5. பஞ்சமஸிக்கா²பத³ங்

810. பஞ்சமே ‘‘அதிக³ம்பீ⁴ர’’ந்திபத³ங் கிரியாவிஸேஸனந்தி ஆஹ ‘‘அதிஅந்தோ பவேஸெத்வா’’தி. ‘‘உத³கேன தோ⁴வனங் குருமானா’’தி இமினா ‘‘உத³கஸுத்³தி⁴க’’ந்திபத³ஸ்ஸ உத³கேன ஸுத்³தி⁴யா கரணந்தி அத்த²ங் த³ஸ்ஸேதி.

812. த்³வங்கு³லபப்³ப³பரமந்தி எத்த² த்³வே அங்கு³லானி ச த்³வே பப்³பா³னி ச த்³வங்கு³லபப்³ப³ங், உத்தரபதே³ புப்³ப³பத³லோபோ. த்³வங்கு³லபப்³ப³ங் பரமங் பமாணங் ஏதஸ்ஸ உத³கஸுத்³தி⁴கஸ்ஸாதி த்³வங்கு³லபப்³ப³பரமங். வித்தா²ரதோ த்³வங்கு³லபரமங், க³ம்பீ⁴ரதோ த்³விபப்³ப³பரமந்தி வுத்தங் ஹோதி. தேனாஹ ‘‘வித்தா²ரதோ’’திஆதி³. அங்கு³லங் பவேஸெந்தியாதி ஸம்ப³ந்தோ⁴. ஹீதி ஸச்சங். ‘‘சதுன்னங் வா’’தி இத³ங் உக்கட்ட²வஸேன வுத்தங், திண்ணம்பி பப்³ப³ங் ந வட்டதி, சதுன்னங் பன பகே³வாதி அத்தோ²தி. பஞ்சமங்.