| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
5. பஞ்சமஸிக்கா²பத³ங்
5. Pañcamasikkhāpadaṃ
810. தேன ஸமயேன பு³த்³தோ⁴ ப⁴க³வா ஸக்கேஸு விஹரதி கபிலவத்து²ஸ்மிங் நிக்³ரோதா⁴ராமே. அத² கோ² மஹாபஜாபதி கோ³தமீ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா அதோ⁴வாதே அட்டா²ஸி – ‘‘து³க்³க³ந்தோ⁴, ப⁴க³வா, மாதுகா³மோ’’தி. அத² கோ² ப⁴க³வா – ‘‘ஆதி³யந்து கோ² பி⁴க்கு²னியோ உத³கஸுத்³தி⁴க’’ந்தி, மஹாபஜாபதிங் கோ³தமிங் த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹங்ஸேஸி. அத² கோ² மஹாபஜாபதி கோ³தமீ ப⁴க³வதா த⁴ம்மியா கதா²ய ஸந்த³ஸ்ஸிதா ஸமாத³பிதா ஸமுத்தேஜிதா ஸம்பஹங்ஸிதா ப⁴க³வந்தங் அபி⁴வாதெ³த்வா பத³க்கி²ணங் கத்வா பக்காமி. அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, பி⁴க்கு²னீனங் உத³கஸுத்³தி⁴க’’ந்தி. தேன கோ² பன ஸமயேன அஞ்ஞதரா பி⁴க்கு²னீ – ‘‘ப⁴க³வதா உத³கஸுத்³தி⁴கா அனுஞ்ஞாதா’’தி அதிக³ம்பீ⁴ரங் உத³கஸுத்³தி⁴கங் ஆதி³யந்தீ முத்தகரணே வணங் அகாஸி. அத² கோ² ஸா பி⁴க்கு²னீ பி⁴க்கு²னீனங் ஏதமத்த²ங் ஆரோசேதி. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – கத²ஞ்ஹி நாம பி⁴க்கு²னீ அதிக³ம்பீ⁴ரங் உத³கஸுத்³தி⁴கங் ஆதி³யிஸ்ஸதீதி…பே॰… ஸச்சங் கிர, பி⁴க்க²வே, பி⁴க்கு²னீ அதிக³ம்பீ⁴ரங் உத³கஸுத்³தி⁴கங் ஆதி³யதீ’’தி 1? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, பி⁴க்கு²னீ அதிக³ம்பீ⁴ரங் உத³கஸுத்³தி⁴கங் ஆதி³யிஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
810. Tena samayena buddho bhagavā sakkesu viharati kapilavatthusmiṃ nigrodhārāme. Atha kho mahāpajāpati gotamī yena bhagavā tenupasaṅkami; upasaṅkamitvā bhagavantaṃ abhivādetvā adhovāte aṭṭhāsi – ‘‘duggandho, bhagavā, mātugāmo’’ti. Atha kho bhagavā – ‘‘ādiyantu kho bhikkhuniyo udakasuddhika’’nti, mahāpajāpatiṃ gotamiṃ dhammiyā kathāya sandassesi samādapesi samuttejesi sampahaṃsesi. Atha kho mahāpajāpati gotamī bhagavatā dhammiyā kathāya sandassitā samādapitā samuttejitā sampahaṃsitā bhagavantaṃ abhivādetvā padakkhiṇaṃ katvā pakkāmi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, bhikkhunīnaṃ udakasuddhika’’nti. Tena kho pana samayena aññatarā bhikkhunī – ‘‘bhagavatā udakasuddhikā anuññātā’’ti atigambhīraṃ udakasuddhikaṃ ādiyantī muttakaraṇe vaṇaṃ akāsi. Atha kho sā bhikkhunī bhikkhunīnaṃ etamatthaṃ āroceti. Yā tā bhikkhuniyo appicchā…pe… tā ujjhāyanti khiyyanti vipācenti – kathañhi nāma bhikkhunī atigambhīraṃ udakasuddhikaṃ ādiyissatīti…pe… saccaṃ kira, bhikkhave, bhikkhunī atigambhīraṃ udakasuddhikaṃ ādiyatī’’ti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhunī atigambhīraṃ udakasuddhikaṃ ādiyissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
811. ‘‘உத³கஸுத்³தி⁴கங் பன பி⁴க்கு²னியா ஆதி³யமானாய த்³வங்கு³லபப்³ப³பரமங் ஆதா³தப்³ப³ங். தங் அதிக்காமெந்தியா பாசித்திய’’ந்தி.
811.‘‘Udakasuddhikaṃ pana bhikkhuniyā ādiyamānāya dvaṅgulapabbaparamaṃ ādātabbaṃ. Taṃ atikkāmentiyā pācittiya’’nti.
812. உத³கஸுத்³தி⁴கங் நாம முத்தகரணஸ்ஸ தோ⁴வனா வுச்சதி.
812.Udakasuddhikaṃ nāma muttakaraṇassa dhovanā vuccati.
ஆதி³யமானாயாதி தோ⁴வந்தியா.
Ādiyamānāyāti dhovantiyā.
த்³வங்கு³லபப்³ப³பரமங் ஆதா³தப்³ப³ந்தி த்³வீஸு அங்கு³லேஸு த்³வே பப்³ப³பரமா ஆதா³தப்³பா³.
Dvaṅgulapabbaparamaṃ ādātabbanti dvīsu aṅgulesu dve pabbaparamā ādātabbā.
தங் அதிக்காமெந்தியாதி ஸம்ப²ஸ்ஸங் ஸாதி³யந்தீ அந்தமஸோ கேஸக்³க³மத்தம்பி அதிக்காமேதி, ஆபத்தி பாசித்தியஸ்ஸ.
Taṃ atikkāmentiyāti samphassaṃ sādiyantī antamaso kesaggamattampi atikkāmeti, āpatti pācittiyassa.
813. அதிரேகத்³வங்கு³லபப்³பே³ அதிரேகஸஞ்ஞா ஆதி³யதி, ஆபத்தி பாசித்தியஸ்ஸ. அதிரேகத்³வங்கு³லபப்³பே³ வேமதிகா ஆதி³யதி, ஆபத்தி பாசித்தியஸ்ஸ . அதிரேகத்³வங்கு³லபப்³பே³ ஊனகஸஞ்ஞா ஆதி³யதி, ஆபத்தி பாசித்தியஸ்ஸ .
813. Atirekadvaṅgulapabbe atirekasaññā ādiyati, āpatti pācittiyassa. Atirekadvaṅgulapabbe vematikā ādiyati, āpatti pācittiyassa . Atirekadvaṅgulapabbe ūnakasaññā ādiyati, āpatti pācittiyassa .
ஊனகத்³வங்கு³லபப்³பே³ அதிரேகஸஞ்ஞா, ஆபத்தி து³க்கடஸ்ஸ. ஊனகத்³வங்கு³லபப்³பே³ வேமதிகா, ஆபத்தி து³க்கடஸ்ஸ. ஊனகத்³வங்கு³லபப்³பே³ ஊனகஸஞ்ஞா, அனாபத்தி.
Ūnakadvaṅgulapabbe atirekasaññā, āpatti dukkaṭassa. Ūnakadvaṅgulapabbe vematikā, āpatti dukkaṭassa. Ūnakadvaṅgulapabbe ūnakasaññā, anāpatti.
814. அனாபத்தி த்³வங்கு³லபப்³ப³பரமங் ஆதி³யதி, ஊனகத்³வங்கு³லபப்³ப³பரமங் ஆதி³யதி, ஆபா³த⁴பச்சயா, உம்மத்திகாய, ஆதி³கம்மிகாயாதி.
814. Anāpatti dvaṅgulapabbaparamaṃ ādiyati, ūnakadvaṅgulapabbaparamaṃ ādiyati, ābādhapaccayā, ummattikāya, ādikammikāyāti.
பஞ்சமஸிக்கா²பத³ங் நிட்டி²தங்.
Pañcamasikkhāpadaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 5. பஞ்சமஸிக்கா²பத³வண்ணனா • 5. Pañcamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 1. லஸுணவக்³க³வண்ணனா • 1. Lasuṇavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 5. பஞ்சமஸிக்கா²பத³வண்ணனா • 5. Pañcamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மலஸுணாதி³ஸிக்கா²பத³வண்ணனா • 1. Paṭhamalasuṇādisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 5. பஞ்சமஸிக்கா²பத³ங் • 5. Pañcamasikkhāpadaṃ
