| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
5. பஞ்சமஸிக்கா²பத³ங்
5. Pañcamasikkhāpadaṃ
950. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ப⁴த்³தா³ காபிலானீ ஸாகேதே வஸ்ஸங் உபக³தா ஹோதி. ஸா கேனசிதே³வ கரணீயேன உப்³பா³ள்ஹா து²ல்லனந்தா³ய பி⁴க்கு²னியா ஸந்திகே தூ³தங் பாஹேஸி – ‘‘ஸசே மே அய்யா து²ல்லனந்தா³ உபஸ்ஸயங் த³தெ³ய்ய ஆக³ச்செ²ய்யாமஹங் ஸாவத்தி²’’ந்தி. து²ல்லனந்தா³ பி⁴க்கு²னீ ஏவமாஹ – ‘‘ஆக³ச்ச²து, த³ஸ்ஸாமீ’’தி. அத² கோ² ப⁴த்³தா³ காபிலானீ ஸாகேதா ஸாவத்தி²ங் அக³மாஸி. து²ல்லனந்தா³ பி⁴க்கு²னீ ப⁴த்³தா³ய காபிலானியா உபஸ்ஸயங் அதா³ஸி. தேன கோ² பன ஸமயேன து²ல்லனந்தா³ பி⁴க்கு²னீ ப³ஹுஸ்ஸுதா ஹோதி பா⁴ணிகா விஸாரதா³ பட்டா த⁴ம்மிங் கத²ங் காதுங். ப⁴த்³தா³பி காபிலானீ ப³ஹுஸ்ஸுதா 1 ஹோதி பா⁴ணிகா விஸாரதா³ பட்டா த⁴ம்மிங் கத²ங் காதுங் உளாரஸம்பா⁴விதா. மனுஸ்ஸா – ‘‘அய்யா ப⁴த்³தா³ காபிலானீ ப³ஹுஸ்ஸுதா பா⁴ணிகா விஸாரதா³ பட்டா த⁴ம்மிங் கத²ங் காதுங் உளாரஸம்பா⁴விதா’’தி ப⁴த்³த³ங் காபிலானிங் பட²மங் பயிருபாஸித்வா பச்சா² து²ல்லனந்த³ங் பி⁴க்கு²னிங் பயிருபாஸந்தி. து²ல்லனந்தா³ பி⁴க்கு²னீ இஸ்ஸாபகதா – ‘‘இமா கிர அப்பிச்சா² ஸந்துட்டா² பவிவித்தா அஸங்ஸட்டா² யா இமா ஸஞ்ஞத்திப³ஹுலா விஞ்ஞத்திப³ஹுலா விஹரந்தீ’’தி குபிதா அனத்தமனா ப⁴த்³த³ங் காபிலானிங் உபஸ்ஸயா நிக்கட்³டி⁴. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அய்யா து²ல்லனந்தா³ அய்யாய ப⁴த்³தா³ய காபிலானியா உபஸ்ஸயங் த³த்வா குபிதா அனத்தமனா நிக்கட்³டி⁴ஸ்ஸதீ’’தி…பே॰… ஸச்சங் கிர, பி⁴க்க²வே, து²ல்லனந்தா³ பி⁴க்கு²னீ ப⁴த்³தா³ய காபிலானியா உபஸ்ஸயங் த³த்வா குபிதா அனத்தமனா நிக்கட்³ட⁴தீதி 2? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ ப⁴த்³தா³ய காபிலானியா உபஸ்ஸயங் த³த்வா குபிதா அனத்தமனா நிக்கட்³டி⁴ஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
950. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhaddā kāpilānī sākete vassaṃ upagatā hoti. Sā kenacideva karaṇīyena ubbāḷhā thullanandāya bhikkhuniyā santike dūtaṃ pāhesi – ‘‘sace me ayyā thullanandā upassayaṃ dadeyya āgaccheyyāmahaṃ sāvatthi’’nti. Thullanandā bhikkhunī evamāha – ‘‘āgacchatu, dassāmī’’ti. Atha kho bhaddā kāpilānī sāketā sāvatthiṃ agamāsi. Thullanandā bhikkhunī bhaddāya kāpilāniyā upassayaṃ adāsi. Tena kho pana samayena thullanandā bhikkhunī bahussutā hoti bhāṇikā visāradā paṭṭā dhammiṃ kathaṃ kātuṃ. Bhaddāpi kāpilānī bahussutā 3 hoti bhāṇikā visāradā paṭṭā dhammiṃ kathaṃ kātuṃ uḷārasambhāvitā. Manussā – ‘‘ayyā bhaddā kāpilānī bahussutā bhāṇikā visāradā paṭṭā dhammiṃ kathaṃ kātuṃ uḷārasambhāvitā’’ti bhaddaṃ kāpilāniṃ paṭhamaṃ payirupāsitvā pacchā thullanandaṃ bhikkhuniṃ payirupāsanti. Thullanandā bhikkhunī issāpakatā – ‘‘imā kira appicchā santuṭṭhā pavivittā asaṃsaṭṭhā yā imā saññattibahulā viññattibahulā viharantī’’ti kupitā anattamanā bhaddaṃ kāpilāniṃ upassayā nikkaḍḍhi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā ayyāya bhaddāya kāpilāniyā upassayaṃ datvā kupitā anattamanā nikkaḍḍhissatī’’ti…pe… saccaṃ kira, bhikkhave, thullanandā bhikkhunī bhaddāya kāpilāniyā upassayaṃ datvā kupitā anattamanā nikkaḍḍhatīti 4? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī bhaddāya kāpilāniyā upassayaṃ datvā kupitā anattamanā nikkaḍḍhissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
951. ‘‘யா பன பி⁴க்கு²னீ பி⁴க்கு²னியா உபஸ்ஸயங் த³த்வா குபிதா அனத்தமனா நிக்கட்³டெ⁴ய்ய வா நிக்கட்³டா⁴பெய்ய வா, பாசித்திய’’ந்தி.
951.‘‘Yā pana bhikkhunī bhikkhuniyā upassayaṃ datvā kupitā anattamanā nikkaḍḍheyya vā nikkaḍḍhāpeyya vā, pācittiya’’nti.
952. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
952.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
பி⁴க்கு²னியாதி அஞ்ஞாய பி⁴க்கு²னியா. உபஸ்ஸயோ நாம கவாடப³த்³தோ⁴ வுச்சதி. த³த்வாதி ஸயங் த³த்வா. குபிதா அனத்தமனாதி அனபி⁴ரத்³தா⁴ ஆஹதசித்தா கி²லஜாதா.
Bhikkhuniyāti aññāya bhikkhuniyā. Upassayo nāma kavāṭabaddho vuccati. Datvāti sayaṃ datvā. Kupitā anattamanāti anabhiraddhā āhatacittā khilajātā.
நிக்கட்³டெ⁴ய்யாதி க³ப்³பே⁴ க³ஹெத்வா பமுக²ங் நிக்கட்³ட⁴தி, ஆபத்தி பாசித்தியஸ்ஸ. பமுகே² க³ஹெத்வா ப³ஹி நிக்கட்³ட⁴தி, ஆபத்தி பாசித்தியஸ்ஸ. ஏகேன பயோகே³ன ப³ஹுகேபி த்³வாரே அதிக்காமேதி, ஆபத்தி பாசித்தியஸ்ஸ.
Nikkaḍḍheyyāti gabbhe gahetvā pamukhaṃ nikkaḍḍhati, āpatti pācittiyassa. Pamukhe gahetvā bahi nikkaḍḍhati, āpatti pācittiyassa. Ekena payogena bahukepi dvāre atikkāmeti, āpatti pācittiyassa.
நிக்கட்³டா⁴பெய்யாதி அஞ்ஞங் ஆணாபேதி, ஆபத்தி பாசித்தியஸ்ஸ 5. ஸகிங் ஆணத்தா ப³ஹுகேபி த்³வாரே அதிக்காமேதி, ஆபத்தி பாசித்தியஸ்ஸ.
Nikkaḍḍhāpeyyāti aññaṃ āṇāpeti, āpatti pācittiyassa 6. Sakiṃ āṇattā bahukepi dvāre atikkāmeti, āpatti pācittiyassa.
953. உபஸம்பன்னாய உபஸம்பன்னஸஞ்ஞா உபஸ்ஸயங் த³த்வா குபிதா அனத்தமனா நிக்கட்³ட⁴தி வா நிக்கட்³டா⁴பேதி வா, ஆபத்தி பாசித்தியஸ்ஸ. உபஸம்பன்னாய வேமதிகா உபஸ்ஸயங் த³த்வா குபிதா அனத்தமனா நிக்கட்³ட⁴தி வா நிக்கட்³டா⁴பேதி வா, ஆபத்தி பாசித்தியஸ்ஸ. உபஸம்பன்னாய அனுபஸம்பன்னஸஞ்ஞா உபஸ்ஸயங் த³த்வா குபிதா அனத்தமனா நிக்கட்³ட⁴தி வா நிக்கட்³டா⁴பேதி வா, ஆபத்தி பாசித்தியஸ்ஸ.
953. Upasampannāya upasampannasaññā upassayaṃ datvā kupitā anattamanā nikkaḍḍhati vā nikkaḍḍhāpeti vā, āpatti pācittiyassa. Upasampannāya vematikā upassayaṃ datvā kupitā anattamanā nikkaḍḍhati vā nikkaḍḍhāpeti vā, āpatti pācittiyassa. Upasampannāya anupasampannasaññā upassayaṃ datvā kupitā anattamanā nikkaḍḍhati vā nikkaḍḍhāpeti vā, āpatti pācittiyassa.
தஸ்ஸா பரிக்கா²ரங் நிக்கட்³ட⁴தி வா நிக்கட்³டா⁴பேதி வா, ஆபத்தி து³க்கடஸ்ஸ. அகவாடப³த்³தா⁴ நிக்கட்³ட⁴தி வா நிக்கட்³டா⁴பேதி வா, ஆபத்தி து³க்கடஸ்ஸ. தஸ்ஸா பரிக்கா²ரங் நிக்கட்³ட⁴தி வா நிக்கட்³டா⁴பேதி வா, ஆபத்தி து³க்கடஸ்ஸ. அனுபஸம்பன்னங் கவாடப³த்³தா⁴ வா அகவாடப³த்³தா⁴ வா நிக்கட்³ட⁴தி வா நிக்கட்³டா⁴பேதி வா, ஆபத்தி து³க்கடஸ்ஸ. தஸ்ஸா பரிக்கா²ரங் நிக்கட்³ட⁴தி வா நிக்கட்³டா⁴பேதி வா, ஆபத்தி து³க்கடஸ்ஸ. அனுபஸம்பன்னாய உபஸம்பன்னஸஞ்ஞா, ஆபத்தி து³க்கடஸ்ஸ. அனுபஸம்பன்னாய வேமதிகா, ஆபத்தி து³க்கடஸ்ஸ. அனுபஸம்பன்னாய அனுபஸம்பன்னஸஞ்ஞா, ஆபத்தி து³க்கடஸ்ஸ.
Tassā parikkhāraṃ nikkaḍḍhati vā nikkaḍḍhāpeti vā, āpatti dukkaṭassa. Akavāṭabaddhā nikkaḍḍhati vā nikkaḍḍhāpeti vā, āpatti dukkaṭassa. Tassā parikkhāraṃ nikkaḍḍhati vā nikkaḍḍhāpeti vā, āpatti dukkaṭassa. Anupasampannaṃ kavāṭabaddhā vā akavāṭabaddhā vā nikkaḍḍhati vā nikkaḍḍhāpeti vā, āpatti dukkaṭassa. Tassā parikkhāraṃ nikkaḍḍhati vā nikkaḍḍhāpeti vā, āpatti dukkaṭassa. Anupasampannāya upasampannasaññā, āpatti dukkaṭassa. Anupasampannāya vematikā, āpatti dukkaṭassa. Anupasampannāya anupasampannasaññā, āpatti dukkaṭassa.
954. அனாபத்தி அலஜ்ஜினிங் நிக்கட்³ட⁴தி வா நிக்கட்³டா⁴பேதி வா, தஸ்ஸா பரிக்கா²ரங் நிக்கட்³ட⁴தி வா நிக்கட்³டா⁴பேதி வா, உம்மத்திகங் நிக்கட்³ட⁴தி வா நிக்கட்³டா⁴பேதி வா, தஸ்ஸா பரிக்கா²ரங் நிக்கட்³ட⁴தி வா நிக்கட்³டா⁴பேதி வா, ப⁴ண்ட³னகாரிகங் கலஹகாரிகங் விவாத³காரிகங் ப⁴ஸ்ஸகாரிகங் ஸங்கே⁴ அதி⁴கரணகாரிகங் நிக்கட்³ட⁴தி வா நிக்கட்³டா⁴பேதி வா, தஸ்ஸா பரிக்கா²ரங் நிக்கட்³ட⁴தி வா நிக்கட்³டா⁴பேதி வா, அந்தேவாஸினிங் வா ஸத்³தி⁴விஹாரினிங் வா ந ஸம்மா வத்தந்திங் நிக்கட்³ட⁴தி வா நிக்கட்³டா⁴பேதி வா, தஸ்ஸா பரிக்கா²ரங் நிக்கட்³ட⁴தி வா நிக்கட்³டா⁴பேதி வா, உம்மத்திகாய, ஆதி³கம்மிகாயாதி.
954. Anāpatti alajjiniṃ nikkaḍḍhati vā nikkaḍḍhāpeti vā, tassā parikkhāraṃ nikkaḍḍhati vā nikkaḍḍhāpeti vā, ummattikaṃ nikkaḍḍhati vā nikkaḍḍhāpeti vā, tassā parikkhāraṃ nikkaḍḍhati vā nikkaḍḍhāpeti vā, bhaṇḍanakārikaṃ kalahakārikaṃ vivādakārikaṃ bhassakārikaṃ saṅghe adhikaraṇakārikaṃ nikkaḍḍhati vā nikkaḍḍhāpeti vā, tassā parikkhāraṃ nikkaḍḍhati vā nikkaḍḍhāpeti vā, antevāsiniṃ vā saddhivihāriniṃ vā na sammā vattantiṃ nikkaḍḍhati vā nikkaḍḍhāpeti vā, tassā parikkhāraṃ nikkaḍḍhati vā nikkaḍḍhāpeti vā, ummattikāya, ādikammikāyāti.
பஞ்சமஸிக்கா²பத³ங் நிட்டி²தங்.
Pañcamasikkhāpadaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 5. பஞ்சமஸிக்கா²பத³வண்ணனா • 5. Pañcamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 3. ததியஸிக்கா²பத³வண்ணனா • 3. Tatiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 5. பஞ்சமஸிக்கா²பத³ங் • 5. Pañcamasikkhāpadaṃ
