| Library / Tipiṭaka / ཏིཔིཊཀ • Tipiṭaka / སཱརཏྠདཱིཔནཱི-ཊཱིཀཱ • Sāratthadīpanī-ṭīkā |
༥. པཉྩམསངྒྷཱདིསེསསིཀྑཱཔདཝཎྞནཱ
5. Pañcamasaṅghādisesasikkhāpadavaṇṇanā
༧༠༡. པཉྩམེ ཨེཏཾ ན ཝུཏྟནྟི ‘‘བྷིཀྑུནིཡཱ ཨཝསྶུཏབྷཱཝོ དཊྛབྦོ’’ཏི ཨེཏཾ ནིཡམནཾ ན ཝུཏྟཾ། ཏནྟི ཏཾ ནིཡམེཏྭཱ ཨཝཙནཾ། པཱལི༹ཡཱ སམེཏཱིཏི ‘‘ཨེཀཏོ ཨཝསྶུཏེ’’ཏི ཨཝིསེསེཏྭཱ ཝུཏྟཔཱལི༹ཡཱ ‘‘ཨནཝསྶུཏོཏི ཛཱནནྟཱི པཊིགྒཎྷཱཏཱི’’ཏི ཨིམཱཡ ཙ པཱལི༹ཡཱ སམེཏི། ཡདི ཧི པུགྒལསྶ ཨཝསྶུཏབྷཱཝོ ནཔྤམཱཎཾ, ཀིཾ ‘‘ཨནཝསྶུཏོཏི ཛཱནནྟཱི’’ཏི ཨིམིནཱ ཝཙནེན, ‘‘ཨནཱཔཏྟི ཨུབྷཏོཨནཝསྶུཏཱ ཧོནྟི, ཨནཝསྶུཏཱ པཊིགྒཎྷཱཏཱི’’ཏི ཨེཏྟཀམེཝ ཝཏྟབྦཾ སིཡཱ། ‘‘ཨུབྷཏོཨནཝསྶུཏཱ ཧོནྟི, ཨནཝསྶུཏོཏི ཛཱནནྟཱི པཊིགྒཎྷཱཏཱི’’ཏི ཨིམསྶ ཙ ཨནཱཔཏྟིཝཱརསྶ ཨཡམཏྠོ། ཨུབྷོ ཙེ ཨནཝསྶུཏཱ, སབྦཐཱཔི ཨནཱཔཏྟི། ཨཐ བྷིཀྑུནཱི ཨནཝསྶུཏཱ སམཱནཱ ཨཝསྶུཏམྤི ‘‘ཨནཝསྶུཏོ’’ཏི སཉྙཱཡ ཏསྶ ཧཏྠཏོ པཊིགྒཎྷཱཏི, ཨེཝམྤི ཨནཱཔཏྟི། ཨཐ སཡཾ ཨནཝསྶུཏཱཔི ཨཉྙཾ ཨནཝསྶུཏཾ ཝཱ ཨཝསྶུཏཾ ཝཱ ‘‘ཨཝསྶུཏོ’’ཏི ཛཱནཱཏི, དུཀྐཊམེཝ། ཝུཏྟཉྷེཏཾ ཨནནྟརསིཀྑཱཔདེ ‘‘ཀིསྶ ཏྭཾ ཨཡྻེ ན པཊིགྒཎྷཱསཱིཏི། ཨཝསྶུཏཱ ཨཡྻེཏི། ཏྭཾ པན ཨཡྻེ ཨཝསྶུཏཱཏི། ནཱཧཾ ཨཡྻེ ཨཝསྶུཏཱ’’ཏི། སེསམེཏྠ ཨུཏྟཱནམེཝ། ཨུདཀདནྟཔོནཏོ ཨཉྙཾ ཨཛ྄ཛྷོཧརཎཱིཡཾ, ཨུབྷཏོཨཝསྶུཏཏཱ, སཧཏྠཱ གཧཎཾ, ཨཛ྄ཛྷོཧརཎནྟི ཨིམཱནི པནེཏྠ ཙཏྟཱརི ཨངྒཱནི།
701. Pañcame etaṃ na vuttanti ‘‘bhikkhuniyā avassutabhāvo daṭṭhabbo’’ti etaṃ niyamanaṃ na vuttaṃ. Tanti taṃ niyametvā avacanaṃ. Pāḷiyā sametīti ‘‘ekato avassute’’ti avisesetvā vuttapāḷiyā ‘‘anavassutoti jānantī paṭiggaṇhātī’’ti imāya ca pāḷiyā sameti. Yadi hi puggalassa avassutabhāvo nappamāṇaṃ, kiṃ ‘‘anavassutoti jānantī’’ti iminā vacanena, ‘‘anāpatti ubhatoanavassutā honti, anavassutā paṭiggaṇhātī’’ti ettakameva vattabbaṃ siyā. ‘‘Ubhatoanavassutā honti, anavassutoti jānantī paṭiggaṇhātī’’ti imassa ca anāpattivārassa ayamattho. Ubho ce anavassutā, sabbathāpi anāpatti. Atha bhikkhunī anavassutā samānā avassutampi ‘‘anavassuto’’ti saññāya tassa hatthato paṭiggaṇhāti, evampi anāpatti. Atha sayaṃ anavassutāpi aññaṃ anavassutaṃ vā avassutaṃ vā ‘‘avassuto’’ti jānāti, dukkaṭameva. Vuttañhetaṃ anantarasikkhāpade ‘‘kissa tvaṃ ayye na paṭiggaṇhāsīti. Avassutā ayyeti. Tvaṃ pana ayye avassutāti. Nāhaṃ ayye avassutā’’ti. Sesamettha uttānameva. Udakadantaponato aññaṃ ajjhoharaṇīyaṃ, ubhatoavassutatā, sahatthā gahaṇaṃ, ajjhoharaṇanti imāni panettha cattāri aṅgāni.
པཉྩམསངྒྷཱདིསེསསིཀྑཱཔདཝཎྞནཱ ནིཊྛིཏཱ།
Pañcamasaṅghādisesasikkhāpadavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / བྷིཀྑུནཱིཝིབྷངྒ • Bhikkhunīvibhaṅga / ༥. པཉྩམསངྒྷཱདིསེསསིཀྑཱཔདཾ • 5. Pañcamasaṅghādisesasikkhāpadaṃ
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༥. པཉྩམསངྒྷཱདིསེསསིཀྑཱཔདཝཎྞནཱ • 5. Pañcamasaṅghādisesasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༥. པཉྩམསངྒྷཱདིསེསསིཀྑཱཔདཝཎྞནཱ • 5. Pañcamasaṅghādisesasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༥. པཉྩམསངྒྷཱདིསེསསིཀྑཱཔདཝཎྞནཱ • 5. Pañcamasaṅghādisesasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༥. པཉྩམསངྒྷཱདིསེསསིཀྑཱཔདཾ • 5. Pañcamasaṅghādisesasikkhāpadaṃ
