙ.… සච්‌චං කිර, භික්‌ඛවෙ, සුන්‌දරීනන්‌දා භික්‌ඛුනී අවස්‌සුතා අවස්‌සුතස්‌ස පුරිසපුග්‌ගලස්‌ස හත්‌ථතො ඛාදනීයං වා භොජනීයං වා සහත්‌ථා පටිග්‌ගහෙත්‌වා ඛාදති භුඤ්‌ජතීති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, සුන්‌දරීනන්‌දා භික්‌ඛුනී අවස්‌සුතා අවස්‌සුතස්‌ස පුරිසපුග්‌ගලස්‌ස හත්‌ථතො ඛාදනීයං වා භොජනීයං වා සහත්‌ථා පටිග්‌ගහෙත්‌වා ඛාදිස්‌සති භුඤ්‌ජිස්‌සති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
699. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sundarīnandā bhikkhunī abhirūpā hoti dassanīyā pāsādikā. Manussā bhattagge sundarīnandaṃ bhikkhuniṃ passitvā avassutā avassutāya sundarīnandāya bhikkhuniyā aggamaggāni bhojanāni denti. Sundarīnandā bhikkhunī yāvadatthaṃ bhuñjati; aññā bhikkhuniyo na cittarūpaṃ labhanti. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā sundarīnandā avassutā avassutassa purisapuggalassa hatthato khādanīyaṃ vā bhojanīyaṃ vā sahatthā paṭiggahetvā khādissati bhuñjissatī’’ti…pe… saccaṃ kira, bhikkhave, sundarīnandā bhikkhunī avassutā avassutassa purisapuggalassa hatthato khādanīyaṃ vā bhojanīyaṃ vā sahatthā paṭiggahetvā khādati bhuñjatīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, sundarīnandā bhikkhunī avassutā avassutassa purisapuggalassa hatthato khādanīyaṃ vā bhojanīyaṃ vā sahatthā paṭiggahetvā khādissati bhuñjissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
700. ‘‘යා පන භික්‌ඛුනී අවස්‌සුතා අවස්‌සුතස්‌ස පුරිසපුග්‌ගලස්‌ස හත්‌ථතො ඛාදනීයං වා භොජනීයං වා සහත්‌ථා පටිග්‌ගහෙත්‌වා ඛාදෙය්‍ය වා භුඤ්‌ජෙය්‍ය වා, අයම්‌පි භික්‌ඛුනී පඨමාපත්‌තිකං ධම්‌මං ආපන්‌නා නිස්‌සාරණීයං සඞ්‌ඝාදිසෙස’’න්‌ති.
700.‘‘Yāpana bhikkhunī avassutā avassutassa purisapuggalassa hatthato khādanīyaṃ vā bhojanīyaṃ vā sahatthā paṭiggahetvā khādeyya vā bhuñjeyya vā, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesa’’nti.
701. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
701.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
අවස්‌සුතා නාම සාරත්‌තා අපෙක්‌ඛවතී පටිබද්‌ධචිත්‌තා.
Avassutā nāma sārattā apekkhavatī paṭibaddhacittā.
අවස්‌සුතො නාම සාරත්‌තො අපෙක්‌ඛවා පටිබද්‌ධචිත්‌තො.
Avassuto nāma sāratto apekkhavā paṭibaddhacitto.
පුරිසපුග්‌ගලො නාම මනුස්‌සපුරිසො, න යක්‌ඛො න පෙතො න තිරච්‌ඡානගතො, විඤ්‌ඤූ පටිබලො සාරජ්‌ජිතුං.
Purisapuggalo nāma manussapuriso, na yakkho na peto na tiracchānagato, viññū paṭibalo sārajjituṃ.
ඛාදනීයං නාම පඤ්‌ච භොජනානි – උදකදන්‌තපොනං ඨපෙත්‌වා අවසෙසං ඛාදනීයං නාම.
Khādanīyaṃ nāma pañca bhojanāni – udakadantaponaṃ ṭhapetvā avasesaṃ khādanīyaṃ nāma.
භොජනීයං නාම පඤ්‌ච භොජනානි – ඔදනො, කුම්‌මාසො, සත්‌තු, මච්‌ඡො, මංසං.
Bhojanīyaṃ nāma pañca bhojanāni – odano, kummāso, sattu, maccho, maṃsaṃ.
‘‘ඛාදිස්‌සාමි භුඤ්‌ජිස්‌සාමී’’ති පටිග්‌ගණ්‌හාති, ආපත්‌ති ථුල්‌ලච්‌චයස්‌ස. අජ්‌ඣොහාරෙ අජ්‌ඣොහාරෙ ආපත්‌ති සඞ්‌ඝාදිසෙසස්‌ස.
‘‘Khādissāmi bhuñjissāmī’’ti paṭiggaṇhāti, āpatti thullaccayassa. Ajjhohāre ajjhohāre āpatti saṅghādisesassa.
අයම්‌පීති පුරිමායො උපාදාය වුච්‌චති.
Ayampīti purimāyo upādāya vuccati.
පඨමාපත්‌තිකන්‌ති සහ වත්‌ථුජ්‌ඣාචාරා ආපජ්‌ජති අසමනුභාසනාය.
Paṭhamāpattikanti saha vatthujjhācārā āpajjati asamanubhāsanāya.
නිස්‌සාරණීයන්‌ති සඞ්‌ඝම්‌හා නිස්‌සාරීයති.
Nissāraṇīyanti saṅghamhā nissārīyati.
සඞ්‌ඝාදිසෙසොති…පෙ.… තෙනපි වුච්‌චති සඞ්‌ඝාදිසෙසොති.
Saṅghādisesoti…pe… tenapi vuccati saṅghādisesoti.
උදකදන්‌තපොනං පටිග්‌ගණ්‌හාති, ආපත්‌ති දුක්‌කටස්‌ස. එකතොඅවස්‌සුතෙ ‘‘ඛාදිස්‌සාමි භුඤ්‌ජිස්‌සාමී’’ති පටිග්‌ගණ්‌හාති, ආපත්‌ති දුක්‌කටස්‌ස.
Udakadantaponaṃ paṭiggaṇhāti, āpatti dukkaṭassa. Ekatoavassute ‘‘khādissāmi bhuñjissāmī’’ti paṭiggaṇhāti, āpatti dukkaṭassa.
702. අජ්‌ඣොහාරෙ අජ්‌ඣොහාරෙ ආපත්‌ති ථුල්‌ලච්‌චයස්‌ස. උදකදන්‌තපොනං පටිග්‌ගණ්‌හාති, ආපත්‌ති දුක්‌කටස්‌ස. උභතොඅවස්‌සුතෙ යක්‌ඛස්‌ස වා පෙතස්‌ස වා පණ්‌ඩකස්‌ස වා තිරච්‌ඡානගතමනුස්‌සවිග්‌ගහස්‌ස වා හත්‌ථතො ‘‘ඛාදිස්‌සාමි භුඤ්‌ජිස්‌සාමී’’ති පටිග්‌ගණ්‌හාති, ආපත්‌ති දුක්‌කටස්‌ස. අජ්‌ඣොහාරෙ අජ්‌ඣොහාරෙ ආපත්‌ති ථුල්‌ලච්‌චයස්‌ස. උදකදන්‌තපොනං පටිග්‌ගණ්‌හාති, ආපත්‌ති දුක්‌කටස්‌ස. එකතොඅවස්‌සුතෙ ‘‘ඛාදිස්‌සාමි භුඤ්‌ජිස්‌සාමී’’ති පටිග්‌ගණ්‌හාති, ආපත්‌ති දුක්‌කටස්‌ස. අජ්‌ඣොහාරෙ අජ්‌ඣොහාරෙ ආපත්‌ති දුක්‌කටස්‌ස. උදකදන්‌තපොනං පටිග්‌ගණ්‌හාති, ආපත්‌ති දුක්‌කටස්‌ස.
702. Ajjhohāre ajjhohāre āpatti thullaccayassa. Udakadantaponaṃ paṭiggaṇhāti, āpatti dukkaṭassa. Ubhatoavassute yakkhassa vā petassa vā paṇḍakassa vā tiracchānagatamanussaviggahassa vā hatthato ‘‘khādissāmi bhuñjissāmī’’ti paṭiggaṇhāti, āpatti dukkaṭassa. Ajjhohāre ajjhohāre āpatti thullaccayassa. Udakadantaponaṃ paṭiggaṇhāti, āpatti dukkaṭassa. Ekatoavassute ‘‘khādissāmi bhuñjissāmī’’ti paṭiggaṇhāti, āpatti dukkaṭassa. Ajjhohāre ajjhohāre āpatti dukkaṭassa. Udakadantaponaṃ paṭiggaṇhāti, āpatti dukkaṭassa.
703. අනාපත්‌ති උභතොඅනවස්‌සුතා හොන්‌ති, ‘‘අනවස්‌සුතො’’ති ජානන්‌තී පටිග්‌ගණ්‌හාති, උම්‌මත්‌තිකාය, ආදිකම්‌මිකායාති.
703. Anāpatti ubhatoanavassutā honti, ‘‘anavassuto’’ti jānantī paṭiggaṇhāti, ummattikāya, ādikammikāyāti.
පඤ්‌චමසඞ්‌ඝාදිසෙසසික්‌ඛාපදං නිට්‌ඨිතං.
Pañcamasaṅghādisesasikkhāpadaṃ niṭṭhitaṃ.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 5. පඤ්‌චමසඞ්‌ඝාදිසෙසසික්‌ඛාපදවණ්‌ණනා • 5. Pañcamasaṅghādisesasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 5. පඤ්‌චමසඞ්‌ඝාදිසෙසසික්‌ඛාපදවණ්‌ණනා • 5. Pañcamasaṅghādisesasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 5. පඤ්‌චමසඞ්‌ඝාදිසෙසසික්‌ඛාපදවණ්‌ණනා • 5. Pañcamasaṅghādisesasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 5. පඤ්‌චමසඞ්‌ඝාදිසෙසසික්‌ඛාපදවණ්‌ණනා • 5. Pañcamasaṅghādisesasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 5. පඤ්‌චමසඞ්‌ඝාදිසෙසසික්‌ඛාපදං • 5. Pañcamasaṅghādisesasikkhāpadaṃ
