| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
5. பஞ்சமஸிக்கா²பத³ங்
5. Pañcamasikkhāpadaṃ
753. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன து²ல்லனந்தா³ பி⁴க்கு²னீ கி³லானா ஹோதி. அத² கோ² அஞ்ஞதரோ உபாஸகோ யேன து²ல்லனந்தா³ பி⁴க்கு²னீ தேனுபஸங்கமி; உபஸங்கமித்வா து²ல்லனந்த³ங் பி⁴க்கு²னிங் ஏதத³வோச – ‘‘கச்சி, அய்யே, க²மனீயங் கச்சி யாபனீய’’ந்தி? ‘‘ந மே, ஆவுஸோ, க²மனீயங், ந யாபனீய’’ந்தி. ‘‘அமுகஸ்ஸ, அய்யே, ஆபணிகஸ்ஸ க⁴ரே கஹாபணங் நிக்கி²பிஸ்ஸாமி, ததோ யங் இச்செ²ய்யாஸி தங் ஆஹராபெய்யாஸீ’’தி. து²ல்லனந்தா³ பி⁴க்கு²னீ அஞ்ஞதரங் ஸிக்க²மானங் ஆணாபேஸி – ‘‘க³ச்ச², ஸிக்க²மானே, அமுகஸ்ஸ ஆபணிகஸ்ஸ க⁴ரா கஹாபணஸ்ஸ தேலங் ஆஹரா’’தி. அத² கோ² ஸா ஸிக்க²மானா தஸ்ஸ ஆபணிகஸ்ஸ க⁴ரா கஹாபணஸ்ஸ தேலங் ஆஹரித்வா து²ல்லனந்தா³ய பி⁴க்கு²னியா அதா³ஸி. து²ல்லனந்தா³ பி⁴க்கு²னீ ஏவமாஹ – ‘‘ந மே, ஸிக்க²மானே, தேலேன அத்தோ², ஸப்பினா மே அத்தோ²’’தி. அத² கோ² ஸா ஸிக்க²மானா யேன ஸோ ஆபணிகோ தேனுபஸங்கமி; உபஸங்கமித்வா தங் ஆபணிகங் ஏதத³வோச – ‘‘ந கிர, ஆவுஸோ, அய்யாய தேலேன அத்தோ², ஸப்பினா அத்தோ², ஹந்த³ தே தேலங், ஸப்பிங் மே தே³ஹீ’’தி. ‘‘ஸசே மயங், அய்யே, விக்கீதங் ப⁴ண்ட³ங் புன ஆதி³யிஸ்ஸாம, கதா³ அம்ஹாகங் ப⁴ண்ட³ங் விக்காயிஸ்ஸதி! தேலஸ்ஸ கயேன தேலங் ஹடங், ஸப்பிஸ்ஸ கயங் ஆஹர, ஸப்பிங் ஹரிஸ்ஸஸீ’’தி. அத² கோ² ஸா ஸிக்க²மானா ரோத³ந்தீ அட்டா²ஸி. பி⁴க்கு²னியோ தங் ஸிக்க²மானங் ஏதத³வோசுங் – ‘‘கிஸ்ஸ த்வங், ஸிக்க²மானே, ரோத³ஸீ’’தி? அத² கோ² ஸா ஸிக்க²மானா பி⁴க்கு²னீனங் ஏதமத்த²ங் ஆரோசேஸி. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அய்யா து²ல்லனந்தா³ அஞ்ஞங் சேதாபெத்வா அஞ்ஞங் சேதாபெஸ்ஸதீ’’தி…பே॰… ஸச்சங் கிர, பி⁴க்க²வே, து²ல்லனந்தா³ பி⁴க்கு²னீ அஞ்ஞங் சேதாபெத்வா அஞ்ஞங் சேதாபேதீதி 1? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ அஞ்ஞங் சேதாபெத்வா அஞ்ஞங் சேதாபெஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
753. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandā bhikkhunī gilānā hoti. Atha kho aññataro upāsako yena thullanandā bhikkhunī tenupasaṅkami; upasaṅkamitvā thullanandaṃ bhikkhuniṃ etadavoca – ‘‘kacci, ayye, khamanīyaṃ kacci yāpanīya’’nti? ‘‘Na me, āvuso, khamanīyaṃ, na yāpanīya’’nti. ‘‘Amukassa, ayye, āpaṇikassa ghare kahāpaṇaṃ nikkhipissāmi, tato yaṃ iccheyyāsi taṃ āharāpeyyāsī’’ti. Thullanandā bhikkhunī aññataraṃ sikkhamānaṃ āṇāpesi – ‘‘gaccha, sikkhamāne, amukassa āpaṇikassa gharā kahāpaṇassa telaṃ āharā’’ti. Atha kho sā sikkhamānā tassa āpaṇikassa gharā kahāpaṇassa telaṃ āharitvā thullanandāya bhikkhuniyā adāsi. Thullanandā bhikkhunī evamāha – ‘‘na me, sikkhamāne, telena attho, sappinā me attho’’ti. Atha kho sā sikkhamānā yena so āpaṇiko tenupasaṅkami; upasaṅkamitvā taṃ āpaṇikaṃ etadavoca – ‘‘na kira, āvuso, ayyāya telena attho, sappinā attho, handa te telaṃ, sappiṃ me dehī’’ti. ‘‘Sace mayaṃ, ayye, vikkītaṃ bhaṇḍaṃ puna ādiyissāma, kadā amhākaṃ bhaṇḍaṃ vikkāyissati! Telassa kayena telaṃ haṭaṃ, sappissa kayaṃ āhara, sappiṃ harissasī’’ti. Atha kho sā sikkhamānā rodantī aṭṭhāsi. Bhikkhuniyo taṃ sikkhamānaṃ etadavocuṃ – ‘‘kissa tvaṃ, sikkhamāne, rodasī’’ti? Atha kho sā sikkhamānā bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā aññaṃ cetāpetvā aññaṃ cetāpessatī’’ti…pe… saccaṃ kira, bhikkhave, thullanandā bhikkhunī aññaṃ cetāpetvā aññaṃ cetāpetīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī aññaṃ cetāpetvā aññaṃ cetāpessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
754. ‘‘யா பன பி⁴க்கு²னீ அஞ்ஞங் சேதாபெத்வா அஞ்ஞங் சேதாபெய்ய, நிஸ்ஸக்³கி³யங் பாசித்திய’’ந்தி.
754.‘‘Yā pana bhikkhunī aññaṃ cetāpetvā aññaṃ cetāpeyya, nissaggiyaṃ pācittiya’’nti.
755. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
755.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
அஞ்ஞங் சேதாபெத்வாதி யங் கிஞ்சி சேதாபெத்வா.
Aññaṃcetāpetvāti yaṃ kiñci cetāpetvā.
அஞ்ஞங் சேதாபெய்யாதி தங் ட²பெத்வா அஞ்ஞங் சேதாபேதி, பயோகே³ து³க்கடங். படிலாபே⁴ன நிஸ்ஸக்³கி³யங் ஹோதி. நிஸ்ஸஜ்ஜிதப்³ப³ங் ஸங்க⁴ஸ்ஸ வா க³ணஸ்ஸ வா ஏகபி⁴க்கு²னியா வா. ஏவஞ்ச பன, பி⁴க்க²வே, நிஸ்ஸஜ்ஜிதப்³ப³ங்…பே॰… ‘‘இத³ங் மே, அய்யே, அஞ்ஞங் சேதாபெத்வா அஞ்ஞங் சேதாபிதங் நிஸ்ஸக்³கி³யங், இமாஹங் ஸங்க⁴ஸ்ஸ நிஸ்ஸஜ்ஜாமீ’’தி…பே॰… த³தெ³ய்யாதி…பே॰… த³தெ³ய்யுந்தி…பே॰… அய்யாய த³ம்மீதி.
Aññaṃ cetāpeyyāti taṃ ṭhapetvā aññaṃ cetāpeti, payoge dukkaṭaṃ. Paṭilābhena nissaggiyaṃ hoti. Nissajjitabbaṃ saṅghassa vā gaṇassa vā ekabhikkhuniyā vā. Evañca pana, bhikkhave, nissajjitabbaṃ…pe… ‘‘idaṃ me, ayye, aññaṃ cetāpetvā aññaṃ cetāpitaṃ nissaggiyaṃ, imāhaṃ saṅghassa nissajjāmī’’ti…pe… dadeyyāti…pe… dadeyyunti…pe… ayyāya dammīti.
756. அஞ்ஞே அஞ்ஞஸஞ்ஞா அஞ்ஞங் சேதாபேதி, நிஸ்ஸக்³கி³யங் பாசித்தியங். அஞ்ஞே வேமதிகா அஞ்ஞங் சேதாபேதி, நிஸ்ஸக்³கி³யங் பாசித்தியங். அஞ்ஞே அனஞ்ஞஸஞ்ஞா அஞ்ஞங் சேதாபேதி, நிஸ்ஸக்³கி³யங் பாசித்தியங்.
756. Aññe aññasaññā aññaṃ cetāpeti, nissaggiyaṃ pācittiyaṃ. Aññe vematikā aññaṃ cetāpeti, nissaggiyaṃ pācittiyaṃ. Aññe anaññasaññā aññaṃ cetāpeti, nissaggiyaṃ pācittiyaṃ.
அனஞ்ஞே அஞ்ஞஸஞ்ஞா அனஞ்ஞங் சேதாபேதி, ஆபத்தி து³க்கடஸ்ஸ. அனஞ்ஞே வேமதிகா அனஞ்ஞங் சேதாபேதி, ஆபத்தி து³க்கடஸ்ஸ. அனஞ்ஞே அனஞ்ஞஸஞ்ஞா அனாபத்தி.
Anaññe aññasaññā anaññaṃ cetāpeti, āpatti dukkaṭassa. Anaññe vematikā anaññaṃ cetāpeti, āpatti dukkaṭassa. Anaññe anaññasaññā anāpatti.
757. அனாபத்தி தஞ்ஞேவ 3 சேதாபேதி, அஞ்ஞஞ்ச சேதாபேதி, ஆனிஸங்ஸங் த³ஸ்ஸெத்வா சேதாபேதி, உம்மத்திகாய, ஆதி³கம்மிகாயாதி.
757. Anāpatti taññeva 4 cetāpeti, aññañca cetāpeti, ānisaṃsaṃ dassetvā cetāpeti, ummattikāya, ādikammikāyāti.
பஞ்சமஸிக்கா²பத³ங் நிட்டி²தங்.
Pañcamasikkhāpadaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / பஞ்சமனிஸ்ஸக்³கி³யபாசித்தியஸிக்கா²பத³வண்ணனா • Pañcamanissaggiyapācittiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. நிஸ்ஸக்³கி³யகண்ட³ங் (பி⁴க்கு²னீவிப⁴ங்க³வண்ணனா) • 3. Nissaggiyakaṇḍaṃ (bhikkhunīvibhaṅgavaṇṇanā)
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 5. பஞ்சமனிஸ்ஸக்³கி³யபாசித்தியஸிக்கா²பத³வண்ணனா • 5. Pañcamanissaggiyapācittiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. து³தியனிஸ்ஸக்³கி³யாதி³பாசித்தியஸிக்கா²பத³வண்ணனா • 2. Dutiyanissaggiyādipācittiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 5. பஞ்சமனிஸ்ஸக்³கி³யபாசித்தியஸிக்கா²பத³ங் • 5. Pañcamanissaggiyapācittiyasikkhāpadaṃ
