| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
5. பஞ்சமஸிக்கா²பத³ங்
5. Pañcamasikkhāpadaṃ
994. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரா பி⁴க்கு²னீ து²ல்லனந்த³ங் பி⁴க்கு²னிங் உபஸங்கமித்வா ஏதத³வோச – ‘‘ஏஹாய்யே, இமங் அதி⁴கரணங் வூபஸமேஹீ’’தி. து²ல்லனந்தா³ பி⁴க்கு²னீ ‘ஸாதூ⁴’தி படிஸ்ஸுணித்வா நேவ வூபஸமேதி ந வூபஸமாய உஸ்ஸுக்கங் கரோதி. அத² கோ² ஸா பி⁴க்கு²னீ பி⁴க்கு²னீனங் ஏதமத்த²ங் ஆரோசேஸி. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அய்யா து²ல்லனந்தா³ பி⁴க்கு²னியா – ‘ஏஹாய்யே’, இமங் அதி⁴கரணங் வூபஸமேஹீ’தி வுச்சமானா – ‘ஸாதூ⁴’தி படிஸ்ஸுணித்வா, நேவ வூபஸமெஸ்ஸதி ந வூபஸமாய உஸ்ஸுக்கங் கரிஸ்ஸதீ’’தி…பே॰… ஸச்சங் கிர, பி⁴க்க²வே, து²ல்லனந்தா³ பி⁴க்கு²னீ பி⁴க்கு²னியா – ‘‘ஏஹாய்யே, இமங் அதி⁴கரணங் வூபஸமேஹீ’’தி வுச்சமானா – ‘‘ஸாதூ⁴’’தி படிஸ்ஸுணித்வா, நேவ வூபஸமேதி ந வூபஸமாய உஸ்ஸுக்கங் கரோதீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ பி⁴க்கு²னியா – ‘‘ஏஹாய்யே, இமங் அதி⁴கரணங் வூபஸமேஹீ’’தி வுச்சமானா – ‘‘ஸாதூ⁴’’தி படிஸ்ஸுணித்வா, நேவ வூபஸமெஸ்ஸதி ந வூபஸமாய உஸ்ஸுக்கங் கரிஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
994. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarā bhikkhunī thullanandaṃ bhikkhuniṃ upasaṅkamitvā etadavoca – ‘‘ehāyye, imaṃ adhikaraṇaṃ vūpasamehī’’ti. Thullanandā bhikkhunī ‘sādhū’ti paṭissuṇitvā neva vūpasameti na vūpasamāya ussukkaṃ karoti. Atha kho sā bhikkhunī bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā bhikkhuniyā – ‘ehāyye’, imaṃ adhikaraṇaṃ vūpasamehī’ti vuccamānā – ‘sādhū’ti paṭissuṇitvā, neva vūpasamessati na vūpasamāya ussukkaṃ karissatī’’ti…pe… saccaṃ kira, bhikkhave, thullanandā bhikkhunī bhikkhuniyā – ‘‘ehāyye, imaṃ adhikaraṇaṃ vūpasamehī’’ti vuccamānā – ‘‘sādhū’’ti paṭissuṇitvā, neva vūpasameti na vūpasamāya ussukkaṃ karotīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī bhikkhuniyā – ‘‘ehāyye, imaṃ adhikaraṇaṃ vūpasamehī’’ti vuccamānā – ‘‘sādhū’’ti paṭissuṇitvā, neva vūpasamessati na vūpasamāya ussukkaṃ karissati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
995. ‘‘யா பன பி⁴க்கு²னீ பி⁴க்கு²னியா – ‘ஏஹாய்யே, இமங் அதி⁴கரணங் வூபஸமேஹீ’தி வுச்சமானா – ‘ஸாதூ⁴’தி படிஸ்ஸுணித்வா ஸா பச்சா² அனந்தராயிகினீ நேவ வூபஸமெய்ய ந வூபஸமாய உஸ்ஸுக்கங் கரெய்ய, பாசித்திய’’ந்தி.
995.‘‘Yā pana bhikkhunī bhikkhuniyā – ‘ehāyye, imaṃ adhikaraṇaṃ vūpasamehī’ti vuccamānā – ‘sādhū’ti paṭissuṇitvā sā pacchā anantarāyikinī neva vūpasameyya na vūpasamāya ussukkaṃ kareyya, pācittiya’’nti.
996. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
996.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
பி⁴க்கு²னியாதி அஞ்ஞாய பி⁴க்கு²னியா.
Bhikkhuniyāti aññāya bhikkhuniyā.
அதி⁴கரணங் நாம சத்தாரி அதி⁴கரணானி – விவாதா³தி⁴கரணங், அனுவாதா³தி⁴கரணங், ஆபத்தாதி⁴கரணங், கிச்சாதி⁴கரணங்.
Adhikaraṇaṃ nāma cattāri adhikaraṇāni – vivādādhikaraṇaṃ, anuvādādhikaraṇaṃ, āpattādhikaraṇaṃ, kiccādhikaraṇaṃ.
ஏஹாய்யே இமங் அதி⁴கரணங் வூபஸமேஹீதி ஏஹாய்யே இமங் அதி⁴கரணங் வினிச்சே²ஹி.
Ehāyye imaṃ adhikaraṇaṃ vūpasamehīti ehāyye imaṃ adhikaraṇaṃ vinicchehi.
ஸா பச்சா² அனந்தராயிகினீதி அஸதி அந்தராயே.
Sāpacchā anantarāyikinīti asati antarāye.
நேவ வூபஸமெய்யாதி ந ஸயங் வூபஸமெய்ய.
Neva vūpasameyyāti na sayaṃ vūpasameyya.
ந வூபஸமாய உஸ்ஸுக்கங் கரெய்யாதி ந அஞ்ஞங் ஆணாபெய்ய. ‘‘நேவ வூபஸமெஸ்ஸாமி ந வூபஸமாய உஸ்ஸுக்கங் கரிஸ்ஸாமீ’’தி து⁴ரங் நிக்கி²த்தமத்தே, ஆபத்தி பாசித்தியஸ்ஸ.
Na vūpasamāya ussukkaṃ kareyyāti na aññaṃ āṇāpeyya. ‘‘Neva vūpasamessāmi na vūpasamāya ussukkaṃ karissāmī’’ti dhuraṃ nikkhittamatte, āpatti pācittiyassa.
997. உபஸம்பன்னாய உபஸம்பன்னஸஞ்ஞா அதி⁴கரணங் நேவ வூபஸமேதி ந வூபஸமாய உஸ்ஸுக்கங் கரோதி, ஆபத்தி பாசித்தியஸ்ஸ. உபஸம்பன்னாய வேமதிகா அதி⁴கரணங் நேவ வூபஸமேதி, ந வூபஸமாய உஸ்ஸுக்கங் கரோதி, ஆபத்தி பாசித்தியஸ்ஸ. உபஸம்பன்னாய அனுபஸம்பன்னஸஞ்ஞா அதி⁴கரணங் நேவ வூபஸமேதி, ந வூபஸமாய உஸ்ஸுக்கங் கரோதி, ஆபத்தி பாசித்தியஸ்ஸ.
997. Upasampannāya upasampannasaññā adhikaraṇaṃ neva vūpasameti na vūpasamāya ussukkaṃ karoti, āpatti pācittiyassa. Upasampannāya vematikā adhikaraṇaṃ neva vūpasameti, na vūpasamāya ussukkaṃ karoti, āpatti pācittiyassa. Upasampannāya anupasampannasaññā adhikaraṇaṃ neva vūpasameti, na vūpasamāya ussukkaṃ karoti, āpatti pācittiyassa.
அனுபஸம்பன்னாய அதி⁴கரணங் நேவ வூபஸமேதி, ந வூபஸமாய உஸ்ஸுக்கங் கரோதி, ஆபத்தி து³க்கடஸ்ஸ. அனுபஸம்பன்னாய உபஸம்பன்னஸஞ்ஞா, ஆபத்தி து³க்கடஸ்ஸ. அனுபஸம்பன்னாய வேமதிகா, ஆபத்தி து³க்கடஸ்ஸ. அனுபஸம்பன்னாய அனுபஸம்பன்னஸஞ்ஞா, ஆபத்தி து³க்கடஸ்ஸ.
Anupasampannāya adhikaraṇaṃ neva vūpasameti, na vūpasamāya ussukkaṃ karoti, āpatti dukkaṭassa. Anupasampannāya upasampannasaññā, āpatti dukkaṭassa. Anupasampannāya vematikā, āpatti dukkaṭassa. Anupasampannāya anupasampannasaññā, āpatti dukkaṭassa.
998. அனாபத்தி ஸதி அந்தராயே, பரியேஸித்வா ந லப⁴தி, கி³லானாய, ஆபதா³ஸு, உம்மத்திகாய, ஆதி³கம்மிகாயாதி.
998. Anāpatti sati antarāye, pariyesitvā na labhati, gilānāya, āpadāsu, ummattikāya, ādikammikāyāti.
பஞ்சமஸிக்கா²பத³ங் நிட்டி²தங்.
Pañcamasikkhāpadaṃ niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 5. பஞ்சமஸிக்கா²பத³வண்ணனா • 5. Pañcamasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 4. சதுத்த²ஸிக்கா²பத³வண்ணனா • 4. Catutthasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 5. பஞ்சமஸிக்கா²பத³ங் • 5. Pañcamasikkhāpadaṃ
